* Saptuam pawl tuamtuam te recommend na lehkha tawi kawm a Pau theilou kineih a khut dawh Chandra Mohan Das matkhiak in om.
* Socio Economic and Caste Census ding tawh kisai a Superviser leh Enumerator ding te'n Training nei.
* Jacintha Lazarus IAS DC Churachandpur in New-bazar ah Axis Bank Branch hong.
* Rev.L Khamkholun General Secretary EBC in MEBCC Thiyam Konjin Biakinn thak hong.
* Lhunkhothang Baite vawtu VDF Personel Siambenlian, Chief Judicial Magistrate in Jail tang ding in thutan khum.
* August 1,2012 in District Council Day kizang ding.
* Chief Medical Officer in District sung ah Hotel bawl leh nektheih zuak peuhmah ki-register ding in theihsakna bawl.

Lamka khawpi leh a sehvel a Saptuam pawl tuamtuam te recomend na lehkha tawi kawm a Pautheilou kineih a khut dawh  Chandra Mohan Das (70) H/o Santa of Samacharanpur, New Cachar, Assam tulel a New Bazar a innluah a om, tuni zinglam dak 7 vel in New Bazar ah matkhiak in om a, CDSU te khut ah piakkhia uhi. Chandra Mohan Das in Saptuam pawl tuamtuam 11 apan recomend na lehkha leh document 1 tawi kawm in inn chih ah lut in khut dawh zel hi. CDSU te'n Bengali Association, Churachandpur makai te khut ah Chandra Mohan Das pekhia ua, July 31, 2012 in Lamka apan New Cachar ah sawlkhe ding in theisak uhi.

Socio-Economics and Caste Census 2011 ding tawh kisai in tuni'n Churachandpur district sung a block teng  a Superviser leh Enumerator te'n training pan uhi. Hiai toh kisai in Churachandpur Block te'n SDO churachandpur LT Puii, MCS makaih in District Training Centre, ground floor ah training nei ua, Tipaimukh Block SDO makaih in District training Centre first floor ah training nei uhi. Singngat Block te'n DC Churachandpur office conference hall ah a neih ua, Thanlon Block te'n DC Churachandpur office a BRGF Resource Centre ah nei ua, Henglep Block te'n MGNREGS Hall, Tuibuong ah nei uhi. Hiai training ahihleh zingchiang in leng sutzop hiding a, huai hun ah Data Entry Operator, Supervisor leh Enumerator teng in akigawm in training neikhawm ding uhi.

Churachandpur District sung ah Bank Branch 7na ding in tuni sunnung dak 1:30 in New-Bazar Auto Parking opposite Tedim Road ah Axis Branch thak honna nei uhi. Hiai hun ah Jacintha Lazarus IAS DC Churachandpur in Axis Bank Branch thak hong in Rev.Khen P Tombing Chief Co-ordinator PCI-R in Pathian kiang ah lan hi. Jacintha Lazarus IAS DC Churachandpur in a thugenna ah tuma in Churachandpur District sung ah Bank Branch 2 kia om in mipi'n genvuallouh haksatna tuak gige ua, himahleh tunaizek akipan Bank Branch hong kibehlap theih ziak in kipahhuai petmah chi a, State dang a Axis Bank te'n mipi adia naa tampi a sepkhiak bang ua, Churachandpur District sung ah leng semsuah ding in Bank thuneitu kiang ah ngetna bawl a, Govt. Scheme leh Programme te sepsuahna ding in Govt. in e-payment tungtawn in nasep sawm a, hiai ding in Govt. Bank te kia kizanglou ding a, Private sector bank te leng kizang ding ahihman in Axis Bank inleng kithuahpih ding in ngen hi. Axis Bank Branch Manager ding Bikramjit Choudhury in a gendan in India pumpi ah Private sector Bank te lak ah Axis bank a thumna in pangban a, Manipur ah Branch 4 hon hita a, North Eastern State 7 teng ah om suak in, North East ah Branch 48 nei in ATM 225 neita chi'n gen hi. Hiai Axis Bank Branch honna neihzawh in C Hangshing Executive Director DRDA in Axis Bank ATM Booth hong a, hiai Axis bank Branch ah Branch Manager tel in Staff 8 in nasem ding ua, branch thak hon ahihtawh kiton in mi 117 in Account hong ngal uhi.hiai Axis Bank branch honna hun District Council Member, District Level Officer leh mi poimoh hunkhop in uap uhi.

MEBCC Thiyam Konjin ah apaisa kiginni sunma dak 11:30 in Biakinn building thak leh Gospel Music Video Album " Keidano Thawaigi Panthung Vol-III honna nei uhi. Hiai hun ah Rev. L Khamkholun General Secretary EBC in Biakinn building thak hong in Pathian kiang ah lan hi. Dr. Chaltonlien Amo Chairman Hill Areas Committee in Gospel Music Video Album hong a, BOT Chairman Upa G Thangchinlian in Pathian kiang ah lan hi. Hiai hun ah Rev.S VUngminthang Director of Mission EBC in Pathian thugen a, mun tuamtuam apan saptuam heutu tamtak in uap uhi.

Apaisa July 25, 2012 nitak dak 6:30 vel in Bethel Bazar ah VDF No.020461 Mr Siambenlian (28) s/o Henzalam of Lingsiphai in a tawilai 303 Rifles sialphei in Lhunkhothang Baite (38) s/o Jangkholun Baite of Molnom village naktak in khen a, Lhunkhothang Baite a nakguh 3 kitan in District Hospital ah admit in om hi. Hiai thu ziak in Police te'n Siambenlian man in Chief Judicial Magistrate Court ah dingsak ua, CJM in Judicial Custody ah omding in thutan khum hi. Police te'n zan in Imphal Jail ah koihlut ngal uhi.

Autonomous District Council Administration  August 1,2012 sunma dak 11 in District Council Administrative Building huangsung ah District Council Day zang ding uhi.  Hiai hun ah BS Kasana, DIG/BSF, STC, Jacintha Lazarus IAS DC Churachandpur, Brigadier VS Ranade Commander 27 Sector Assam Rifles leh L. Mangkhogin IPS SP Churachandpur in special guest hihna Council Day uap ding uhi. Lal Hossan, Executive member ADCC in member sisate suunna hun makaih ding a, Mannuamching Chief Executive Officer ADCC leh C Hangshing Executive Director DRDA in District Council toh kisai in report peding uhi.

Dr.HL Liensang Disignated Food Safety Officer and Chief Medical Officer Churachandpur in mipi theihdia poimoh thusuah a bawlna ah Food Safety and Standards Act,2006 (34 of 2006), Rules and Regulation, 2011 kichi India pumpi ah August 5,2012 in kizang panding a, hiai dungzui in Churachandpur district sung a, Hotel a meh-le-buh, singpi -le-sang ban ah lamnawl a Sa minsa zuak, Singzu, Chana leh thei zuakte tanpha in Chief Medical Officer kiang ah August 4,2012 tan in register bawl in License neih ngai ding hi. Hiai hunsung a register bawllou Hotel a nektheih zuak leh muan tuamtuam nekthih himhim zuakte tung ah dan tawh kituak in gawtna pai hiding a, Jail tanpha ah koih hiding chi'n thusuahna ah taklang hi. Hiai Food Safety tawh kisai ahihleh Th.Sunil Kumar District Food Safety Officer in enkai ding hi.

Apaisa Kiginni nitaklam dak 4 vel a kek kia om ziak in Hornbill Cable Network power supply leh vanzat tamtak kisia a, Company te'n hong bawl mahle uh, hiai lak a bawl theih maiding ahihlouh ziak in Kolkata ah bawl ding in pawsuk ua, vanzat kisia bawlzawhna ding in nipi kalkhat vel lutding hi. Vanzat kisia bawlzawh ahihma deihbang in Signal hong kipe theilou ding a, Subscriber te'n hunsawtlou sung hon theisiam ding in kon ngen uhi. Huailou in kha beinawn ding ahihman in Subscriber te'n Cable Operator te haksatna theisiam a Cable fee pe siau-siau ding inleng i ki-ngen hi.

* 27 Sector Assam Rifle in Only Grace kithuahpihna in Anntang leh Chini pia.
* United Chiefs' Committee in Meeting nei.
* Churachandpur District a om ding Women Police Constable 50 te tutung sawtlou in Training ding.
* DC leh SDO teng ban ah District Social Officer in Old Age Pension Sum hawm dingdan bikhiah.
* Khaipao Haokip MDC in apianna Pa Uap Haodem theihgigena dia a bawl Biakinn honkhiak hita.
* DC Churachandpur makaih in DLCC Meeting om ding.
* Socio Economic and Caste Census tawh kisai a Enumerator leh Superviser te Training hunding kisuan.

Zomi Mother Association (ZMA) etkolna nuai a om New Lamka a Only Grace te ading in tuni sun dak 12 in 27 Sector Assam Rifle pawl in anntang bag 2 leh chini bag 1 pia uhi. Hiai hun ah Brigadier VS Ranadee, Commander, 27 Sector Assam Rifles leh Officer hunkhop tel ua, Neilam Vaiphei President Zomi Mothers Association in 27 Sector Assam Rifle te tung ah kipah thugen hi.

Churachandpur district sung a khaw hausate kikhaikhawmna United Chiefs' Committee in tuni sunnung dak 1:00 in United Chief Committee President Lalboi tenna inn, Chiengkonpang ah meeting nei uhi. Hiai hun ah Manipur Cabinet in singtang gam a land survey bawl ding leh MLR and LR Act zatding a thupukna a bawl theihtawp suah a doudal dingdan tel in thu poimoh tuamtuam genkhawm uhi.

Police Department nuai a Women Constable Churachandpur District a om ding mi 50 lakthak a om te'n joining report a piak khit nung un niteng in roll call nei in, parade zilzel ua, tuni apan in uniform silh vekta uhi. Tuni sunnung dak 2:00 in L. Mangkhogin Haokip, IPS SP Churachandpur in amah office chamber ah lakthak a om women constable mi 50-te kimuhpih in, maban a, a training na ding utawh kisai in hasotna nei hi. Lakthak a om women constable mi 50-te ahihleh tunung sawtlou in Pangei ahihkei leh 2nd MR ah training in kuankhe pahding uhi. Women Constable lakthak a om te lak ah Pasal neisa 33, nungak lai 17 leh Graduate 9, Under graduate 13 leh Matriculate 28 hidan in kigen hi.

Jacintha Lazarus, IAS, DC Churachandpur in amah office chamber ah tuni sun dak 12:00 in SDO teng leh District social Welfare Officer te meeting neihpih a, Old Age Pension sum hawmkhiak dingdan bikhiah uhi. Old Age pension sum khawmkhiak hunchiang in SDO te'n verified ding leh Sub divional Headquater teng a hawmkhiak ding in thupuk uhi.August 8 akipan 10, 2012 sung in Churachandpur block a Old Age Pension Sum hawm hiding a, August 14 leh 15, 2012 in Thanlon, Parbung, Henglep leh Singngat block ading hawmkhiak ding in thupuk uhi.

Khaipao Haokip, MDC Kholmun in a pianna pa Upa Haodem theihgigena dia biakinn abawl tuni'n ahonna nei uhi. Program ahihleh sunma dak 11:00 in kipan a, Rev. D. Jangkholun, Executive Director, ECA/ECCI in Biakinn hong in Pathian kiang ah lan hi. Rev. Lalrosiem Songate leh Upa Khaikholam in hatsotna thugen uhi. Hiai hun ah Khaipao Haokip MDC in hiai biakinn hong piakkhiak dan pulakna nei a, huaizawh in Evangelical Churches Association, New Boljang saptuam a ding in Biakinn pekhia hi.

Jacintha Lazarus, IAS, DC Churachandpur makaih in August 3, 2012 sunma dak 11:00 in DC's office a BRGF Resource Centre ah District Level Co-ordination Committee (DLCC) meeting omding hi. Huai hun ah August 15, 2012 a Churachandpur District ah Indian Independence Day lopna ding tawh kisai genkhawm  ding uhi.

Socio-Economics and Caste Census 2011 ding tawh kisai a Churachandpur block leh Singngat block a Superviser leh Enumerator dia seh a om te'n tuni apan training neiding chih himahleh District Malaria Department apan mi 17 te thakheng ding guangthak ahihziak in block teng in July 30 leh 31, 2012 a training neihding in a hun suan thak uhi.