* D Phailian Bazar a Dawr khat sung ah Luanneihoih @ Hoihnu, ki-khailumsa in kimukhia.
* Tipaimukh road ah Culvert bawlna pailel. BSNL Telephone gui metre 30 val ding kigumang.
* Mannuamching DC Incharge makaih in SDO teng in Socio Economic Census tah kisai in Meeting nei.
* DC Incharge in NIOS Exam Centre ding in College 2, Higher Secondary School 1 leh High School 1 propose bawl.
* Manipur Aids Control Society Conference hall ah DACO Executive Meeting kipan.
* CDSU vaipaw dia telching thak a om te'n Officer Bearer ding guang.
Tuni zinglam dak 7:00 vel in D.Phailian Bazar a Moreh van tuamtuam zuakna dawr khat sung ah, dawr neinu, Luanneihoih @ Hoihnu (48) D/o (Late) Thienkhopau of Red Cross Road, awk lum sa in mukhia uhi. Thil omdan report a zakphet un police te'n delh ngal in zinglam dak 9:30 vel in a luang lakhia in post-mortem bawl ding in District Hospital morgue ah pawlut uhi. Himahleh Hoihnu sih dan a muanmawh huai ziak in Imphal ah forensic test bawl ding in pawsuk thak uhi. A kigen dan in Hoihnu ahihleh a pasal toh a kikhen nung uh kum 2 bang paita a, Phailian bazar ah Moreh van zuak in neek zong in, a inn tawh a dawr kizom a, zan nitak inleng pasal bangzahhiam toh party nei uh hidan in kigen hi. Hoihnu ahihleh, a dawr sung a Ceiling fan khaina ah puanza zang in kikhai a, a khe in tuangtung hetkha in, a kam ah sii pawt hi. Hoihnu dawr ahihleh a mailam shutter kikhaak a, himahleh a nung lam kongkhak bel kikalhlou hi. Akigen dan in tu zingkal in Nupi khat dial puan leiding in dawr nunglam ah valut a, Hoihnu awklum sa in va mukhia hi. Hoinnu luang Imphal lam apuak ahihma in, Police te'n District Hospital morgue ah etchet na nei ua, huai ah a taksa dang teng khauh vek mahleh, a ngawng bel ut le dah in kiheitheih mawk a, huai ziak a Hoihnu awklup dan lamdang sa in RIMS forensic department Imphal a etchet ding in pawsuk uhi.
Churachandpur district adia lamlian poimoh mahmah leh National Highway,150 in a totkhaak, IB Road leh Tipaimukh Road kisuktuahna ah vuahzuk chiang in tui leet gige a BRO ten Culvert lian tak bawl sawm in hun bangtan hiam paisa in a Culvert luipen hihsia in tun Culvert thak bawlsawm in nasem lel uhi. Culvert bawl 80 RCC te'n mipi te khualna in kintak bawl zawh sawm mahle uh vuah a zuk zeuh-zeuh ziak in deih bang in kinawh theilou ua, mipi lam in bel a kinlam zawhsiang ahi deih thugen uhi. Hiai culvert bawl na ding in JCB in Culvert lui a lakkhiak nalam ah water pipe line leh BSNL telephone line tamtak kisia a Water pipe line te a tamzaw bawlzoh in om a, phone line kisia teng leng akisaipih department in bawlzou mahle uh, zankal in guta pawl khat in telephone gui metre 30 vel a sau kigumang nawn a inn 200 val telephone line kisia hi. A kisaipih Telecom department in phone line te bawl ngal in tuni'n zousiang uhi.
Tuni sunma dak 11:00 in Mannuamching Chief Executive Officer ADCC and DC incharge, Churachandpur makaih in DC office ah Sub-Division tuamtuam a SDO teng in meeting nei uhi. Meeting hun ah, District sung a Sub-divisional Officer, SDO teng tel in, Socio Economic Census toh kisai leh thu tuam tuam genkhawm uhi.
National Institute of Open Schooling NIOS Exam Centre ding tawh kisai in Mannuamching Chief Executive Officer ADCC and DC incharge, Churachandpur in tuni'n Deputy Secretary Education,(S) kiang ah Churachandpur District a NIOS exam centre ding in Churachandpur Govt. College, Lamka College, Rengkai Govt. Higher Secondary School leh Gandhi Memorial High School, te proposed bawl a, hiai teng lak ah College leh School 2 beek a paisuak lam-et huai hidan in kigen hi. Churachandpur District sung a NIOS Exam Centre, town pawlam a om chiang in Candidate tamzaw in haksatna tuak gige a, tutung a town sung a om ngei lam-et thugen uhi.
District AIDS Prevention and Control Unit DAPCU in apaisa July 19 apan July 21 sung in Refresher Training nei ua, tuni in Manipur Aids Control Society conference hall, Imphal ah, District Aids Control Officer DACO executive meeting kipan nawn hi. Hiai meeting ah Dr. T.Nengkhanmang, District AIDS Control Officer, Churachandpur leng vatel in zingchiang in meeting zou ding uhi.
Churachandpur District Students Union CDSU kum 2012 akipan 2014 sung vaipaw dia telching thak a om President Lalkhohao Chongloi (TKSU), Vice-President Kaithianjoy Vaiphei (Zillai) leh General Secretary Ginzawmsang Gangte (MZP) in Office bearer ding guang thak uhi. Office bearer dia guan thak a om te, Vice-President External Laxman Serto (KRSU), Joint Secretary Emmanuel L Pulamte (HSA), Secretary Organisation and incharge Planning and Development Thangkhanlun Samte (SSPP) Education Secretary Th.Liankhogin (KZP) Finance Secretary nengkhosoi Phianphu (ZSP) Secretary Information and Publicity Pumkhanlian (TCSA) leh Assistant Secretary Infromation and Publicity Kansuanmung Guite (SSPP) te hi uhi.
Agricultural Labours Union (ALUM), Manipur leh Indigenous Kuki Peoples's Forum (IKPF) saina in July 27, 2012 in B.Vengnuom Community Hall ah, 1-day Farmers Convention om ding hi. Hiai convention honna zinglam dak 11:00 in om ding a, huai hun ah, Langkhanpau Guite, Chairman, ADCC in chief guest hihna toh uap in programme hon ding hi. Huai ban ah, programme sung in, Rev YR Chothe, President, ALUM and IKPF in functional president hihna toh uap in, Demmang Haokip Vice-Chairman ADCC ; Genneikhup Vaiphei, Executive Member, ADCC, Paolal Haokip, MDC; Thangkhomang Haokip, MDC leh N.Tomba Singh, Chief Adviser, ALUM in guest of honour hihna toh uap ding uhi.