* Luanneihoih @ Hoihnu sih ziak in Khopi sung ah Sumbuk teng kikhak in D Phailian Nupi te'n nuakna nei.

* L Tilotama Devi Vice-Chairperson Nehru Yuva Kendra Sangathan Ministry of Youth Affairs and Sports Govt. of India in Lamka hongpha.

* (Late) Khaikhanlian District First Division League 2012 paillel.

* Zomi Mothers' Association Headquater leh Zomi Youth Association General Headquaters in Nu. Hoihnu thattu te naktak in mohpaih.

* DC Churachandpur tutan Lamka hongtung kiklou.

* District School Trail-Cum-Selection Test for Under 17 years (Boys) Football ading in DYASO Office ah Eligibility Form laktheih.

TUN TANCHIN KIMZAW IN:

##Zan zinglam dak 7:00 vel a D.Phailian Bazar a Moreh van tuamtuam zuakna dawr khat sung ah, dawr neinu, Luanneihoih @ Hoihnu (48) D/o (Late) Thienkhopau of Red Cross Road, Sisa a kimuhkhiak nung in a luang RIMS Imphal ah Post Mortem leh forensic test bawl ding in zan mah in puaksuk in om a, Post mortem bawlzou in tuni sunnung dak 4 in aluang Lamka puaktung in om hi. Hoihnu sihna tawh kisai a tualthat tute mohpaihna in tuni'n D Phailian Bazar a Hoihnu Dawr kong ah D Phailian khaw sung a nam tuamtuam tengkhawm nupi te'n Sit-in-Protest nei uhi. Sit-in-Protest a tel D Phailian khaw sung mi pau-le-ham kitheituah te'n Hoihnu thattu te mohpaihna sang a mohpaih in numei tung a mulkimna bei a tatsiatna om nawnlouh ding deih in nuakna nei ua, huaiban ah tualthatte ni 2 ni 3 sung a Govt. leh Police te'n a matkhiak keileh kiphinna sangzaw in zuiding chi uhi. Nu Hoihnu  sihna thutawh kisai mah in tuni sunnung in Lamka khopi sung ah Sum buk teng kikhak in Gari bei ngeina bang in tai a, bazar a mehzuak te leng kihemkhe dia theihsak ahih dungzui un patau in buai mahmah uhi.

Nu Hoihnu luang sunnung dak 4 vel in Lamka puaktung in om a, D Phailian Bazar a amah sunna a nisa nuai a tu nupi te kiang puaktung himasa a, huai ah amah ngainatu hunkhop in Siluang puan in tuam uhi. Nu Hoihnu Siluang ahihleh Imphal apan Manipur State Commission for Women a Chiarperson Ibetombi makaih in Member June Rose Vaiphei, Member, Mazida Khan, Member Piteshorei Devi leh member Secretary Meghachandra Sharma in honzui uhi. D Phailian bazar ah Nu Hoihnu suunna hun zawtlou kizang a, huai ah Ibetombi Chairperson Manipur State Commission for Women leh June Rose Member in thiltung poisak thupuang in numei tung a tangtat te kintak a report pezel ding ngen ua, tualthatte matkhiakna ding in SP Churachandpur tawh kithuzak khin ahihdan uh gen uhi. Huaiban ah hiai bang thil mulkimhuai a tunchiang in tualthatte matkhiakna ding in Police te mipi'n kithuahpih poimoh ahihdan gen in Police te'n subuaitu omlou hial a thil tung a suizui theihna ding ua, mipi te omdan siam poimoh ahihdan leng gen uhi. Aban a gnzelna uah, Post mortem kibawlzou mahleh a result pawtpah ding hilou a, ni 2 ni 3 bang lutding ahihziak in mipi te mawk sousang mailou ding leh police te hoihtak a nasem sak phot ding in ngetna bawl uhi. KNF Samuel group inleng Nu Hoihnu suun thupuang in a luang puan in tuam ua, KNF Samuel pawl inleng Nu Hoihnu that te matkhiakna dia theihtawp suah a panla ding ahihdan leng taklang uhi. Nu. Luanneihoih @ Hoihnu luang ahihleh D Phailian bazar apan mipi'n zuisuk in D Phailian apan Gouchinkhup veng New-Lamka tawn in Tedim road apan Red-Cross road a, atenna inn puaktung in om hi. Nu Hoihnu luang hihleh tunitak in YVA makaih in vui uhi. Nu.Hoihnu suunna hun KKL, ZYA, ZMA, Zillai, YVA leh Organisation tuamtuam a makai tamtak in uap uhi. Hiai thiltung tawh kisai in Police te'n tunitan in kuamah matnei nailou uh hidan in kigen hi.

Nu Hoihnu ahihleh, a dawr sung a Ceiling fan khaina ah puanza zang in kikhai a, a khe in tuangtung hetkha in, a kam ah sii pawt hi. Hoihnu dawr mailam shutter kikhaak a, himahleh a nung lam kongkhak bel kikalhlou hi. Akigen dan in zingkal in Nupi khat dial puan leiding in dawr nunglam ah valut a, Hoihnu awklum sa in va mukhia hi. Nu. Hoinnu sihdan ah lamdang sakna om ziak in Police te'n aluang Imphal ah pawsuk in Post mortem bawlzou ua, tun a result ngak lel uhi. Zingchiang in bel ngeina bang in sumbuk teng kihong nawn ding hi.

##L Tilotama Devi Vice-Chairperson Nehru Yuva Kendra Sangathan Ministry of Youth Affairs and Sports Govt. of India in tuni'n Lamka hongpha a, sunma dak 11 in Tuinuphai khua a Work Camp of NYK 2011-2012 nuai a kibawl Tuinuphai Youth Club Office Building hong a, huaizawh sunnung dak 2:30 in Nehru Yuva Kendra Churachandpur leh Hmar veng Youth Culb saina a, Awareness and Education for the Prevention of Drug Abuse and Alcoholism and Youth Initiative for the Publicity of Message of Peace and Development, neihna hun uap in thugenna hunzang hi. Hiai hun ah Jackie Ruivah Zonal Director Nehru Yuva Kendra Sangathan Imphal Zone in keynote address gen a, Resource Person Dr. HL Liensang Chief Medical Officer in " Drug Abuse and Alcoholism" tawh kisai in thugen a, Yourh Club member hunkhop tel uhi.

##Churachandpur District Sports Association CDSA saina in Lamka Public ground leh Saikot play ground ah (Late) Khaikhanlian District First Division League 2012 omlel a, tuni'n Lamka Public ground ah New-lamka Youth club leh Lamka United Soccer kimawl ua, New-lamka Youth Club in Lamka United Soccer te 6-0 in zou ua, Saikot play ground ah Sports Club of Leatherite leh Ngathal Youth Club kimawl ua, Sports Club of Leatherite in Ngathal Youth Club te 5-1 in zou uhi. Zingchiang in Saikot Play ground ah Lamka Sports Club leh Zomi Football Club kimawl ding ua, Lamka Public ground ah Gangam Soccer Club leh Saipum Youth Club kimawl ding ua,kimawlna sunnung dak 2:30 in kipan ding hi.

##Zomi Mothers Association ZMA Headquater in tuni'a thusuah a bawlna uah, July 23,2012 nitak a Luanneihoih @ Hoihnu (48) a tenna mun D Phailian a, thah a, a om poisak thupuang in tualthatte sangtak in mohpaih uhi. Huaiban ah akisaipih thuneitu te'n tualthatte khahsuah mailou a, a kinlam a man a dan tawh kituak a gawtna peding in ngetna bawl uhi. Huailou in Zomi Youth Association ZYA Gneral Headquater in Nu.Hoihnu hehpihna bei leh mulkimna bei a thattu te mohpaihna sangpen puankhum in, mimal hi'n innkuan leh gamsung ah hiaibang thil mulkimhuai tung nawnkei hen chi in, kituaktak a tengkhawm chiat ding in akisaipih te kiang ah ngetna bawl uhi.

##Apaisa July 11, 2012 in Jacintha Lazarus, IAS DC Churachandpur in ni 10 sung leave la in atenna khua uh zuan in zinkhia hi. DC Churachandpur ahihleh July 22,2012 a Lamka hongtung kikding chih himahleh tunitan in hongtunglou hi.

##Churachandpur District Students Union CDSU in tutung SSC saina nuai a LDC leh DEO lakna ding a tunaizek a Advertisement kibawl tawh kisai a lunglutna nei student te ading in CDSU in Online application ah kithuahpihna peding hi. Exam penuam student te'n CDSU Information Centre, Ground View Building Opposite Lamka Public ground, Tipaimukh road ah July 28,2012 tan in zinglam dak 10:30 akipan sunnung dak 2:30 sung in Online in Application piaklut theih ding hi.

##Department of Youth Affairs and Sports Govt. of Manipur in August 7 akipan 9,2012 sung in Khuman Lampak, Imphal ah Trial Cum Selection basis in State Level Inter Schools Under 17 years Boys Football saisawm a, hiai State Level Inter School (Boys) Football a telkhia a om te Jammu and Kashmir a September 3 akipan 7,2012 sung a 58th National Schools Games 2012 ah kuan ding uhi. Hiai ding tawh kisai in District Youth Affairs and Sports Office Churachandpur in August 1 leh 2,2012 sung in Tuibuang Peace ground ah District School Trail cum slection test for under 17 years boys football saiding a, lunglutna football kimawlmi te'n District Youth Affairs and Sports Office Tuibuang ah Eligibility Certificate laktheih ding a, fill-up zawhnung in July 31,2012 tan in piaklut theih ding hi. Hiai ding tawh kisai in tuni tan in School 3 kia in Eligibility form la pan uhi.