* YPA Hall Hiangtam Lamka ah Christian Book Festival 2012 kipan.
* ADCC saina in District Level Public Leaders Seminar neih in om.
* Md. Amin Shah Parliamentary Secretary MOBC, Science and Technology in Muan Hangzo Music Video Album hong.
* The Bolocops Brothers te saina in Lamka a Orphanage Home te kithuahpihna ding in Charity Concert om ding.
* YPA Diamond Talks-II neih hiding.
* Gopal K Pillai IAS (Retired) leh Commodity Board palai te'n Lamka hongpha.
Beautiful Books Chennai saina in tuni'n YPA hall Hiangtam Lamka ah, Christian Book Festival 2012 kipan hi. Hiai hun ah Bible, study bible, biographies, song books, sunday school books, DVDs, Laminated Boards, Bible Commentaries, bible dictionaries, children books, poster, VCDs, christmas item leh gift item ban ah van chi tuamtuam 10 to 50 percent discount in zuak ua, December 11, 2012 tan sunzom ding uhi.
Autonomous District Council Churachandpur saina in tuni'n EBC Guest House a Mini-Auditorium ah District Level Public Leaders Seminar nei uhi. Hiai hun ah, " He Restores my Soul" chih pansan in Rev. Dr. Kh Khaizakham leh Rev. Dr. JM Ngulkhanpau in thugen ua, Rev. S Vungminthang General Secretary EBC in Seminar a tel teng thumsak hi. Hiai Seminar ahihleh Thangzamuan Hauzel in makaih hi. Hiai hun ah District sung a, Minister Phungzathang Tonsing Health and Family welfare Minister , Vungzagin Valte Parliamentary Secretary leh MDC teng ban ah a Zite uh tel in local artist hunkhop inleng uap in nitaklam in annkhawm uhi.
Muan Hangzo in a bawl Music Video Album " Ken Tua Ka Pawm" kichi tuni sunnung dak 2 in Synod Hall IB road ah ahonna nei uhi. Hiai hun Md. Amin Shah Parliamentary Secretary MOBC, Science and Technology in Chief Guest hihna tawh uap in Album bawl te tung ah kipah thugen in kithuahpihna sum sing 2 pia hi. Guest of Honour in S Kamsuanlun Executive Member ADCC, pang a, aman a thugenna ah, Album leh lehkha bu bawl kichi singtangmite adia gou manphatak ahihdan gen hi. Functional President in H Dalzamang Gangte Divisional Forest Officer Churachandpur pang a, hiai hun local artist tuamtuam leh mipi hunkhop in uap uhi.
The Bolocops Brothers te saina in December 22, 2012 in Rayburn College New-Lamka ah, lamka khopi sung a Orphanage Home omte kithuahpihna ding in Charity Concert om ding hi. Huai hun ah, Friends band, Thangginsang Tombing, RDi, Florence, Vungthiankim, Donny, Lamching leh artist tuamtuam in naupang tagah te omna Orphanage Home kithuahpihna ding in lasa ding uhi.
Tuibuang a Dr. S Radhakrishnan Foundation School in, a teacher te ading in One Month Intensive Spoken English Training saisawm a, december 10, 2012 sunnung dak 1 in Kaikhanlian Guite Deputy Inspector of School Churachandpur Block in Training Programme hong ding hi. Hiai Training Programme in January 2013 sung daih ding hi.
Gopal K Pillai IAS Retired Former Union Home Secretary leh Sudha Pillai IAS Retired, former Member Secretary Planning Commission of India ban ah Commodity Boards Govt. of India apan Official bangzah hiam in December 10, 2012 in Lamka hongpha ding ua, Singngat Sub-Division sung a Tangpizawl khua ah, Zogam-Pillai Coffee Plantation mun enkhe ding uhi. Hiai Zogam-Pillai Coffee Plantation ahihleh Zomi Economic and Development Agency (ZEPADA) etkaina nuai a patkhiak a om hidan in kigen hi. December 11, 2012 in ZEPADA saina in YPA hall New-lamka ah Annual Farmers Conference 2012 om ding a, huai ah, best performing farmers award 2012 leng pekhe ding ua, Sudha Pillai IAS retired, Gopal K Pillai IAS retired, Jacintha Lazarus IAS DC Churachandpur, Vungzagin Valte Parliamentary Secretary Horticulture, Soil Conservation and CADA leh Minister, MLA te apan ban ah Commodity Board palai te apan thugen ngaihkhiakna om ding hi.
Young Paite Association (YPA) Diamond Jubilee lopna March 2013 a om ding tawh kiton in zingchiang sunnung dak 1 akipan sunnung dak 3 sung in EBC Guest House Mini-Auditorium New-Lamka ah YPA Diamond Talks-II om ding hi. Tutung in YPA motto te lak a khat "Panpih Ngaite Panpih" chih pansan in houlimna neih hiding hi.A telnuam te ading in seat tamlou awng ding a, a lunglut te teltheih ding hi.
GAMDANG THU.
Zan in Rajya Sabha ah FDI thu genzawh a om tawh kiton in, America solkal apat kipahpihna thusuak in zui ngal hi. United States Deparment Spokesperson gendan in, mitamtak adia akichingzaw nasepna, loukhou mite adia lametna, sumdawngte adia hunpha leh gamsung khantouhna kongpi kihonna ahih dan gen hi. Tu in ahih leh Parliament ah pension leh insurance bills thute genkhawmna nei nawn ding uhi.
Olympic committee in India kimawlmite naktak in alungkiatsak nung, tuni’n Sports Minister Jitendra Singh in gamsung a boxing,archery leh sports tawh kisai a association a tel kimawlmite’n International affiliation thu ah bangmah lunghimawh lou di’n theisak hi. Sports Minister in agenzelna ah kimawlmite maban ding susehetlou leh recognition kisiat ziak a kimawlmi kuamah in thuakkha lou ding in chiamna bawl hi.
Gujarat assembly election in a naih mahmah tak ziak in, campaign neih kisaan mahmah ua, zan in leng Congress a dia campaign Sonia Gandhi in a thugenna ah BJP govt. nuai ah tuni tan Gujarat state sung ah loubawlmi lakh 4 leh siing 5 tel in district 57 in electric mulou ua, huai te zatding electric teng state dang ah mantamtak in zuak chi’n ngawhna Narendra Modi in a dawnkikna ah, Congress government in cotton export a kham ziak a Gujarat loubawlmite’n crore 7000 tak mansuah ahi chi’n dawngthuk hi.
London a King Edward 7th , hospital ah ni thum paita a Australia apan minkhem zang FM Radio presenter nih nurse duty ten Prince William zi Kat Middleton ahoupih sakna thu ah kipiaksiat luat ziak in tua hospital ah kum 4 semta first class nurse Jacintha Saldanha tuzing in amah leh amah kithat hi. Hiai tawh kisai in tuni’n Sydney ah Today FM a Chief Executive Officer in press conference leng sam hi.
Belfast City Council in Northern Ireland gamsung ah British Union Flag niteng a pawngkhai nawnlou a, nipoimawhte chauh ah khai ding chih thupuan republican pawl in a zakdah ziak un kiphinna a neih uh ni 3 chingta a, tunitan in tan in police 20 in naktak in liamna tuakta uhi. Flag khailouh ding thupukna gumtu, Belfast MP, NAOMI LONG zong thah dia vau in om hi.
Sudan gam a Thoukang ziak a Yellow Fever natna vei mitamtak om lak ah tunitan in hiai natna ziak a si mi 160 chingta hi. Kum 10 paita apan Africa gamsung pumpi adia natna hi lauhuai pen hilai chi’n World Health Orgnisation thusuak in gen hi.
America gamsung pumpi ah kum nawn hun lemtang masapen ah numei leh numei, pasal leh pasal kingaite kiteng theihna ding phalsak na dia, supreme court in America danbupi sunga khamna tuamtuam kigelhte puahphat sawm hi.
Phalbi hun a Russia in Ukraine gamsung tawn in Russia gamsung mun tuamtuam a natural gas supply na dia pipeline a zawl pen, Russia leh Ukraine gamnih kikal a kitanauna a siat ziak in, Ukraine gamsung tawn khan nawn lou di’n Russia in natural gas supply na ding gas pipeline khung thak hi.
Belgium gam a khawpi khat ah annkuang leh nou 3000 val zang in feet 9 a sang feet 6 a lian in Christmas tree design thak bawl khiak in om hi. Hiai Christmas tree design thak phel khiak hileh kuang leh nou te sevek ding in kigen hi.