* Ginsuanhau MLA in Behiang khua a Border Trade Centre omna munding enkhia.
* Agricultural Labours Union leh Indigenous Kuki Peoples Forum saina in One Day Farmers Convention neih in om.
* Songkholien (67) of Gangpimual a omna ki-theilou.
* All India Muaythai Championship ah Hengousang Khongsai in Gold Medal ngah.
* DC Churachandpur in SDO teng Socio Economic and Caste Census tawh kisai in Meeting neihpih.
* DC makaih in District Social Welfare Department leh SDO teng in Meeting neiding.
* Ginsuanhau MLA in Singngat Assembly Constituency sung a PDS Agent teng Meeting neihpih.
* STC/BSF in Thau-le-Bomb kapna sunzom ding.
* United Chief Council in Meeting poimoh tak neiding.
TUN TANCHIN KIMZAW IN:
Ginsuanhau MLA 60th Singngat Assembly Constituency in tuni sunma dak 11 in Behiang khua vapha a, Behiang khaw Hausa Jubilee Mawi tawh Integrated Circuit House ah kimu in in Behiang khua a Border Trade Centre munding tungtang genkhawm uhi. Huaizawh in Indo-Myanmar gamgi zul, Behiang khaw sung ah Border Trade Centre omna munding mun 3 enkhia uhi. Ginsuanhau MLA 60th Singngat Assembly Constituency in a gendan in Behiang khua ah Border Trade Centre honding in Central Govt. in approved bawlta a, amun ding Hausa Pi Jubilee Mawi in hon piak hunhun in Ground Breaking Ceremony neih hiding a, Border Trade Centre Building lamna leng kipan ngal ding chi hi. Aban a genzelna ah Border Trade Centre omna ding in Behiang khua lemtang pen a, Singngat Constituency mipi te ki-hampha petmah chi'n leng genbeh hi. Ginsuanhau MLA in Behiang khua a phakna ah Bialtu MDC P Sianzadong Chairman Finance Committee ADCC, Tongkai Baite MDC, Rachel N Guite SDO Singngat leh Michael Ginzasuan District Supply Officer in zui uhi.
Agricultural Labours Union (ALUM), Manipur leh Indigenous Kuki Peoples' Forum (IKPF) saina in tuni sun dak 12 in B.Vengnuom Community Hall ah, 1-day Farmers Convention nei uhi. Langkhanpau Guite, Chairman, ADCC in chief guest hihna toh uap in programme honna nei hi. Hiai hun ah Rev YR Chothe, President, ALUM and IKPF in functional president hihna toh uap in, Demmang Haokip Vice-Chairman ADCC ; Genneikhup Vaiphei, Executive Member, ADCC, Paolal Haokip, MDC; Thangkhomang Haokip, MDC leh N.Tomba Singh, Chief Adviser, ALUM in guest of honour hihna toh uap ua, resource person leh technical expert tuamtuam in haichi tuamtuam lh loubawl dingdan sinsak uhi. Hiai hun ah Loubawl mite zatding in fertilizer sprayer 160 pekhia uhi.
MIMANG ZONNA : Gangpimual a om AK Lunpi Neihsial pianna Pa Songkholien (67) of Gangpimual tuni zinglam dak 8:30 vel a inn apan pawtkhia tutan inn tungkiklou hi. Aman puan-ak Kamis ngou silh in khekol pyjama Green teng in moreh slipper suakthak a tungsin neite bun in a lukhu ah Blue Star Academy chih kigen hi. Aman omna theikha te'n Gangpimual a Huanlian veng ah theihsak theih ding a, huailou in Contact number, 8974442999 ahihkei leh 9615393150 ah leng theihsak theih ding hi.
Kuki Martial Arts Association (KMAA) a Secretary D William Haokip in tuni'a thusuah a bawlna ah International Federation of Muaythai Amateur (IFMA) saina in Chennai ah All India Muaythai Championship neih in om a, huai ah Kuki Matrial Arts Association member 2 Hengousang Khongsai in Gold Medal ngah a, Helkhothang Touthang in Silver Medal ngah hi. Hiai All India Muaythai Championship a Gold Medal la Hengousang Khongsai ahihleh September 2012 a St.Petersburgh Russia a International Muaythai Championship ah va tel ding hi.
Jacintha Lazarus IAS DC Churachandpur in leave la a, a zinkhiak nung in zan in Lamka damtak in hongtung kiknawn a, tuni'n amah Office Chamber ah Sub-Division tuamtuam a SDO te tawh Socio Economic and Caste Census tawh kisai in Meeting neihpih hi.
Zingchiang sunma dak 11 in Jacintha Lazarus IAS DC Churachandpur makaih in DC Churachandpur Office a BRGF Resource Centre ah District Social Welfare Department leh SDO teng in Meeting neiding ua, huai ah Old Age Pension tawh kisai leh Scheme tuamtuam genkhawm ding uhi.
Ginsuanhau MLA 60th Singngat Assembly Constituency in tuni sunnung dak 3:30 in amah tenna inn Lailam Veng ah Singngat Assembly Constituency sung a PDS Agent teng Meeting neihpih hi. Hiai hun ah PDS Agent te'n PDS item tuamtuam hawmzak dan tawh kisai leh haksatna a tuahte uh report pia in thil omdan genkhawm ua, PDS item mudia kilawm teng in ahiding bangtak a, amuhtheihna lampi ngaihtuah khawm uhi.
Subsidiary Training Centre STC/BSF in Mission Compound suahlam leh Pearsonmun, Mualkawi leh Gangpimual simtum kikal ah August 1 akipan ni 15,2012 sung in zinglam dak 5 akipan zannung tanpha in thau-le-bomb kapna zunzom ding ua, kim-le-kiang a om te pilvang a ganvualh te khahzanlou ding in theihsakna bawl uhi.
Manipur Cabinet Meeting in singtanggam a Land Survey bawl ding leh MLR and LR Act. Singtanggam a zatding a thupukna abawl thutawh kisai in United Chief Council (UCC) in zingchiang sunma dak 11 in Lalboi tenna inn Chiengkonpang ah Meeting neiding ua, hiai hun ah Block tuamtuam a Chairman leh Secretary ban ah hausa te telkim ding in theihsakna bawl uhi. United Chief Council in tuma deuh inleng Sielmat Community hall ah hiai thutawh kisai mah in Meeting neikhin ua, huai ah Singtanggam a land Survey bawl ding leh MLR and LR Act. thihtawp suah a doudal ding in thupukna bawl khin uhi.
.