* National Seminar-Cum-Workshop on Development of Zomi Language and Literature kipan.
* Town area a ASHA leh Fecilitator te'n JSSK tawh kisai in Training nei.
* Salt Brook School in Parents Day-Cum-Decade Anniversary zang.
* Kuki State Demand Committee in Deputy Chief Minister Gaikhangam tawh kihouna nei mahleh Public Blockade sutzop ding in thupuk.
* Langkhanpau Guite Chairman ADCC Delhi apan Lamka hongtung.
Tanchin Kimzaw:
Zomi Language and Literature Society leh Central Institute of Indian Language (CIIL) pangkhawm in tuni'a kipan in Lamka College Examination Hall ah National Seminar-Cum-Workshop on Development of Zomi Language and Literature kipan hi. LB Sona Chairman Zomi Council leh Phungzathang Tonsing Health and Family Welfare Minister in thugenna hunzang uhi. Phungzathang Tonsing Health and Family Welfare Minister in a thugenna ah, Manipur ah tep-leh-muam hih zongsang pung deuhdeuh a, adiak in singtangmite lak ah uang diak chi hi. Hiai tep-le-muam tungtang ngaikhawk mahmah ahihdan leh natna lauhhuai tuamtuam piang thei ahihdan gen in, tep-le-muam apan a neu alian kidek ding in ngen hi. Huaiban ah khovel in, a ngaih pimoh mahmah Language ahihdan gen a, Zomi sung a om tribe 9 te'n pau leh laimal kibang zatding adeih thu leng gen a, hiai Seminar Cum Workshop leh saptuam heute leng a telding uh deih thugen hi. Technical session ah Prof. Kedutso Kapfo Deputy Director Central Institute of Indian Language, Dr. Sobha Satyanath Assistant Professor Delhi University, Dr. Gail Coelho Assistant Professor Delhi University leh Dr. SS Bhattatarya Former Head Language Division Office of the Registrar General India, Kolkata in sinsak uhi. November 22, 2012 sunnung dak 3 in a khakna om ding a, huai ah Zomi Youth Association Lamka makaih in cultural show om ding a, Chaltonlien Amo Chairman Hill Area Committee, Vungzagin Valte Parliamentary Secretary, K Guite Adviser Zomi Language and Literature Society leh Ginsuanhau MLA in thugenna hunzang ding uhi.
District Health Society Churachandpur saina in tuni sunma dak 11 in Female Health Worker Training School huangsung ah Town sung a ASHA leh Fecilitator te'n JSSK nuai a numei naunei te leh naungek te adia hamphatna tuamtuam omte kisinsakna nei uhi. Hiai hun ah Dr. VC Pau Tonsing District Family Welfare Officer leh D Khuala Vaiphei District Programme Manager District Health Society in sinsak in Town sung a ASHA leh Fecilitator 92 tel uhi.
Tuibuang a Salt Brook School in tuni sunma dak 10 in School huangsung ah, Parents day cum decade anniversary zang uhi. Hiai hun ah Langkhanpau Guite Chairman ADCC, chief guest in pang a, guest of honour in L Mangkhogin Haokip IPS, SP Churachandpur pang a, kipahman tuamtuam pekhia uhi. Student te'n politician te gamtat khawheidan muhnop huaitak leh entertainment item tuamtuam lak uhi. Langkhanpau Guite Chairman ADCC in a thugenna ah, student te'n tupkhat nei a tangtak a paipih ding in ngen a, nu-le-pa te thumang a, khamtheih guihtheih a kibuallou ding leh midang te adia vualzawlna hithei ding a hinkhua zang ding in deihsak thugen hi. Huaiban ah, Salt Brook School in student te education diktak pia ahihdan gen a, Education kichi all round development ahihdan leng gen hi. Hiai hun nu-le-pa tamtak in uap uhi.
Kuki State Demand Committee in tuni sunnung dak 3:30 in B Vengnuam ah Media te kimuhpih in tuni sunma dak 10:40 a Kuki State Demand Committee leh Gaikhangam Deputy Chief Minister kihouna tawh kisai leh maban a panlak dingdan taklang uhi. K Khongsai spokesperson Kuki State Demand Committee in agendan in, tuni'a Deputy Chief Minister tawh kihouna in gahsuah bangmah neilou a, himahleh State palai te apan Sangai festival leh TET exam na ding tawh kisai a, bandh khawlsan ding in ngetna om chi a, huchih dungzui in Sangai festival a telding leh TET exam ding te'n a hunma a Kuki State Demand Committee te theisak masa a, document kichiantak a neih ua leh paisuaksak hiding chi a, Union Govt. apan gelhthoh a kihou dia chialna om masiah public blockade sutzop hiding chi hi. Huaiban ah Kuki te buaina hihvengna ding a State Govt. in Govt. of India tung a nohna a bawl ziak in kipahpih thupuang in, nelhsiah a om Kuki te panlakna society, group leh mimal kuapeuh mah in kithuahpih ding ngen hi. Aban agenzelna ah, tuni'a Kuki State Demand Committee leh Gaikhangam Deputy Chief Minister in kihouna a neih lai a, State Security force te'n Imphal-Ukhrul road in a totkhak Mongneljang khua a Kuki State Demand Committee bandh supporter Nemkim (45) gari a, a phut uh mohpaih thupuang a, hiai thiltung in Kuki te haksatna tawh kisai State Govt. in bangmah a ngailou ahihdan kilang mahmah chi in, Nemkim ahihleh Christian Hospital Imphal a etkol a omlel ahihdan leng taklang hi.
New-Delhi a Autonomous District Council tawh kisai a mohpuakna neite kimuhpih ding a zinkhia Langkhanpau Guite Chairman ADC Churachandpur, tuni sunma dak 10 in Lamka hongtung nawn hi.
GAMDANG THU
Shiv Sena Chief Bal Thackery sihnung a, a luang hal ding ni a, Mumbai khopi a sumbuk teng a kikhak thutawh kisai in numei khat in social networking site face book ah, zahtakna ziak a, dawr kikhak hilou in lauh ziak a kikhak hizaw kichi a post ziak in buaina thupitak piang a, numei nu lawmnu inleng hoihsa zawmah a, hiai thu ziak in police te'n numei nihte man in ni 14 sung jail a koih ding dinmun in ua, om a khawnung in sing1 leh sang 5 tuak pia in bail in pawtkhia uhi. Numei nihte'n media te dotna a dawngna uah, kisik huai mahmah a tunung in hiai bang thu te kigelh nawnlou ding chi uhi. Hiai thu ziak in numei nu gang (uncle) orthopedic clinic sung ah pasal 30 leh 40 vel ding valut in clinic sung a vanzat tamtak susia in tukvelh glass teng leng hihsia, ua, hiai bang a gamtang te lak ah police te'n 9 mankheta ua, Shiv Sena party supporter hiding un kigen hi.
Bihar a Ganga lui pang a Adalatghat a Chhath Puja zatna ah mipi a sing a sim te kiphuttuahna ah naupang 9 tel in mi 15 siklup in om ua, midang tamtak leng liam uhi. Misi te post mortem bawlzawh hita a, a liam te private hospital tuamtuam ah etkol in om uhi. Patna Police SP Jayant Kant in a gendan in, zan nitak a puja zang a om te paina ding a gua a lei kibawl tawm a siatna om ziak in, a pumpelhna ding kibawl a, huchih lai in electric hong mit a huai in mipi teng su patau in, kiphut tuahna piang kha hidan gen hi. Bihar Chief Minister Nitish Kumar in thiltung suizui hingal ding a, Home Minister in nguntak a enkai ding in theisak hi. Huaiban ah sihna tuak te innkuanpih te kiang ah compensation lakh 2 chiat hiding chi hi. Hiai Chhath Puja zatna ah mi lakh 4 val paikhawm uhi.
BJP a top leader teng in tuni zingkal in LK Advani tenna inn ah meeting nei in winter parliament session a panlak dingdan genkhawm uhi. Huaiban ah Mamata benerjee in Prime Minister Manmohan Singh tung a no-confidence motion paipih ding a ngetna a bawl tungtang leng genkhawm ua, akigen dan in BJP in Trinamool Congress chief Mamata ngetna nungthuap maithei hi.