* Manipur State Co-operative Bank Churachandpur Branch in Loan Recovery Camp nei.
* Good Samaritan Foundation saina in One Day Awareness on Indigenous and Oil Exploration neih in om.
* MANIREDA in DC Churachandpur Office a 25KV Power Supply zouding Solar Plate 90 hong koih.
* MGNREGS Annual Action Plan 2012-2013 Approved sa himahleh Drought Like Situation om ziak in Plan bawl thak hiding.
* TN Haokip MLA in Olymic Medalist MC Mary Kom Vaidawnna leh Kipahpihna Programme zang ding.
* Numei Naupang kum 5 miding Hriati Nu-le-Pa te'n Churachandpur District Observation Home Rengkai, Shan Veng apan tonpih theih ding.
* CDSA in (Late) Khaitinsiak Chief of Mata theihgigena ding in District IIIrd Division League 2012 saisawm.

TANCHIN KIMZAW:

Manipur State Co-operative Bank Limited Churachandpur Branch a Two Wheeler loan, Micro Business loan, Medium Term loan, Long Term loan leh SEGP loan la a, dinkik zounailou te ading in Manipur State Co-operative Bank Limited Churachandpur Branch in tuni sun 12 in Synod Hall IB road ah Recovery Camp neih uhi. Hiai Recovery Camp ah Loan la hunkhop in dinkik ua, a dinkikzou nailou te kiang ah baihlamtak a loan dikdik dingdan sinsak uhi. One Time Settlement Scheme nuai a bat neih teng baihlam tak a ditkik theih hidan inleng kigen hi.

United NGOs Mission-Manipur sponsor na nuai a Good Samaritan Foundation saina in tuni sunma dak 11 in Sielmat a ICI Secretariat Conference Hall ah One Day Awareness on Indigenous and Oil Exploration kichi nei uhi. Hiai hun ah Thangmang Haokip Advisor Good Samaritan Foundation in Indigenous Rights tawh kisai sinsak a, Thangkhangin Ngaihte PhD in Oil Exploration in singtanggam a suksiat dingdan tungtang gen in, student leader leh social activist bangzah hiam tel uhi.

Manipur Renewable Energy and Development Agency (MANIREDA) in DC Churachandpur Office Building tung a koih ding in Solar plate lian taktak Plate 90 DC Office hon pawtung uhi. MANIREDA in DC Office Building tung ah Solar Plate te install ding a, huai in 25KV Power pekhe zouding hi. 25KV in DC Office leh DRDA Office Building sung leh pua a, power poimoh zah supply zouding a, tulel a DC Office in a zat 25KV Generator tawh Power a piakkhiak zah kibang ding hi.

Tuni sun dak 12 in DC Office a BRGF Resource Centre ah C Hangshing Executive Director DRDA Churachandpur makaih in Block Development Officer, Project Officer, Assistant Project Officer, Executive Engineer, Assistant Engineer leh Block teng a Section Officer teng in Mahatma Gandhi NREGS tawh kisai in Meeting nei uhi. Meeting hun ah Khaw teng in September khasung a Social Audit zawhsiang ding in lemsa ua, Social Audit taktak bawllou a, khawsung mipi samkhawm zual a banner mai a lemkilak chih te ki-pom nawnlou ding a chih ban uah, Job-Card holder te tellou a, khaw hausa leh Banner kia lem kila a, Social Audit lemlak dan a submit leng pom hilou ding chi uhi. Huaiban ah Annual Action Plan 2012-2013 ading approved sa himahleh tukum a vuahtui tawm ziak a, drought like situation om ziak ding in Govt. in Annual Action Plan 2012-2013 bawl thak ding in theihsakna hon bawl chi ua, hiai tungtang ah kintak a income generate thei ding a diak in Horticulture lampang ah
 proposal bawl thak hiding chi uhi. MDC te 25 percent tawh kisai leng khaw sung mipi leh hausa te tawh kithuzak a, income generate theihna ding lampang ngaihtuah thak a, proposal bawl ding in thupuk uhi.

TN Haokip MLA 59-Saikot Assembly Constituency in September 17,2012 sunma dak 11 in Kuki Inn Imphal ah Olympic Medalist MC Mary Kom vaidawnna leh kipahpihna neiding hi. Hiai hun ah MDC leh Social Leader te'n MC Mary Kom kipahpihna thilpiak peding ua, Menasseh Cultural Troupe in namlam lakding uhi. Rev. Helkholam in MC Mary Kom ading in vualzawlna ngetsak ding a, L Ibomcha Singh Boxing Coach, Churachandpur Boxing Association, MC Mary Kom leh TN Haokip MLA in thugenna hunzang ding uhi.

Numei naupang kum 5 miding Hriati kichi tuni'n Zenhang Bazar ah apaina ding thei nawnlou in munkhat ah kapkap a, HYA te'n tonpih in CWC te khut ah pekhia uhi. CWC in Churachandpur District Observation Home Rengkai, Shan Veng ah kemlel ua, numei naupang Hriati in Paite pau zang a, a nu-le-pa Sangkim leh Pauboi hidan in gen a, a khaw min bel gentheihlou hi. CWC te gendan in a Pu tawh DI Gari ah hongtuang khawm in Zenhang Bazar ah a Pu muzou nawnlou in muhkhat ah kapsa in om den chi uhi. Thuchian kimzaw thei nuam te'n Contact number 9862193602 ah kanchet theih ding hi.

Churachandpur District Sports Association (CDSA) in (Late) Khaitinsiak Vaiphei Chief of Mata theihgigena ding in October 2,2012 akipan Lamka Public Ground ah District IIIrd Division League 2012 saisawm uhi. Thuchian kimzaw thei nuam te'n CDSA Office, Lamka Community Hall, Hiangtam Lamka ah nasep niteng in zinglam dak 7 apan zinglam dak 9 sung in kanchet theih ding hi.

* District Social Welfare Office in Annapurna Card neite ading in Anntang hawm ding.

* Independence Day Cycle Rally a tel te'n Nehru Yuva Kendra Office Tuibuang ah Participation Certificate laktheih ding.

* Lalremsiem leh EFCI Central Numei Pawl saina in Ni 40 leh Zan 40 anngawl a thumna om ding.

* Zenhang Lamka Village Authority, Youth Club leh YPA Zenhang Lamka Unit in thusuah bawl.

* Dr. Ambedkar National Merit Award for Meritorious Students apply theih.

* Network of Women at Risk in Churachandpur pawl in Kum 6 chinna lawm.

* DC in Sinzawl Primary Health Centre a zatding in Ambulance pekhe ding.

* District Level Trail-Cum-Selection Test zawhsiang hita.

TUN TANCHIN KIMZAW IN :

District Social Welfare nuai a Annapurna Card neite ading in September 17, 2012 akipan District Social Welfare Office ah Annapurna anntang kihawm ding hi. Thusuak kimu dan in, Churachandpur Assembly Constituency sung a Annapurna Card neite ading in September 17 leh 18, 2012 in kihawm ding a, Singngat Assembly Constituency ading in September 19 leh 20 in kihawm ding hi. Henglep Assembly Constituency leh Samulamlan Block ading in September 21,2012 in kihawm ding a, September 22,2012 in Thanlon leh Tipaimukh Assembly Constituency ading in hawm nawn ding uhi. Tutung a Annapurna anntang kihawm ding ahihleh April 2012 apan August 2012 sung ading hi a, beneficiary te'n kha 1 in anntang sel 10 chiat lading ua, September 17 apan 22, 2012 sung in zinglam dak 10:30 akipan sunnung dak 3:30 tan hawm hiding in A. Umarani Devi, District Social Welfare Officer Churachandpur in a thusuahna ah taklang hi.

15th August Independence Day zingkal a cycle rally a telte ading in participation certificate bawlfel hita a, Nehru Yuva Kendra Office Tuibuong ah office kai hunsung a laktheih ding hidan in H. Doungel, District Youth Co-ordinator, Nehru Yuva Kendra Churachandpur apan thutut kingah hi.

Lalremsiem leh EFCI Central Numei Pawl saina in Mualvaiphei a Nehemiah Prayer Mountain ah September 25 akipan November 3,2012 sung in, Ni 40 leh zan 40 anngawl a thumna om ding hi. Hiai Anngawl thumna ah Sptuam khentuam omlou in a lunglut peuhmah teltheih ding a, Churachandpur, Manipur leh Khovel pumpi huap in thumna neiding uhi.

Zenhang Lamka Village Authority, Zenhang Lamka Youth Club leh YPA Zenhang Lamka Unit in September 10,2012 a Joint Meeting a neihna uah, thupukna dungzui in khawsung bitna ding ngimna in Zenhang Lamka Hanmual kim-le-kiang ah Guktakna thil hih, Guihtheih leh khamtheih chi tuamtuam zuak leh hih, ban ah Numei leh Naupang ban ah khawsung patausak thei ding thawmngaih leh buaina bawl tuni'a kipan kham bikbek uhi. Huaiban ah khawsung mi ahihkei leh khaw pawlam mi kuapeuh mah Zenhang Lamka huapsung ah nitak dak 10 akipan zinglam dak 4 sung a mawk pawt leh lutlou ding in theihsakna bawl ua, hiai theihsakna zahtaklou a palsat teitei mat omleh, a tung a thununna kipia bangbang a pom ngai ding a, kuamah leng a khase theikei ding a, amoh teng a kipuak ding chi in thusuah bawl uhi.

Dr. Ambedkar Foundation, Ministry of Social Justice and Empowerment, Government of India in ST student te ading in scheme tuamtuam bawl uhi. Scheme tamtak lak ah, Dr. Ambedkar National Merit Award for Meritorious Students of Secondary leh Higher Secondary School Exam for ST ading in Board tuamtuam a topper te'n ngaihven theih ding hi. Manipur ah CBSE, BSEM leh NIOS board om a, hiai board te a result suah nung ni 15 sung in application form te khaak theih ding a, huaiban ah application form leng Board a secretary in a certified ngai ding hidan in kigen hi. Class X a ST Students te lak a mark mu sangpen in, sing 6 ngah ding a, a zom in sing 5 sang in a, 3na in sing 4 sang ding hi. Hiai top 3 teng lak a numei a telkhak keileh, numei te lak a mark mu sangpen kiang ah kipahman piak hiding a, huaiban ah, board teng a mark mu sang pen kiang ah sing 1 piak hiding hi. Class XII, Higher Secondary level ahihleh, category 4 in kikhen ding a, Science Medical stream,
 Science Non Medical Stream, Arts leh Commerce in kikhen a, 1st ah sing 6, 2nd ah sing 5 leh 3rd ah sing 4 hiding hi. Huaiban ah,  hiai category 4 a telkha lou, numei te lak a a sang pen 3na tan te kiang ah sing 2 chiat piak hiding uhi. Hiai ding tawh kisai a thuchian kimzaw thei-ut ten, www.ambedkarfoundation.nic.in ah ettheih ding a, a form leng huai website apan download theih ding hi.

SHALOM Project Orchid nuai a Network of Women at Risk in Churachandpur pawl in tuni sunnung dak 1:30 in SHALOM Women Day Care Centre, IB Road ah kum 6 chinna lawm uhi. Hiai hun Muallum MDC, Grace Zamnu in Chief Guest hihna toh uap in thugenna hun zang a, SHALOM apan official hunkhop leng tel uhi.Hiai hun zatna session 2 in kikhen a, session masa sunma dak 11:00 in kipan a, huai ah Nengkhojam Advocacy Officer SHALOM makaih in Network of Women at Risk Churachandpur vaipaw thak ding kitelna leng nei uhi. Second session ahihleh sunnung dak 1:30 in kipan nawn a, huai ah vaipaw dia telching thak a omte mohpuakna piak in om ua, Secretary apan Report ngaihkhiakna om hi. Chief Guest apang  Grace Zamnu in a thugenna ah, Pathian in mihing omzia neitak in hon bawl a, damsung hun tomchik sung a hinkhua a manpha theitawp a zat poimoh ahihdan gen hi.

Tuni sun dak 12:00 a DC Churachandpur Jacintha Lazarus, IAS makaih a BRGF Resoure Centre, DC office a SSA Review Meeting om ding kichi mahleh DC Churachandpur in lemtanglouhna aneih ziak in September 19, 2012 sun dak 12:00 a neih ding in ahun suan in om nawn hi. Hiai meeting ding ahihleh 3vei akisuanna hita hi'n leng kigen hi.

BADP 2009-10 Fund tungtawn a kileikhia  Sinzawl Primary Health Centre a zatding Ambulance piakkhiakna September 18, 2012 in Sinzawl khua ah Jacintha Lazarus IAS DC Churachandpur in neiding hi. Huai hun zatna Dr. HL Liensang, Chief Medical Officer inleng uap ding hi.

Directorate of Youth Affairs and Sports saina a September 20, 2012 a Khuman Lampak, Imphal a State Level Inter-School Games 2012 neihna ding tawh kisai a District Youth Affairs and Sports in District Level Trail -cum- Sepection Test a neih uh, discipline tamzaw zohsiang ahihnung in tuni'n Lamka Community Hall, Hiangtam lamka ah Under 14 and 17 Boxing ading trail cum selection neinawn uhi. District Youth Affairs and Sports saina a Trail cum Selection Test ahihleh apaisa September 12, 2012 in kipan a, Kabaddi, Volleyball, leh Basketball a ding zan leh zanhal a neihkhin ua, tuni'n boxing ading nei nawn in, zousiang uhi.