* Ginsuanhau MLA in Loubawlmi te ading Water Pump pekhia.

* Ginsuanhau MLA in tuni sunma dak 10:30 in Singngat a ZMA te kiang pha

* Ginsuanhau MLA in tuni sunma dak 11 in Singngat khua a Sim Veng ah Waiting Shed kibawl honna nei hi

* Ginsuanhau MLA in Singngat khua ah Developmnt Work tuamtuam enkhia.

* Lamka Police Drugs Cell in Lamvah tawh Heroin No. 4 mankhawm.

* DC Incharge makaih in DC Office Staff te'n "Kargil Diwas" zang.

* SDO Churachandpur in Socio Economic leh Caste Census ding tawh kisai a Superviser leh Enumerator ding guang.

* CDSU in mipi kiang ah ngetna thusuah bawl.

TUN TANCHIN KIMZAW IN :

Ginsuanhau MLA 60th Singngat Assembly Constituency in tuni zinglam dak 9:30 in Lamka hongpha , amah tenna inn ah Singngat Constituency sung a vuahtui tawm ziak a loubawl theilou te tui pump nang water pump 4 pekhia hi. Ginsuanhau MLA in a thugenna ah Constituency dang te'n Water Pump 4 leh 5 kia a tangkhak lai un Singngat Constituency in Chief Minister O Ibobi Singh deihsakna ziak in Watr Pump 8 ki-tangkha chi in Chief Minister tung ah kipah thugen hi. Tutung a Water Pump te USHA Company hi in hoih mahmah a Water Pump khat in sing 7 leh sang 5 vel manzou a, Govt. in Loubawlmi te khualna a, a thon a, apiak hidan in MLA Pu'n gen a, tutung a water pump tangkha te'n mahni area chiat a loubawlmi te tui pesawn a, water pump kineisak tuam mailou ding in ngen hi. Tutung a water pump tangkha te ahihleh Ngambawm of Lailoiphai, Thangkam of Mateijang, Hemtong of Dutijol leh Lampau of Singngat te hi uhi.

Ginsuanhau MLA in tuni sunma dak 10:30 in Singngat khua pha a, huai ah Zomi Mothers Association (ZMA) Singngat in ana vaidawn uhi. ZMA Singngat in zin le-leng a neih hun ua, zan puan ding leina ding in Ginsuanhau bialtu MLA in sum sing 3 pia a, huai sum te zang in ZMA Singngat in zan puan tamtak leikhia ua, huai te tuni'n bialtu MLA ensak uhi. Chinkhoman President ZMA Singngat in Bialtu MLA tung ah kipah thugen in ZMA Singngat Office building lamna ding in ngetna lai pia hi.

Ginsuanhau MLA in tuni sunma dak 11 in Singngat khua a Sim Veng ah Waiting Shed kibawl honna nei hi. Hiai Waiting Shed ahihleh MLA Development Fund akibawl hidan in kigen a, Waiting Shed honna neih zawh in Simte Youth Organisation SYO Singngat in L Vumthang tenna ah kithuahpihna programme zatpih uhi. Hiai hun ah Ginsuanhau MLA in SYO Singngat te ngetna bang in tu-le-tu hikei mahleh kum nawn vel a fund om masa penpen a SYO Hall bawlsak ding ahihdan gen a, Election lai a thuchiam a bawlte tutan manghilh nailou ahihdan leh khentuam neilou a nasem ding ahihdan gen hi. Hiai Proramme zawh in mipi'n MLA Pu annkuang umpih uhi. Huaizawh in Ginsuanhau MLA makaih in P Sianzadong MDC and Chairman Finance Committee ADCC, Rachel N Guite SDO Singngat leh Michael Ginzasuan District Supply Officer in Singngat khua a, PDS item koihna Godown building lui enkhia ua, Godown luipen ah Gari lian lutna ding a lemtanglouh ziak in , Gari lian lut theihna ding mun lemtang zaw ah Godown thak bawl ding in lemsa uhi. Godown luipen ah 200 metric tonne koih theih a, tun 500 metric tonne koih theihna ding Godown thak bawl hiding in Bialtu MLA in gen a, tunung sawtlou a, FCS Minister tawh Godown thak lamna munding enkhe nawn ding ahihdan gen hi. Godown munding etzawh in SDO Office Singngat leng enkhia a, huai ah SDO Staff te Quarter ding ki-pezou nailou ahihman in Staff te rotation a Office kaiding in theisak hi. Huaizawh in Singngat Playground enkhe nawn a, Bialtu MLA in singngat play ground puahna ding in tuma in lei Truck 10 sungna ding pia a, himahleh lei truck 18 dim sung ahihnung a leng deihbang a Singngat playground hoihzou nailou hidan in kigen hi. Singngat Playground apan Singngat Primary Health Centre enkhe nawn a, Bialtu MLA in Singngat Primary Health Centre zotna lampi puahna ding in tuma in ballu single sungsak a, tun bel damdawi inn zawtna lampi nuamtuam mahmah ta hi. Ginsuanhau MLA in Singngat apan Khuga Dam Canal tawn in Lamka honglut suak a, Canal dung a loubawlmi te haksatna tawh kisai hon enkai malam hidan in kigen a, Ginsuanhau MLA ahihleh tuzan Lamka ah giak ding hi.

Lamka Police Drugs Cell in Zan zinglam dak 4:40 vel in Old bazar ah Lamvah (40) W/o Sarat of Yaiphakol Churachandpur tawh Heroin Number 4 gram 15 mankhawm uhi. Police te gendan in number 4 in Sing 4 vel manding in gen ua, Lamvah tung ah Police te'n FIR Chiamteh uhi.

Mannuamching Chief Executive Officer and Incharge Deputy Commissioner Churachandpur makaih in tuni sunma dak 11:30 in DC Churachandpur Office a BRGF resource centre ah "Kargil Diwas" zang uhi. Hiai hun ah DC Churachandpur Office Staff teng tel in Kargil galdouna a si India sepaih hangsan te suunna hunzang uhi.

Churachandpur District sung a Socio Economic and Caste Census ding tawh kisai in LT Puii SDO Churachandpur in District Malaria Department nuai a Male Health Worker 17, Male Health Superviser 3 leh Microscopies 1, Superviser leh Enumerator ding in  guang hi. Mohpuakna piak a om Male Health Worker leh Male Health Superviser te'n khakhat in 2 vei report peding ua, Microscopies te'n niteng in report peding uhi.

Churachandpur District Students Union (CDSU) in tuni'a mipi kiang a ngetna thusuah a bawl uh kimu in a gendan in District sung ah banghiam thubuai leh mipi sousang theihna tan tunthei hong om hun chiang a, thuchian diktak theihchet ahihma kuamah in nam vai a lalou ding in ngetna bawl ua, huaiban ah lungphawng huai mahmah thil hong om guih hun inleng, a thuahkha innkuan te'n lungsim liantak puu a, mipi sousang ding vengzaw ding inleng ngetna bawl uhi. Huaiban ah kuamah in thuneihna mahni khut a tawilou ding leh Student leh niteng nektawm zong a nasem te ban ah annteh louhing zuak te leh khawpi sung kawmtuah a sumdawng te kuamah in amawkna a subuai nawnlou ding in ngetna bawl uhi. Huaiban ah Bandh/ Strike bawlnuam peuhmah in CDSU kiang ah thubuai tun masa ding in ngen ua, huai ah nguntak a genkhawm ahihnung in, thudik mah ahihleh pangkhawm a maban sawn hiding chi in thusuahna ah taklang uhi.

{youtube}http://www.youtube.com/watch?v=v8VuadqmjVw{/youtube}