*District Handloom & Textiles,CCpur in One day Awareness Programme Nei
*The Homecoming Project Nuai ah Spot Drawing and Essay Competition Nei
*Sony India Pvt. Ltd in Hornbill Showroom kiang ah Authorised Dealer hih na pe-ta
*E-District Manager/CCpur Lakna Ding Hun Kisuan
*ZYA GHQ in ZYA Lamka Block Thupitak in Lawm Ding
*CCpur Consumers' Club in Theihsakna leh Ngetna Bawl
*CDSA Saina in Super Division League Kipan Ding

Tanchin Kimzaw:
***District Handloom & Textiles,CCpur in ‘Primary Weavers Co-op Societies for Welfare Scheme’ nuai ah tuni zinglam dak 11.00 in DIC Hall,CCpur ah Handloom Weaver-te ading in ‘One day Awareness Programme’ sai uhi. Huai ah Primary Weavers Co-op Societies nuaia Handloom weaver- tamtak tel uhi. Govt of India in LIC toh pangkhawm in Mahatma Gandhi Bunkar Bima Yojana (MGBBY) kichi pankhe thak a, tua ah Govt of India in contribution 150, Weavers Contribution Rs 80 leh LIC Contribution Rs 100 hiding hi. Hiai policy ahihleh kum 1 sung kia hiding a, kum khat zoh chiang in renew zel ngai ding hi. LIC a tel tawh kisai in Natural death-te Rs 60,000/-; Accidental Death-te Rs 1,50,000/-, Total Disablility-te Rs 1,50,000 leh Partial Disability-te Rs 75,000 tan piak theih hiding in kigen a, waevers te'n a tate uh Class IX- XII kikal simte kiang ah additional benefit in kha 4 hal zel in panpihna in mi khat tung ah 300 scholarship ngah ding uhi.

***The Homecoming Project kichi state pawlam a laisim a va om khia student-te leh Siamsinpawlpi GHQ pangkhawm in Lamka khopi sunga school tuamtuam omte apaisa July 15, 2013 apan in vehna nei ua, tua ah siamsin naupangte toh kituah khawm in kiim-le-kiang kepbit a poimoh dan sinsakna neih pihna in studentte kiang ah singnou khat chiat a suan ding uh pe zel uhi. Hiai pawl te'n tuni sunnung dak 2:30 in Lalpuithuaii Foundation School, Bungmual ah School tuamtuam apan student a chial khawmte uh toh Environment toh kisai in "Lamka of my dream" chih thupi pansan in Inter-School spot drawing & essay competition nei pih uhi. Hiai hun ah school 7 apan student mi 41 kihel in drawing leh essay competition nei uhi. Drawing leh Essay Competition a telte kiang a kipah man piakkhiakna hun Jacintha Lazarus IAS DC/CCpur in uap a, kidemna a tel student 1na apan 3na tan te kiang ah kipahman piakkhiakna nei hi. Hiai hun a DC in a thugenna ah The Homecoming Project leh SSPP GHQ te'n hiai bang a gamsung leh mipi a dinga thilhoihtak a sepkhiak theih uh kipahpih mahmah ahih dan gen a, hiai bang a vaisai tute kiang ah parker pen khat chiat pia hi. Tuni a competition a telte lak ah drawing competition ah Sarah Varthanmawii Class X Young Learners' School in khatna la a, Pauginmang Class VIII of Lalpuithuaii Foundation School 2na in panga, thumna in Lungoulal Class X of St. Pauls' Institute pang a, Essay Competition ah khatna ah Lydia Donbiakkim Class X of St. Pauls' Institute panga, nihna in Thangmuanapu Class X of Young Learners School leh Lalpuithuaii Foundation School apan Class X sinlel Suanbiakson 3na in pang uhi.

***Lamka khopi a ding a amasa pen ding in Sony India Pvt. Ltd. apan in Hornbill Showroom, Mission Road, Vengnuam Junction, Hiangtam Lamka a om in Sony Authorise Dealer hih na ngah ta hi. Sony product TV,DVD, Home Theater leh a dang dang muh theih gige ding hi.

***Ms Jacintha Lazarus, IAS DC/CCpur makaih in amah office chamber ah tuni zinglam apan E-District Manager/CCpur Dist nuai a post 1 semding witten test leh interview omding chih himahleh lemtan louhna khenkhat omziak in July 24, 2013 zinglam dak 11:00 a neih ding in ahun suan in om hi. E-District Manager/CCpur a post 1 lakna ding ah mi 11 in application pelut uhi.

***Zomi Youth Association (ZYA) Gen HQ a President T. Goukhomang makaih in tuni zingkal dak 7:30 in Zomi Council Administrative Office Nehru Marg ah ZYA Executive Member teng, ZYA Lamka block a President & Secy banah ZYA Lamka block nuai a Unit 12 apan President leh Secy teng in joint meeting nei uhi. Huai hun ah kha nawn August 1, 2013 zinglam dak 10:30 in Hiangtam Lamka a YPA Gen HQ Hall ah ZYA Lamka Block thupitak a lop hiding in thupuk uh a, program saiding in Programme drafting committee khat bawl khia ua, huai te'n programe bang kim sai ding thupukna la in moh puakna pekhia uhi.

***Manipur leh State dang kikawmtuahna National Highway 2 ah vuahzuk ziak in memchim (landslide) om a, niteng poimawh van tuamtuam (essential commodities) deihbang in Manipur ah puaklut theihlouh ziak in CCpur District sung a dawr/dukan teng in van mante printed price tung a zuaklou ding in CCpur Consumers' Club in theisakna bawl uh hi.Thudang khat ah Authorised Oil Agencies (Petrol Pump) te'n National Highway lampi siat pen hun lemchang ala in Petrol Pump te'n mipi ading in thautui zuakkhe lou ua, akhak (closed) uh lamdang sakthu leng puang uh a, maban ah vanman tuamtuamte leh Oil Pump te hoihtak a enkai ding in thusuah bawl uhi.

***Distric AIDS Prevention and Control Committee (DAPCC), CONGO leh DCC (HIV-TB) te'n tuni in 1st Quarterly meeting neih sawm mahle uh lemtanlouhna khenkhat a om ziak in July 24, 2013 a ding in ahun suan uhi. Meeting hun ah NGO, Rehab centre teng banah member teng telkim chiat ding in Dr. F Thienkhogin DACO in theihsakna bawl hi.

***Churachandpur District Sports Association (CDSA) saina in zingchiang July 20, 2013 in Lamka Public Ground ah (L) T. Lianboi Simte, Super Division League, 2013 kipan ding hi. CDSA apan thu kiza dan in, July 20, 2013 sunnung dak 2:00 in Super Division League honna om ding a, huai hun ah, Churachandpur Joint Phillanthropic Organisation leh Manipuri Film star-ten football exhibition match nei ding uhi. Hiai hun ah, M.Prithviraj, Parliamentray Secretary, Govt. of Manipur in chief Guest hihna toh uap dinga, Limkholet Haokip, President KKL, GHQ, T.Goukhomang, President, ZYA GHQ, Mangcha, President YMA GHQ leh Zothanmawia, President HYA GHQ ten Guest of Honour hihna toh uap ding ua, Jacintha Lazarus, IAS, Deputy Commissioner, Churachandpur in Functional President hihna toh uap ding hi. Super division league honna hun ah exhibition match kia neih hiding a, huai hun ah, Manipuri film star teng kimtak in hong tel ding ua, amaute lak a lasiam tuamtuamte'n leng lasak na hong neih ding banuah meitei film star-te lak ah bollywood film a kihel kha masa pen ding leh South Indian film a part lakha ding a kigen Bala in leng hiai hun hong uap ding hi. Super Division League ahihleh, zingchiang a hon khiak ding himahleh kimawlna (match) taktak bel, July 22, 2013 in kipan ding a, tua ah Lamka Football Club (LFC) leh New Lamka Youth Club (NLYC) te sunnung dak 3:00 in opening match nei ding uhi.

***Manipur Goverment in tunung sawt lou in class XII zil zoute ading in ANM zilding lakna nei ding uhi. Hiai ding in apaisa July 16, 2013 apan in CMO/CCpur Office ah form hawmkhiak pat in om a, form lanailou te'n July 21, 2013 tan sum 20 pia in lak theih lai ding hidan in thutut kingah hi.

Gamdang Tanchin:
***US khopi khat Detroit in bankruptcy filed nawn hi. Detroit tuh Multi-City chih in om a, himahleh sum lam ah buaina leh haksatna nasatak a tuah ziak in tu'n long term debt a a bat dollar billion 18 sang a tamzaw nei a, pia zoulou in tuaziak in a puksiat louhna ding in federal solkal huhna leh panpihna zong in bankruptcy filed hi. Detroit khopi tuh US a ding a gari bawlkhiakna lam a madawk mahmah ahi a, US khopite lak a a lianpen leh thupipen lina ahi. Himahleh tu'n patauhna leh lauhthawngna in Detroit City tuh tuamchip a, nakpitak in niamkiak hi. Detroit in bat a neihte toh kisai in creditor, sum helsaktute toh kihouna neita mahle uh masawnna leh lam-etna kipahhuai lua muhtheih in kilang nailou a, mipite tuh patautak in om lel uhi.

***Spanish Prime Minister Mariano Rajoy makaihna solkal a minister khenkhat tung ah nekguk-takgukna toh kisai a ngawhna a om ziak in, nekguk-takgukna a kigolh kha minister-te kitawp ding phutna in Spain khopi Madrid ah lungkimlouhna sousang mahmah a, Spanish solkal bawllel Popular Party-te headquarters kong ah mi tamtak in lungkimlouh etsakna in kiphinna nei ua, Party headquarters ah a lut ding uh police-te'n dal in, kongzing dangte awng mahmah hi. Spain vaihawmna lenlel Mariano Rajoy leh a makaih Popular Party a minister khenkhat kiang ah golhgukna sum piak a om hi'n Spain a newspaper lian mahmah nih in suahkhia ua, mipi lungkimloute'n hiai ngawhna pen Spanish Prime Minister in Parliament ah dawnna diktak pia ding in nawhna leh phutna nei uhi. Kiphinna neite'n Spain a vaihawm ding in party thak deih ua, Spain maban ding chiangkuangtak deih ua, kibulpat thakna deih uhi. Zingsang thawhkhiak teng a hamhaihtak a om a, nekguk-takgukna thu kigen gigete ka ning uh chi uhi.

***Cambodian opposition makai tallang mahmah Sam Rainsy in Cambodia ah ngawhna tuamtuam a maituah nung in Cambodia pawtsan in France ah kum li vel va kibu a, tu'n Cambodia ah kitelna a naih nawn tak man in kiknawn a, Cambodia mipite hunkhia ding in ka hong kiknawnta chi'n gen a, Cambodia a kum 28 vaihawmna ana lenta Hun Sein khekkhiakna ding toh kisai in election naichik a om ah naktak a panla ding ahihdan gen hi. Cambodian Prime Minister apan in Sam Rainsy in a tung a ngawhna omte ngaihdamna mu a, tuaziak a Cambodia ah kiknawn hi'n kigen a, maban naichik a election ah a party-te a ding a tuh ding hi'n kigen hi. Himahleh, a kigendan in, Cambodian electoral roll ah Sam Rainsy tuangkha nawnlou a, tuapan ni kua nung a election om ding ah Sam Rainsy in tuh theilou ding hi'n kigen hi. Sam Rainsy bel Cambodian National People's Party a makai ahihdungzui in, election a tuh theihna ding in electoral roll ah a min khumlut nawnna ding in a party in naktak in panla ding a, Rainsy in leng naktak in election ah campaign bawl ding hi. Cambodia ah Khmer Rouge-te vaihawmna a puksiat nung in tulel a Prime Minister Hun Sein makaih solkal in 1985 apan in vaihawmna lentou charchar hi.

***NASA telsuimite'n sol, Mars ah hinna leh ten theihna ding a om hiam chih suizuina nei ding a Mars, Red Planet kichi ah Curiosity Rover a sawllut nung uh kum khat phial a pai nung in, NASA telsuimite'n kum billion li sang a tawmzaw paisa ah Mars tuh tua i tenna leitung toh kibang a ana om ahihdan musuah thak uh hi'n kigen hi. Telsuina vanzat Curiosity Rover in Mars ah information poimawh taktak a kaihkhawmte leh piakkhiakte pansan in telsuimite'n Mars tuh kum billion li val paisa ah mihing' ten theihna planet ahihdan musuah uhi. Curiosity Rover a kithuah vakzung, laser hattak in Mars a suang omte kap pailet in, suang sung a information omte kaikhawm a, tuate leitung a telsuimite kiang ah khaksawn zel in, leitung pansan telsuimite'n Mars a suangte bangbang kihelkhawm a kibawl hihiam chih ngenteltak in suizui uhi. Mars ah atmosphere sahtak ana om ngei a, himahleh boruak a magnetic field kisiat ziak in Mars atmosphere tuh awl-awl a kisia in mangthang a tuni a planet Mars i muh bangbang un Mars omta ahi chi uhi.

***Mohammed Morsi apan a Egypt vaihawmna Egyptian Army-te'n a laksak nung un interim solkal bawlkhiak in om a, huai nung a amasapen ding in Egyptian interim President Adly Mansour in mipite kiang ah thugenna nei hi. Adly Mansour in a thugenna ah, mi khenkhat leh forces khenkhat in Egypt gam tuh buaina leh thagum suahna kokhuk ah paihlut tum in panla mahle uh huaite hihtawp leh beisak hiding ahihdan gen hi. Himahleh, a vaihawmna apan paihkhiak aom Mohammed Morsi gumtute'n bel Adly Mansour pen ka President uh ahikei a, ka thukhentu uh ahi, ka President uh Morsi ahi a, amah kiang a thuneihna leh vaihawmna piakkik nawn ahihma teng kiphinna ka sunzom ding uh, chi uhi. Morsi gupna in mi tamtak in ann le nne lou in kiphinna ah pang ua, huai pen poisa vetlou uhi. Options nih ka nei uh- Morsi kiang a thuneihna leh vaihawmna piakkik ding, ahihkeileh, hiai mun ah ka rights uh sihpih ding chih ahi. Morsi gupna leh zathuapna a Cairo pawlam apan a hong paite'n Cairo khopi sung mun tuamtuam ah puanbukte kai in, abik in Nasr City ah giaklut top ua, Nasr City tuh tu'n Tent City, Puanbuk Khopi suakta hi. Muslim Brotherhood leh Morsi gumtute'n tua Egypt a vaihawmna ding lel tuh sepaih solkal ahi a, Adly Mansour leng makai taktak hilou in, General Al Sisi thunuai a om ahi chi uhi.

***Lebanon in European Union kiang ah Lebanon pansan Hezbollah helpawlte terrorist organisations list ah telsaklou ding in ngetna bawl hi. Lebanese solkal in a ngetna ah Hezbollah-te Lebanese society ah component poimawhtak ahi uh chi hi. Hiai toh kisai in EU thuneitute lak ah leng deihdan leh ngaihdan kibatlouhna ziak in kikhenna om hi'n kigen a, Seppatni chiang in hiai thu genkhawmna nei ding uhi.

***Bihar's Chhapra District a Makrash khua a Primary School khat ah Mid-day Meal lak a guu kihel nekkhak ziak a naupang 23 in sihna a tuah nung un, school headmistress kibumang lai a, police-te'n thudot ding in kuamah matkhiak nei nailou uhi. Huchikawm in, naupang 23-te sihna toh kisai forensic report ngak hilel hi. Mid-Day Meal lak a guu om ziak a naupang 23 sih nung in, Bihar solkal in, Mid-day Meal kihawmna school teng ah Mid-Day Meal huantu leh school principal in ann leh nek ding kibawlte a chep masak zel ding uh chi'n thusuah bawl hi. Mid-Day Meal lak a guu kihel nekkhak ziak a buaisia naupangte etkol a a omna mun uh Patna Medical College ah gas leak chih thu ziak in damdawi inn ah patauhna leh hamhaihna piang hial a, damdawi inn sung ward tuamtuam a omte tuahkhiak in om hial uhi. Thudang khat ah, Tamil Nadu state ah leng Mid-Day Meal nne school naupang za khat val in ann a nek khit un aamhai leh buai in om a, himahleh sihna leh buaisiatna hial tuak a om lam report bangmah omlou hi.

***Tuni'n West Bengal a districts thum ah Panchayat Election phase thumna neih in om a, mihing crore khat vel vote khe thei om uhi. Panchayat poll bel sousang sim mahmah hi'n kigen a, 24 Parganas District ah zan nitak in kisattuahna piang hi. Panchayat poll toh kisai in thiltung khenkhat ah liamna tuak hunkhop om uh ahihdan report om a, Trinamool Congress candidate khat kaplup in om hi. Tuni a election ah buaina, kisattuahna leh thiltung neuhneuh report khenkhat om mahleh vote khiakna bel bangmah hihbuailou hi'n kigen hi. Huchikawm in, vote khia ding a kisa a line a kivual nupite lak ah nau nei bang leng om hi'n NDTV thusuak in gen hi. West Bengal Panchayat election third phase ah candidate 37,500 val om hi.

***Srinagar ah Nilaini nitaklam a BSF-te'n sakhua makai khat a soisak zek nung un mipi lungkimlou in kiphinna nei ua, huai ah BSF-te thau khahna ziak in mi li in sihna a tuak ua, midang 40 val in liamna a tuah nung un Kashmir phaizang lak vel sousang mahmah a, curfew khauhtak puan in om a, tuni'n kiphinna neite toh security-te kidelh in, suang leh bangbang hiam zang in kidengtuah uhi.

***India thuneitute'n Kolkata Airport ah sea turtle, tuipi sumkuang chi tuamtuam sing khat sang a tamzaw passenger mi nih' suitcase apan in mankhia uhi. Hiai sumkuangte bel Thailand tawn a Singapore ah puaklut sawm uh hi'n kigen a, mi nihte hentang in om lel uhi. Tuipi sumkuang, sea turtle chi peuhmah mangthang thei dinmun a om, endangered species a puang ahi uh.