*SBI Official-te'n Lamka Hong Pha Uh; SBI Bracnh Tuamtuam Vehna Nei
*Mat a om KNF (N) Cadre Khat Jail ah; Khat pen Juvenile Home ah Koih Uh
*DYASO in 10-Days School Level Bharatiyam Training Programme Nei Ding
*MNREGS toh Kisai Meeting Om
*CDSA Saina in Super Division League Kipanpahta Ding
*Hill House Tax 2013-14 Toh Kisai Meeting Om Ding

Tanchin Kimzaw
***Tuni zinglam dak 10:00 in Deepak Kumar Lalla, Deputy General Manager, Administration Office, Shillong leh James Thatlinga, Assistant General Manager, Regional Business Office, Babupara, Imphal-ten Lamka hongpha in, State Bank of India, Churachandpur branch leh, district sung a SBI branch tuamtuamte vehna nei uhi. Official visit toh kisai, Deepak Kumar Lalla, Deputy.General Manager in a gendan in, mun tuamtuam a om SBI branch-te nasep dante en khia leh a kisamte etchetna ding a hong pha uh hi'n gen hi. Huai banah, Churachandpur district mipite'n bank toh kisai a haksatna a tuahte uh beisakna dia naktak a panla ahihdan leh tunung kha 3 sung a CCpur District sung ah ATM Booth 5 koih behlap ding ahihdan gen a, tua banah, ATM, sum laak khiakna kia hilou, Cash Deposit Machine (CDM) -te tanpha leng koih ding ahihdan gen hi. Huai banah, Churachandpur district sung mah ah, kha 3 sung a Self Service Kios (SSK) kichi, bank va phak ngai lou a, ATM booth kibang mahni a pass book update theihna ding tanpha leng koih ding ahihdan gen a, hiaite tungtawn a customer-te lungkimtak a koihsawm uh ahihdan gen hi. Deepak Kumar Lalla, Deputy Generl Manager, Administration Office, Shillong in a gen zelna ah, tulel in Kishan Credit Card (KCC) kichi patkhiak in om a, hiai sang a policy hoihzaw, KCC kichi mah policy thak khat patkhiak hinawnta ahihdan leng gen hi. James Thatlinga, Assistant General Manager, Regional Business Office, Babupara, Imphal in ahihleh, Churachandpur district sung ah SBI branch 3, SBI Churachandpur Branch, SBI Tuibuang Branch leh SBI Pearsonmun Branch-te om a, mipiten, SBI Churachandpur branch kia phalou a, branch dangte leng a tamthei lam a phaak leh zat poimoh ahi chi in gen hi. Huai lou in, tuma hun bangtan hiampaisa apan, SBI CCpur branch in currency chest ding a bawl uh zouta ua himahleh, RBI-te munpi, Mumbai lamte toh kithuzakna a hoih chiah louh ziak a zat theihlouh a om himahleh, tuni a official-te'n a hongphaak dungzui un, amaute mahmah in hiai currency chest zat ahihtheihna ding a panla a, sum lam toh kisai a SBI/CCpur Branch in buaina a neih nawn louhna ding a RBI in SBI/CCpur branch a direct a sum peta ding ahihdan gen uhi.

***Police thusuak kingah dan in 46-Assam Rifles-te’n apaisa July 8, 2013 sunnung in Tuibuong a Canan Veng ah KNF(Nehlun) active cadre 2 - Kaiminlal (18) s/o Lunjang of Bongbal Khullen,Thoubal District leh Mangkhohao (22) s/o Lunkholam of Bongbal Khullen,Thoubal District mankhia ua, amaute apan in 9 mm pistol 1,magazine 1 leh atang 3 mukhia in Lamphel Police Station ah pekhia uhi. CCpur Police-te’n Lamphel Police-te apan in case lasawn ua, court ah mi nihte a dinsak nung un, court in July 15, 2013 tan Police khut a omdi’n thupiak bawl hi. Zan in Police-te’n mi 2-te pawkhia ua, Mangkhohao pen Jail a om di'a thutankhum ahihman in Police te'n Jail ah koih ua, Kaiminlal ahihleh kum ching nailou chih ziak in Juvenile Home ah Police-te'n koih uhi. KNF(Nehlun) cadre 2 tung ah Police te'n FIR No.61 (7) 2013 CCP-PS U/S 400 IPC & 25(1-C) Arms Act registered uhi.

***District Youth Affairs & Sports, Churachandpur saina in August kha tawp in district sung a school 2 ah, 10-Days school level Bharatiyam Training Programme om ding hi. Hiai ding toh kisai, Lunkhosei Haokip, DYASO in thusuah a bawl kimu dan in, district sung a student numei-te physical fitness lam ngaih poimohna ziak a hiaibang a programme sai a om ahi a, lunglutna nei school teng in, August 15, 2013 tan a naupang-te min list 50 chiang toh application teng DYASO office ah submit theih ding hi. Training programme zoh in District Level Bharatiyam competition om ding a, hiai a championship ngahte, State Level Bharatiyam Competition ah district ai-oh in kuan ding uhi.

***India gamsung pumpi ah Staff Selection Commission (SSC) saina in Prasar Bharati a Technician leh Engineering Asistant a sem ding laakna exam hong tung ding July 21, 20132 in om ding hi. Hiai ding toh kisai in FR Tariang, Deputy Director, Regional Officer, NER, SSC in thusuah a bawl kimu dan in, Churachandur district ah leng SSC exam centre om mahleh, tutung a exam ding pen ah candidate a tawm luat ziak in, Imphal a te toh combine in om a, Imphal centre ah exam khawm ding chi in taklang hi.

***Tuni sunnung dak 12:30 in DC office, Conference Hall, ah MGNREGS toh kisai meeting neih in om hi. Meeting hun ah, Ms. Jacintha Lazarus, IAS, Deputy Commissioner & Executive Director, DRDA makaih in, SDO, BDO, PO, SO, AE/'DRDA banah, MGNREGS toh kisai a kisaikhakpihte tel uhi. Meeting toh kisai official lam apan thu kimu dan in, MGNREGS 2012-2013 4th phase ah ni 16 tha ding pen, Block teng in, amau block sung a khua omte ah singnou suan dingdan genkhawm ua, tua banah Lamka leh Tuibuang TD Block-ten, kum paisa te a catchment area a singnou a suan mah bang un, tutung in leng catchment area-te ah singnou suanna nei nawn ding ua, block dangte'n ahihleh, amau utna munmun ah suan ding ua, sing leng a utut uh a suan ding uh chi a genkhawm in, hiai plantation ding toh kisai, Forest leh Agriculture department-te toh kithuzaak tuah uh ngai ding hi. Official-ten a gen zel dan un, ni 16 tha toh kisai leng sanction bawl khinta ua, fund leng released theih phial hita a, a released khiak theihna ding in a concerned BDO teng in plantation neihna ding toh kisai a, laipoimoh omte Excutive Director DRDA kiang a submit zoh hunhun ua released ngal hiding in gen uhi.

***Churachandpur District Sports Association (CDSA) saina in hongtung ding July 20, 2013 in Lamka Public Ground ah (L) T. Lianboi Simte, Super Division League, 2013 kipan ding hi. CDSA apan thu kiza dan in, July 20, 2013 sunnung dak 2:00 in Super Division League honna om ding a, huai hun ah, Churachandpur Joint Phillanthropic Organisation leh Manipuri Filmstar-te kikhai khawmna Maniwood-te'n exhibition match nei ding uhi. Hiai hun ah, M.Prithvi Raj, Parliamentray Secretary, Govt. of Manipur in chief guest hihna toh uap ding a, Limkholet Haokip, President KKL, GHQ, T.Goukhomang, President, ZYA GHQ, Mangcha, President YMA GHQ leh Zothanmawia, President HYA GHQ ten Guest of Honour hihna toh uap in, Jacintha Lazarus, IAS, Deputy Commissioner, Churachandpur in Functional President hihna toh uap ding hi. Super division league hon ni in exhibition match kia om ding a, huai hun ah, Manipuri filmstar teng kimtak in hong tel ding ua, amaute lak a lasiam tuamtuam te'n leng lasakna toh hong uap ding uhi. Super Division League toh kisai ahihleh, July 20 in hon khiak hiding himahaleh kimawlna taktak bel, July 22, 2013 in kipan ding a, tua ah Lamka Football Club (LFC) leh New Lamka Youth Club (NLYC)-te'n sunnung dak 3:00 in opening match nei ding uhi. Exhibition match a ding in CDSA in VIP seat bangzah hiam koih sawm ua, huai seat-te zingchiang apan in CDSA office ah, zinglam dak 8:00 apan dak 10:00 kikal in sum 100/- pia in ticket lei theih ding hi.

***Jacintha Lazarus IAS DC/CCpur makaih in zingchiang sunnung dak 2:00 a' office chamber ah Hill House Tax 2013-14 toh kisai meeting om ding hi. Hiai meeting ah SDO Thanlon, SDO Singngat, SDO CCpur, SDO Henglep leh SDO Tipaimukh-te tel ding ua, amaute'n meeting hun ah latest hill house tax assessment a tawi uh ngai ding hidan in S. Khaikhopau Ngaihte Branch Officer DC Office in tuni a thusuah a bawlna ah taklang hi.

Gamdang Tanchin
***Mexican solkal in khamtheih a sumdawng leh migilou mat ding a most wanted a a koih uh Miguel Angel Trevino Morales tuni phalvak in Mexico leh US gamgi zul ah matkhiak in omta hi. Miguel Trevino Morales bel Mexico a drug cartel minthang mahmah leh hat mahmah, mite'n akihtak pen uh Zetas, Z-40 kichi a heutupa leh makaipa ahi. Mexican solkal thupuangtu Eduardo Sanchez in, Mexican Navy-te'n Trevino Morales mankhia uh ahihdan gen in, Trevino matkhiakna ding in warrant sagih kisuah khia a, a tung ah investigation 12 val pailel hi'n leng gen a, khamtheih zuakna leh thilsual hihna kia ah ngawh in omlou a, tualthahna, mi pimangna, guktakna, mi soisakna, gelgawtna leh adang tampi a tung ah ngawhna om hi'n Mexican solkal thupuangtu in gen hi. Mexican Marine-te'n Zetas phutkhiatu a kaplup nung un Miguel Angel Trevino Morales in 2012 apan in Zetas pawl makaih hi. Zetas pawl a pang mi gilou tamzawte bel Mexican security forces tuamtuam a ana panglui tamtak ahi ua, himahleh, Morales in military background bangmah neilou hi. A huhamna, poisak neihlouhna ziak in minthang mahmah a, lauh mahmah in om hi. Mi thahna, mi pimangna leh soisakna thubuai tamtak ah Miguel in kigolhkhakna nei hi'n kigen hi. Trevino Morales matkhiak a a omna tuh goldmine tou khia kha toh kibang in kikoih hial ua, amah apan in Drug cartel-te douna ding tampi suikhiak leh theihkhiak theih a om ding in kigen hi. US in Morales tuh wanted a a koih ahi a, a lubuk ah bounty $ million 5 khu kiihkeih hi. Tuaziak in, a tungthu US ah ngaihtuah ding a puaklut himaithei in kigen hi.

***Tunaizek a a vaihawmna leh thuneihna, Egyptian President ahihna apan paihkhiak a om Mohamed Morsi gumtute'n a dinmun ngei leh a thuneihna piakkik nawn ding phutna leh nawhna in Cairo khopi ah kiphinna sunzom zel lai ua, kiphinna sousang ziak in security-te toh kinawktuahna piang a, mi sagih a sih banu'ah 260 vel in liamna tuak uhi. Morsi gumtu leh supporter-te ni bangzahhiam sung a thagumsuahna neilou ding a a kikhamdaih zawh nung un, tu'n puakzakta hi. Morsi supporter-te'n Cairo khopi a lampi poimoh mahmah 6th October Bridge khaktan in, Ramses Sqaure leng khaktan in sit-in protest neih sawm ua, huai apan in police-te tawh kinawktuahna kipan hi'n kigen hi. Vaihawmna leh thuneihna apan Morsi paihkhiak a om nung nipikal nih sung amah supporter-te Cairo khopi mun tuamtuam leh abik in, Cairo University kiim ah giaklut top in kiphinna sunzom ua, Egyptian President ahihna Morsi kiang ah piakkik ahihma teng kongzing nusia lou ding uh hi'n puang uhi. Egypt solkal thak a interim President, Vice-president leh Army Chief banah mi poimoh tuamtuam toh Egypt maban ding leh US toh a kizopna uh genkhawm ding in US Deputy Secretary of State William Burns, Cairo ah taam lel hi. Himahleh, Muslim Brotherhood-te'n US Deputy Secretary toh kimuhna leh kihouna neih ding nial ua, kimuhpih utlou uhi. Tu'n, Egyptian solkal thak in Muslim Brotherhood makai 300 val mat ding in thupiak bawl a, assets a neihte uh leng laksak leh hentang sakna ding in order suah khint a, tuaziak in, Egypt buaina tuh veng zok ding in kilang lou hi.

***Pakistani Taliban thusuak in a gendan in, Syria a Bashar al-Assad solkal sepaihte douna a Syrian opposition rebel-te panpihna leh huhna pia ding in, Pakistani Taliban fighter tamtak Syria tungta ua, tu nipikal sung in tamtak tung behlap lai ding uh chi hi. Syria kidouna ah Lebanon apan Hezbollah helpawlte va kigolh a, Syrian Army-te toh pangkhawm a opposition rebel-te a doukhawm ua pan in Syrian kidouna tuh sectarian war in pai hi. Pakistani Taliban-te'n Pakistan ah leng Shia Muslim-te naktak in humbitna leh venna pia ua, tuaziak Syria a Shia Muslim community-te kiang a huhna leh zathuapna pia ding a kisa uh hiding in kigen a, Syria a Hezbollah-te va kigolhna pen counter-balance bawlna ding leh, Sunni Muslim-te tung a phuba lak tupna toh Syria ah lut uh hiding in muanmawh in om a, thuchiantak bel theih hinailou hi. Huan ah, Tehrik-e-Taliban-te tuh khovel theih a kiphoukhiak ut ziak uh leng hiding a gingta pawl om hi.

***India in tukum in ngeina banglou deuh in tuktui, monsoon vuah tamtak mu baih a, tuaziak in India mallam state Uttarakhand ah siatna leh manthatna huaisia mahmah khalui June in ana tungta hi. Tuilian, menchim leh leitolh thuakkhate hutkhiakna paizom zellai a himahleh tunitan in, hutkhiak louh om nawn ngellou hi'n kigen a, muh theihna tan ah siluang muhkhiaklouh leh siluang pholhlouh om nawn kei mahleh siatna ziak a mangthang mihing 5,748 phazou a, amaute solkal in si bang in chiamtehta a, a' innkuan naipente kiang ah compensation piak hiding ua, himahleh death certificate bel piak hinailou ding uhi. India dan dungzui in, siluang phawtlouh leh muhkhiaklouh tuh mimang bang a koih ahi a, koilai mun hiam ah si hita lehzong kum sagih sung a dam lai bang a ngaih hiding a, tua nung in a luang muhkhiak ahihkeileh death certificate piak hipan ding hi.

***Dhaka War Crime Tribunal in, 1971 a Bangladesh War of Independence a omlai a, war crime a ngawh a om Jamaat-e-Islami party makai Ghulam Azam tung ah thutanna bawl in kum 90 sung suangkul tang ding in thutanna bawl a, tua ziak in Jamaat-e-Islami supporter-te lungkimlou in Dhaka ah kiphinna nei ua, police-te'n thau a khahna u'ah mi nih kaplup in om uhi. Kum sawmkua suangkul taang ding a thutan khum a om Ghulam Azam bel tu'n kum 91 vel in upata hi.

***Kum 25 sung a amasapen ding in Myanmar President Thein Sein in United Kingdom vehna nei lel a, London ah British Prime Minister David Cameron toh kimuhna leh kihouna nei a, huai ah, Thein Sein in, kum 2013 bei tan a Myanmar, Burma gamsung a political prisoner om tengteng khahkhia vek ding ahihdan gen a, Burma a rebel group-te toh leng nipikal tamlou sung a Burma gamsung pumpi huam ding a ceasefire a bawl theih uh leng lam-en ahihdan gen hi. Himahleh human rights group-te'n Thein Sein thugen gingta lou ua, Myanmar ah mi tamtak soisak leh gelgawt kawm a nasep sak a om lai uh ahihdan leh a rights uh zahtak saklouhna uang mahmah lai ahihdan gen uhi. Campaign Activist-te'n Myanmar President Thein Sein in human rights sang in masawnna leh khantouhna ngai poimoh masa zaw hi'n ngoh ua, gamsung vai, innsung vai kitup tak a koih a, huaizawh chiang a khantouhna leh masawnna vai ah gamdang toh kihouna leh kizopna bawl pan ding in ngen uhi.

***UN in tuban kum nih sung a AIDS vei mihing million a simte kiang ah Anti Rectroviral Treatment, ART piakna ding in programme thak pankhia nawn a, UN in AIDS douna a strategy thak a puankhiak pen tuh Treatment 2015 chi a, huai programme nuai ah AIDS vei leh nei khate' tua sang a a damtheihna uh hoihzaw leh damsawt theihzawkna ding uh, banah AIDS infection thak dalna ding ngimna toh AIDS douna naktak in paizom zel ding hi'n thusuak in gen hi. UNAIDS in panlakna sunzom zel a AIDS vei tamna diak gam 30 kiang ah AIDS douna nasepna keklet behlap ding hi. UNAIDS programme nuai ah, leitung maikaih ah mihing million 15 in ART treatment ngahta ua, tuban kum nih sung a mihing million 15 in ART treatment a ngah theihna ding un UN in naktak a panla lel hi'n kigen hi.

*TMI in The First Meet of Sibling of Person with Disabilities zatna nei
*PTC in kum 64 chinna lawm
* Zonal Educatian Officer in Water Co-operation : Issues and Challenges' pansan in Seminar sai ding
*North East States Kingdom Talent Hunt, Christian Reality Show ah Zomi-te;n hihhoih
*Numei khat vuak in om; damdawi inn puaklut ngai
*ZYA HQ in ZYA Lamka Block bawlkhia ding; makai ding telna leh kichiamsakna om ngal ding
*KSO in Felicitation Programme zang ding

Tanchin Kimzaw:
***The Malsawm Initiative Pearsonmun in, tuni sunma dak 11:00 in Observance of Helen Keller Birth Aniversary toh kituak in, The First Meet of Unau (Sibling of Person with Disabilities) zatna nei uhi. Hiai hun ah songnawite leh a sanggamte un kithuah khawmna hun zatna nei uhi. Helen Keller ahihleh June 27, 1880 in piang a, ama'n mitdelte' laibu ding ana bawl khia masa pen hi. Lamka pansan songnawite siamsinna The Malsawm Initiative in Pearsonmun khokhung ah Ability Village ding bawl sawm ua, tua ding in hong tung ding July 27, 2013 chiang in Lise Grande UN Resident Co-ordinator & UNDP Resident Representative in Ability Village mun ding ah suangphum hon khiakna hong nei ding hi.

***Tu sun dak 12:00 in, Paite Tribe Council, PTC GHQ in "Thou ni in Lam ni" chih thupi a nei in, PTC, nidang a PNC kichi phuhkhiak a a om nung kum 64 chin lopna Pearsonmun Community Hall ah nei uhi. Programme ahihleh zinglam dak 11:00 a pat ding kichi himahleh, Pearson ah misi om ziak in a hun in pan thei lou in sun dak 12:00 in kipan a, Rev Dr. Hs Chinsuanthang, Local Pastor/EBCC Pearsonmun in programme honna nei a, L.Tualkhanhau President, PTC, GHQ in PTC puanlap kaihpalhna nei in, presidential address genna nei ngal hi. Programme pen Phungzathang Tonsing, Health Minister banah, Vungzagin Valte, Parliamentary Secretary-te'n uap ding uh chih himahleh, Manipur in assembly a neih lel ziak in Vungzagin Valte, Parliamentary secretary kia tel thei a, tua banah Thanglianpau Guite President ZRO in leng hiai hun zatna uap ding chih himahleh Gwahati a zin ziak in tel theilou a, amah sik in K Guite Adviser ZRO pang a, ADC Churachandpur a EM leh MDC mi 8 in leng uap uhi. K. Chinkhansuan Gen Secy PTC GHQ in report piakna nei in, heutu ana mualliamsate suunna hun leng zat in om hi. LB Sona, Chairman, Zomi Council in a thugenna, government a i sepnate uah pension mahle hang, i gam - i nam a ding a bel pension chih omlou a nna i sep ding uh ahi, chi in gen hi. Vungzagin Valte, Parliamentary Secretary in ahihleh, i thupi uh, Thouni in Lamni chih ahihtoh kiton in, i thupi uh i sepsuah theihna ding ua, kigensiat chihte chiin nawn louh a, i attitude uh khek hunta ahi chi hi. K.Guite, Adviser ZRO in, hun paisa toh teh in, ei Paite-te, Manipur a exam result tuamtuam a suah hun chiang a kitawm theilawta ahi chia gen in, Manipur state a service lam i ngaihpoimoh ding uh ahi chi in gen hi. Huai banah, gam-le-nam iit i hih dungzui un, tup-le-ngim hoihtak neih ding ahi chi'n gen a, Pathian in Paite namte a mei (tail) ding a hon bawl hi lou in, a lu(head) ding a hon bawl ahi chi hi. Programme ahihleh session 2 in kikhen a, session 2-na ah, open debate neih in om a, Innpi-pa in Langkhanpau Guite Chairman ADC/CCpur pang hi.

***Board of Education Manipur (BSEM) saina in July 2, 2013 zinglam dak 10:00 apan sunnung dak 1:00 kikal in Lamka Central High School, IB Road ah HSLC Comparmental Examination 2013 om ding hi. Lamka apan candidate Roll No. 6966- 9632 leh Roll No. 33687- 33692 kikal bangzah hiam telding uhi. Campartmental Examination ah Aditional English, English, Match, Science, Social Science subject-te exam ding uhi. Tuni'n huai ding toh kisai in admit card hawmkhiakna neih in om.

***Shillong ah, North East States Kingdom Talent Hunt, Christian Reality Show kichi pailel ah final round kidemna July 2, 2013 in om ding a, result leng huai ni mah in puankhiak hi ding hi'n kigen hi. Huai kidemna ah Group 16 tel ua, huaite lak ah 'Musk Roses' kichi group ah Manipur singtangmi - Nemhoihkim @ NK Hoih Ngaihte d/o L. Khaizalam of New Lamka Vengnuam, Jessie Nuamneilam Zou d/o Sanjeev Zou of Kamdou Veng, Tuibuong leh Lhingneimoi @ Lily Moi d/o L. Khamzahang of Games Village, Imphal-te final round lut uhi. Hiai kidemna a final round lutte kipahpihthu ZYA GHQ in puang a, phattuamngaihna toh mipi'n vote chiat ding in ngetna leng bawl hi. June 30, 2013 tan in vote piak theih ding hi. Mush Roses-te' vote theihna'ng ahihleh KTH 19 chih sms gelh in 56263 leh facebook page ah lut in 'video KTH 19 Kingdom Talent Hunt chih ana like in vote piaktheih ding hi.

***Zonal Educatian Officer/CCpur nuai a Science Unit saina in August 1st week 2013 in Lamka ah 'Water Co-operation : Issues and Challenges' chih thupi zang in Student Science Seminar om ding hi. Seminar a telding in school 1 apan student 2 nih zel hiding a, Class VIII- X kikal sinmite tel thei ding ua, amau' kaina school a Headmasters/ Principal-te'n recomend a bawl uh ngai ding hi. Seminar a telding student-te list July 20, 2013 tan in ZEO/CCpur office ah submit theihding hi'n ZEO/CCpur apan kiza hi.

***Donneisiam (28) w/o Donglunlal Samte of Milongmun, Thanlon sub division apaisa, June 25, 2013 nitaklam dak 5:30 vel in UTLA( Surrender Group) cadre Lamzamang @ Doctor kichi in soisa a, Donneisiam in a awm (chest) leh a' pang lak nasa in, zannitak in Dist Hospital kipaw tung hi. Donneisiam in, tui na-ngawn dawn theilou in, ann leng ne theilou hi'n kigen hi. Thusuak kingah dan in Lamzamang in Milongmun khua-mi, Paukhochinmuan' kiang ah zu bottle 5 lei in nusia a, huaizawh in Kammang in huai mun mah ah zu lei hi'n kigen hi. Lamzamang leh a lawmpa Ginminthang in zu bottle 5 teng lakhia in dawn khawm uh a, a zu dawnlai un bottle 5 phalou chin kitawm uh hi'n kigen hi. Lamzamang zukham a kitawm tak in Kammang in a zu lei pen Lamzamang' zu hidia gingta inDonneisiam pekik sak a, Lamzamang in zu pekiktu Donneisiam ana soisa hidan in thusuak kingah hi.

***Zomi Youth Association (ZYA) GHQ in zingchiang June 28, 2013 sunnung dak 2:00 in Lamka Block laklutna leh Block makai ding telna nei ding uhi. Tua ah, Unit hon thak a omte apan palai 7 chiat in vote khe thei ding ua, unit khat zel in amau unit apan candidate guang ding uhi. Zingchiang mah in Lamka Block makai dia telching thak a omte kichiam sakna, ZYA GHQ President T. Goukhomang in nei ngal ding hi. Tua zoh in Lamka Block makaite ZYA GHQ in meeting nei khawm ding ua, maban a ZYA Lamka Block lop ding thu gen khawmna nei ding uhi.

***Henglep Constituency bialtu T. Manga Vaiphei Chairman MTDC sponsore-na leh Kuki Student Organisation (KSO) Henglep Sub-Division-te saina in 2013 a Class X & XII 1st Division a pass-te kipahpihna hong tung ding June 29, 2013 sunma dak 10:30 in Synod Hall IB Road ah nei ding uhi. Tua ah T. Manga Vaiphei Chairman MTDC, Demmang Haokip Vice Chairman ADCC, Thangmang Haokip MDC, Genneikhup EM ADCC, Paolal Haokip MDC leh Dr. Zamlienmang MO i/c Henglep PHC-te'n chief guest, guest of honour leh functional president hihna toh hiai hun zatna uap ding uhi. Hiai lohchinna ngah student-te a ding a thumsakna leh vualzawlna ngetsakna Rev. Dr. TJ Haokip Registrar ECT in nei ding hi.

***Mualkoi a STC/BSF Deputy Inspector General apan theihsakna kimu dungzui in, Mission Compound suahlam leh Mualkoi, Gangpimual leh Pearsonmun simtum a om STC/BSF firing range ah July 1,2013 apan July 15, 2013 tan sun leh zan in thaukapna sunzom nawn ding ua, tua toh kiton in hiai a firing range kimlak ah vak vel pilvang ding in theihsakna bawl uhi.

Gamdang Tanchin:
***Tuma a Goa ah BJP National Executive meeting ah BJP poll panel chief ding a dopsang ahihnung a amasapen ding in Narendra Modi in tuni'n Mumbai vehna nei a, huai ah Maharashtra state BJP unit makaite kiang ah 2014 General Election ding toh kisai a a' agenda ding putlakna nei a, industry tuamtuam a mi poimohte toh leng houlimna nei hi. 2014 Election Campaign-na bel Narendra Modi in Pathankot ah panta a, huainung dakkal 90 nung in Maharashtra BJP makaite toh 2014 agenda ding genkhawmna nei ding in Mumbai tung hi.

***Central Bureau of Investigation in a nasepna ua transparency a om zawkna ding ngimna in, CBI in functional leh fiancial lam ah autonomy a neihna ding ua Group of Ministers in recommendation a bawl uh toh kisai in tuni'n cabinet in thupukna la maithei hi'n kigen hi.

***West Bengal a Panchayati Raj election pailel ah, Baruipur a Trinamool Congress candidate Shivram Najkal, mel theihouh mi thum in South 24 Parargan District ah that uhi. Amah, Shivram bel election campaign neizou, innlam zuan a a pai lai a thah a om hi'n kigen hi.

***Hyderabad khopi aom Manipal University a MBBS third year student khat ni sagih paisa in pimang ahihnung in suam, rape in om a, mi giloute tutnitan in matkhiak in om nailou ua, police-te team sawm a kikhen in Hyderabad khopi sung a auto 8000 val hektute lak ah muanmoh aom auto hektu muhkhiak hinailou hi. Ni sagih paisa in, Manipal University a MBBS zillel, Kerela apan numei khat, a' siamsinna Univerity library apan in nitaklam dak 11 vel in innlam zuan in pai a, lampi ah auto khat apan mi thum in ana mantang in puamang ua, a ki-rape siak nung un bangmah lohlou in khah uhi. Medical report in numei nu pen thagum toh, mi khat sang a tamzaw in kipolhpih uh ahihdan taklang hi. University thuneitute complaint-na pansan leh medical report pansan in police-te'n case chiamteh ua, sual leh rape aom numei bel damdawi inn ah omlai hi'n kigen hi.

***Brazil kiphinna paizom zel a, gam khopi Brasilia ah mipi sing tamtak in anti-government rally nei ua, solkal leng naktak a kiging in, Brazil police force a officer sang li val zang in Brazil Congress building umkual thipthep uhi. Kiphinna neite'n, Brazilian solkal in khantouhna, masawnna, damtheihna lam leh siamsinna lam puah ding leh etzui ding poimoh tamzaw a neih lai a, huaite ngaihsaklou a football leh kimawlna kia ngaihsak a, kimawlna ah sum tampi seng ngam a, mipite haksatna leh khotang dinmun hoihlou, siamsinna leh damtheihna lam etzuina hoihlou, nekguk-takgukna dal ngamlou hia solkal ngoh in, a lungkimlouhna uh etsakna in Brazil National Congress kong ah kiphinna neite'n solkal in kimawlna kia a ngaihsak pen deihlouhna leh 2014 World Cup zintun ding a kisakkholhna a Brazil solkal in sum tamtak a zat pen deihlouhna taklatna in football tamtak koih uhi. Kiphinna neite lak a Brazil National Congress kong tung masate'n football-te, Congress building vengtu police-te pek khum uhi. Beli Horizonte khopi ah, Confederation Cup kimawlna pailel ah Brazil leh Uraguay in semifinal kimawlna a neihna mun, stadium kong ah mipi sing nga vel in protest thupitak nei ua, huai pen thagumsuahna leh kinawktuahna in zui hi. Brazil kiphinna neite'n Brazil hoihzaw, solkal hoihzaw, mipite haksatna theisiam leh ngaihsak solkal deih uh ahihdan uh gen chiat ua, kimawlna a sum tamtak sen sang a Brazil gamsung a health system-te leh siamsinna bawlhoih a, nekguk-takgukna dou ngam solkal deih uh ahihdan uh gen uhi.

***US a court sangpen Supreme Court in, pasal-le-pasal kiteng, numei-le-numei kiteng, gay nupa-te'n federal solkal nuai a huhna leh panpihna a muhtheihna ding un thupukna bawl a, California in, Proposition 8 kichi dan pansan in same-sex marriage phallou a, a khawlsakna, dalna pen phalsak ahihnawnna ding in leng thupukna bawl hi. US ah, 1960s vel in gay-te huat leh muhdah in om ua, society ah leng ana talou ua, bar ah zu leng dawn theilou ua, gay-te kiang a zu piak tuh dankalh ahi. Gay-te kimuhkhawmna bar leh club khawng a laamna munte khopi a tengte panpihna toh police-te'n ana luhkhia zel uhi. Gay rights toh kisai a US Supreme Court in gay-te gupna a thutanna a bawlpen naktak gay-te'n kipahpih ua, Supreme Court kong ah mi tamtak kipunkhawm ua, laam pih uhi. 1996 in, US ah, Defence of Marriage Act in kitenna tuh numei leh pasal kigawmna ahi chi a, numei leh numei hiam, pasal leh pasal hiam kigawmna pen kitenna chilou hi. Himahleh Gay Activist-te'n kitenna pen itna leh itna kal apan a piang ahi chi uhi. US a state 50 om lak ah, tu nipi bei tan in state 12 in neih kibang, same-sex marriage pen dan bang in pomsakta ding uhi. Himahleh, Supreme Court thutanna deihloute'n kitenna pen i society kibulphuhna leh kingakna ahi chi ua, kitenna pen Pathian in numei leh pasal kal kia apan a om ding a a bawl ahi chi uhi. US catholic-te'n leng same-sex marriage phalsakna a US Supreme Court in thutanna a bawl pen US a ding a a dahhuai ni pen ahi chi uhi.

***US solkal surveillance programme liantak toh kisai a thuguk poimoh mahmahte pholhkhiatu leh puangkhiatu, NSA contractor lui, Edward Snowden in Hong Kong apan Russia gam a lut nung in tu'n Moscow airport a transit zone ah omlai hi'n kigen mahleh, transit area a om hia, ahihkeileh, transit hotel-te ah tung hia chih bel theih hinailou a, a omna diktak kuama'n thei nailou hi'n kigen hi. Snowden in Ecuador kiang a bukna leh humbitna, asylum a nget toh kisai in, September tan ah Ecuador solkal in Snowden kiang a asylum a piak ding leh dinglouh thupukna la thei pan ding uh ahihdan Ecuadot solkal thusuak in gen hi. Huchikal ah, US solkal in, Ecuador in Snowden kiang a bukna, bitna leh humbitna, asylum a piakleh US leh Ecuador kal a kisumdawntuahna leh kizopna in siatloh thei ahihdan vauhilhna bawlkawm in theihsakna bawl hi. Ecuador a rose pakte tuh khovel a rose pak kilawm leh nalhpente lak a khat ahi ua, Ecuador ah huchibang rose pak kilawm taktakte kung million tamtak suan ua, ching uhi. Huchibang rose chinna neitu khat in, Ecuador in Snowden kiang a political asylum apiakleh US leh Ecuador kal a trade, kisumdawntuahna in siatphah ding in gingta a, huchihileh, rose pak a a sumdawnna, business leng kisia ding ahihman hi. Ama'n nikhat in rose pakte a loh gige kul a, nikhat in US ah rose pak box 5000 khawng thonkhia zou hi. US market omkei leh rose pak a sumdawnna kisia ngal ding hi'n gen hi. US President Barack Obama in Snowden ziak in Ecuador leh US kal a trade om teng khawlsakleh Ecuador a sumzaw suak ding a, huai pen Ecuadorian sumdawngmite'n ngaingamlou uhi. Tuaziak tak a Ecuador in Snowden kiang a asylum piakna ding toh kisai a tangtak a thupukna la ngam pahlou a, September lam tan diah hiding a gintak ahi.

***US President Barack Obama in nipikal khat sung Africa vehna nei ding leh Africa a a taam sung a gam thum vehna nei ding in Senegal tung masa hi. Government official-te'n kipaktak in Obama ana muak ua, Senegal gamsung mun tuamtuam, gamla taktak apan in mipi tamtak in leng US President mivom masapen leh leitung a thuneipen, most powerful man in the world muh bek mu ut in ana vaidawn ua, President Barack Obama tung ah a lam-etna uh sang mahmah a, amau a ding a banghiam a puak lam-en ua, police-te'n mipite hawldalh zoulou phial uhi. Barack Obama in US President ahihnung in Africa gambup ah 2009 in Ghana vehna nei a, ni khat lel taam hi. Huai nung kum nga Obama in Africa gambup a sik nawn patna ahi. US President in Africa gamte a vehna bel, Africa gambup ah US in Africa gambup sung a nasepna leh kigolhkhakna, engagement tuamtuam a neihte hihhing leh hihhat nawn tupna hi'n kigen hi. Senegal kiang ah US in millions a sim panpihna tamtak pia a, tuate lak ah, AIDS douna lam ah US solkal in Senegal kiang ah sum tamtak in huhna pia hi. Senegal solkal leh US solkal in development policy thak, gam nihte kal a kizopna leh kisumtuahna lam a hat zawkna ding a policy thak leh humanitarian assistance lam ah thupuan leh kilemna poimoh tak bawl ding uh hi'n kigen hi.

***Australian Prime Minister thak ding in kum thum paisa, 2010 a amah' party mah, Labour Party in Australian Prime Minister ahihna apan a zahlakhuaitak a paihkhiak a ana om Kevin Rudd in kichiamna nei nawn hi. Australian Prime Minister lenlel Julia Gillard vaihawmna solkal ah, mipite muanngamna naktak a a kiakniam ziak in Labour Party in, amau sung ah confidence vote lakna, party leadership ah kitelthakna Nilaini in nei ua, Australia a numei Prime Minister masapen Gillard in zoulou in Prime Minister ahihna apan a ki-awngsut kul hi. Gillard in Australian Parliament ah vuallelhna a tuah toh kiton in politics apan paimang ding in kichiam hial a, Australian numei Prime Minister masapen ahihna a a lohchinna leh sepsuahte suang mahmah leh kisaktheihpih mahmah ahihdan gen hi. September in Australia ah kitelna om ding hi.

***Egyptian President Mohammed Morsi in Egypt's Presidential Office aluah n ung kum khat chingta a, tua toh kiton in, opposition lamte'n President kitawp ding phutna in protest liandeuh khat neih tum ua, President kitawp ding deihte apan in min leh suai tamtak, sau tak kaikhawm dendon get uhi. Egyptian President in a thugenna ah, gamsung a buaina neuhneuh omte'n Egypt gam vaihawmna baibawm tak a koih thei ahihdan gen in, tuni tan a Presidential Office a luahna ah hihkhelh leh bawlkhelh nei mah ahihdan gen hi. Egyptian President in, Egypt a political division thuktak om ziak a Egypt puksia nawn thei ahihdan a gen pen opposition activist-te'n thangpaihna toh dawngkik ua, President omna party' headquarters buluh in om a, Muslim Brotherhood-te office leng luh in om a, a sung a omte pawkhia ua, lampi ah mei in hal uhi. Hosni Mubarak vaihawmna deihlouh ziak a mipi lungkimlouhna leh thangpaihna in vaihawmtu a khek nung in tu'n Egypt a civilian solkal dingkhia nawn masapen in leng mipite haksatna leh lungkimlouhnate ngaihsak lou in, a vuina uh leh phunnate ngaihkhia utlou hi'n ngoh ua, Egyptian mipite haksatna bawlhoih ut tuanlou in, kum paisa a solkal deihlouh a paihkhiak a ana om toh kilamdanna omkei chi uhi. President in a vaihawmna solkal in kum khat mel a muhna hun zatna a thugenna a neihma in President gumtute leh opposition-te kal kisualna piang a mi nih vuaklup in om uhi. Egypt khopi Cairo ah thautui taksapna leh kidaihlouhna ziak in niteng hindan naktak in nawngkai sak ban a, huai mahmah leng mipite lungkimlouhna behlap sawnsawntu ahi.

***South African anti-apartheid icon leh President lui Nelson Mandela dinmun in siatlam manawh nawn hi'n kigen a, life support lel a hing hi'n kigen a, tua ziak in South Africa President Jacob Zuma in Mozambique vehna a neih ding pen leng thulh, cancel hi. Nelson Mandela bel Pretoria damdawi inn ah nipikal nih val, lung infection, tuap natna sual in omta hi. Mandela damkhiak nawnna ding deih ziak in a omna damdawi inn kong ah South Africa mipi tamtak in, kideidanna leh simmohna leh muhsitna apan a suahtakpih-pa, Nelson Mandela dam nawn ding deihna a message tuamtuam a khakte uh dim a, South Africa President in damdawi inn ah zan nitak sawt nung a Mandela a va veh khit in South Africa mipite leh khovel mun tuamtuam apan Nelson Mandela leh a' innkuante a ding a thumna leh thuakpihna leh a damkhiak nawnna ding deihsakna thuchah lungsim khoih taktak luanglut zungzungte ziak in kipahthu gen hi.