* Phungzathang Tonsing Health and Family Welfare, GAD and CADA Minister in YPA Cemetry Hall Dorcas Veng, New-Lamka hong.*
* Mualkawi a Covenant School in Annual Day zang.
* Langkhanpau Guite Chairman ADCC in T Bethlehem khaw thak hong.
* ZYA General Headquaters in ZYA Shillong Region hong.
* District Council saina in District Level Public Leaders Seminar om ding.
* BYF New-Lane in SA road ah One Day Market bawl ding.

Tanchin Kimzaw:
Tuni sunma dak 10:30 in YPA Cemetry Hall Dorcas Veng New-Lamka ahonna nei uhi. Hiai hun Phungzathang Tonsing Health and Family Welfare, GAD and CADA Minister in Chief Guest hihna tawh uap in YPA Cemetry Hall hong a, hall sung ah, Rev. N Thawndoulian Field Superintendent Nepal EBC in Pathian kiang ah lan hi. Guest of Honour apang Langkhanpau Guite Chairman ADCC in hall sung a Stage tung a kibawl Health and Family welfare Minister Phungzathang Tonsing Zi Chhungi hansuang hong in amah sunna hun makaih a, huaizawh in Langkhanpau Guite Chairman ADCC, Phungzathang Tonsing Health and Family Welfare Minister, H Mangchinkhup Executive Member ADCC, G Suanchinpau MDC leh Chinngaipau President YPA General Headquaters leh YPA makai khenkhat in Pi Chhungi hansuang ah pak koih in zahna pia uhi. K Thangkhogin President YPA New-Lamka Block in agendan in Phungzathang Tonsing Health and Family Welfare Minister in YPA Cemetry Hall Dorcas Veng a, bawlsakna tung ah kipahthu gen in, vuahtui daikai nuai a, sivui hunchiang in hiai hall phatuam mahmah ding in gen a, Dorcas Veng sung a om kha ahihman in YPA Dorcas Veng Unit in hall enkai ding chi hi. Langkhanpau Guite Chairman ADCC in hall sung a zatding in plastic chair 300 pia hi. Hiai hun YPA member leh mi poimoh tamtak in uap uhi.

Mualkawi khua a Covenant School in tuni sunma dak 10 in Annual Day zang uhi. Hiai hun ah Student leh Teachers ban ah School Managing Board in entertainment item tuamtuam nei in Rev. G Suanzalam Co-ordinator (Institution) PCCI (R) in hasotna thugen in Covenant School apan Class-X exam ding te vualzawlna ngetsak hi. Covenant School in tutung a pawl 10 candidate a neih masakna ding hi a, amasa pen ding in Candidate 43 neiding uhi. Hiai hun ah kipahman tuamtuam leng hawmkhia in nu-le-pa tamtak inleng uap uhi.

Tuibuang TD Block sung a khaw thak T Bethlehem Vangkho kichi tuni sunma dak 11:30 in a honna neih in om hi. Hiai hun ah Langkhanpau Guite Chairman ADCC in T Bethlehem khua hong in Rev. NT Lamcha Presbyter Molphai Section in khaw sung siansuah in Pathian kiang ah lan hi. Langkhanpau Guite Chairman ADCC in a thugenna ah, Bible a I muh bang in Bethlehem  kichi tanghou inn chihna ahi a, gialkial dangtak, leh migenthei te adia vualzawlna khua hiding in deihsak thugen a, T Bethlehem khua in masawn theihna ding in hausa leh khaw sung mipi'n Pathian manghilhlouh poimoh mahmah ding ahihdan gen hi. Aban agenzelna ah MGNREGS Job Card tawh kisai ahihleh ut hunhun in bawl theihlouh a, ADCC Vice-Chairman tawh pangkhawm a, bialtu MDC tawh kithuzak a, khaw sung mipi'n Job Card aneih theihna dia panlak hiding chi a, huaiban ah, Village Recognition tawh kisai ahihleh Hill Department lam ah ngaihtuah ngai ding a, huai ding a leng, hihtheihna tan a panlakpih ding ahihdan in, District Council in Village Recognition bawl ding in Khaw thak 6 Hill Department ah kipelut mahleh tunitan in dawngna bangmah kimu nailou chi hi. T Bethlehem khua in Biakinn a bawl masak leng kipahpih thugen in khaw sung Hausa Pu Upa TK Haokip leh a Zi hausa puansan silhsak in wall clock liantak khat pia hi. Hiai hun Demmang Haokip Vice-Chairman ADCC, Thangkhomang MDC leh mipi tamtak in uap ua, nitaklam in khaw thak lopna in mipi'n annekhawm uhi.

Zomi Youth Association (ZYA) General Headquaters in December 5, 2012 nitak dak 5 in Shillong a Hotel Yalana ah ZYA Shillong Region hongkhia uhi. ZYA Shillong Region vaipaw ding kitelna leng om ngal a, President ding in Thangchinlian, Vice-President ding in LP Tuang, Secretary ding in William Siankhup, Assistant Secretary ding in Thangsianmung, Finance Secretary ding in Lamkholun, Tresurer ding in Khamzalam leh Information Secretary ding in Langbiaklian telching uhi. ZYA Shillong Region vaipaw dia telching thak a omte T Goukhomang President ZYA General Headquaters in kichiamsak hi.

Autonomous District Council Churachandpur saina in zingchiang in EBC Guest House a Mini-Auditorium ah District Level Public Leaders Seminar om ding hi. Huai hun ah, " He Restores my Soul" chih pansan in Rev. Dr. Kh Khaizakham leh Rev. Dr. JM Ngulkhanpau in thugen ding ua, Rev. S Vungminthang General Secretary EBC in Seminar a tel teng thumsak ding hi. Hiai Seminar ah District sung a, MP, Minister, MLA leh MDC teng ban ah a Zite uh telding uhi.

Bungmual a Baptist Youth Fellowship New-Lane in zingchiang zinglam dak 9:30 akipan SA road ah One Day Market bawl ding uhi. Huai hun ah van tuamtuam kizuak ding a, kuapeuh mah in Pathian gamna sepna bang a ngai a, van kizuak te leisak ding in ngetna bawl uhi.

Sports Authority of India SAG Centre Imphal in, Manipur Hill District Churachandpur, Moreh, Chandel District  leh Ukhrul District apan kimawlmi numei leh pasal kum 14-18 kikal te ading in Boxing, Judo, Weightlifting leh Wrestling a lunglutna neite laksawm uhi. Hiai ding tawh kisai in december 13, 2012 in Churachandpur District ah test om ding hi. Thuchian kimzaw theinuam te'n Nudon Enterprise PKT Street Central lamka ah kanchet theih ding hi.

Mission road Hiangtam Lamka a Ektra Super Ware ah Christmas Discount om a, ziltawpni leh kiginni teng in Dawr sung a item teng ah Christmas discount muhtheih ding hi.

GAMDANG THU.

Opposition pawl in theihtawp suah in doudal in Parliament Winter Session ni bangzah hiam a sukbuai nung un, vote lakkhawm in om a, huai ah UPA solkar in vualzawhna tang in Lok Sabha ah Foreign Direct Investment  paisuak ding in thupukna bawl in om hi. Tuni'n Upper House Rajya Sabha ah vote lakkhawm in om nawn a, huai ah leng UPA Solkar in vualzawhna tang in Retail Sector ah Foreign Direct Investment hihtheih ding in paisuak hi.

International Olympic Committee apan Indian Olympic Association  paih khiak ahih nung, tuni’n Indian Boxing Association sung a kivaipuakna diktak zoulou chih ziak in International Boxing Association tawh kizopna beisak in om hi.

Gujarat election na dia Congress ticket deih ziak a kitheihsiam louhna thu in Congress party a thanemsak louhna di’n Sonia Gandhi leh Rahul Gandhi te’n Gujarat khawpite ah election campaign neih sawm uhi.

Apaita September kha a LOUTUI PIAKNA ding bawlna dia sum crore 7200 thelthangsaktu a ngawh a om ziak a cabinet minister ahihna apat AJIT PAWAR akitawpnung in  Maharashtra Deputy Chief Minister di’n kichiamna tunin lathak hi. Opposition party BJP leh Shiv Sena pawl in hiai hun boycott uhi.

Jammu and Kashmir a Rajouri district ah kum 8 a upa class 4 simlel Numei naupang khat in a School kaina Government School nusia a, a teacher pa' Private School hon thak ah admission abawllouh ziak in ateacher Pa'n liam zena azepna thu Kashmir Police in FIR a chiamteh ban ah, athu hoihtak a suichet hiding chi'n District Chief Education Officer in naupangnu’ sungkuante khamuan hi. Hiai thu tawh kisai a akigen dan in, a teacherpa'n amah private school a kaidia a deih ziak hi in kigen hi.

Zanitak a Cairo a buaina ah mi 7 ten sihna tuak ua, Army Tank leh barb-wire zang in Presidential palace venbitna khauhsak in om hi.

Tuni’n Egypt buina thu a si leh liamte tungtang ngaihtuah phathak di’n US President Obama in President MOHAMMED MURSI a nget kawm in, suanlam bangmah bawllou a kihouna nei di’n chial hi.

Afghanistan gam mun khat ah POLIO ERADICATION nasepna a tel kum 17 vel a upa School naupang numei ANISSA kichi nitamlou paita a thah a om kichi pen, a sihziak diktak suikhe di’n Afghan President HAMID KARZAI in investigation team sawlkhia hi. Helpawlte kaplup chi a thuthang om mah leh aleh lam ah asungkuante’ thah hi a genpawl zong om zel hi.

Khawvel LUM leh VOT kikhengna thu a Doha khawpi a United Nations khawmpi ah tunin Philippines palai NaDeRev Sano in thu poimawh dang te sang in, kumteng a khaw om dan in  siatlam manawh thu poimoh ngaih pen in nei hi. Hiai khaw om dan kikhekna tawh kisai a theihtawp suah a panla chiat ding in Khawmpi a paikhawm palai te mai ah gen hi. A ban a genzelna ah, mimal deihna ziak a hiai thugen hilou a, khovel pumpi in a poimoh ngeih ziak a gen hizaw ahihdan leng gen hi.