*Emmanuel EBCC/BCD-te'n Tabitha Home vehna nei
*Siamsinpawlpi Foundation Trust in Home Reception Programme kichi zatna nei
*EM in scheme tuamtuam tungtawn a panpihna hawmkhia
*Mun li ah biometric awareness campaign om
*One Day District Level Sensitization Programe zatna om
*Tuithalui a misi kimukhia pen chet hita
*PTC GHQ in 64th Raising Day zang ding
*Exhibition Match om ding

Tanchin Kimzaw:
***Pathianni dak khat in Emmanuel EBCC, Baptist Children Department HQ Veng-te'n Tabitha Home vehna nei ua, huai hun ah Emmanuel EBCC/BCD-te'n Tabitha Home panpihna ding in anntang hal-bag khat leh sumtang in Rs 2,200 piakna nei uhi. Thilpiakte ahihleh Emmanuel EBCC/BCD-te'n amau sung ah a kidonkhawm uh ahi a, khuttawi manpha leh thupitak toh BCD Emmanuel-te'n vehna a neih ziak un Tabitha Home Director, Zoram Tonsing in Pathian min in Emmanuel EBCC/BCD-te tung ah kipahthu gen hi.

***Siamsinpawlpi Foundation Trust in, Siamsinpawlpi heutu masa; State polam a Goverment of India nuai a sepna nei, a sepna ua pan ana pension-sate a ding in zan Pathianni sunnung dak 1:00 in Jelshyam Chapel, GBC Campus ah Home Reception Programme neihpih uhi. Home Reception programme neihpih a omte ahihleh V. Dongzathang IRS Retd, President ITAT, N. Tuankhankhup IFS Retd Ambassador of India, Thiauzakhup Hangzo IRS Retd, Chief Commissioner of Income Tax leh Khaikhanthang Hangzo Retd, Deputy Commissioner of Custom & Central Excise-te ahi uh. Hiai hun zatna ah Vumlunmang Vualnam IAS Jt Secretary Home Govt of India in uap a, special address pia hi. Home reception neih a omte a ding in, Rev Dr. S. Langzakham Divisional Superintendent EBC Lamka South Division in vualzawlna nget sak kawm in amaute ziak in Pathian kiang ah kipahthu genna nei hi. Zan a hiai hun zatna ah Langkhanpau Guite Chairman ADC/CCpur, H. Mangchginkhup EM ADC/CCpur, M. Gouzamang Guite EM ADC/CCpur, Pauzakham Ngaihte IRS leh saptuam makaite leh mipoimoh hunkhop in uap uhi.

***New Lamka East ADCC bialtu M. Gouzamnag Guite EM ADC/CCpur in tuni zingkal in Vengnuam New Lamka a Siktui bawlna mun ah IAY, Sprayer, Kumut leh panpihna chituamtuam hawmkhiakna nei hi. M. Gouzamang Guite in a genna ah, Government apan scheme tuamtuam hongpaite a malmal a hawm khelou in, khat-vei thu a lom hawm a sawm ziak in, a seppih EM leh MDC-te'n amau bial chiat ah hawmkhe mahle uh ama'n tuni zingkal a alom a hawmkhia hi'n gen hi. Tu zingkal a panpihna tuamtuam hawmkhiak a omte ahihleh kumut 217, sprayer 42, Alpha Tailoring Institute kiang ah puankhuina khawl (sewing Machine) 4 leh Assistant to Women Organisation ah sum tang in 10,000/- pekhia hi.

***CCpur Assembly Constituency sung a mipite a ding in Phungzathang Tonsing Minister saina in tuni sunma dak 10:30 apan in mun tuamtuam ah Biometric Awareness Campaign neih in om hi. Hiai Biometric Awareness Campaign neihna hun Phungzathang Tonsing Minister in uap ding chih himahleh Manipur Assembly Session neih ahihlai ziak in hong tel theilou a, amah sik in LT Puii SDO/CCpur leh Kamsuanlun EM ADC/CCpur-te'n awareness campaign ah thugenna hun zang uhi. Hiai hun LT Puii SDO/CCpur in a thugenna ah India khua-le-tui hihna ding in biometric lim kilak vek ding ahi chi a, hiai a lim kila khaloute'n Government apan hamphatna bangmah mu theilou ding ua, tua banah limlakna a kila loute, government in India khua-le-tui a pom theilou ding ahi chi'n gen hi. Tuni a Biometric Awareness Campaign neihna munte ahihleh Pearsonmun Community Hall, Bungmual YPA Hall, Chiengkawnpang Community Hall leh HYO Hall HQ Veng-te ahi.

***Director State Council of Education Research Training saina in tuni sunma dak 10:30 in District Institute of Education (DIET) Centre, HQ Veng ah Mandatory of Untrained Elementary Teacher-te a ding in One Day District Level Sensitization programe zatna om hi. Langkhanpau Guite Chairman ADC/CCpur, Mannuamching MCS CEO, ADC/CCpur leh Joseph Lalrothang ZEO/CCpur-te'n Chief Guest, Guest of Honour leh Functional President hihna toh uap uhi. Chief Guest apang Langkhanpau in a thugenna ah teacher- te a ding in training programme kichi poimoh mahmah a, huai ziak a Director State Council of Education Research Training in hiai bang training hon sai uh ahi chi hi. A ban a gen zelna ah teacher training a telkha loute leh training a telkhate sinsakna piak kibang het lou a, huai ziak in training ngaih poimoh huai mahmah chi a, training a telloute'n tunung a haksatna bang hiam khat tuak ding uh ahi chi hi.

***NARCOTICS Control Beaureau, Ministry of Home Affairs Imphal Sub-Zone-te saina in tuni sunma dak 10:00 apan in Dawn School Lailam Veng ah International Day Against Drug Abuse & Illicit Trafficking hun zatna neih in om a, tua ah "Make Health Your New High in Life-Not Drugs" chih thupi a nei in Painting Competition neih in om hi.

***Kalpaisa Kiginni in Tuithalui ah siluang khat muhkhiak in om a a om nung in, police-te'n va a ua, kua hihiam chih chetna ding a District Hospital Morgue ah koih a nung un misi pen theih suah in om ta a, Thangsuamang Buhril (28) s/o Liannang Buhril of District Headquarter Tubuang ahi a, doctor-te'n post mortem a bawl zoh un Lamka Police-te'n a innkuante kiang ah pekhia ua, tuni mah in Tuibuang Hanmual ah kivui ngal hi. A kigen dan in Thangsuanmang Buhril ahihleh Muallum khua a chialpi om ah va tel a, innlam hong pha in kalpaita Ningani in chialpina a tel nawn ding a a inn uapan potkhia, tungkik nawnlou hidan in kigen hi.

***Paite Tribe Council GHQ in phuhkhiak a aom nung kum 64 chinna hong tung ding June 27, 2013 sunma dak 11:00 in Pearsonmun Community Hall ah "Thou ni in Lamni" chih thupi a nei in PTC GHQ 64th Raising Day lopna nei ding uhi. Hiai hun ah Rev Dr. Hs Chinsuanthang Local Pastor EBCC Pearsonmun in hong khe ding a, PTC Flag kaih palhna leh Presidential Address L. Tualkhanhau President PTC GHQ in nei ding a, huetu masa ana mualliamsate suunna leh report tomkim piakna K. Chinkhansuan Gen Secy PTC GHQ in nei ding hi. Hiai hun ah hasotna thu LB Sona Chairman Zomi Council, Phungzathang Tonsing Health Minister, Vungzagin Valte Parliamentary Secretary leh Thanglianpau President ZRO-te'n genna nei ding uhi. Tua zoh in H. Pauzalal Secretary External PTC GHQ makaihna in Open Debate neih hiding a, topic ding in "I khua-le-tui kepbitna Hausate mohpuak" chih hiding a, Innpi Pa in Langkhanpau Guite Chairman ADC/CCpur pang ding hi.

***CCpur District Sport Association (CDSA) in zingchiang sunnung dak 3:00 in Lamka Public Ground ah CCpur District Team te leh District polam leh National Player CCpur District apan mun dang a va kimawlte'n Exhibition Football Match nei ding uhi. Hiai hun CCpur District team a pang ding Zomi Football Club (ZFC) te pang ding ua, CCpur polam team dingte ahihleh Hringsolal Thomte in makaih ding hi. Zingchiang a Exhibition Match a kimawl dingte ahihleh et nuam mahmah ding in kigen a, CCpur Team a telding lak ah tallang deuh te ahih leh Naoton Singh, Suanpau leh Ngulkhsiam te hi ua, Outsider team a kimawl dingte lak a tallang deuhte ahih Khanthang Paite of Pune FC, Hringsolal Thomte of Air India, Henry Gangte of Mumbai Tigers, Zamkhansiam of Pallan Arrows Alvin George of Pallan Arrows, Max Lalzarlien Arhima Shillong leh Lalit Thapa of Churchil Brothers te hi uhi.

Gamdang Tanchin:
***South African President lui Nelson Mandela dinmun in hoihlam nawt chih in om mahleh, Kiginni apan in a dinmun lauthawng huaitak in kisia nawn a, a hinna humbitna ding leh damsak nawnna ding a doctor-te'n a hihtheih teng uh hih uh hi'n kigen hi. South Africa's President Jacob Zuma leh African National Congress Deputy President Cyril Ramaphosa in Pathianni nitaklam in damdawi inn ah Nelson Mandela vehna nei ua, Nelson Mandela enkoltu medical team-te'n Madiba dinmun dakkal 24 paisa apan kisia mahmah nawn ahihdan hilh uhi. Nelson Mandela hatnawnkei mahleh, mi tamtak in amah it lai uh ahihdan leh, amah poimoh lai uh ahihdan gen uhi. Nelson Mandela in bangchik ni chiang hiam in a it mahmah South Africa leh a' mipite nusia ngeingei ding ahi chih South African tamtak in a thei ua, a damtheihna dinmun a siat dan leng mi tamtak in thei uhi. Himahleh, Nelson Mandela in a sihsan taktak hial ding bel ngaingamlou ua, si hita lehleng mi tamtak kiguih ding omlai uhi, chi'n report khat in taklang hi.
South Africa a polical system khat, apartheid kichi, chi-le-kuang thu a kideidanna leh kichiziatna hihbeina ding in naktak in Nelson Mandela in pan ana la a, jail ah sawtpi khum in ana om hi. 1994 in South Africa ah apartheid hihbei in om a, huai nung in Nelson Mandela tuh South Africa a mi vomte lak a president masapen ding in telching om hi. Tuap natna/lung infection ziak in June 8, 2013 in damdawi in ah puaklut in om a, huainung damdawi inn nusia kha nawn nailou hi. US National Security Council thupuangtu Caitlin Hayden in, South Africa mipite leh Nelson Mandela leh a' innkuante kiang ah America-te' lungsim om a, thumna ah phawk uh ahihdan gen hi. Zanhal zek in, Nelson Mandela' tupa Mandla Mandela in, a' pu dinmun in hoihlam nawt a, tunung sawtlou a damdawi inn nusia thei ding ua kinem ahihdan ana genta hi.

***US intelligence agency-te' surveillance programme liantak toh kisai thuguk poimoh hunkhop puangkhiatu Edward Snowden man ding leh US ah thonkik ding a US solkal in Hong Kong thuneitute kiang a ngetna a bawl himahleh, US ngetna in Hong Kong a legal requirements chin zohlouh banah, Snowden matna ding leh hentangna ding a US apan information kichiantak leh kiningching a neihlouh ziak in Edward Snowden man lou ua, Hong Kong apan gamdang a a paikhiak ding leng dal tuanlou ua, tu'n Edward Snowden, Moscow tung hi. Ed Snowden in Hong Kong a nutsiat nung sawtlou in, anti-secrecy group WikiLeaks panpihna toh Ecuador solkal kiang ah asylum ngetna khia a, Moscow apan Ecuador zot sawm hi'n kigen hi. Edward Snowden in Hong Kong apan in Moscow zuan mahleh, Russia gam lut theihna ding in diplomatic visa hiam, standard visa hiam khat bek a neihlouh banah, US in a' passport a phiat sak ziak in Moscow lut theilou a, airport hotel ah omlel hi'n kigen hi. Hong Kong apan Moscow leh Moscow apan Ecuador a lut theihna ding in Wikileaks in Edward Snowden kiang ah panpihna pia hi'n kigen hi. Pathianni in Moscow airport ah Ecuadorian flag leh diplomatic plate kithuahna car khat in Snowden ana ngak a, Russia a Ecuador Ambassador in Moscow airport hotel khat ah Snowden kimuhpih hi'n gen hi.
Veitnam veh a omlel Ecuadorian Foreign Minister Ricardo Patino in, Ecaudor ah Ed Snowden in bukna leh bitna, asylum ngen ahihdan gen a, Ecuadorian solkal in leng Snowden ngetna nguntak a vel chian lel ahihdan gen a, asylum piak ding leh piaklouh ding toh kisai thupukna om nailou hi'n gen hi. Snowden in Hong Kong a nutsiat thu US in a theih in thangpai mahmah a, Hong Kong naktak in dem a, Moscow kiang ah Snowden lutsak lou ding leh US ah sawlkik ding in ngetna bawl a, Ecuador, Cuba leh Venezuela gamte kiang ah leng kuamah in a gam ua Snowden lutsak lou ding leh a lut leh leng US ah thonkik nawn ding in ngetna bawl hi.

***Lebanon ah Sunni Muslim siampu, cleric nungzuite leh sepaihte kal ah kinawktuahna nasatak a piang nung in Lebanese sepaih sawm in sihna tuak uhi.
Sunni Muslim siampu, Sheikh Ahmad al-Assir in, Shia movement makaihtu Hezbollah helpawlte Syria buaina a a va kigolh uh deihlou a, a nungzuite toh Lebanese sepaihte kal a kikaptuahna a piang nung in Lebanese Army officer leh sepaih sawm in sihloh ua, Army-te'n ngongtatna ahi chi uhi. Sheikh Ahmad al-Assir nungzuite'n Sidon khopi nawl a om Abra a Army-te checkpoint khat umkual in naktak a bei uh hi'n kigen hi. Hiai thiltung ziak in Lebanon gamsung mun dangdang ah leng tension sang mahmah hi. Syria buaina in Lebanon khong zou mahmah a, Sunni leh Shia Muslim-te kal ah siatna leh kihoutheihlouhna lian deuhdeuh ziak in Lebanon ah sectarian war dang a piang ding patauh huai mahmah hi'n kigen hi.

***Egypt gam khopi Cairo kiang a Giza ah, Sunni Muslim mipi 3,000 vel in Shia Muslim mi li vua lum uhi. Vuaklup a om mi lite bel, sakhua leh biakna toh kisai a thilhihna a neih laitak ua beih a om uh hi'n kigen hi. Shia Muslim mi li-te'n Islam sinsakna amau deihdan leh utdan a heikawi uh thehzak a tup ziak ua thah a om uh hi'n kigen hi. Egyptian Health Ministry in mi dang hunkhop in leng liamna tuak uh hi'n taklang hi. Sunni Muslims mi 3,000 vel in, Shia leader Hassan Shehata' tenna inn umkual ua, a' innsung a om Shia Muslim mi 34-te'n ni tum ma a Giza khua a pawtsan kei uh leh inn toh buhal khawm ding uh chi'n vauna bawl uhi. Innsung a om Shia Muslim-te'n vauna leh thupiak pen bangmah a a simlouh tak un Sunni Muslim-te'n inn buluhna pan ua, a sung a om Shia Muslim khenkhat leitual ah kaitaal ua, inn leng hal man zek uhi. Kum nih paisa apan in Egypt ah sectarian violence nak pitak in kibehlap a, himahleh Muslim radical-te tup deuhte bel Christian leh Shia Muslim-te ahi uh. Huchikawmkal ah, Egyptian opposition-te'n June 30 in anti-government protest lian huntawk neh tum ua, huai ding toh kisai in Egyptian army General Abdel Fattah al-Sisi in vauna khauhtak suahkhia hi. Egyptian military chief banah defence minister leng hikawm in a gendan in, Egypt ah solkal deihlouhna a kiphinna a kipat ngeingeileh Army-te'n khutzep chetchat a gal-et lou ding uh ahi chi hi. Egyptian Army-te'n ahitheitan a politics ah kidiah khaklouh tum uh ahihdan gen a, himahleh mipite deihna vengbitna ding leh kiphinna deihuailou dalna ding a moral responsibility nei uh ahihdan gen hi.
Egypt a opposition group-te'n June 30 in Egypt gamsung pumpi huam in solkal tung ah kiphinna lian deuh pat sawm ua, huai ni bel Mohammed Morsi vaihawmna in kum khat mel a muh ni hi geih ding a, oppositon-te'n kitawp ding in phut ua, tuaziak in protest pen thaugum suahna leh hiamgamna in zui ngeingei ding a gintakna lian mahmah hi.

***US Secretary of State John Kerry in ni thum sung India vehna nei ding in New Delhi tung a, India ah a taam sung in Indian heutu tuamtuam toh Indo-US civil nuclear deal, terrorism, regional security leh Afghanistan ah political solution a om theihna ding toh kisai banah, India in UN Security Council a Permanent Member hihtheihna ding a bid a bawlpen US palai toh leng leng genkhawm ding ua, thu poimoh tuamtuam tamtak houlim ding uhi. John Kerry in New Delhi a tunnung sawtlou in India mallam a Uttarakhand state ah moonson vuah ziak a siatna leh manthatna thupitak tung lellel pen, a thuakpih thu puang in, flood relief a ding in $15,0000 thawh a, India in huhna a poimoh leh a pia ding a US mansa ahihdan gen hi.

***Italian Prime Minister lui Silvio Berlusconi in Italian Prime Minister a letlai in kum chinglou kizuak khat lei in, luppih a, huai toh kisai thubuai gen venglouh nei lai hi. Court in Berlusconi a mohpaih leh, a makaih People of Freedom party apan MP khenkhat in kitawp ding uh hi'n vauna thupuan bawl uhi. Milan pansan court in Berlusconi tung ah thutanna bawl ding in kisa a, mohpaih a a omleh kum guk sung jail taang ding hi. A kigendan in, Berlusconi in Italian Prime Minister ahihlai in, Milan a amah mimal inn ah, 2010 in, 'bunga bunga sex party' zintun hi. Huai hun ah, Berlusconi, kum 76 in, a luppih ding in nightclub a laam zel Karima El-Mahroug, Ruby the Heartstealer leng kichi numei naupang, huailai a kum 17 khat lei hi. Huai nung in bracelet gu chi a Karima El-Mahroug ngoh in om a, police-te'n man ua, amah lakkhiakna ding in Berlusconi in a tung a thuneihna kikoih pen zangkhial hi'n ngoh in om hi. Berlusconi in thil hihkhelh bangmah neilou ahihdan gen mahleh, prosecutor, Ilda Boccassini in kum chinglou numei toh a lup khawmna ding un sum tamtak pia a, Berlusconi in leng a numei lei pen kum chinglou ahihlam thei gegu ahi chi hi. Boccassini in agen behna ah, Berlusconi toh Karima El-Mahroug a kitheih nung un Kariman in Italian Prime Minister lui apan in sum tamtak huikhia a, euro 4.5 million tungzou ding in gen a, El-Mahroug leng Berlusconi in a sex-partner-te lak a a favourite ahi chi hi.
Berlusconi mohpaih a a om ding leh ding louh bel, amah tung a thutanna bawl ding judge-te lak a numei thumte tung ah naktak in kinga ban ding hi. Mohpaih in om leh leng, Italy's justice system lung-aphuai tak ziak in jail ah Berlusconi lut pahlou ding a, a tung thutanna om pen appeal bawl ding a, huai in kum khat khawng daihlai ding hi. Appeal ah tai deuh a gen chai diam ahihchiang in, thutanna zukkik a a omkeileh, jail lut pan ding hi.

***Huihpi leh vuahpi kithuah ziak in Montenegro ah bus khat, Moraca luipi tung a lei apan taikhia kha a, guamkuak meter 40 vel a sau a kilep suk in mi 16 si in, mi dang 30 in liamna tuak ua, khenkhat gim mahmah uh hi'n kigen hi. Official-te'n bus in tuahsia a tuahlai in bus sung ah mi 50 tuang uh hi'n gen uhi. Tuahsiatna, vuahpi leh huihpi kithuah a omlaitak a tuahsiatna pen thuneitute'n suichetna bawllel uhi. Bus tuahsia a tuangte a tamzaw Romania apan ahi ua, pensioner ngen hi un kigen hi.

***India mallam, abik in Uttarakhand a monsoon vuah ziak a tuilian leh menchim ziak in siatna thupitak tung a, misi muhkhiak zah kibehlap zel a, misi muhkhiak tengteng 600 chingta hi'n kigen hi. Meipi sahluat ziak leh vuah tamluat ziak in helicopter zang a hutkhiakna nasep pen khawlsak phot uh ahihdan Army thupuangtu in gen hi. Helicopters zang a hutkhiakna nasep a khawl sung in, Army-te panlakna leh sepaihte makaihna in kikawmtuahna lei kisiate zattheih zual ding a bawl ahihbanah, hutkhiak aomte mun bitzaw ah nawnkhia uhi. Mi sing khat val taanglai uh hi'n kigen hi. Tuilian leh menchim ziak a Himalayan taang dung a taang khate' innkuante leh tanaute'n Uttarakhand state capital Dehradun ah kiphinna nei ua, hutkhiakna nasep patna ding ah solkal in hun sawt lutsak lua chi'n dem ua, helicopters neu chikchik, khat-vei thu a mi li/nga khawng lel tuantheihna zang a hutkhiakna nasep pen iplah mahmah ua, solkal in haksatna thuakte a ngaihsaklouh ziak a misi tam hi'n ngoh uhi. Tunitan in Uttarakhand state sung mun tuamtuam apan in mi 80,000 hutkhiak leh mun bitzaw ah pikhiak hita ua, Pathianni in mi 12,000 hutkhiak a om uh hi'n kigen hi. Tuilian leh menchim ziak a misite Uttarakhand solkal panlakna in alom a halkhawm hiding un kigen a, misite DNA sample lak ahihbanah, a lim uh leng lak hi a, amaute halna ding in singtum tonnes 50 kaihkhawm in om lel a, himahleh, misite a lom ahalna ding mun, Kedarnath puaktung hinailou hi.

***Hyderabad khopi khat Cyberabad a police station ah, Telengana state bawlkhiakna ding toh kisai a Union Home Minister in Telengana mipite khem a, Telengana state bawlkhiakna ding a a thuchiamte kitheihmoh bawl leh, a thuchiam bang a semsuahlou chih ziak in Section 240 case filed khum in om hi.

***2014 General Election mitsuan kawm in Indian political party-te lak ah a thu a kidouna leh kikaptuahna kipanta a, Gujarat Chief Minister Narendra Modi in a thugenna ah, Ishrat Jahan Fake Encounter case toh kisai genna nei a, CBI leh Congress naktak in dem a, Congress-te'n politics ah hamphatna leh punna a muhna ding un CBI naktak in zang uh chi'n ngoh a, CBI leng Congress Bureau of Investigation ahi chihsan hi. CBI in Gujarat official-te leh minister-te hih minsiatna ding ngen tum leh zong hi'n ngohna bawl hi.

***Bangalore khopi nawl ah, tu zingsang in sai hon in mi li tuan/sik lum in, mi khat naktak in tuanliam uhi. Forest Department-te'n chillouh hiai sai honte bel Pathianni apan Bangalore suburban ah omta uh hi;n gen ua, gamlak a sawllut kik a hihtheihna ding un Bangalore thuneitute'n panla lel uhi.