* CoPTAM General Strike sung in Major Vikas 46-Assam Rifle in Press/Media te tuanna CDSU President Maruti Car Chabi laksak. 
* New-Bazar Thangzam Road ah Nin tamtak kisekhawm nawn.
* Manipur Police Christian Association Youth Fellowship saina in Jawans Revival Camp om ding.
* Manipur State Co-operative Bank Churachandpur Branch in Loan Recovery Camp neiding.
* Dr. Ambedkar National Essay Competition om ding.
* DC makaih in SSA Review Meeting om ding.
* Dr. Ambedkar Foundation tungtawn in Scheme tuamtuam muhtheih ding om.
TUN TANCHIN KIMZAW IN :
Committee on Protection of Tribal Area Manipur (CoPTAM) in Manipur singtanggam sung a Panchayat Election neih ding deihlouh ziak a tuni zinglam dak 6 akipan nitaklam dak 4 tan Manipur pumpi huap a General Strike abawl lohching mahmah in Churachandpur District sung ah Sumbuk teng kikhak in Gari tai muhding vang mahmah a, Lamka leh Imphal kikal ah Gari service leng omlou hi. Bandh supporter te'n Gari tai sunsun te khamkhawl in Gari chabi laksak ua, Bandh beinung in pekiknawn uhi. Bandh sung in buaina thupilua gending omkei mahleh Singtangmite lawm kichi a, Friends of the Hill people chi a kiminvuah Assam Rifle te a buaihuaipen in pang uhi. Major Vikas 46-Assam Rifle in Molnom khua ah Press/ Media te tuanna CDSU President Lalkhohau Chongloi Gari Maruti Car chabi laksak hi. Hiai hun ah Major Vikas in Bandh om ding lam an hon theisak kei uh chi a, Seiboi Haokip Joint Secretary in SP a kitheisak chi hi. Major Vikas in a dawng kikna ah SP is nothing chi hi.
Hiai thiltung tawh kisai in CDSU President in Major Vikas kihou ding in sam a, Major Vikas tawh CDSU Administrative Building ah kihouna hunsawt kuamtak a neih nung un Major Vikas in ngaihdam in CDSU Office pawtsan hi. CDSU leh CoPTAM in Major Vikas gamtat dan ngaisiamlou in Bandh bawlna ah amah kigolh nang bangmah omlou a, Civil Administration ah direct a, a kigolh nang thu leng omlou a chih ban uah, Anti-Tribal ahi chi in Singtangmite musit mawng-mawng mihing ahi chi'n leng genbeh uhi. Tuni'a General Strike neihna tawh kisai a Seiboi Haokip Joint Secretary CoPTAM in a thugenna ah CDSU leh CoPTAM makai te'n zan in Singtanggam sung a Panchayat election omkhakna mun te va ki-enkhia in Saikul a Nepali te leng thil om dan theihsiamsak ahihnung in Panchayat election ah tellou ding in thupukna ua, ADC a om ding telzaw uh chi a, Khoirentak leh Kangvai lak ah leng Singtangmite'n Panchayat election ah vote khelou himhim ding in thupukna bawl ua, tuni'n leng Singtangmi melpu kuamah vote khia muhding omlou chi a, himahleh Sagang leh Khodang ah mipi kitheisiamsak zoulou in Election ah lamzangtak in vote khia ua, poi kisa mahmah chi a, huaiban ah Major Vikas gamtat dan leng mohpaih in Singtangmite deihdan kalh a gamtang hidan in gen hi. Aban agenzelna ah tuni'n Bandh bawlna a kithuahpih CDSU, Churachandpur Private School Association, United Chief Committee, Civil Society leh mipi ban ah Bandh bawlna dia sum-le-pai a kithuahpih te tung ah kipah thugen hi.
Autonomous District Council Churachandpur in khopi sung kep siangthou sawm in theihtawp suah in panla mahleh deih bang in phatuam zawlou hi. Khopi sung ah Dustbin teng in khetsiat ahihnung in kuamah in khopi sung ah nin paihthang nawnlou a ninpaw Gari in nin teng khonkhawm ding chih himahleh New-Bazar Thangzam Road ah nin tamtak kipaih nawn a, Lampi kimkhat ding mahmah luahzou hi. Hiai in khopi sung melsesak mahmah a, Bawng hon in nuamsa hunphet uhi.
1st IRB Unit Church Headquater Veng, Lamka sponsor na nuai a, Manipur Police Christian Association Youth Fellowship saina in October 2 akipan 6,2012 sung in Tuibuang a Christian Fellowship Church ah Jawans Revival Camp om ding hi. October 2,2012 nitak dak 5:30 in Rev. Nguljathang Local Pastor Christian Fellowship Church in Revival Camp hong ding a, Camp sung in Pastor Elvis Nehlal thugenpi in pang ding a, Counsellor in Lunkhosei General Secretary Manipur Police Christian Association 2nd MR pang ding hi.
Manipur State Co-operative Bank Limited Churachandpur Branch a Two Wheeler loan, Micro Business loan, Medium Term loan, Long Term loan leh SEGP loan la a, dinkik zounailou te ading in Manipur State Co-operative Bank Limited Churachandpur Branch in September 15,2012 sunma dak 11 in Synod Hall IB road ah Recovery Camp neihsawm uhi. Hiai Recovery Camp ah Loan la peuhmah in dinsiang ding in ngetna bawl ua, huchi ahihkeileh dan tawh kituak in legal proceeding kipan ding chi'n Kh.Menjor Singh Branch Manager Manipur State Co-operative Bank Churachandpur Branch in thusuah bawl a, huaiban ah One Time Settlement Scheme nuai ah bat neih teng baihlam tak a ditkik theih hidan inleng gen hi.
Ministry of Social Justice and Empowerment, Government of India nuai a Dr. Ambedkar Foundation in recognised school, College, University, Institution te ading in Dr Ambedkar National Essay Competition, 2012 saisawm uhi. Hiai ding toh kisai a S.Khaikhopau Ngaihte, Branch Officer Hqtr. apan lai kimu dan in, competition ahihleh category 2 in kikhen ding a, category A, ah Class IX apan Class XII hiding a, amau, Life of Mission of Dr. BR Ambedkar chih thupi zang ding ua, Category B, ah Recognised Colleges, University/Institution ten, Contribution of Dr. BR Ambedkar in making of the constitution of India chih thupi zang ding uhi. Hiai ding toh kisai a lunglut na nei kuapeuh in, September 15, 2012 tan in Chair Professor, Dr. Ambedkar Chair of Legal Studies and Research, Department of Law, Aligarh Muslim University, Aligarh-202002, Uttar Pradesh ah entry form te khaak ngai ding hi. Huailou in hiai ding toh kisai a thuchian kim zaw thei ut ten, www.ambedkarfoundation.nic.in ah etchet thei ding hi.
Jacintha Lazarus IAS Deputy Commissioner, Churachandpur makaih in zingchiang sun dak 12:00 in SSA tawh kisai in Review Meeting om ding hi. Meeting hun ah, Zonal Education Officer, District Co-ordinator, Cluster Resource Person leh Block Resource Person te tel ding ua, SSA tungtawn a nna kisem te leh School Uniform kihawmdan tawh kisai genkhawm ding uhi.
Ministry of Social Justice and Empowerment Government of India nuai a SC/ST te ading in Director, Dr. Ambedkar Foundation, tungtawn in scheme tuam tuam 6 muhtheih ding om a, apply ut ten DC office hiam ahihkei leh website. www.ambedkarfoundation.nic.in ah thuchian kan in etchet theih ding hi. Scheme tuam tuam 6 te, Dr. Ambedkar Medical Aid Scheme for SC and ST, Dr. Ambedkar national Relief to SC Victims of Atrocities, Dr. Ambedkar Scheme for Celebration of Birth Anniversary of Great Saints, Dr. Ambedkar Foundation National Essay Competition Scheme, Dr. Ambedkar National Merit awards for Meritorious students of secondary school examination belonging to SC and ST leh Dr. Ambedkar National Merit awards for meritorious students of Senior secondary school examination belonging to SC te hi a, apply ut ten a kinthei lam a kanchet theih ding hidan in kigen hi.