*International Day Against Drug Abuse and Illicit Trafficking ah Spot Painting Competition om
*Autonomous District Council CCpur in Council Siiting 6-veina nei
*PTC GHQ 64th Raising Day zang ding
*ZYA GHQ in ZYA Lamka Block hong khia ding
*HSLC Compartmental Examination Admit Card kihawm ding
*Album honna om

Tanchin Kimzaw:
***District Social Welfare Office (DSWO) saina in tuni zinglam dak 9:00 in Synod Hall IB Road ah International Day Against Drug Abuse and Illicit Trafficking chih thupi a nei in Spot Painting Competition neih in om hi. Painting Competition ah school tuamtuam apan student Class V apan Class X kikal te tel ua, Category A leh B in kikhen uhi. Category A ah Class V-VII tan tel ua, tua ah Kamliansang of Dawn School Lailam Veng in khatna la a, Thangliansiam of Dawn School Lailam Veng leh Lunhoihching of Donbosco School te'n 2na leh 3na la uhi. Category B ah Class VIII-X tan te kihel ua, Thangthianzou of Donbosco School in khatna la a, Jolly Vungthianniang leh Nangminlian Guite of Dawn School Lailam Veng te'n 2na leh 3na la uhi.

***A. Umarani Devi District Social Welfare Officer, Dr. F. Thienkhogin District AIDS Control Officer (DACO), H. Doungel Co-ordinator NYK leh Thangpu Tonsing i/c Drug Cell te pang khawm in tuni sunnung dak 12:00 in Synod Hall IB Road ah "Give new High to Health, not to Drugs' chih thupi pansan in International day against Drug abuse and Illicit Traficking zatna neih in om hi. Hiai hun zatna ah L. Mangkhogin Haokip IPS SP/CCpur in chieh guest hihna toh uap a, resource person tuamtuam in topic tuam chiat zang in sinsakna nei uhi. Hiai hun zatna student tamtak in uap uhi.

***Tuni sunnung dak 1:30 in CCpur District Hospital Medical Superintendent Conference ah District Hospital ah doctor te ding in Inhalant use Disorder chih thupi a nei in Continued Medical Education Training nei uhi. Hiai hun ah Dr. Gyneshwar Singh Psychiatrist in sinsakna pia hi.

***Autonomous District Council CCpur in Council Siiting a 6 veina ding leh tukum a ding a sitting masa pen ding in tuni sunma dak 11:00 in Conference Hall District Council Office ah nei uhi. Tuni a Council sitting kipatma in Kamsuanlun EM/ADCC in Council member paikhawm te devotion neih pih kawm thumna in Council Sitting honna nei a, tua zoh in Langkhanpau Guite Chairman ADC/CCpur makaih in Council Sitting pat in om ngal hi. Tuni sitting a neih na uah, agenda 11 member paikhawm te'n gan khawmna nei uhi. Agenda khatna ah recognition of Village toh kisai in kho thak 5 recognition piak ding in lemsa ua, recognition piak a om ding te ahih leh G. Khomunnuom, Talan, K. Phaijang, K. Zoar leh Lhangnem khua te hi uhi. Agenda nihna ah Shifting of Lamdan Kuki JB School to Phaihel village toh kisai in Council office lam etkhawmna neih thak ding in thupuk ua, ADCC nuai a JB School te ah Mid Day Meal tung tang toh kisai in Goverment order lui om sa dung zui in Mannuamching CEO/ADCC Nodal Officer ding guang ua, aman Council nuai a school omte a mid day meal omte enkai ding in mohpuakna pia uhi. Pension Benefit for Council Employees and Members toh kisai in State Goverment in 2007 a order a suah dung zui uh toh kituak in thuneihna sang zaw te kiang ah phut touh ding in lemsa ua, Post Vaccant leh Creation of New Post toh kisai in ahi theitan a hukdim theihna ding leh post creation om theihna ding naktak panlak tou hiding in thupuk uhi. Tua ban ah Transfer of Land record from CCpur District to Bishnupur District toh kisai leng gen khawmna nei ua, tua ah Bishnupur district nuai ah 60-Sagang leh 98-Torbung khua te ana om kha pe'n leng CCpur District Administrative Juridiction ahih ziak a CCpur kiang piak khiak ding a phut leh CCpur District inch khat leng kek khesak lou dia member te'n panla ding in thupuk uhi. Oil Exploration toh kisai toh kisai leng Goverment leh Jubilant Company te'n Local Self Goverment ADC leh khohausa te bang mah theisaklou in MoU sign a guk abawl uh moh paih kawm in maban a panlak touna ding ah district mipi te lungtunna tan a hih theihna dinga ADC member te'n panla ding in thupuk uhi. 6th Schedule Demand toh kisai in India Constitution nuai a 6th Schedule provision om pe'n CCpur District a zat ahih theihna dia panla ding leh Ammendment of Council Act 1971 toh kisai leng member te'n entou lai ding in tukha sung hun piak in om ua, hoih tak ettou zoh chiang in Goverment ah submit ding in thupukna bawl uhi. Member te'n sitting aneih chiang ua, sitting allowance ding in Goverment apan order thak om masiah sitting Allowance ding in mi khat 1000/- hiding in thupuk ua, August ni khat a Council Day 2013 neih ding toh kisai leng Executive member te moh puakna pia uhi. Sitting ahih leh nitak lam dak 4:00 tan in zousiang uhi.

***Paite Tribe Council GHQ in a kiphuh khiak nung kum 64 chin lopna zingchiang June 27, 2013 sunma dak 11:00 in Pearsonmun Community Hall ah "Thou ni in Lamni" chih thupi a neih in PTC GHQ 64th Raising Day lopna nei ding uhi. Hiai hun ah Rev Dr. Hs Chinsuanthang Local Pastor EBCC Pearsonmun in hong khe dinga, PTC Flag kaih palhna leh Presidential Address L. Tualkhanhau President PTC GHQ in nei dinga huetu masa ana mualliamsate suunna leh report tomkim piakna K. Chinkhansuan Gen Secy PTC GHQ in nei ding hi. Hiai hun ah hasotna thu LB Sona Chairman Zomi Council, Phungzathang Tonsing Health Minister, Vungzagin Valte Parliamentary Secretaryleh Thanglianpau President ZRO te'n genna hun nei ding uhi. Tua zoh in H. Pauzalal Secretary External PTC GHQ makaih na in Open Debate neih hidinga, debate neih hun ah Innpi ngaihdan in "I khua -le- tuikep bit Hausate mohpuak" chih zat hiding a, tau ah Innpi Pa in Langkhanpau Guite Chairman ADC/CCpur pang ding hi. Hiai bebate a telding te ahih leh Ruling Bench ah T. Khupzadou, Social Thinkers, John K. Ngaihte President Paite Literature Society, H. Chinkhokam MCS Retd. V. Dongzathang IRS Retd. N. Tuankhankhup IFS Retd leh Dr. R. Sanga Social Workers te hi ding ua, Opposition Bench ah M. Vumhau Social Thinker, KN Zalam Social Thinkers, H. Thiauzakhup IRS Retd, H, Khiakhanthang IRS Retd. Ginvum Ngaihte leh Nengzagin Guite DI Retd te hi ua, hiai hun zatna Pastor Retd. V. Khamlang in thumna in khak ding hi.

***Zomi Youth Association (ZYA) GHQ Central Executive Committee meeting tuni zinglam dak 6:30 in Zomi Council Administrative Building Nehru Marg ah om a, hiai meeting ah Constituent Unit President teng leng tel uhi. Hiai meeting ah Lamka Block sunga ZYA Unit hon thak 11 te Block khat a gawmkhawm ding dan leh Block makai ding telna neih ding thu gen khawmna nei ua, huai ding in June 28, 2013 sunnung dak 2:00 SYO Hall ah ZYA Lamka Block maki ding telna om ding hi. Huai hun ah Unit hon thak a omte apan palai 7 in vote khe thei ding ua, unit khat zel in amau unit apan candidate mi 2 chiat a guan uh ngai ding hi. Hiai ni mah in telching a omte kichiam sakna ZYA GHQ President in nei sak ngal ding hi. ZYA GHQ in ZYA Lamka Block thupi tak alaklutna maban ah neih pah sawm ua, tua hun ah Zomi sunga MLA teng ban ah officer tamtak chial hiding in T. Goukhomang President ZYA GHQ in gen a, huai hun ZYA website leh constitution english apan lehkhiak a om hon khiakna leng neih hi ding h'n leng gen hi.

***High School Leaving Certificate Compartmental Examination, 2013, Churachandpur Private Centre Officer-in-Charge, apan theihsakna a, a hong tung ding July 2, 2013 a HSLC Compartmental Exam om ding toh kisai in, zingchiang, June 27, zinglam dak 10:00 apan in Central School, IB Road ah Admit Card hawmna om ding hi. HSLC Compartmental Exam bel, Lamka Central School, IB Road ah July 2, 2013 in neih hiding a, exam-ni chiang a student-te'n mahni-skul full uniform chiat toh zinglam dak 9:20 a exam centre tung ding in leng theihsakna bawl hi.

***Hiangtam Lamka Village Authority in 25 Days Job-Card nasepna paipih lel a, tuni chiang in ni 7 chingta a, nasepna paizom zel ding hi'n Authority thusuak in gen hi. Tuni in leng JCB leh Tipper 2 zang a nasep ahi.

***H Pauzacin' La-te - Tun leh Zua Lungtup - kichi Zomi la siam tuamtuam in a sak uh video album honkhiakna tuni'n Simveng SYO Hall ah, Pu LB Sona, Chairman Zomi Council in nei a, Rev. Dr Sutkhanthang, Executive Secretary, CBA in Pathian kiang ah latna nei hi. Hiai hun ah, la phuaktu leh kaikhawmtu H Pauzacin in hiai video album putlakna nei hi.

***Evangelical Churches Association, Evangelical Baptist Convention, Christian Institute of Management leh Glocal Volunteer-te'n pangkhawm a a sai uh, Two Days Management Seminar for Churches and Public and Charitable Institutions/Organizations kichi Dorcas Hall, New Lamka ah tuni'n a ni nihna neih in om nawn hi. Zan in Constitution of India, Finance Management leh FCR Act toh kisai seminar om ta a, tuni'n Organisational Management leh Income Tax toh kisai kisinsakna om nawn a, seminar zoh in a tel teng kiang ah certificate piakkhiakna leng om hi.

Gamdang Tanchin:
***Brazil a kiphinna paizom zel ah, Rio de Janeiro khopi nawl zek a om Capao Redondo leh Campo Limpo ah peaceful protest om nawn a, mipi 500 vel in dakkal bangzah hiam lampi khaktan uhi. Kiphinna pen thagum suahna leh hiamgamna in zui zel a, criminal gang, mi gilou pawlkhat in Brazil kiphinna pen hun renchang a la in mi suamna leh dawr khenkhat luhna in zang uhi. Rio de Janeiro slum, Nova Holonda Favela ah mi gilou pawl khat in lampi khaktan in mei chih ua, lampi khaktan na a taang garite suam ua, police-te'n delhzui in kikaptuahna piang a mi kua kaplup ahihbanuah, mi dang 9 mat in om uhi. Kikaptuahna ah police officer khat tel in criminal gang member mi nga leh Favela a teng mi thum kaplup khak in om uhi. Confederation Cup kimawlna pailel ah, Uraguay leh Brazil in semifinal kimawlna Nilaini in nei ding ua, huai hun ahmipi 100,000 vel in Belo Horizonte ah protest neihnawn tum uh hi'n kigen hi.

Belo Horizonte ah Brazil leh Uraguay in semifinal kimawlna a neih ding ziak un public holiday a puan in om a, kiphinna aom leh kinawktuahna piang thei dinmun hi'n thuneitute'n gen uhi. FIFA President Sepp Blatter in leng hiai kimawlna uap ding hi'n kigen a, tuaziak in security leng hihkhauh mahmah in om hi. Brazil kiphinna neite khem lungdamna ding a President in political reforms a om theihna ding a referendum neih ding proposal a bawlpen Brazil Congress in nawlkhin sak hi. Senate President Renan Calheiros in student-te a ding a free transport bawlkhiak ding in proposal bawl hi.

***Russian President Vladimir Putin in, US whistleblower Edward Snowden Moscow ah om ahihdan gen a, a ut leh Moscow nusia thei ding a zalenna nei ahihdan gen in, Russia in bangmah lohlou ding ahihdan leh Snowden thubuai ziak a US leh Russia kizopna leh kitanauna in a siatphahlouh a lam-et thu gen hi. Putin in, Moscow ah Snowden a hong tun mawk lam-etlouh leh gintaklouh ahi a, US ah thonkikna ding a, Russia leh US in extraditon treaty bangmah neilou ahihman in, gamtang lou ding ahihdan gen hi. Edward Snowden bel Moscow's Sheremetyevo airport a transit zone ah omlai hi'n kigen a, Moscow apan, asylum a ngetna gam, Ecuador zuan ding a gintak ahi. Ecuador thuneitute'n Snowden in asylum ngetna a bawlpen ngaihtuah lai uh ahihdan gen uhi.

***US President Barack Obama leh a' innkuante'n Africa vehna nei ding in tuni'n US nusia uhi. Africa ah a taam sung un, Senegal, South Africa leh Tanzania-te vehna nei ding uhi. White House thusuak in a gendan in Africa ah a taam sung in US President in US aid, panpihna, khantouhna, development leh mipi vaihawmna, democracy-te gen ding hi.

***China in za-awng a mission a sawlkhiak Shenzhou-10 astronaut-te space ah ni 15 a va om nung un leitung hong tungkik nawnta uhi. Space ah aom sung un manual docking exercise lohchingtak in va nei thei ua, space apan in video conference tungtawn in China a skul naupangte kiang ah sinsakna khenkhat leng pia uhi. Tua space mission nanung pen ah, Chinese za-awng telsuimite'n, China in za-awng ah mihingte etkol ding space station khat permanent in koih sawm a, tua ding in study hoihtak in va bawl uh hi'n kigen hi. Shenzhou-10 bel China in mihing in a etkol leh hek space mission nga-na ahi a, China in kum sawm nung a space ah astronaut a sawl nawn patna leng ahi.

***Chinese space mission pen lohching tak in hon kiknawn mahleh, China's Xinjiang province ah, mipi kiphinna Nilaini zingsang baihtak in piang a mi 27 in sihna tuak uh hi'n kigen hi. Mipi lungkimloute'n temta leh hiamhei tawi in police station leh local governemnt building khenkhat buluh ua, mipite lak ah sepaihte'n thau khah top uh hi'n kigen hi. Buaina a piangna mun bel China ning kilkawm pek aom ahi a, thu-le-la kimchang zaw bangmah ngah om nailou hi. Xingjiang province ah Muslim Uighur leh Han Chinese-te kal ah buaina a piang mun mahmahna ahi. 2009 in Xinjiang ah riot thupitak paing a Han Chinese 200 vel in sihloh ua, April in Kashgar ah riot dang khat piang nawn a, mi 21 si uhi.

***Afghanistan ah Taliban-te'n gamtatna leh thagum suahna paizom zel mahleh US leh Afghanistan in Taliban toh kihouna neih ding chi a a puan pen uh bangmah zukkikna omlou ahihdan leh Taliban toh kihouna neih ding ah tolhlou uh ahihdan gen uhi. Video conference tungtawn in Barack Obama leh Hamid Karzai in Afghanistan a thagumsuahna leh hiamgamna, violence hihbeina ding a lampi omsun pen kihouna toh zuih ding ahi chi'n Taliban toh kihouna neih a tup uh khawlsan tuanlou uh ahihdan pomkipna nei thak uhi. Zan a Taliban-te'n Afghan Presidential palace leh Ariana Hotel a CIA station a beihna uah, security guard thum leh helpawl a tel mi li kaplup in om uhi.

***Uttarakhand state a monsoon vuah ziak a menchim leh tuilian kithuah in mihing hinna leh neih-le-lam leh inn-le-lou tamtak a suksiatna nung a hutkhiakna nasep pailel kawmkal ah, zan nitaklam in Indian Air Force-te'n hutkhiakna nasepna a a zat uh helicopter khat tuahsia a, asung a tuang mi 20-te suakta khat mahleng suakta omlou uh hi'n kigen hi. Air Chief Marshal NAK Browne in, IAF in tuahsiatna lungliap huaitak tuak mahleh, hutkhiakna nasepna a khawltuankei ding a - hutkhiakna nasep zoulou manlou a a hinna uh piate kiang ah i bat uh ahi, chi'n gen hi. Air Chief bel tuni zingkal baihtak in Dehradun tung hi. IAF-te'n hutkhiakna nasepna a a zat uh helicopter khat in tuahsiatna tuak mahleh, tuni zingsang in IAF in hutkhiakna nasep, vuahzu leh meipi sah liailuai kawmkal ah sunzom nawn uhi. Vuah leh meipi sahluat ziak in hutkhiakna nasep pen deihbang in kintak in paizom theilou a, vuah a theu kal hiam, meipite neuchik a kihong kal suam in IAF-te'n hutkhiakna nasep sunzom guigui ua, lauhthawnghuai mahmah hi'n kigen hi.

Uttarakhand mun tuamtuam ah, tu'n si luang muat dek, ui leh mulukolh khawng in a nek pawl leng omta hi'n hutkhiakna nasep atel ITBP personnel-te'n gen uhi. Huchikawmkal ah, mun khenkhat ah tuisiang dawn ding kiningching omlou a, natna hii a piang ding patauh huai mahmah a, tua toh kiton in central in high-level medical team-te Uttarakhand ah sawllut hi. Mi tamtakte nek-le-dawn hoih muhlouh ziak in sungkhawh, sunghoihlou, santen leh khosik sang khawng nei in buai mahmah ua, mun tamzaw ah doctor kiningching omlou hi'n kigen hi.

***Indian Prime Minister Manmohan Singh leh Congress Chief Sonia Gandhi in Jammu and Kashmir a Banihal-Qazigund kal a pai ding rail khahkhiakna nei uhi.
Hiai train service, tuni a honkhiak a om bel Kashmir phaizang a rail service masapen ahi. June 27 apan in regular tak in service kipan ngal ding a,
Banihal-Baramulla-Banihal kawmtuah in nikhat in nga vei tai ding a, zinglam dak 7:10 in amasapen kipankhia zel ding hi. Kilometer 18 a sau Banihal-Qaziqund kal a rail lampi bawlna ding in Rs 1,691 crore zat in om hi. Kilometer 18 a sau rail lampi ah, kilometer 11 sung leihawm, tunnel sung ah tai ding a, hiai tunnel bel India a tunnel saupen ahi a, Asia a ding in a saupen nihna ahi.

***Lankan Tamil issue toh kisai a lungkimlouh ziak a kha thum paisa a UPA apan ana taipawt DMK in, Congress toh kizopna bawlnawn ding in kisa hi. DMK Chief Kurananidhi in a' tanu Kanimozhi in a term nihna ding a Rajya Sabha seat tuh a sawmnawnna ah Congress-te zathuapna ngen a, Congress-te'n leng DMK toh kizopna kisia pen hihhing thak nawn a, 2014 general election ah pankhawm theih a kilama-et ziak un Kanimozhi gupna pia ding hi.

***India a Maoist helpawlte'n a lak ua pang in naupang zong lel uh hi'n kigen a, Jharkhand a Gumhla District apan school naupang guk pimang uhi. Tuma in, hiai kim a school omte kiang ah Maoist-te'n, Maoist-te kiang a training ding in school-te kiang ah naupang guk chiat pia ding in ngetna leh theihsaknna ana bawlta uhi. Huai hunchiam a beitoh kiton a school naupang guk thagum a pimang uh hi'n kigen hi.