* Lailam Veng a EBCC Bethel in Sannem Aw Nite zang.
* Sports Authority Of India SAG Centre Imphal in Boxing, Judo, Weighting leh Wrestling ading in Trail-Cum-Selection nei.
* Ginsuanhau MLA in Muallum khua ah Blanket hawmna sunzom in, Muallum khua ah Electric hong lut kipahpihna in suang hong.
* Singngat khua ah Singngat Block ZSF Election om ding .
* Dorcas veng YPA hall ah "Pankhawm Hatna" kichi Film honna om ding.
TANCHIN KIMZAW
Lailam veng a EBCC Bethel in tualsung a Pathianni teng a kithuzakna dia a bawl Newspaper Sannem Aw kichi in tualsung ah Sannem Aw Nite zang in mahni laphuah sak leh kidemna nei in zan nitak in kipahman leng pekhe ngal uhi.
Nudon Enterprise intekna nuai a Sports Authority of India SAG Centre Imphal in, Manipur Hill District Churachandpur, Moreh, Chandel District leh Ukhrul District apan kimawlmi numei leh pasal kum 14-18 kikal te ading in Boxing, Judo, Weightlifting leh Wrestling a lunglutna neite training ding a laksawm in, tuni zinglam dak 9 in Bungmual playground ah Sports Authority of India SAG Centre Imphal apan Official te'n trail cum selection hong nei uhi.
Ginsuanhau MLA 60-Singngat Asembly Constituency in abial sung a meithai te lak a blanket hawmna sunzom in tuni sun dak 12 in Muallum khua ah, muallum leh a kim-le-kiang a khua te ading in blanket hawm nawn hi. Hiai hun Grace Zamnu MDC Muallum inleng uap a, aman a thugenna ah, Muallum khua ah hausa pa phalna tawh NLCPR nuai ah school building kibawl ding chi a, Muallum khua ah electric meivak omta ahihleh computer training centre khat bawlkhiak kisawm chi in, development work a banban in hongpai ding a, thumna in phok touzel ni chi hi. Aban a genzelna ah MLA pu in thil hoih a hihna tung ah kipah dan siam ding in mipi te kiang ah ngen hi. Ginsuanhau MLA in a thugenna ah, Govt. apan sanction om ziak a blanket hawm hilou a, MLA ahih a kipan tunitan a, a khaloh khakhat a sing 7 khawl a meithai te khual a blanket hawm ahihdan gen in, constituency sung ah meithai blanket tangkhalou omlou ding a, a hong pai zoulou te leng piak vek ding chi hi. Meithai te ki-ngaise mailou a, christmas hun ahong piang ding Jesu Krist a muannna koih ding in ngen hi. Hiai hun ah MLA pu Zi Thian ching leh Grace Zamnu MDC Muallum in Meithai 145 te kiang ah blanket pekhia uhi. Hiai Programme zawhnung in Muallum khua a electric meivak hun sawttak a omlou nung a bialtu MDC leh MLA panlakna ziak a electric meivak hong om kipahpihna nei uhi. Hiai hun ah Ginsuanhau MLA in Muallum khua a electric meivak a lut chiamtehna suang hong in, Right Rev. Ginkhanmung Bishop MELC in Pathian kiang ah lan hi. Ginsuanhau MLA in a thugenna ah, Manipur Govt. hoih ziak in RGGVY nuai ah Muallum khua in electric meivak muta a, maban ah Singngat Assembly Constituency sung a electric mevak omlouhna teng ah Christmas ma ngei a electric vaksak sawm ahihdan gen hi. Hiai ding tawh kisai in chief minister leh a kisaipih power department tuamtuam tawh kihouna kinei khin chi a, zingchiang inleng power department official te tawh kihouna kinei laiding chi hi. Aban agenzelna ah, Singnat Assembly Constituency sung a khaw teng a electric transformer koihna ding in proposal approved hita chi a, Muallum leh Sangaikot khua ah, tui haksat ziak in Handpump thuah hiding chi hi. Muallum khaw sung a development om theihna ding in kituahna poimoh chi hi. Muallum khaw sung a saptuam nih om te kikhen mailou a kituahtak a khawsa khawm ding inleng ngen hi. Aban a genzelna ah, zingchiang zinglam dak 8 in Tuaitengphai area ading in Tuibul khua ah Meithai te a ding in blanket kihawm nawn ding a, December 15, 2012 in Sangaikot khua ah kihawm nawn ding chi hi.
Zomi Students Federation (ZSF) General Hedquaters saina in december 15, 2012 sunma dak 10 in ZSF Singngat Block Office ah ZSF Singnat Block 2012-2015 sung vaipaw ding kitelna om ding hi. Huai hun ah President, Secretary leh Finance Secretary ding telding ua, S Kapkhanmuan President ZSF General Headquaters in telching thak a omte kichiamsak ding hi.
Ahongtung ding December 14, 2012 sunma dak 11 in YPA hall Dorcas veng, New-Lamka ah "Pankhawm Hatna" kichi film honna om ding hi. Huai hun Manipuri film star minthang taktak Gokul, Abenau leh adandang telding uhi.
GAMDANG THU
Gujarat state first phase election tuzinglam dak 8 in kipanta hi. Hiai first phase election ah candidate 177 pha in, BJP ten tutung election ah leng majority lak nawn ding kinem mahmah uhi.
CNN IBN channel in asai, Indian of The Year 2012 award zanin Chess kimawl siam Vishwanathan Anand kiang ah piak in om hi. Hiai hunzatna ah Special Achievement award piak a om Boxing kimawlsiam Mary Kom leng kipaklua in kap zawzen hi.
Pakistan Interior Minister lenlel Rehman Malik in India hong phak tawh kiton in 26/11 Mumbai attack leh kum 11 paita a Parliament hong luh helpawl Pakistan gam a kibulel te, a kin thei lam a mankhia a India ah thon di’n Home Minister Shinde in ngen hi.
A sita Bal Thackeray phawk gige na Shivaji park a kibawl pen, Brihan-Mumbai Municipal Council in Shivaji Park pawlam ah tuah khiak ding chi mah leh, Shiv Sena pawl in tulel in a omna mun a pat feet 20 agamla ah kiinphei sawm zaw uhi.
Kum 2003 pek a neih leh lam thu ah Samajwadi Party makai Mulayam Singh Yadav atateng tawh hek a aomna thu CBI suizuina beitheilou pen tunin Mulayam sungkuan te’n hiai tungtang vengsakna dia ngetna apiaksa uh Supreme Court ah ngaihtuah sak in om hi. Mulayam gen dan in, Congress in hiai thubuai pen Samajwadi party a ut hunhun a Mulayam a deihkaih theih nadia khau in a gakna ahih ziak in vengsak hilou dan in gen hi.
Super Storm sandy thuakte panpihna leh kitungdin nawnna di’n tunin New York khawpi Madison square garden ah concert neih in om hi. Hiai hun ah lasa siam leh band minthang foo fighters, rolling stones leh springstines tel in band tuamtuam in perform uhi. Super storm sandy in bel mihing hinna 100 val ana la hi.
South West England lam a School pasal naupangte class room ah gilou mahmah chih ziak in, sinsikna tuam biik kha 6 sung daih ding pat pih in om uhi. Gamtat khawhei kilawm, tel in mahni kitoudelh didan leh feltak a om dan kisinsakna neisak uhi.
Myanmar gamsung Rakhiane state ah Rahinga muslim leh Buddhist sahkhaw mite kal a buaina kha 6 nunga UnitedNations humanitarian affairs secretary etkhiakna apat kiza dan in, Myanmar government in galtai Rahinga muslim te ngaihsak hetkei mahleh leh alangkhat a Buddhist galtaite tuambawltak in nek leh dawn ding akiching pia chi hi. Humanitarian affairs secretary in agenbeh zelna ah Myanmar solkal in gamdangte muh a panpih taak ahih nadin, zahlaak in a om ma Rakhiane muslim leh Buddhistte kalah lemna nasep a pat ding chi hi.
British scientist te’n tulai in Antartica continent sung mun khat ah tuisuansou zang in kilometer 3 a thuk vukkhal nuai ah kum asinga sim bangmah tawh akisukha ngei nailou diil neu khat sung ah bang bang hinna nei ganhing om hiam chih sui khiak tum in sun leh zan in na asep uh, kal nawn sunga zawh lamen uhi.