* Ginsuanhau MLA in Singngat PHC enkhia in Singngat Community Hall ah Meithai 450 te Blanket silhsak a, Hill Model Aided High School Annual Function Cum Parents Day zatna Chief Guest hihna tawh uap hi.
* Paldai khua ah Truck Accident in, a si-leh-liam kuamah omlou.
* Lalpuithluaii Foundation School in Annual Prize Giving Day zang ding.
* STC/BSF in thau-le-bomb kapna sunzom ding.
* EBCC Hiangtam Lamka ah One Day Inductive Bible Study om ding.

Tanchin Kimzaw:

Ginsuanhau MLA 60-Singngat Assembly Constituency in tuni sunma dak 10 in Singngat khua pha in Singngat Primary Health Centre a Doctor leh Nurse omte dinmun enkhia hi. Singngat Primary Health Centre a Medical Officer Incharge Dr. Ruati Colney in agendan in Doctor leh Nurse kidaihlou ahihdan MLA pu theisak a, MLA pu in Doctor 3 bek koihbeh theihna dia panla ding ahihdan gen in, nurse leh doctor te pangkhawm a, duty hun kichiantak a bawl ding in ngen hi. Singngat Primary Health Centre akipan Singngat Community Hall zuan in Singngat khua leh a kiangnai a, meithai te kimuhpih in, meithai 450 te phalbi khawvot douna ding in blanket pia hi. Aman a thugenna ah election hunlai a kigen bang in meithai leh daikilkal a mite kimanghilhlou ding a kichih bang in kimanghilhlou a, deihsakna tuam piak hi gige ding chi hi. Blanket te ahihleh MLA pa Zi Thianching leh ZRO President Thanglianpau Zi Mangnu in pekhia uhi. Huai apan in Singngat khaw sung mah a Hill Model Aided High School Annual Function Cum Parents Day 2012 zatna Chief Guest hihna tawh uap nawn hi. Aman a thugenna ah, Hill Model Aided High School, pen high school piching a up-grade ding in lungsim kinei mahleh, high school piching dinmun ah omta leh tua a hoih bang in hoihlou ding chi a, govt. teacher chitakloupi hong om ding ua, school in siatloh ding chi hi. Maban ah septheih theih sep sawm in pan kila a, himahleh tutung a govt. in sum lam a haksatna a tuah ziak in fund bangmah omlou chi hi. Hill Model Aided High School building bawlna ding in SPA apan crore 1 kiguang in approved leng hita chi a, building bawl ding a, midang sawllou ding ahihdan gen in School managing committee te khut ah sum piakkhiak hiding a, committee in a hoih thei bang pen in a bawl ding chi hi. Huaiban ah School huangsung a leivui khu om nawnlouhna ding in black topping bawl hiding chi a, Hill Model Aided High School ading in Computer set 10 leng tunung sawtlou in hongtung ding chi hi. Aban agenzelna ah, Singngat khua model town suahsakna ding in theihtawp suah in pan kila a, hiai ding in crore 18 proposal kipelut ta chi hi. School Managing committee te khut ah kithuahpihna in sum pia a, huaiban ah entertainment item tuamtuam a perform group 8 te sang 1 chiat pia hi. Hiai Singngat Hill Model Aided High School ah, Student 903 om in, tutung in Class-X exam ding in candidate 41 nei ua, school kiphuhkhiak a kipan tuni tan in student 687 in pawl sawm zouta uhi. Hiai hun ah kipahman tuamtuam leng hawm ua, Rev. Ginmalsawm Divisional Superintendent Singngat EBC in class-x exam ding leh a school ading in vualzawlna ngetsak hi. Ginsuanhau MLA in abial sung a meithai te kiang a blanket hawmna sunzom lai ding a zingchiang in Mullum khua ah hawm nawn ding a, december14 in Sangaikot khua ah hawm nawn ding hi.

Zan nitaklam dak 5 vel in Singngat apan sing pua a Imphal zuan a tailai Punjab body truck mn-01-5128, singngat khaw khang a paldai ah brake fail in khoubang boh in truck mailam teng kise nak mahmah hi. Truck sung ah mi 5 tuang mahleh uh vangphathuaitak in kuamah a si-le-liam omlou uhi. Truck neitu ahihleh Biren Singh of Oinam hidan in kigen hi.

Bungmual a Lalpuithluaii Foundation School in December 17, 2012 sunma dak 10 in School huangsung ah Annual Prize Giving Day zang ding uhi. Huai hun ah, Foundation School a semlui teacher, student leh nu-le-pa te ban ah tulel a student leh nu-le-pa te telding in chialna bawl uhi.

Subsidiary Training Centre STC/BSF in Mission Compound suahlam leh pearsonmun, mualkawi leh gangpimual simtum kikal ah december 15 akipan 31, 2012 sung in zinglam dak 5 akipan zannung tanpha in thau leh bomb kapna sunzom ding ua, kim-le-kiang a omte pilvang a ganvulh te khahzanlou ding in theihsakna bawl uhi.

EBCC Hiangtam lamka ah December 18, 2012 sunma dak 10 in One day Inductive Bible Study om ding a, huai hun ah Light of Life kichi lehkhabu gelhtu P Abraham in thugen ding hi.

Kuki Baptist Church (KBC) Womens Department in tunitak akipan December 15, 2012 tan daih ding in T Champhai Baptist Church, KBC No.8 ah The 42nd Annual Assembly Cum Seminar neiding uhi. Huai hun ah, "Kipana Thupha hil lhang dinga eitun ahi" chih pansan in resource person Lamkhohoi @ Sony Baite Secretary North East India Christian Council Women Assembly in thugen ding a, Chingboi Child Evangelist in Devotion hun makaih ding hi.

GAMDANG THU

North Korea gam in satellite pua rocket lawhchingtak in a khak khiaknung, United Nations nuai a America, Japan, Russia, China leh South Korea gamten kipahpih hetlou uh ahih dan puankhum ngal uhi. Khawvel pilna ah North Korea leng minung ah om nuam tuanlou kichih ut ziak a hiai Long Range Rocket North Korea in a sum neih sunsun te hichi bang in azat bei sangin, gam zawng mahmah ahihna zumpih lou a mipite’ nek leh taak leina in seng zaw leh a tawm pen in kum 4 sung khamkhop ann lei zou ding in tuat ahi.

Sitar tumging tumsiama minthang  Pandit Ravi Shankar tuzingkal in a tenna San Diego California ah sita hi. Amah 1922 kum in Varanasi Uttar Pradesh ah piang a, India gam a pahtawina sangpen Bharat Ratna tel in Grammy award 3 vei piak in om a, kumnawn 2013 a Grammy award ngah dia nominate in leng om hi. Kum 92 a upa Music Maestro ahih leh, 1960s a music band lar mahmah Beatles sunga George Harrison in ‘The Godfather of World Music’ chi in a minvawh banah, India adia tumlam gamte kiangah classical music palai kichi hi.

Morocco ah tunin Friends of Syria kichi gamtuamtuam 130te’ kimuhkhawmna hun ah America in opposition party hilel Syrian National Council in Syria mipite adia pangthei di’n amuang ziak in theihpihna poimawhtak pia hi. Tua bang kalah, buaina ziak a Lebanon gamgi ah galtai asing a simte’n khosak haksatna namenloutak tuak uh hi’n UN refugee acengy thusuak in agen ban ah, galtaina ah amau puak zawh zah chiat vantamlou tengtawh phalbi sung khawvot dou haksa sa mahmah ding uh hi’n leng thusuak in gen beh hi.

America gamsung Oregon state a Portland khawpi simlam ah zanin semi automatic thau tawi pasal khat in shopping mall khat sunga bazaar kaite thau ahawtkhum gawp na ah mi 2 kaplum in midang tamtak akapliam nung in amah leh amah kithat hi.

Muslim helpawlte’n Mali gam mallam a luahkhumna tungtang ah United Nations in sepaih thahatna tawh helpawlte douna nasep ah Mali kithuahpihna pe di’n Africa gamte chial hi. Helpawlte gamtatna ziak in mitamtak in innlum nusia in tunitan om ua, nek leh dawn taksapna liantak piang in galtai a om mite giautauna tun hi.

Chairman Hamid Ansari in Rajya Sabha a khak mun luat na in Uttar Pradesh Minister Mayawati kidek zou nawnlou in tunin hangsantak in a hehna Hamid Ansari tangtak in ngawh a, hiai thu ziak in BJP pawl in Mayawati mawhsa mahmah uhi. Rajya Sabha kikhopna ahih leh Samajwadi Party te’n a sukbuai gige ziak ua khak mun sim in omta hi.

West Bengal state assembly a Chit fund scheme ziak a kinakna ah MLA bangzah in liamna atuahna thu mawhpaihna in tunin Congress pawl in helmet khu in nuakna nei uhi.

Shiv Senna makai Manohar Joshi in National Democartic Alliance apat Prime Ministerial candidate di’n Sharad Pawar deih hi. Manohar Joshi in Marathi nam apat Prime Minister a om ding lunggulh mahmah ahi dan agen tawh kiton in NDA sung apan Prime Minister di’n Narendra Modi deihsak lou chihna suak hi.

Haryana state sung a Faridabad khawpi ah school building kisalai khat kichim in mi 6 delhlum in mi 9 delhliam hi. Haryana police in building contractor tel in building neitu tung ah tualthahna case chiamteh hi.

* YPA Central Lamka Unit President ding in Khanpau Ngaihte telching in om.
* YPA motto te lak a khat " Panpih Ngaite Panpih" chih pansan in YPA Diamond Talk 2veina neih in om.
* Kaikhanlian Guite Deputy Inspector of School in One Month Intensive Spoken English Training Programme hong.
* KBC Women Department in 42nd Annual Assembly Cum Seminar neiding.
* Gopal K Pillai IAS (Retired) Former Union Home Secretary Tangpizawl khua a, Zogam-Pillai Coffee Plantation mun enkhia.
* Zingchiang in Kangkap Gospel Centenary lopna kipan ding.

Tanchin Kimzaw

Young Paite Association (YPA) Central Lamka Unit in zan sunnung dak 1 in Beaulahlane a YPA hall Central Lamka ah Election nei in YPA Central Lamka Unit 2012 -2015 sung vaipaw ding kitelna nei uhi. Hiai hun ah D Kaizamang President YPA Central Lamka Unit in phattuamngaihna tawh kisai leh thil hoih sepsuahna dia haksatna tuamtuam omte tungtang gen in, heutu khat in amah thakheng ding a bawlkhiak theih leh heutu piching ahihdan gen hi. Kitelna hun ah President ding in Khanpau Ngaihte telching in om a, Secretary ding in Chinkhansiam, Finance Secretary ding in G Thuamkhanlun leh Treasurer ding in T Thangsuanmung telching uhi. Telching a omte Pastor Dr. Thangminlun Mangte Local Pastor EBCC Bethel Lailam Veng in thumsak hi.

Young Paite Association (YPA) Diamond Jubilee lopna March 2013 a om ding tawh kiton in zan sunnung dak 1 akipan sunnung dak 3 sung in EBC Guest House Mini-Auditorium New-Lamka ah YPA Diamond Talk 2veina neih in om hi. Hiai hun ah YPA motto te lak a khat "Panpih Ngaite Panpih" chih pansan in YPA makai leh khotang heutu te'n houlimna nei uhi.

Tuibuang a Dr. S Radhakrishnan Foundation School in, a teacher te ading in One Month Intensive Spoken English Training sai in, tuni sunnung dak 1 in training programme honna nei uhi. Hiai hun ah Kaikhanlian Guite Deputy Inspector of School Churachandpur Block chief guest a pang in Training Programme hong a, aman a thugenna ah, Dr. S Radhakrishnan Foundation School Headmaster Dr. HH Mate kipumpiak zawhna thupisak thugen in training programme in gahsuah hoihtak a neih ding deihsak thugen hi. Hiai hun ah Dr. HH Mate Headmaster in vaidawnna thugen in School dinmun report pia hi. Hiai Training in Khuma Thangzom Proprietor Excelsior Spoker English Centre in sinsak ding a, teacher 23 telding uhi.

Kuki Baptist Church (KBC) Womens Department in December 12, 2012 akipan December 15, 2012 tan daih ding in T Champhai Baptist Church, KBC No.8 ah The 42nd Annual Assembly Cum Seminar neiding uhi. Huai hun ah, "Kipana Thupha hil lhang dinga eitun ahi" chih pansan in resource person Lamkhohoi @ Sony Baite Secretary North East India Christian Council Women Assembly in thugen ding a, Chingboi Child Evangelist in Devotion hun makaih ding hi.

Gopal K Pillai IAS Retired Former Union Home Secretary leh Sudha Pillai IAS Retired, former Member Secretary Planning Commission of India ban ah Commodity Boards Govt. of India apan Official bangzah hiam in tuni sunma dak 10 in Lamka hongpha ua, New-Lamka a EBC Dorcas Hall Guest House ah Zomi Economic Planning and Development Agency (ZEPADA) makai te'n ana vaidawn uhi. Huai apan Singngat Sub-Division sung a Tangpizawl khua ah, Zogam-Pillai Coffee Plantation mun va enkhe uhi. Hiai Zogam-Pillai Coffee Plantation ahihleh Zomi Economic and Development Agency (ZEPADA) etkaina nuai a patkhiak a om hidan in kigen hi. Zingchiang in ZEPADA saina in YPA hall New-lamka ah Annual Farmers Conference 2012 om ding a, huai ah, best performing farmers award 2012 leng pekhe ding ua, Sudha Pillai IAS retired, Gopal K Pillai IAS retired, Jacintha Lazarus IAS DC Churachandpur, Vungzagin Valte Parliamentary Secretary Horticulture, Soil Conservation and CADA leh Minister, MLA te apan ban ah Commodity Board palai te apan thugen ngaihkhiakna om ding hi.

Singngat Sub-Division sung Kangkap khua a Tangthupha a tungnung kum 100 chinna Gospel Centenary lopna Kangkap khua ah, December 11 akipan 13, 2012 sung in thupitak in neihsawm uhi. Hiai Kangkap Gospel Centenary lopna hun ah, "Tangthupha gahsuah te-Khalam ki-siamthakna, Lungsimlam ki-siamthakna, Khotang hinkhua kisiamthakna, Ki-ukna leh nekzonna ki-siamthakna" chih thupi pansan in Damkhothang Lecturer Grace Bible College, Rev. M Gousuan City Pastor Guwahati, Rev. K Mangte Principal Grace Bible College leh Rev. T Kamzakham in thugen ding uhi. December 11, 2012 nitak dak 5 in Pastor Suanmung Local Pastor EBCC Kangkap in Tangthupha kum 100 chin lopna hun hong ding a, December 12, 2012 in Rev. ST. Jamkhanthang in Gospel Centenary suang hong ding a, Rev. H Vungzalian in Gospel Centenary Souvenir hong ding hi. Hiai hun ah Kangkap khawsuak Pastor leh Upa omkha teng in Gospel Centenary Dakpi tumding ua, Gospel Centenary Cultural Troupe in Musical Bamboo Dance  lakding uhi. Kangkap Gospel Centenary lopna hohding te zingchiang zingkal dak 6:30 in Lamka apan kipankhe ding uhi.

GAMDANG THU

Haryana State sung Bhiwani khawpi a om numeite kaina Adarsh College ah laisim hahkat theihna ding ngimna a dan bawlthak uh dunzui in College ah student kua mah in Jean khekol ten leh short tops silh aphal louhna thu National Commission for Women in ngaikhawk mahmah in college thuneitu tung ah action lakding tan pha in vau uhi. College Principal gendan in bel, siamsin nungak ten jean pant leh short top in hong kichei chiang un, migilou apat lauhuai tung thei kia hilou in a, a laisim mahmah uh subuai in, Indian culture leng ahih louh ziak in hichi bang kicheina zat louh ding chi mah leh, aleh lam ah a college student te mahmah in leng a hiai bang rules and regulation a deihlouh thu uh puang uhi.India simlam ah Kudankulam khawpi a Nuclear Plant bawlna pailel deihlouh ziakin khawmipi in lampi khaktan in helna patsawm uhi. Hiai Nuclear plant ahih leh Atomic Energy Regulatory Board etkaina nuai a bawlkhiak ahi.

Jammu and Kashmir Liberation Front helpawl makai poimawh mahmah 2 te mat leh damsung a jail tang dia thutan khum in a omna thu ah JKLF in tunin Jammu Kashmir state pumpi bandh puang hi.

London a King Edward 7th damdawi inn a nurse sem, phone thubuai ziak a sihlawh India mi Jacintha Saldhana luang tukal sung in Karnataka sung a Shirva khua ah vuidia puaktung hi ding.

Egypt a kiphin pawlte’ lungkimlouhna President Mursi in ngeingaih sawm in athuneihna apan kingaihtuah phat thak ding chiam mah leh, constitution bawlthak pen puahphat ding anial ziakin, gamsung numei leh Christian te’n zan in kiphinna nei ua, Sepnawnni ah uang zaw a neihding sawm uhi. Egypt constitution thak in ahih leh, Freedom of Expression tel in rights tuamtuam ah gakna a koih ziak in Eqypt mipi in adeihlouhna uh bawlzawh ahih apat tunitan khawl lou in kiphinna neitouzel uhi.

Typhoon Bopha ziak in tuni tan in mi 640 val te’n silawh in US dollar million 180 huding inn leh lou suksiat in a om ziak in Philippines solkal beidong kisa mahmah a, gampua apan panpihna lamen mahmah ahih dan Foreign Affiars spokesman in gen hi.

South African gam President lenlui kum 94 a upata Nelson Mandela in taksa damlouhna ziak a damdawi inn ah alup zawh ni 2 chingta a, President Jacob Zuma in avehna apat  agen dan in, hoih lam nawt mahmah ta chi hi. Bang natna nei a om hiam chih bel genkhiak in omlou hi.

Zanin America lasasiam Jenni Rivera lenna tuahsiat ziakin si hi. Tusuak  kizadan in Mexico gam ah concert  nei zouphet inn lam zuan a lenlai un tuahsia tuak ua, lenna sung ah tuang Jenni tel in midang 6 in sihna tuak uhi.