* Evangelical Congregational Youth Fellowship in One Day Fellowship nei.
* YPA General Headquaters in "Kristian Hindan Tawisang" chih pansan in Diamond Jubilee Talk nei.
* ZYO Lamka in Election nei.
* HSLC Private Centre Committee in Meeting nei.
* CoPTAM in Media te kimuhpih.
* National Seminar Cum Workshop on Development of Zomi Language and Literature om ding.
ECCI Evangelical Congregational Youth Felowship in zan sunma dak 10 in ESC Headquater Church Chiengkonpang ah One Day Fellowship nei uhi. Hiai hun ah Rev. LB Angam General Director ECCI in " That they may be one " chih pansan in thugen a, saptuam pawl tuamtuam in lapawl sa uhi.
Young Paite Association YPA General headquaters in March 2013 a " Introspection for Social Transformation " chih pansan a, YPA Diamond Jubilee zatna ding tawh kisai in zan sunnung dak 1 in "Kristian Hindan Tawisang " chih pansan in Mini Auditorium Dorcas hall New-Lamka ah YPA Diamond Jubilee Talk nei in houlimna nei uhi.
Zou Youth Organisation (ZYO) Lamka Block zan sunnung dak 1 in Zogal Memorial hall Zoveng ah Election nei uhi. Hiai hun ah ZYO Lamka Block President ding in Tualminthang telching ua, Vice-President ding in M Thanghau, Secretary ding in T Dongzalian, Assistant Secretary ding in Liantungnung, Finance Secretary ding in Enlian, Treasurer ding in Grace Chingboi leh Information Secretary ding in Paul Ginliankhup telching uhi. Telching a omte S Lamthang in kichiamsak in thumsakna leng neingal hi. Telchign thak a omte'n kum 2015 tan vaipaw ding uhi.
Tuni sunma dak 11 in Zonal Education Office ah HSLC Private Centre Committee in meeting nei ua, kumnawn 2013 a HSLC Private Centre Committee a President ding in Joseph Lalrothang Zonal Education Office guang uhi. Huaiban ah OC cum Secretary ding in Lalbiakthuami Headmistress Vungzagen High School guang uhi.
Committee on Protection of Tribal Areas Manipur (CoPTAM) in tuni sunnung dak 2 in Tuibuang ah Media te kimuhpih uhi. Letpu Haokip Chairman CoPTAM in a gendan in Kuki State leh Autonomous Hill State demand a pawl tuamtuam panlakna CoPTAM in kipahpih mahmah ahihdan leh akul leh poimoh bang a moral leh physical support pedia mansa ahihdan gen a, huaiban ah CoPTAM in Village Authority election neih ding deihlou ahihdan leng gen a, khaw sung a election om ding leh khaw sung mipi leh khaw hausa deih telna a, neih ahihding ahi chi a, Govt. in mipi deih telna tellou a Village Authority election a neih pen thildik hilou ahihdan gen hi. Huaiban ah CoPTAM in Panchayat election a singtang mite kiglohlouh ding a chihleh a kigolh teitei a, ki-candidate leh telching a omte October 2012 tan a kitawp a, sum liau ding in theisak mahleh tunitan in kuamah kitawp lou in sum liau leng omlou uhi. Hiai thu tawh Letpu Haokip in a gendan in tukha sung a, a kigolhkha teng in ahihfel kei ua leh organisation tuamtuam te tawh a tung thu uh kingaihtuah ding chi hi.
Zomi Language and Literature Society leh Central Institute of Indian Language (CIIL) pangkhawm in zingchiang akipan Lamka College Examination Hall ah National Seminar-Cum-Workshop on Development of Zomi Language and Literature om ding hi. Zingchiang sunma dak 10 in Rev. Khen P Tombing Principal Rayburn College in thumna in programme hong ding a, LB Sona Chairman Zomi Council, Langkhanpau Guite Chairman ADCC leh Phungzathang Tonsing Health and Family Welfare Minister in thugenna hunzang ding ua, technical session ah Prof. Kedutso Kapfo Deputy Director Central Institute of Indian Language, Dr. Sobha Satyanath Assistant Professor Delhi University, Dr. Gail Coelho Assistant Professor Delhi University leh Dr. SS Bhattatarya Former Head Language Division Office of the Registrar General India, Kolkata in sinsak ding uhi. November 22, 2012 sunnung dak 3 in a khakna om ding a, huai ah Zomi Youth Association Lamka makaih in cultural show om ding a, Chaltonlien Amo, Chairman Hill Area Committee, Vungzagin Valte Parliamentary Secretary, K Guite Adviser Zomi Language and Literature Society leh Ginsuanhau MLA in thugenna hunzang ding uhi.
Ministry of Culture Govt. of India nuai a Centre for Cultural Resources and Training New-Delhi in Imphal a Manipur Public School, Koirengei ah November 22 akipan 27, 2012 sung in primary, junior high school leh higher secondary school a Inservice teacher te ading in 5 days cultural activities training saiding uhi. Huai hun ah Churachandpur district sung a block 6 apan teacher 1 zel telding uhi.
Hornbill Cable network adia khuam poimoh mahmah Romeo Hangzou tapa Richard (28) in hon omlouh sanna tung ah Hornbill Cable Network in suun thu ka puang uhi.
Hornbill Cable Netwrok subscriber te kiang a thiehsakna, kum beiding kuan ahihman in cable fee bat neite'n pesiang ding in I kitheisak a, a limsaklou te cable connection ki-disconnection ding hi.
GAMDANG THU
Shiv Sena Chief Bal Thackery sih ziak in Mumbai khopi sung bandh dandeuh in om mahleh tuni'n ngeina bang in sumbuk te kihong nawn in gari te leng ngeina bang in tainawn uhi. Shiv Sena Spokesperson Anil Parab in agendan in pathianni a dawr khaksak a bandh dan a thupuan bawlte party in theihpihlou ahihdan gen hi. Bal Thackery luang ahihdan Central Mumbai a Shivaji Park ah kihal hi. Khopi sung a dan leh thupiak dinmun enkai ding in police personnel sing 2 petrolling in omden uhi.
New-Delhi a Connaught place kiang a KG road ah tuni zinglam dak 6:30 in Himalaya house building innsawng sawng 15 mei in kang a, security guard khat kanglum hi. A kigendan in security guard 2 hutkhiak in om ua, fire tender 32 in meikang phelh uhi. Hutkhiak a om security guard 2 te ahihleh sawng 6 leh sawng 11na akipan hutkhiak in om ua, a kanglum pen ahihleh, a ihmut ziak hidan in kigen hi. Electric short circuit ziak in meikang kipan hidan in police te'n gen uhi.
Tamil Nadu ah school bus te puahphat ding phutna in school bus driver te'n kiphina nei in tuni'n kuamah a service omlou uhi. A paisa July 25 in school bus tuang a kisiat ziak in school naupang khat kia in si a, hiai thu ziak in school bus te puahphat ding leh facility tuamtuam piakding ban ah emergency exit omsak deih in kiphinna kipan hi. Tamil Nadu ah private school sang leh za 5 om a, huai te'n bus sing 5 val nei uhi. Bus te strike ziak in school naupang tamzaw in haksatna tuak uhi.
American Indian Austronaut Sunita William in za-awng a kha 4 sung hinkhua a zatnung in tuni'n leitung damtak in hongtung nawn hi. william tawh crew member 33 in International space station ah ni 125 sung hinkua zang in space station a radiation sang dan leh leitung a vukkhal te a tuina ziak ban ah khovel a khaw omdan kikhekna ziak theihsuah sawm in test leh experiment tuamtuam bawl uhi.