* PTC General Headquaters in Special Assembly nei.
* District Hospital ah Naupang damlou tam.
* United Brothers General Headquaters in General Conference zousiang.
* Kwakta ah Direct Bus Accident in Bus Handyman Thianmuanlal Si in midang 4 liam.
* EBC saptuam makai dia telching thak a omte mohpuakna kihawm.
* Angels' Place in 7th Annual Day zang ding.
Tanchin Kimzaw:
Paite tribe Council (PTC) General Headquaters in tuni zinglam dak 9 in YPA hall Hiangtam Lamka ah " Kikhekna" chih pansan in Special Assembly nei uhi. L Tualkhanhau President PTC General Headquaters in PTC flag kaipalh in Rev. G Haukhomang Chief Adviser YPA General Headquater in thumna in Assembly honna nei hi. G Vungsuanthang Chairman Central Working Committee PTC General Headquaters in PTC Preamble simkhia a, Business Session hun ah, Assembly Speaker in Langkhanpau Guite Central Working Committee Member and Chairman ADCC pang a, Deputy Speaker in John K Ngaihte Central Working Committee member pang a, Recording Secretary in K Chinkhansuan General Secretary pang a, Assistant Recording Secretary in H Pauzalal Secretary External pang a, Propose Paite Tribe Council Constitution leh Paite Customary Law and Practice tawh kisai sawttak genkhawm ahihnung in pomkipna nei uhi.
District Hospital Churachandpur ah Naupang damlou tam mahmah in Chil Ward awng manlou phial in dim gige hi. Child Ward a Nurse te gendan in tulai in naupang awmna tam mahmah in, awmna a dampahlouh chiang in sungkhoh in zui a, damdawi inn a admit ahihchiang un a tangpi in sungkhoh hita chi uhi. November 2012 sung in Child Ward ah naupang damlou 143 admit in om hi.
Tangpua, Tombing, Vualnam, Laingek leh Hualngou behte kikhaikhawmna United Brothers General Headquaters in zan akipan in YMA hall Hmuia Veng ah General Conference Cum Election 2012 nei uhi. Hiai hun ah Vung D Tombing (Retired) Director, Higher Education and University, father of United Brothers in pang a, T Awnzagen makaih in United Brothers Executive Member ding kitelna nei uhi. Tuni inleng General Conference sutzop in om a, Vung D Tombing fathers of United Brothers, Rev. Khen P Tombing Chief Co-ordinator PCI (R), Pumsiam Vualnam leh V Khaikhanmung MDC in thugenna hunzang uhi. Tuni'n Cultural programme tuamtuam nei in nitaklam in annekhawm uhi.
Lamka leh Imphal kikal a Direct Bus service Mn-01-1824 Ibudhon Express Bus tuni zinglam dak 9 vel in Lamka akipan Imphal zuan a tailai Kwakta ah Accident in Bus Handyman Thianmuanlal (17) S/o Liankhup Vaiphei of New-Lamka Gouchinkhup Veng Si a, passenger mi 4 liam uhi. A liamte Lamka damdawi inn puaktung ahihnung un, Kwakta a om Abdul Kalam tanu 2 Asina (12) leh Apabi (8) a gimdeuh ziak un Imphal ah refer in om ua, midang 2 Khupkhohen of D Phailian zi Ngaineikim (50) leh a tanu Jonny (26) te bel Lamka damdawi inn ah etkol in omlel uhi. Hiai tuahsiatna sihna tuak Thianmuanlal ahihleh Ebenezer Academy a Class 7 Exam zou a Bus handyman a va pang zual in, hiai bang tuahsia tuak hidan in kigen hi. Hiai Case Moirang Police te la in FIR No. 120(12)MRG, PS U/S 279/338/427/304-A IPC chiamteh uhi.
Evangelical Baptist Convention (EBC) in Kumsim Khawmpi 64veina a kitelna tuamtuam a neihnung in tuni'n telching a omte mohpuakna piak in om uhi. Rev. L Khamkholun in Director of Mission lending a, Rev. K Kamchinkhup in Director of Ministries lending a, Rev. V Thangkhangin in Director of Institution lending hi. Rev. Paukhanmang Guite in Lamka North Divisional Superintendent hihna lending a, Rev. S Langzakham in Lamka South Division Divisional Superintendent hihna lending hi. Rev. S Ginmalsawm in Imphal Division Divisional Superintendent hihna lending a, Rev. V Khamvum in Singngat Divisional Superintendent hihna lending hi. Rev. N Tuanglang in Thanlon Divisional Superintendent hihna lending a,Rev. E Paukhanlian in Vangai Divisional Superintendent hihna lending a, Rev. M Zalian in Mizoram Divisional Superintendent hihna lending hi. Rev. N Khaikhansong in Manipur Field Superintendent hihna lending a, Rev. P Paukhanmang in Karbi Field Superintendent hihna
lending a, Rev. N Thawndoulian in Nepal Field Superintendent hihna lending hi.
Angels' Place in zingchiang sunma dak 10 in 7th Annual Day function zang ding uhi. Huaihun ah Student te'n entertainment item tuamtuam lak in Dr. R Sanga Co-ordinator, Angels' Place in Gospel Message gending hi.
27 Sector Assam Rifle leh Churachandpur District Sports Association (CDSA) saina in zingchiang in Lamka Public Ground ah The 4th Thangzalet Haokip Memorial Open Football Tournament kipan ding hi. Hiai Tournament ah Club 23 kimawl ding ua, kumlui a finalist Lamka Sports Club leh M Songgel Youth Club te quater final lutsa dinmun in om ding uhi. Club dang te ahihleh group a kikhen in group khat ah team 3 zel om in group 7 in kikhen ding uhi.
Delhi government etkai Sushrut Trauma Centre ah zan zingkal dak 6:40 vel in Intensive Care Unit ah oxygen kiningchin louh ziak in damlougim mi 4 in sihna tuak ua, hospital thusuak dan in oxygen supply contractor in training lalou mikhat oxygen supply enkai dia a sepsak ziakin hichi bang vantahna piang ahihdan thusuak in taklang hi.
Madhya Pradesh state Betul district ah kal 2 paita in class 4 simlel kum 9 pha pan pasal naupang khat school ah bucket sutam chih ziak a gawtna a tuah, thuakzou nawnlou in zanin Bhopal hospital ah sita hi.
India kimawlmite’ kilawikhawmna Indian Olympic Association sunga vaipawte’ dukdak louh ziakin, International Olympic Committee tawh akizopna zahlaak huaitaka mansuah in om a, huai in kimawlmite Olympics leh Olympic tawh kisaihpih kimawlnate India ai-oh in kimawl phallou dia, International Olympic Committee min in akimawl lebel medal ngah bang hileh leng, India flag leh national anthem zang thei tuan lou ding suak hi. IOC apan IOA in recognition amuh nawn mateng India gam in Olympics zintun theinawn lou ding hi.
Brazil sepaihte’n ten khamtheih hih zongsang migiloute matkhiak louhna dia golhguk la Brazil police 60 mankhia ua, huai tawh kiton in Rio De Janerio khawpi apat military commander in hichi bang a kigolh thuneihna sangzaw len police sung ah matkhiak beh ahih leh a sepna ua pat tawpsak hiding chi’n thupuan bawl hi.
Colombia solkal in hun bangtan hiam apat helpawlte galvan tuamtuam siing 4 val amat te uh, khawtaang a dia kisam school leh hospital te lamna a zat diin, ton 100 val a gik sik hoihmahmah a kibawl thau tamtak innbawlna vanzat diin sungsak hi.
Hurricane 5 tawh kikim Philippines simlam a typhoon in tunitan in mihing hinna 100val alaak banah tenna inn tamtak asuksiat taak ziakin mihing a siinga simte mangbangtak in omsak hi.
Egypt gam constitution thak leh President Morsi deihlouha kiphinna in tawp lam manoh lou a, zanitak in Cairo presidential palace kong ah leng mipi leh police naktak in kibei tuah nawn uhi.
Turkey ngetna bang in NATO sepaihten kilometer 900 val a sau Turkey leh Syria gamgizul ah Syria gam apat missile leh bomb kap thei lenna hong lut sawmte hepkhiakna diin galvan tuamtuam patriot missile tel in missile batteries leh radar te koih ta ding.