*Manipur Ex-Servicemen Multi-Purpose Co-operative Society Ltd. pawl in General Body Meeting nei.
*Muallum ADCC Grace Zamnu in tuni'n press leh media te kimuh pihna nei.
*June 15, 2013 in YPA Hall New Lamka ah Biomatric Awareness campaign neih hiding.
*Nehlianlal tung ah Lamka Police te'n FIR Bulh.
*Bijang khosung ah Bijang Women Welfare Association te duty
*Zou Saangnaupang Pawlpi (ZSP) GHQ ngah student te kipahpihna leh award piak khiakna ding
*Dr. HL Liensang, CMO/CCpur in mahni sepna munchiat ah omding in theisakna bawl.
*Old age Pensioner, Widow Pensioners leh Disable Pensioner-te a ding in bank ah sumlutta

Tanchin Kimzaw:
***Manipur Ex-Servicemen Multi-Purpose Co-operative Society Ltd. (MEMCOS) pawl in tuni sunma dak 11:00 Synod Hall IB Road ah General Body Meeting nei uhi. Hiai hun ah "How to Solve our Heavy burden or our depositor" chih agenda in nei ua, palai paikhawm te'n depositor te haksatna tuamtuam omte suk veng ding dan gen khawmna nei uhi.

***Muallum ADCC bialtu Grace Zamnu in tuni sun dak 12:00 in a tenna inn lailam veng ah press leh media te kimuh pihna nei hi. Hiai hun a Muallum MDC Grace Zamnu in a genna ah Muallum khua ah School building thak bawl in om lel a, himah leh school building bawlna tung zawn tak a electric high tension gui apai khak ziak in na sep theih nawn lou in nasepna dinnkhawl in om a, hiaitoh kisai in electric department te kiang ah school building kibawl na tung a high tension gui pai pe'n lakhia a mun dang a suan khe ding in hun bang tan hiam paisa in bialtu MDC hihna ziak in ngetna ana bawl mah leh tuni tan in department lam in ngaisak lou chi hi. Hiai toh kisai in Muallum bialtu MDC in media tung tawn in apoimoh bang a department lam in ngaisak ding leh school building ki bawl lel sutzom ahih theih nawn na ding in high tension gui mun dang a suan khe ding in ngetna bawl hi.

***58-CCpur Assembly Constituency sunga mipi te a ding in zingchiang June 15, 2013 sunma dak 1:00 in YPA Hall New Lamka ah Biomatric Awareness campaign neih hiding hi. Hiai hun ah Maniram Sharma IAS DC incharge CCpur in vaidawnna thu gen dinga, tua ah CCpur Assembly Constituency bialtu Phungzathang Tonsing Health Minister in khuallian hihna toh uap ding hi. Hiai ding toh kisai in Maniram Sharma IAS DC/CCpur in tuni sunnung dak 1:30 in ama office chamber ah press leh media te kimuhpihna nei a, tua ah zingchiang a YPA Hall New Lamka a Biomatric Awareness Campaign om ding toh kisai in District Level Officer (DLO) teng, Philantrophic Organisation teng, Student leader teng, Chief Association teng leh Church Leaders teng ban ah Constituency mipi tam theilam hiai hun zatna a telchiat ding in ngetna bawl hi. Zingchiang a Awareness Campaign neihna hun a District Level Officer tellou a om leh a tung thu serious tak a ngaih hiding leh a tung ah action lak hiding in gen hi.

***Apaisa June 11, 2013 nitak a thiltung toh kisai a Haumuankhai pa Thongpau Munluo in Lamka Police Station a report a bawl dung zui in khut kha tu Nehlianlal tung ah Lamka Police te'n FIR No. 48(6)2013 CCP PS U/S 364/307/ 325/34 IPC & 25(I-C) A.Act chiam bulkhum in om hi. Hiai thiltung toh kisai in David S. Piaklian MPS SDPO/CCpur in Superintendent of Police CCpur sik leh tang in khotang damna ding deihna in tuni sunnung dak 3:00 in ama Office Chamber SP/CCpur Office ah kimuh pihna nei a, tua ah thiltung toh kisai in khut kha tu Nehlianlal tung ah Haumuankhai pa Thonpau Munluo in report a bawl dung zui in Lamka Police Station ah June 12, 2013 nitak dak 6:00 in FIR register ahih dan gen a, huai nitak mah in Police in Nehlianlal mat ding a inn va luh mah le uh ama ana om louh ziak in man theilou ua, himahleh Police lam in mat khiak teitei sawm a panlak hi lel a, mat khiak ahih theihna ding in mipi kua peuh in support pechiat ding in ngetna bawl hi. Aban a gen zelna ah hiai thiltung toh kisai in khosung chidamna ding deihna in Nehlianlal sung kuan te leh Haumuankhai sung kuan ban ah philantrophic organisation tuamtuam om te'n media leh printed media te ah hiai thu suah nawn lou phot ding ngetna Superintendent of Police, CCpur sik leh tang in ngetna bawl hi.

***Bijang Women Welfare Association in Bijang khosung ah kuaman khamtheih No. 4, Zu. Kani. Nganja leh Damdawi tang puaklut leh zuak phal hinawn lou ahih dan thupuan a bawl nung un apaisa June 10, 2013 apan in Bijang khosung ah Bijang Women Welfare Association te duty in zuzuakna mun te luhkhiakna pan uhi. Tuni in leng Tedim Road zul Bijang Area a teng zuzuakna munte check a bawlna uah zu ngou leh zusan tamtak mankhia in buaksak uhi.

***Zou Saangnaupang Pawlpi (ZSP) GHQ in tukum a class X leh XII lohchinna ngah student te kipahpihna leh award piak khiakna zingchiang sunma dak 11:00 in Zogal Memorial Hall Zoveng ah nei ding uhi. Tua ah S. Kaikhankap District Co-Operative Officer CCpur, H. Kapneithang DI of School, T. Lamkhothang AI of School leh TC Tungnung Chairman Zou Text Book Committee te chief guest, functional president, guest of honour leh chief host hihna toh hiai hun zatna uap ding ua,lohchinna ngah student te thumsakna Rev Thangginmuanlian Executive Director ZCBC in nei ding hi.

***Dr. HL Liensang, CMO/CCpur in hong tung ding June 17-21, 2013 sung in CCpur Dist sunga CHC/PHC/PHSC omna munte insepction bawl ding ziak in medical staff te mahni sepna munchiat ah omding in theisakna bawl hi. CMO in inspection bawlna ding munte ahihleh CHC Parbung, PHC Thanlon, Sinzawl, Singngat, Senvon ban ah PHSC munte Tuila, Santing; Sainoujang, Suangdoh, G.Bualzang, Lungthul, Mualnuam, Songtal, Sumtuh, Bukpi, Pherjawl leh Lungthulien te hi uhi.

***Deputy Inspector General STC/ BSF, Churachandpur in theihsakna a bawl kimu dungzui in, June 15 apan June 30 tan subsidairy training centre ah BSF-te'n thaukapna - small arms leh long/short/grenade/51mm, MOR firing range ah sun leh zan in nei ding uhi. BSF-te thaukapna, firing range kiang nai ah mihing leh ganta kuamah khahzanlou ding in theihsakna Dihe Peter DC/Training in theihsakna bawl hi.

***Old Age Pensioner blue leh red card nei-te, widow leh disable pensioner, District Social Welfare Office a a' bank account uh ana submit-te a ding in IGNOAP apan in a' bank account chiat uah sum lutta ahihdan tuni'n District Social Welfare Officer in a kisaipih mite a ding in theihsakna bawl hi. Old Age Pensioner, blue leh red card neite a ding in a' bank account uah Rs 1,600 lut a, Widow Pensioner-te a ding in Rs 1,400 lut a, Disable Pensioner-te a ding in Rs 1,200 lut hi. A kisaipih Pensioner-te'n amau remchang bangchiat a, bank account a neihna uh bank apan sum kilakthei ding uh hi'n Social Welfare Officer in theihsakna bawl hi.

Gamdang Thu:
***Media mogul Rupert Murdoch in kum 14 a kitenpih tak tulel a a' zi Wendi Deng toh kikhenna ding zong in US Supreme Court ah petition filed hi. Rupert Murdoch leh Wendi Deng bel 1999 in kiteng ua, ta numei nih Grace lehChloe nei uhi. Bangziak a kikhen tum uh hiam chih toh kisai in thuchian zaw bangmah puankhiak hilou a, himahleh, Murdoch in a petition ah, a' zi toh a kal uh, relationship uh bawl vuallouh a sia hi'n gen hi. Kum 82-a-upa Rupert Murdoch bel khovel a media conglomerate lianpen leh powerful mahmah neitu ahi. Murdoch in a etkolte lak ah 20th Century Fox, Fox television - Fox News leh FX tel in, Sky news service, HarperCollins publishing , Wall Street Journal, Britain's Times leh The Sun kichite khovel theihphak a minthang ngen ahi. Murdoch leh Deng bel Hong Kong a cocktail party khat ah kimukha masapen ua, huai nung in Murdoch in Deng 'try' mahleh zou pahlou a, himahleh, huai a kimuh nung un Deng in Murdoch etkolna nuai a om Hong Kong pansan Star TV ah sepna mu ngal hi. A' pasal toh a kikhen nung un, Wendi Deng leh a' tate'n Murdoch' hauhsakna leh gou kigawmkhawm billion $11.2 lak apan bangzah a huikhia zou ding ua chih bildoh mahmah in om hi.

***Nitaklam rush hour in, Argentina gam khopi Buenos Aires apan gamlalou ah commuter trains nih kiphutuah a, mi thum a sih banuah, 315 vel in liamna tuak uhi.Bangziak pen tak a tuahsiatna tung hihiam chih chiangtak in theih hinailou hi. Argentine President Cristina Fernandez de Kirchner in sihna leh liamna tuak innkuante a thuakpih thu puang hi.

***US government surveillance programme toh kisai thuguk poimoh taktak puangkhiatu Edward Snowden prosecute ahihtheihna ding in US solkal in panlakna kipan a, Snowden tung ah criminal investigation kipan hi'n FBI Director in gen hi. FBI Director Robert Mueller in, Edward Snowden in US security surveillance programme thuguk poimoh tak a puankhiak ziak in, American national security a ding in siatna thupitak tungsak hi'n gen hi. Edward Snowden bel Hong Kong ah om lai a, US in Hong Kong apan a America ah extradite a tupleh, Hong Kong pansan a naktak a nang ding hi'n gen hi. FBI Director Robert Mueller in US surveillance programmes naktak in gum a, US in ngun tak a surveillance a bawlziak a US citizen-te' tung a hiamgamna leh thagum suahna tung dingte ven leh dal a om ahihdan gen a, tua huai US bitna thuguk; US leh a mi-le-sate bitna ding gelna a information leh data poimoh taktak kaihkhawmna thuguk a puankhiak ziak in US national security ah saupi poisak ban hihdan gen hi. Foreign Intelligence Surveillance Court in hichibang surveillance programme neih theihna ding a phalna pia ahihdan Mueller in gen hi.

***Syria buaina ah, Syrian government in opposition rebel-te tung ah chemical galvan zang ahihdan chetna amuh nung in, Syrian opposition rebel-te kiang ah galvan leh military aid piak ding in US in thupukna la hi. US leh European gamte'n suizuina a neihna uah, Syrian solkal in opposition rebel-te tung ah chemical galvan, nerve agent Sarin gas zang uh ahihdan mu uhi. Chemical galvan ziak a mi 100 apan 150 kikal in sihloh uh ahihdan White house in taklang hi. Ningani a UN in Syria buaina toh kisai report a khahkhiak un a taklat dan in, nikum July apan in kha teng in Syria ah mihing 5,000 in sihna tuak ua, tunitan in 93,000 in sihna tuakta uh uhi. Syria buaina a misite lak ah za-a-sawmgiat pasal ahi ua, himahleh UN's High Commissioner for Human Rights (OHCHR) in a chiamtehna ah, naupang kum sawm nuailam mi 1,700 val in leng sihna tuak uh chi hi.

***Iranian President Mahmoud Ahmadinejad dinmun khekkhiatu ding telna tuni'n Iran mipite'n nei uhi. Iran gamsung ah polling station-te, local time in, zinglam dak 8 in kihong a, a kihong nung dakkal sawm nung in vote khiak theih hun kikhak ding hi. Himahleh, presidential election toh kisai chipchiar tak a enzuitu The Guardian Council leh Interior Ministry in, vote khia ding turnout a sang leh/a tamleh, vote khiak theih hun sung hihsau thei a, zankim tan in a hun suan gamla tou thei hi. Iranian voter-te'n President thak ding telna a neih kawmkawm un municipal councillors ding leng telkhiakna neikhawm ngal ding uhi. Iranian President thak hihtheina ding a candidate guk-te lak a kua mah in, vote kikhia tengteng lak a 50.1 percent a muhzoh kei uh leh, nipikal khat nung in vote khiakna second round neih hinawn ding a, tuni a presidential election result pen Kiginni in kithei chiang pan ding hi. Iranian President dinmun tuh ut mi 680 val lak ah mi 8 presidential candidate ding a telkhiak ahihnung un, mi nih kizukkhia ua, mi guk in president post kituhna nei uhi. Candidate gukte lak a mi nga-te bel conservative candidate ngen ahi ua, reformist candidate, Hassan Rowhani kia ahi. Conservative candidate-te lak ah vote taidalh mahmah di'n kigen a, tua ziak in reformist candidate a ding in chance leh-om ding in kigen a, ma-dawk mahmah hi. Tutung Iranian presidential election campaign ah issue lian mahmah nih naktak a debate in om hi. Iran's nuclear ambitions leh international sanctions ziak a Iran economy buai mahmah pen bangchi hihhat nawn ding chih leh bangchi panlak ding chih in election result ah gen-le-sak nei mahmah ding hi. Inflation, vanman sangna nidang teng sang in 30 percent in sang zaw a, Iranian currency, Rial in a value 70 percent mansuahta a, unemployment rate sang mahmah lai hi.

***Brazil ah bus leh public transport dangte a a tuanman a khanziak in, mipi sang tamtak lungkimlou in kiphinna nei uhi. Sao Paulo ah kiphinna pen thagumsuahna leh police-te toh kinawk tuahna in zui a, Rio de Janeiro a kiphinna ah leng thagum suahna piang hi'n kigen hi. Kiphinna neite'n bus leh train tuanman hihpung aompen lakkhiak leh punsaklouh ding in phutna nei ua, kiphinte'n dawr leh sumbuk tamtak hihsia uhi. Demonstrator-te hawldalhna ding in police-te'n rubber bullet zang ua, mi 50 vel in liamna a tuah banuah, mi 40 khawng hentang in om uhi. Police-te gendan in, a mi mattte ua pan petrol bomb, temta leh damdawi khamtheih khenkhat mukhia uhi. Sau Paulo ah, Bus ticket khat in Brazil sum, real 3 ($1.40) man a, June 2 apan in real 3.20 ($1.50) ah punsak in om hi. Thuneitute'n bus tuanman khanna pen atamlua hilou hi'n gen ua, inflation nuailam pek ahi chi uhi.

***BJP leh JD (U) kikhen petmah ding un kilangta a, BJP, Janta Dal United leh party dang bangzah hiam kikhaikhawmna NDA apan Janata Dal United kizukkhiakna ding toh kisai thupukna taktak tuapan dakkal 24 sung a puankhiak gintak ahi. Patna pan tuni in Chief Minister Nitish Kumar in June 17 chiang a Janata Darbar a tel ding in BJP MLA 6 kiang ah chialna bawl hi. Banah, Bihar a Janata Dal United makaih a solkal thak bawlna ding ah, Nitish Kumar in, ministerial berth toh Independent MLA-te zolna bawl hi. 2014 a general election om ding ah BJP party's poll campaign chief ding a Gujarat Chief Minister Narendra Modi, BJP in a guan nung in JD(U) leh BJP kizopna ah siatna muhtheih in kilang ngal hi. Huchihlai in BJP patriach LK Advani in BJP a dinmun a let teng apan kitawpna pialut a, huai hun in JD (U) in BJP leh JD(U) kizopna pen ventilator support a hing lel hi'n taklang uhi. Janatal Dal United toh a kizopna uh sia pen bawlhoih tum in BJP in naktak in panla mahleh tuni tan in kizopna sia bawlhoih theih in om nailou a, kikhen ding un chiang mahmah simta hi. Huchikawmkal ah, Bihar Chief Minister Nitish Kumar in third front bawlkhiak ding dan toh kisai in West Bengal Chief Minister Mamata Banerjee leh Odisha Chief Minister Naveen Patnaik-te kihoupih khin hi'n kigen hi.

***Telengana Joint Action Committe makaihna in Andhra Pradesh state apan Telengana state bawlkhiak ding phutna in, tuni in Hyderabad ah Chalo Assembly protest neihn in om hi. Chalo Assembly protest neih ding police in a phallouh uh ahi a, police-te'n kiphinna neihtumte lak ah Maoist helpawlte leng a kihel khak ding uh pilvang tak in enzui ua, tua toh kiton in Hyderabad khopi ah police personnel 10,000 koih behlap in om a, central para-military force companies 20 koih behlap in om uhi. Police-te'n Section 144 CrPC nuai ah prohibitory orders koih ua, mi nga sang a tamzaw kipunkhawm theihlouh hi. Himahleh, Telengana state gum leh supporter-te'n prohibitory order zahtak seselou in kiphinna sunzom veve ua, security forces-te toh kidelhna leh kinawkna piang hi. student-Zan in leng Osmania University a Telengana state support sudent-te toh police-te ana kinawktuahta uhi. Tuni in Telangana Rashtra Samithi (TRS) leh BJP leader khenkhat mat in om uhi. Telangana Rashtra Samithi (TRS) leader leh MLA nih, Andhra Pradesh Assembly House huangsung a om Congress building ah lut in flag vom va tak ua, Assembly ah Budget Session pailel pen Seppatni tan adjourned in om hi. Chalo Assembly protest makaihtu, Telangana Joint Action Committee (TJAC) in Telengana state bawlkhiakna ding toh kisai a resolution kichian tak lak kin ding nohna in Chief Minister leh Assembly Speaker kiang ah Memorandum submit uhi. Central government in Andhra Pradesh state seh nih suah a, huai apan a Telengana state kichi bawlkhiakna ding a thupukna December 2009 in puankhiakna nei hi. Himahleh Telengana state bawlkhiak ding tamtak in dal ua, tua ziak in zekai den a, Telengana state supporter-te thangpai gawp uh hi'n kigen hi. Telengana in district sawm nei ding a, tulel a Andhra Pradesh capital, Hyderabad leng Telengana state bawlkhiak ahihching in huamkha ding hi.

***Manipur solkal policies khenkhat protest-na in United naga Council in June 16 zankim apan in dakkal 48 sung Manipur ah bandh puang uhi. United Naga Council statement in a taklat dan in, Imphal phaizang ah communal forces khenkhat; Naga-te interests kalh a gamtang om uh hi'n ngohna bawl a, Manipur a Naga-te a ding a alternative arrangement bawl ding ngiat in, UNC in a statement ah, Naga-te'n, communal lou uh ahihdan a puang gige uh ahi a, himahleh Manipur a communal solkal nuai ah Naga-te leh tribe neuzaw dangte khosa theilou uh, om theilou uh leh haksa sa uh ahihdan taklang uhi. Official thusuak in khat in, UNC bandh sung a transport service-te ngeina bang a pai theihna ding a kong bangkim ah panlakna om hi'n taklang hi.

***Agartala a niteng kiloh tawm a nek zong nupa khat in, a' ta uh kha guk a upa, a etkolna haksa a sak ziak un a' ta uh that ua, a luang pen a innkiang ua kokhuk ah paih uh hi'n Tripura police thusuak in gen hi.Police-te'n leng kum 53 a upa Laba Debnath man ua, ama'n a kipuanna ah, a' zi toh a tanu uh kha guk a upa Lina that uh, chi hi. Naungek pa kipuan dan in, a ta uh naungek in tetanus a vei banah sisan pawt kam theilou, haemorrhage leng nei a, doctor-te'n niteng a zat ding in damdawi Rs 1,500 man gelhsak ua, kikapna khat in Rs 900 man hi'n gen hi. Laba Debnath-te nupa in ta dang leng nga nei uh ahihman in nek leh dawn suktuahna ah haksatna thupitak tuak a, amah kia a' innsung ua nekzong omsun ahihman in, niteng a a sum muh tamlouloute a nek ding uh leh a tanu damlou etkolna ding khen ding kidaihlou zoulou a, haksa salua ua that uh hi'n kipuang hi.