* ZYA General Headquaters a President T Goukhomang in ZYA Tuivel Block hong.
* Kangkap khua in Gospel Centenary lawm ding.
* CHC, PHC leh PHSC Managing Committee in Meeting neiding.
* World Disability Day zatna ah Gangnam Style Dance Competition leh Stand-Up Comedy Competition om ding.
* Medical Grade-IV Association Churachandpur in, a member pih uh T Sinkhothang gaalna in Sum pia.
* BSEM saina in Imphal ah TET Exam om ding.
* World Aids Day zatna ding tawh kisai in District Aids Prevention and Control Committee leh Media te'n Interaction neiding.
* L Canaan khua ah Samte Unau Thuphatawina Programme om ding.
Tanchin Kimzaw:
Zomi Youth Association (ZYA) General Headquaters in zan sunnung dak 1 in Maukot khua ah ZYA Tuivel Block hong uhi. Hiai hun ah T Goukhomang President ZYA General Headquaters in ZYA Tuivel Block hong in makai thak dingte kichiamsak ngal hi. ZYA Tuivel Block 2012 akipan 2015 sung vaipua a President ding in T Ginzamang telching in om hi. Vice-President ding in G Thangbiaklian, Assistant Secretary ding in Haudoulian,Tresurer ding in Ginsuanthang, Finance Secretary ding in Thangpi Guite leh Information Secretary ding in Lamkhansiam telching in om uhi. ZYA Tuivel Block sung ah khua 7 omlel a, maban ah khaw 2 lakbeh ding uhi.
Singngat Sub-Division sung Kangkap khua a Tangthupha a tungnung kum 100 chinna Gospel Centenary lopna Kangkap khua ah, December 11 akipan 13, 2012 sung in thupitak in neihsawm uhi. Huai hun ah "Tangthupha gahsuah te-Khalam ki-siamthakna, Lungsimlam ki-siamthakna, Khotang hinkhua kisiamthakna, Ki-ukna leh nekzonna ki-siamthakna" chih thupi pansan in Damkhothang Lecturer Grace Bible College, Rev. M Gousuan City Pastor Guwahati, Rev. K Mangte Principal Grace Bible College leh Rev. T Kamzakham in thugen ding uhi. December 11, 2012 nitak dak 5 in Pastor Suanmung Local Pastor EBCC Kangkap in Tangthupha kum 100 chin lopna hun hong ding a, December 12, 2012 in Rev. ST. Jamkhanthang in Gospel Centenary sung hong ding a, Rev. H Vungzalian in Gospel Centenary Souvenir hong ding hi. Hiai hun ah Kangkap khawsuak Pastor leh Upa omkha teng in Gospel Centenary Dakpi tumding ua, Gospel Centenary Cultural Troupe in Musical Bamboo Dance lakding uhi.
Churachandpur District sung a Community Health Centre (CHC), Primary Health Centre (PHC) leh Primary Health Sub-Centre (PHSC) Managing Committee in November 29, 2012 sunma dak 10 in DC Office a BRGF resource centre ah meeting neiding uhi. Huai hun ah, CHC, PHC leh PHSC Management Society a Chairperson/ khaw hausa leh secretary ban ah CHC leh PHC a Medical Officer Incharge leh PHSC a ANM Incharge te telding ua, National Rural Health Mission (NRHM) nuai a Programme tuamtuam omte tawh kisai leh Health Institution te function dan ban ah thu poimoh tuamtuam genkhawm ding uhi.
Nehru Yuva Kendra Churachandpur, Churachandpur District Disabled Union, Liliane/Diocesan Social Service Society leh Centre for Community Initiative pangkhawm in Lalpuithluaii Foundation School huangsung a, The Malsawm Initiative ah "Removing Barriers to Creat an Inclusive and Accessible for all" chih pansan in World Disability Day 2012 kizang ding hi. December 1, 2012 sun dak 12 in Observance of World Disability Day 2012 honna om ding a, huai ah regular student class-XII tan te ading in Gangnam Style Dance Competition om ding hi. Huaiban ah Craft Exhibition leh The Malsawm Initiative kipatkhiak nileng kizang ngal ding hi. December 2, 2012 sunnung dak 1 in minautang te teltheihna ding in Stand-Up Comedy Competition leh Craft Exhibition om nawn ding hi. December 3, 2012 sunnung dak 1 in World Disability Day nipi ni kizang ding a, huai ah, khanvual phalou te'n amau hihtheihna lam chiat show ding uhi. Category nih in kikhen ding a, Category khatna ah kum 15 nuailam te hiding a,Category nihna ah kum 15 tunglam te hiding hi. Huaiban ah kum paisa a World Disability Day kizatna etthak hiding a, World Disability Day 2012 thuchiam bawlna leh kipahman piakkhiakna om ding hi.
Medical Grade-IV Association Churachandpur in kiginni a Si a zan akivui T Sinkhothang of Bungmual gaal in Association min in galna sum sing 1 pia uhi.
Board of Secondary Education Manipur (BSEM) saina in zingchiang in Imphal a exam school tuamtuam ah Teachers Eligibility Test om ding hi.
District Aids Prevention and Control Committee saina in December 1, 2012 in " Getting Zero" an Working Together for HIV/AIDS Free Generation" chih pansan in World Aids Day kizang ding hi. Hiai ding tawh kisai in zingchiang sunma dak 11 in Chief Medical Office Conference Hall ah District Aids Prevention and Control Committee makaih in Media te tawh Interaction om ding hi. Huai hun ah Dr. T Ngngkhanmang District Aids Control Officer in vaidawnna thugen ding a, DAPCU, PPO Churachandpur, MVS, LRRC, Link Workers Scheme, EHA-Church Based Organisation, SHALOM, MSF, CPPC, MNP+, DSSS, ART Centre, ICTC Centre leh STI-STD Centre apan presentation om ding hi.
Samte Phungpi Organisation saina in zingchiang in Singngat Sub-Division sung L Canaan khua ah Samte Unau Thuphatawina Programme om ding hi. Hiai ding tawh kisai in zingchiang zinglam dak 5:30 in S Tualchinkham President Samte Phungpi Organisation tenna inn Tedim road ah Bus leh Gari tuamtuam kidoh ding a, bahara omlou a Samte Unau innkuan te tuang chiat ding in S Siampu Information Secretary Samte Phungpi Organisation in ngetna leh theihsakna bawl.
GAMDANG THU
Tuni Mumbai a 26/11 attack huaisetak tungni ahihtawh kiton in huai thiltung a sikha te nutsiat innkuan te'n tuni'n sunna hunzang uhi. Mumbai 26/11 attack ah mi 164 si in, Union Home Ministry in thiltung om nung sawtlou in misi te kinaihpih pen te kiang a compensation lakh 3 chiat piak ding in thupuan bawl mahleh kum 4 painung in tunitan in innkuan 76 in Union Home Ministry apan compensation sum lakh 3 mupan ua, adang innkuan 88 in tutan in compensation munailou uhi. Mumbai 26/11 terror attack ah mi 164 si in midang 250 liam ua, misi te lak a siluang kimuzoulou te innkuan te'n state govt.apan compensation lakh 5 leh prime minister fund apan lakh 2 chiat ngah uhi.
Gujarat State sung a khanawn December 13 a Assembly Election first phase neihna ding tawh kisai in tuni'n BJP President Nitin Gadkari in campaign bawl a, Libayat leh Udhna constituency sung mun nih a public rally neihna ah thugen hi. Hiai constituency 2 te ahihleh Marathi te tamna mahmah hidan in kigen hi. Gujarat ah December 13 in first phase poll om ding a, Decmber 17, 2012 in second phase poll neih hinawn ding a, December 20, 2012 in vote sim hiding hi.
England leh Wales gamsung ah huihpi tawh kithuah a vuah tamtak a zuk ziak in gamsung ah tuilian in tenna inn 800 val tui in tummang hi. Gamsung a Environmental Official te'n vuahzu laiding in gen ua, apaisa nilaini akipan vuahtui tamziak in mi 2 siloh uhi. Prime Minister David Cameron in Cornwall a tuilian lamdang a sak thugen in govt. in theihtawp suah a panpihna peding ahihdan gen hi. England ah 2000 kum leh 2007 in tuilian om mahleh tutung a pen huaise diak hidan in kigen hi.
Andra Pradesh a Ranga Reddy District sung a Sriramnagar colony ah zan nitak in pawl in film a shoot na meikuang nasatak kipan in a kiangnai a tenna inn building pehsawn in mi 5 kanglum uhi. State Home Minister P Sabita Indra Reddy in, innkang omna mun delh ngal in, media te mai ah, misi te lak ah naupang kha 7 miding leh nupi 2 telkha in mi 3 liam in damdawi inn ah etkol in omlel chi hi. Police te gendan in short circuit ziak a meikuang kipan hiding in gen ua, Fire tender 2 leh fire fighter personnel te'n dakkal 2 nung in innkang phelmit theiphet uhi.
Uttar Pradesh Asembly house ah Bahujan Samaj Party pawl in state sung a law and order, power supply ginatlouh thu leh nekguk takgukna thutawh kisai tangkoupih in assembly house hihbuai uhi. sunma dak 11 a aseembly session kipat phet in Bahujan Samaj Party pawl in placard leh poster tawi in state sung a vaihawm Samajwadi Party naktak in mohsa ua, speaker in sunnung dak 12:20 a assembly patnawn ding in bikhiah hi. Himahleh ginatak a paithei tuanlou in assembly khawlsak in om nawn hi.