*  Indigeneous Kuki Peoples Forum saina in Khaw Hausa te'n Chief Rights tawh kisai in Seminar nei.
* Axis Bank Churachandpur Branch in Painting Competition nei.
* District TB Department in Anti TB Drive-Cum-TB Awareness Camp neiding.
* YPA Diamond Jubilee lopna ding tawh kisai in YPA Diamond Talks-II om ding.
* Langkhanpau Guite Chairman ADCC in T Bethlehem khaw thak hong ding.
* Police leh VDF Presonnel te'n Disaster Management, Search and Rescue tawh kisai in Training neiding.
* CDSA in Inter District Sub-Junior Boys Under-15 Football Tournament a kimawl ding in Player 25 telkhia.

Tanchin Kimzaw:
Indigeneous Kuki Peoples Forum (IKPF) saina in tuni sun dak 12 in M Songgel Youth Club Hall ah, One Day Seminar on Chief Rights neih in om hi. Hiai hun ah Resource Person Rev. RR Chothe President Indigeneous Kuki Peoples Forum in hausa te tanvou leh hamphatna tawh kisai sinsak in khaw hausa hunkhop tel uhi.

India gamsung pumpi a Axis Bank Branch teng in " Green Way of Life" "Save Water.Save Life" leh "One Earth One Family" chih thupi pansan in naupang kum 7 akipan 12 kikal te ading in Painting Competition nei uhi. Axis Bank Churachandpur Branch inleng tuni sunnung dak 3 in Painting Competition nei ua, huai ah, nupang kum7-12 kikal 45 tel uhi. Telkhiak a omte State level leh National level a elimination round ah telthei ding uhi.

Dr. T Pumzathang District TB Officer apan thusuah kimu dan in District TB Officer leh a Staff te'n TB natna doudalna ding tawh kisai in zingchiang akipan Primary Health Sub-Centre leh khaw tuamtuam ah Anti TB Drive-Cum-TB Awareness Camp neih sawm uhi.

Young Paite Association (YPA) Diamond Jubilee lopna March 2013 a om ding tawh kiton in December 9, 2012 sunnung dak 1 akipan sunnung dak 3 sung in EBC Guest House Mini-Auditorium New-Lamka ah YPA Diamond Talks-II om ding hi. Tutung in YPA motto te lak a khat "Panpih Ngaite Panpih" chih pansan in houlimna neih hiding hi.A telnuam te ading in seat tamlou awng ding a, a lunglut te teltheih ding hi.

Tuibuang TD Block sung a khaw thak T Bethlehem khua honna zingchiang sunma dak 11 in om ding hi. Hiai hun ah Langkhanpau Guite Chairman ADCC Chief Guest apang in khaw thak hong ding a, Rev. NT Lalcha in Pathian kiang ah thumna in landing hi.

Directorate of Civil Defence saina in zingchiang akipan December 31, 2012 tan daih ding in Tuibuang a District Training Centre leh Singngat Police Station ah Churachandpur District sung a Police leh VDF personnel 1080 te ading in Disaster Management Training on Search and Rescue Training om ding hi. Training sung in Churachandpur Police Station, Henglep Police Station, Thanlon Police Station, Parbung Police Station, Sangaikot Police Station leh Singngat Police Station a Police leh VDF Personnnel te telding ua, resource person tuamtuam in sinsak ding uhi.

Churachandpur District Sports Association (CDSA) in Churachandpur District min a Inter District Sub-Junior Boys Under-15 Football Tournament a kimawl ding in, mi 25 telkhia a, telkhiak a om players te zingchiang zinglam dak 7:30 a Lamka Public Ground a ki-report ding in CH. Lhunchon General Secretary CDSA in theisak hi.

Sports Authority of India SAG Centre Imphal in, Manipur Hill District Churachandpur, Moreh, Chandel District  leh Ukhrul District apan kimawlmi numei leh pasal kum 14-18 kikal te ading in Boxing, Judo, Weightlifting leh Wrestling a lunglutna neite laksawm uhi. Hiai ding tawh kisai in december 13, 2012 in Churachandpur District ah test om ding hi. Thuchian kimzaw theinuam te'n Nudon Enterprise PKT Street Central lamka ah kanchet theih ding hi.

Mission road Hiangtam Lamka a Ektra Super Ware ah Christmas Discount om a, ziltawpni leh kiginni teng in Dawr sung a item teng ah Christmas discount muhtheih ding hi.

GAMDANG THU.

Punjab police Assistant Sub-Inspector Ravinder Singh’ tanu nilaini in Amritsar Urban bial a Akali Dal Party Secretary Ranjit Singh Rana in engbawl chih ziakin tunin ASI Ravinder in Ranjit Singh tenna a va phak leh, Ranjit Singh in thau in a police pa’ khe a kapliam sak zawh in innsung ah thautang valak beh in kaplum hi. Mit a muten police station naipen phone mahle uh ahun tak a dawnna a omlouh ziakin, ASI hinna humbit man hinawnlou hi. Tu in tualthat tel in mi 2 mat in om ua, midang 2 mat ding in police in zonglel hi. Police officer hial in ama tanu leng vengzou nawn lou ahihleh,Punjab ah kua in asanggamnu/atanu lauhuai a pan vengbit zou ta ding hiam chi in Punjabi te lauthawng mahmah uhi.

Seppatni zan in Mumbai khawpi Dombivali vengsung a pasal naupang 5 in nungak a thawh uh, kum 19 a upa khat in a khouh ziak in huai pa that uhi. Tualthatte lak ah mi khat kum 18 pha mah le a dang 4 te bel a kum uh tawm mahmah lai hiin kigen hi.

Gujarat state election pailel ah Congress ticket piak a omlouh ziak in Deputy Chief Minister lenlui Shri Narhari Amin in zanin Congress party nusia in BJP zom a, tuni’n BJP in amah laklutna thupitak in nei uhi.

Tuni December 6, 2012 ahih tawh kiton in Dr. B.R. Ambedkar sih champha 55 veina mitamtak in Mumbai a Ambedkar phawk gige inn ah zahna va pia uhi.
Parliament Winter Session pailel ah zan in

Lok Sabha FDI voting lawhchingtak in zawh ahihtawh kiton in tuni’n Rajya Sabha ah FDI debate kipan a, zingchiang in voting nei ding uhi.

Tualthat a ngawh a om McAfee Anti-Virus Software neitu John McAfee in Keliz gam apan phalnei bei a Guatemala alut ziakin police in man a, John ahih leh November kha in a ui khawite a innvengpa’n ahuat ziak in athahsak nung sawtlou in a innvengpa thah in a omna thubuai nuse nuam in Guatemala gam ah pemlut ding ut ahih dan gen hi.

Cairo khawpi ah petrolbomb leh sungtum zang in President deih leh deihlou kikal a keibeihtuahna ah mi 4 si in mi 400val liam ua, tuabang kal ah, Muslim kulmutte thuzawh solkal in langpang pawlte tawh kihou theihna ding ngaihtuah lel hi.

North Sea ah longpi Corvus J tawh akiphutkhak ziak in tuipi ah tummang Baltic Ace kichi tuipi long a nasemmi 3 suakta mahle uh mi 4 ten sihna tuak ua, midang 7te muh hinaikei mah leh damzou dia gintak nawn louh ziak in long leh lenna zang a  Neitherlands in a zonna tunin tawpsanta hi.

Prince William zi, Kat Middleton damdawi inn a om nurse duty te tungtawn a hospital ah a dinmun bangkim nurse ten Australia pansan a FM radio disc jokeys te a hilhkhakna thu uah, hospital thuneiten amau pilvang zawhlouh ziak hi a gen in ngaihdamna ngen uhi.

Philippines a Bopha Typhoon ziak in misi 300 valta a, mihing 400valte omna theih zawhlouh ahih ban ah inn neilou sangtamtak kibehlap hi’n thu kiza hi.

Zan in tornado hattak in New Zealand khawpi lian pen Auckland anuai ziak in mi 3 in sihna tuak ua, inn tamtak kisia hi.