* Presbyterian Church of India saina in Workshop on Peace Building neih in om.
* August khasung a District a Hospital a naunei te ading in JSY sum kihawm nawn.
* ZEO Office ah TET Admit Card tamtak laklouh in omlai.
* Traffic Police te'n tuni'n Helmet khulou 2 wheeler driver 11 man in sum liausak.
* KZP General Headquater in General Assembly Cum Election neiding.
* National Seminar-Cum-Workshop on Development of Zomi Language and Literature, hunkhakna om ding.
The Presbyterian church of India saina in tuni sunma dak 10 in Synod hall IB road ah One Day Workshop on Peace Building nei uhi. Hiai hun Rev. Laldawngliana Chairman Peace and Justice Committee in thumna in hong a, technical session hun ah, Dr. Leban Sreto in "Concept of Conflict in North East India: An Over View" chih pansan in thugen a, AK Goldsmith ARDLF in "Role and Functions of Community in Conflict Resolution" leh "Stratrgic Peace-Building in North East India" chih pansan in thugen a, sunnung in Rev. Dr. Ramengliana makaih in Extempore Speech Competition nei in kipahman leng hawm ngal ua, hiai hun ah Saptuam pawl tuamtuam apan Saptuam heutu leh Social leader tamtak tel uhi.
District Hospital a Medical Superintendent Dr. N Paulginthang in thusuah a bawl dungzui in District Hospital Churachandpur a August 2012 sung a nau a khatna leh nihna tan neite ading in naunei panpihna JSY sum kihawm nawn a November 24, 2012 tan sunzom ding uhi.
Board of Secondary Education Manipur saina nuai a November 27, 2012 a Imphal Teacher Eligibility Test (TET) Examination neihna ding tawh kisai a, apply ngal a Admit lanailou tamtak omlai a, Churachandpur District apan Candidate tutan a Admit Card lanailou te'n ZEO Office Churachandpur ah Office hour sung in laktheih ding hi.
District Administration in November 1, 2012 akipan khopi sung a 2 wheeler hek peuhmah in helmet khuk chiat ding a thusuah a bawl nung in Traffic Police te'n helmet khulou tamtak mankhia ua, tuni kia in helmet khulou mi 11 man nawn in za 1 zel liausak in khahnawn uhi.
Khangthah Zuun Pawl (KZP) General Headquaters Executive Committee thupukna dungzui in November 24, 2012 sunnung dak 1 in SYO Hall Simveng ah KZP General Assembly Cum Election om ding hi. Huai hun ah President, Vice-President, General Secretary, Joint Secretary leh Finance Secretary tawh Treasurer hihna lenkhawm ding telding uhi.
Zomi Language and Literature Society leh Central Institute of Indian Language (CIIL) pangkhawm in tuni'a kipan in Lamka College Examination Hall ah National Seminar-Cum-Workshop on Development of Zomi Language and Literature omlel a, Prof. Kedutso Kapfo Deputy Director Central Institute of Indian Language, Dr. Sobha Satyanath Assistant Professor Delhi University, Dr. Gail Coelho Assistant Professor Delhi University leh Dr. SS Bhattatarya Former Head Language Division Office of the Registrar General India, Kolkata in sinsak ua, zingchiang sunnung dak 3 in a khakna om ding a, huai ah Zomi Youth Association Lamka makaih in cultural show om ding a, Chaltonlien Amo Chairman Hill Area Committee, Vungzagin Valte Parliamentary Secretary, K Guite Adviser Zomi Language and Literature Society leh Ginsuanhau MLA in thugenna hunzang ding uhi.
GAMDANG THU.
Mumbai a 26/11 attack a terrorist hingmat a omsun kum 25 miding Ajmal Amir Kasab, India govt. in kum 5 phial, kem a sum a crore a si a sengnung in tuni zinglam dak 7:30 in Pune a Yerwada Jail ah khailup hita hi. Kasab khailup ding ahihlam ni 4 paisa in theihsak in om a, khailup ahihma inleng thuna nung banmah neilou hi.Foreifn Minister Salman Khurshid in agendan in Kasab khailup ding thu High Commissioner tungtawn in theihsakna kibawl mahleh Pakistan in pom nuamlou chi a, himahleh India in a mohpuakna bel semsuah veve chi hi. Union Home Minister Sushil Kumar Shinde in agendan in Kasab luang a sungkuan te lakding in kikoih a, kuamah in a luang a lakkei leh Maharastra State sung mun khatpeuh ah kivui ding chi hi. Maharastra Home Minister RR Patil in, thupuan bawl in Mumbai attack si minautang leh officer te min tawisangna suak ding chi hi. Kasab in India President Pranab Mukherjee kiang ah hehpihna ngen mahleh President in nawlkhin hi. Mumbai 26/11 attack ah mi 166 in sihloh uhi.
East Asia Summit ah Prime Minister Manmohan Singh leh US president Barack Obama kimuhkha in Prime Minister in US President lohchinna tung ah kipahpih thugen a, US President inleng tu term thak a India inleng poimohna liantak neiding ahihdan gen hi. Leader nihte'n maban ah gam nihte kitanauna hihhat semding lunggulh tuak uhi.