*CDSA in exhibition football match sai ding; super division league tunung sawtlou in kipan ding
*MZP in Annual Conference 40-na zang
*PTC, Mizoram HQ in PTC General Headquarters vehna nei
*ADC/CCpur, Chief Executive Officer in theihsakna bawl
*Overdose khat damdawi inn tut in om; dam zoulou in si
*Zotang Counter kisuan

Tanchin Kimzaw:
***CCpur District Sport Association (CDSA) in, tuni zingkal dak 8:30 in CDSA Office, Hiangtam Lamka ah media-te kimuhpihna nei uhi. Hiai hun ah, Ch. Lhunchon, General Secretary CDSA in, CDSA saina in hong tung June 25, 2013 sunnung dak 3:00 in Lamka Public Ground ah CCpur District Team-te leh District polam a omte leh CCpur District apan national player-te kigawm in Exhibition Football Match nei ding uh ahihdan gen hi. Hiai hun ah, CCpur District Team min in Zomi Football Club, (ZFC)-te pang ding ua, CCpur polam team dingte ahihleh Hringsolal Thomte in makaih ding hi'n gen hi. Tua banah, CDSA saina mah in Lamka Public Ground ah July 13, 2013 apan in (L) T. Lianbawi Memorial District Super Division League neih sawm ahihdan gen a, hiai ding toh kisai in Super Division Clubs/Team-te'n CDSA Office kai hunsung in entry form lak theih ding a, July 6, 2013 tan in form submit kik ngai ding hi. Form submit hun in entry fee Rs 2500/- leh security deposit Rs 1000/- piak khawm ngai ding a, July 9, 2013 in club/team manager teng toh CDSA in meeting nei ding uhi. Hiai (L) T. Lianbawi Memorial Super Division League ah champion hihna latu in Trophy + Cash award Rs 10,000/- sang ding a, tua banah runners-up in Rs 5000/- sang ding a, best goal keeper in Rs 1000/- banah Golden boot sangtu in Rs 1000/- mah sang ding uhi.

***Mizo Zillai Pawl (MZP) Manipur Headquarter saina in, tuni sunma dak 10:30 in Nghathal YMA Hall ah, The 40th Annual Conference-cum-Meritorious Award Distribution Programme zatna om hi. Hiai hun, Langkhanpau Guite Chairman ADC/CCpur in chief guest hihna toh uap a, Maniram Sharma IAS Addl DC/CCpur in guest of honour leh T. Sumlianthang MDC in functional President hihna toh uap hi. Dingluaia i/c Secretary Education, MZP Manipur HQ makaih in Meritorious Award piak khiakna neih in om hi. Tuni a award piakkhiak a omte ahihleh Lungmuana IAS in a' pa Hiako Memorial Award di'a a thoh hi'n kigen hi. Award tuamtuam hawmkhiak a omte lak ah Class XII Arts Topper K. Ruthy d/o H. Thangkhosiem of Chiengkawnpang kiang ah Memento leh Cash Award 10,000/- piak in om a, Science Topper Jeremy Lalnunmawia Renthlei s/o R. Lalthankima of Imphal Checkon kiang ah Memento leh Cash Award 7000/- piak in om a, Commerce Topper Lamthiankim d/o Enthang of Nghathal kiang ah Memento leh Cash Award 7000/- piak in om hi. CBSE Class X topper, Chingneihlhing d/o Lunmang of Chiengkawnpang leh Mercy Kimneithiem d/o Jamkap Kipgen of Chiengkawnpang-te kiang ah memento leh cash award 3000/-chiat piak in om uhi. Tua banah, Class X Mizo subject a topper Chiinneilhing d/o Lunmang of Chiengkawnpang leh Class XII Mizo subject topper Lalhriatrengi d/o Lalbiaksanga of Mualvaiphei-te kiang ah Mizo Literature Society-te'n memento leh cash award 1500 tuak pia uhi. Chief Guest apang Langkhanpau Guite Chairman ADC/CCPur in a thugenna ah, tuni a award sangte kiang ah kipahpih thu gen a, student paikhawmte, laisim uang lua chih omlou a laisim ding a hasuan kawm in, maban ah nam leh gam makai dingte na hi uh chih mangngilh kei un chi hi. Chief Guest in, tulai in siamsinna sang mahmahta a, huai ziak in siamna pibawl chiat ding leh siamsinna kia in khovel pumpi khekthei ahih lam mangngilh lou ding in student paikhawmte kiang ah gen hi. Student-te laisimna lam ah nu leh pate'n leng mohpuakna liantak kinei a, tua ziak in student-te'n a laisim sung ua, nu-le-pate'n thumna neih sak a, amaute tutpih poimoh mahmah ahi chi hi. Tua banah sinlai hih lai a, khamtheih tuamtuam zu-le-sa leh adangdang a kibual lou ding leh tup kichian tak leh lungsim siangthou tak toh laisim chiat ding in siamsinte hasuan hi.

***Paite Tribe Council (PTC) General Headquarters vehna nei ding in zan in, Mizoram HQ President H. Dalkhenkhai makaih in PTC, Mizoram HQ a makai mi 4, Lamka hong tung ua, PTC GHQ in amaute vaidawnna leh ann nekkhawm pihna tuni sunnung dak 2:00 in PTC GHQ Office Conference Hall ah nei uhi. Hiai hun ah H. Dalkhenkhai President PTC Mizoram HQ in a nna sepkhiakte uh leh maban ah tup-le-ngim a neihte uh report piakna hun nei hi. PTC Mizoram HQ apan in H. Dalkhenkhai President, General Secretary Thangkhanlal Samte, CEC Member Tualkhanzam leh CEC Member Thangzamuan-te hong tel uhi.

***Autonomous District Council CCpur, Chief Executive Officer Smt. Mannuamching in tuni a thusuah a bawlna ah, New Bazaar Super Market a 1st leh 2nd floor a vannen tuamtuam zuakna, shop leh anteh-louhing zuakna vegetable shop hon theihna ding a seat piak a omte'n June 30, 2013 tan a amau a ding a seat kipai chiat luah ding in theihsakna bawl a, hiai theihsakna zuilou a, June 30 tan meh leh van zuak utte kiang a seat piak aomte'n amau a ding a seat kipiate chiat a luahkei uh leh, seat piak a omsa pen phiat/cancel hiding a, security deposit abwl teng uh leng lakik theilou ding ua, kuama'n complaint bangmah bawl theiloiu ding uhi.   

***Headquater Veng Youth Organisation (HYO) in, Headquater vengsung ah nitak teng a duty a neih sek dungzui un zan nitak in, HYO volunteer nitak duty-te'n CCpur Government High School huangsung ah pasal khat overdose a buaisia tuakkha ua, kintak in Lamka Police Station ah theihsakna bawl ua, police-te'n leng damdawi inn tun mahle uh damsuah zou lou in si a, misi pen a' min leh a' hihna bangmah theih ahihlouh ziak in District Morgue ah koih in om hi. Lamka Police Station OC, Elvy Tunglut makaih in zan nitak leh tuni zingkal apan in police-te'n misi kua hihiam chih kansui ua, Khuanggin hausa L. Thangkhansum' tapa, Pauminlun (22) ahihdan theikhia uhi. Amah, Pauminlun ahihleh, ni thum vel paisa a' khua ua pan Lamka hongzin ahi a, Church Road, Vengnuam, New Lamka a a' pa-neu Mangkhochin inn a tung hi'n kigen hi. Siluang tuni mah in a' khua ua vui ding in puakkhiak in om hi.

*Lamka to Aizawl Sumo Services ticket counter-te lak a khat Zotang Counter kichi, mipite khualna leh alemtang zaw ding etna in IB Road apan in Salem Veng, Tedim Road, opposite Zamkunga Compound, HDFC Bank kiang ah June 20, 2013 in kisuanpheita a, hiai counter kisuan ziak a buaina nei khempeuh in Contact Nos. 8014-53-0436 hiam 8730-91-8620 ah thuchian kan theih ding hi.

Gamdang Thu:
***Brazil solkal in public transport tuanman cent kua chauh a khansaak nung in mipi lungkimlouhna leh kiphinna in zui a, Brazilian solkal in leng bus leh metro train tuanman a khansakna teng zukkik mahleh, kiphinna a pai ngei in paizom zellai a, Ningani in Brazil khopi mun tuamtuam 100 val ah mihing million 1.2 vel in rally leh kiphinna sunzom ua, vaihawmtu solkal kizenlouhna, nekgukna leh damtheihna, siamsinna leh economy lam awlmoh sang a solkal in kimawlna man tam taktak a ziak a mipi tamtak lungkimlou in kiphinna sunzom lai ua, maban ah kiphinna tamzaw sem neih sawmlai uhi. Brazilian President in Japan a vehna ding thulh zen in, Ziltawpni in emergency meeting sam hi. Brazil gam khopi, Brasilia ah protesters tamtak in Brazil Foreign Ministry, a nihveina ding in lut sawm nawn ua, police-te toh naktak in kinangtuah ua, Brazil Congress leng dakkal bangzah hiam umkual ua, akiang ah mei liantak hal uhi. Protest-na a mipi tamna pen ahihleh Rio de Janeiro ahi a, mipi sing tamtak kipunkhawm in rally lian mahmah nei uhi. Khopi 10 ah kiphinna pen thagum suahna leh police-te toh kinawktuahna in zui a, Sao Paulo a kiphinna ah, mipi tamtak kongzing ah kizui in, Brazil national flag tawi in, tumging toh lum vengvung ua, nopbawlna mah bang hi. Huchikawmkal ah, Brazil kiphinna ana hamphatpih khenkhat om veve. Brazil a kiphinna a kipat nung in maiphaw, face mask zuaktu numei khat in ni tamlou sung in sang li val khawng ngal hi. University siamsin naupang tamtak in leng kiphinna zom ua, Brazilian solkal in kimawlna pen solkal 'top agenda a a koih ding hilou ahi, chi uhi. Brazil tuh football gam, football nation chi a theih aom ahi a, politician-te na-ngawn in appoinment khenkhat cancel hial in football kimawlna et ding ngai poimoh uhi. King of football, Pele in mipite kiphinna pen thagum suahna leh hiamgamna toh kizuilou a peaceful protest ahih sungteng gum ahihdan gen a, himahleh protester-te'n kongzingte nusia a kiphinna tawpsan ding in ngetna nei hi. University student-te'n Pele thugen bangmah in ngaituanlou ua, football sang in siamsinna leh damtheihna etkaina lam ah sum tamzaw zat ding deih uhi. Hiai kiphinna in leader atuam a neilou ahihdan gen ua, a kipanpan ahi chi uhi.   

***Indonesia a Sumatra tuikulh gam apan gam kang ziak in meikhu sah tak in Singapore tuamchip a, lenna khenkhat cancelled in om a, huih na-ngawn diiklut ding a lauhuai thei hi'n kigen a, Singapore thuneitute'n leng loh-ngaihna thei tuanlou in, meikhu zam in nipikal khat vel daih ding ahihdan puang ua, kuapeuhmah inn kong a om tamlou a, innsung a om tam zaw ding in theihsakna bawl a, huih sianglou tampi diklut khak ding kivenna a maituamna zang ding in mipite kiang ah theihsakna bawl hi. Indonesia ah, hiai gam kang pen phelhmit tum in meiphelhte'n ni thum sung naktak in panla ta ua, himahleh, gam katna hectar 1000 sang a lianzaw ahihman in Indonesia solkal a ding in chouna liantak suak hi. Indonesia, abik in Sumatra lak ah, haichi leh adangdang chinna kipatna ding a gam vat a, hal siang hun ahihman in, company lian taktakte leh loubawl mite'n gamlak vat in mei in halsiang ua, tuaziak in meikang in bangtan peh zomlai ding chih theihchiang haksa mahmah hi. Meikang phelh a haksatna diak ahihleh, chiangkang leh singnah pulhte leilak ah sah mahmah a, huaite atungtham ah kanglou  in, akawm lam ah kang a, meiphelhtute a ding in haksa mahmah hi. Singapore in Indonesia apan a gam kang ziak a Singapore a huih sianglou toh kisai in Indonesia kiang ah complaint a bawl mahleh, Indonesia solkal in  naupang na bang uh chihsan uhi.   

***Somalia khopi Mogadhisu a UN agencies munpi al-Shabab helpawlte'n a beihna ua si, UN workers 3, South African mi nih leh Kenyan mi khat luang, Kenya puaktung in om a, a' innkuante un ana vaidawn uhi. Nilaini a bomb leh thau toh UN munpi beih a a omna ah UN worker mi 8 leh Somali mi 5 in sihna tuak uhi.

***Syria kidouna paizel ah, opposition rebel-te'n international community kiang ah athak in galvan ngetna nei nawn uhi. Opposition rebel-te kikhaikhawmna Free Syrian Army a member-te'n Syria gam tung mun khenkhat a no-fly zone koih in omleh humanitarian disaster pumpelh aom thei ding ahihdan gen uhi. Syrian Army-te leh rebel-te kikap tuahna khopi lianpen Aleppo ah paizom zel a, Free Syrian Army in, Aleppo khopi lakkik nawn teitei tum a Syrian Army-te naktak a hong pang ding ua a gintak thu uh gen uhi. Syria buaina toh kisai mah in, UN Human Rights Chief, Valerie Amos in, Syria buaina ah mihing' hinna, dikna leh tan zahtaklouhna leh bangmah a ngaihlouhna uang mahmah a, patauh huai dinmun ahihdan gen hi. UN in khangthu a humanitarian appeal thupi pen leh lianpen a bawlna ah Syria buaina, galtaite leh mihing hinna leh khosakna kisia dimdemte tunding nawnna ding in $3.9 billion bek poimoh ding ahi chi'n khovel gamte kiang ah ngetna bawl hi.  

***Palestinian Prime Minister in, nipikal nih sung geih office a luahnung in, thuneihna kituhna ziak in kitawpna pialut nawn hi. Rami Hamdallah in, Palestinian polictics a thuneihna kituhna, authority conflict ziak a kitawp ahihdan gen a, aban bel bangmah gen sau utlou hi. President Mahmoud Abbas in Prime Minister kitawpna pomsak nailou hi'n kigen hi.

***Canada a Quebec province ah fire-work factory khat ah explosion thupi tak piang a, mi nih si uhi. Kipatna theihchet nailouh puakzak ziak in factory leng mei mei in kang hi. A' kim-le-kiang a inn omte apan mite kihemkhia ding a sawl ahihbanuah, a kiang nai a highway leng khak in om hi. Police-te'n puakzak kipatna suizuina neilel uhi. Huchikal ah, Canada tumlam om Calgary province ah vuah tamtak a zuk ziak in tuilian a, mi 100,000 vel khawng mun bitzaw ah kisuankhia ding a theihsak, evacuation order piak ahi uh. Tuilian in kikawmtuahna lei leh lampi khenkhat hihsia a, vuah tamsem zu lai ding a genkholh ahi.

***US leh Taliban in kihouna a neihna ding ua Doha a Taliban's political office honkhiak a om, a min ding in Islamic Emirate of Afghanistan chih zang ua, signboard leng takkhia uhi. Hiai pen Afghan solkal in zadah mahmah a, Afghanistan ah Taliban-te vaihawmna neuchik leng a om nawnlouh nung leh, Taliban vaihawmna kaihpuk ahihnung a Taliban-te vaihawmna leh solkal tuam nei dan a a kikoihna uh, leh state in exile dan a a kikoihna uh Afghanistan solkal in zadah mahmah hi. Tuaziak in Taliban-US-Afghanistan kihouna om ding apan in kizukkhia a, US solkal toh kihouna a neih lellelte apan in leng kizukkhia a, UN tanpha ah a lungkimlouh thu uh tangkoupih uhi. Afghan solkal a thangpaih luatziak in US-Taliban kihouna ding leng hun suan in om a, Taliban-te'n leng a' office thak ua Islamic Emirate of Afghanistan chih a tak uh lakhia ua, US in kipahpih thu puang zom ngal hi. Tu'n Afghan solkal in, condition khenkhat a koihte uh zuih ahihpeuhleh US-Taliban leh US-Afghanistan kihouna ah lut nawn maithei uh ahihdan puang uhi. US State Department thupuangtu Jen Psaki in, maban, ni tamlou sung a kihouna a kipat theih a lam-et thu gen hi. US State Department in Taliban in US solkal kiang a a ngiat masak ding ua gintak uh bel, tulel a Taliban commander nga, Guantanamo Bay a kikhum lelte khahkhiak masak ding in kalh masapen ding un gingta ua, Taliban-te'n 2009 apan POW dan a a mat uh leh a hentang lel uh US Army Sergeant Bowe Bergdahl toh kikhek ding offer bawl ding ua gintak ahi. Himahleh, US in Taliban commander mi nga Guantanamo Bay a hentang lelte bel US in khahkhiak ding a lauhuai a chihte uh lak ah tel ngen ahi uh.

**Khovel a mihing tamna pen China ahi. Mihing atam ziak mah in misi omzah leng kum khat in million-a-sim tung gige a, huchikawm in, mihing kibehlap zel, a si kibehlap zel mahleh, gam leitang pen kibehlap tuanlou ahihman in misite vuina mun, hanmualte dim gawp a, hanmual leh kivuina mun ding neu hiaihiai a, China ah leitang mun-awng neu hiaihiai ahihman in, huai pen hihvengna ding in Chinese solkal in idea thak khat pan a, misite tuipi ah vui ding chih hileuleuta hi. Misi neite'n, a it mahmah uh a suunte uh tuipi a vuina neihna ding a sumsen teng solkal in seng ding a, innkuan khat tung ah US$ 320 zel pia ding hi. Hiai thupuan China in a bawl nung in tuipi tung a misi vuina 2 % lel tungzou pan a, himahleh China solkal in pan lak behlap zel tum lai hi. China ah, kum teng in Annual Day of Remembrance kizang a, huai hun chiang in, lusunna nei khata innkuante'n a it mahmah uh, a suun takte uh hanmun ah vehna nei zel ua zahna leh ngaihnatna va pia zel uhi. Tuipi a kivuina omleh, Chinese innkuante'n vehna ding mun nei nawn lou ding ua, Chinese tradition bohsiatna khat hiding hi. Himahleh, Chinal solkal in gam leitang humbitna ding in Chinese tradition, chindan leh tawndan khawng kidal sak maimai tumlou uhi.

***India mallam state Uttarakhand a monsoon vuahtui tamtak a kiak ziak in siatna leh manthatna thupitak tung a, Uttarakhand state solkal thusuak ina taklat dan in,  tuilian leh menchim ziak in Uttarakhand state sung a lamlian 1100 vel ah kisiatna nasatak om a, kikawmtuahna lei 94 tui ih taaisia hi. Hutkhiakna nasepna ah Indian Airforce-te'n helicopters 30 zat behlap nawn ua, tawl-nga lou in helicopter 43 in relief material leh tuilian leh menchim ziak a taangte hutkhiakna nasep pia lel hi'n kigen hi. Uttarakhand a tuilian leh menchim ziak a misi kibehlap zel a, tuni tan in misi muhkhiak 207 chingta a, siatna huaisiatak ziak a misi 1000 tungtou zou ding a gintak ahi. Mihing 34,000 hutkhiak in omta ua, 50,000 vel taanglai uh hi'n kigen hi. Hutkhiakna nasep leh panpihna piakna ah solkal a ze-awl mahmah ziak in mipi'n solkal iplah mahmah uhi. Indian Prime Minster Manmohan Singh leh Congress President Sonia Gandhi in huihkhua apan in monsoon vuah ziak a tuilian, menchim ziak a siatna leh manthatna a tunna munte etkhiakna nei uhi. Home Minister Sushil Kumar Shinde in Kiginni in Uttarakhand state vehna nei ding a siatna leh manthatna thupi tak a tunna munte etkhiakna leh vehna nei ding hi. State Disaster Response Fund apan in Uttarakhand in Rs 145 crore panpihna mu ding a, Sonia Gandhi in, MP leh MLA teng kiang ah a kha khat loh chiat uh relief a ding a thawh ding in ngetna bawl hi.

***Mumbai, Thane area a Mumbra ah zan nitak zan kimlai in, kum 30-a-upa building sawng thum nei khat kichim nawn a, building kichip hun a building sung a ihmu lai, naupang thum tel in, mi sawm in sihna tuak ua, mi dang 40 vel liam uh hi'n kigen a, building kichim nuai a taang khate hutkhiakna nasep pai lel hi. Kha thum sung a Mumbai ah building thum a kichipna hita a, tua building kichim a tengte rehabilitation piakna ding toh kisai in solkal in tutan bangmah ngaihsak nailou hi'n kigen hi.