* DC leh ZEO in Govt. School te Surprise Visit bawl.
* Khaikhanmung MDC in Bijang Loubuk Junior High School ah Free Unifrom pekhia.
* Socio-Economic and Caste Census, August 2,2012 in kipan ding.
* Chief Medical Officer in TB natna tawh kisai in Medical Officer Incharge te Meeting neihpih.
* District Malaria Department in July khasung in Malaria Positive 5 mukhia.
* Vungzagen Higher Secondary School a Lecturer leh Lab. Assistant lakna ding tawh kisai in CDSU in ngetna thusuah bawl nawn.
Jacintha Lazarus, IAS, DC Churachandpur in tuni zinglam in Kumbipukhri Junior High School leh Tuibuong Govt. Junior High School surprise visit bawl a, huai hun ah Joseph Lalrothang, Zonal Education Officer, Kapneithang, Assistant Inspector of School in zui uhi. DC in student te attendence tanpha etsak a, naupang te Mid Day meal nekdan tel in school tawh kisai in thil tuamtuam akisaipih te dong hi.DC Churachandpur paizawh in Zonal Education Officer leh Assistant Inspector of school in Phungkhothang Govt. High School leh Vimala Raina High School inspection bawl nawn uhi.
SSA tungtawn a free text book leh Free uniform hongpaite district sung a Govt. school tuamtuam in amau school naupang te ading a lak nung un School naupang te kiang ah pekhia uhi. Tuni in Bijang Loubuk Junior High School in Free Uniform piakkhiakna nei ua, hiai hun Khaikhanmung, MDC, Zenhang Lamka in uap in school staff te kimuhpih a, huaizawh in school uniform te pekhia hi. Bialtu MDC pu in a thugenna ah, abial sung a school om sun a vehkhak ngeilouhna tung ah kisuanglah thugen in maban ah student tamsem a kaitheihna dia teaching staff te'n panla ding in ngen a, huaiban ah School in banghiam haksatna a tuah leh panpih dia mansa gige ahihdan gen hi. School naupang te Uniform piak ahihnung un Mid Day Meal nesak nawn uhi.
Socio-Economics and Caste Census 2011 ding tawh kisai in tuni'n Churchandpur district sung a Block teng a Superviser leh Enumerator ban ah Data Entry Operator ding te'n a kigawm in District Training Centre Tuibuang ah Training nei uhi. Training hun ah Jacintha Lazarus IAS DC Churachandpur in thugenna nei a, huai ah Socio-Economic and Caste Census lakkhawmna khat veithu a neih ding kichi mahleh a lemtangzaw ding ngimna in Phase 3 in kikhen ding a, Phase masa ah Lamka Block, Tuibuang Block leh Samulamlan Block sung ah neih hiding chi hi. Aban a genzelna ah hiai Socio-Economic and Caste Census patna ding August 2,2012 sunma dak 10 in District Training Centre Tuibuang ah Launching Programme om ding chi'n leng genbeh hi.
Dr. HL Liensang Chief Medical Officer makaih in tuni sun dak 12:00 in amah Officer Chamber ah TB natna tawh kisai in Primary Health Centre leh Community Health Centre a Medical Officer incharge teng in meeting nei uhi. Meeting hun ah, Block/ PHC level a Directly Observed Treatment, DOT provider koih dingdan leh DOT centre te puahthak dingdan gen khawm uhi. Huaiban ah, RNTCP service tawh kisai sukhaat dingdan ban ah, Block leh Primary Health Centre level a RNTCP koih dingdan leh thu poiomoh tuamtuam genkhawm uhi.
District Malaria Department in July 2012 khasung in damlou tuamtuam sang 1 za 3 leh 51 sisan test abawlna uah Malaria positive 5 mukhia in PF 3 leh PV 2 hi'n kigen a, July 2012 khasung in official record ah Malaria ziak a misi omlou hi'n kigen hi.
Vungzagen Higher Secondary School, Mata, a Lecturer leh Lab. Assistant laakna ding tawh kisai a Churachandpur District |Students Union, CDSU in government kiang a ngetna a bawl uh, tuni tan Government in ngei ngaihlou hi. Hiai tawh kisai in CDSU in tuni'n thusuah bawl thak nawn a, Government in student te leh lehkha siam sepna neilou khangthak te khualna a banghiam beek semkhe ding in ngetna bawl thak uhi. CDSU thusuak in ataklat zeldan in, Vungzagen Higher Secondary School a lecturer leh lab assistant laakna ding tawh kisai a, interview hunding bikhiah thak a, interview leng district headquarter a akisaipih Deputy Commissioner makaih a neih ding in deihthu taklang uhi. Huaiban ah CDSU in hiai tan a ngetna a bawl nung a Govt. in a limsak keilai leh Government in District mipi adiak a singtangmite nelhsiah bang a ngaih hiding in thusuahna ah taklang uhi.
.