* District Level Students Science Seminar neih in om.
* Chief Medical Officer in District sung a ANM teng Meeting neihpih.
* Electricity Department in phalna neilou a Electric Connection bawl te leh Fee Bat neite zonkhiak sawm in Drive panta.
* SP Churachandpur makaih in Police te'n phalna neilou a honglut Bangladesh mi matkhiak sawm in panla.
* RSETI leh Civil Supply tawh Meeting ah DC Churachandpur a tel ziak in Office kailou.
* ZSP General Headquater in Annual Magazine honna neiding.
* EBC Lamka North Division sung a Inter leh Senior pawl te ading in Awareness Programme om ding.
TUN TANCHIN KIMZAW IN :
Zonal Education Office nuai a Science Unit saina in tuni sunma dak 11:00 in Synod Hall, IB Road ah District Level Students Science Seminar neih in om hi. Seminar hun ah, Mathematics In India, past, Present and Future chih thupi a zang in District sung a school 6, Rengkai Govt. High School, Donbosco High School, St.Marys' School, Bunglon High School, Dr. Radhkrishnan Foundation School leh Lalpuithluaii Foundation School apan Student 2 zel tel in power point presentation pia in kidemna nei uhi. Kidemna a tel Student te Dr. N.Chaoba Singh Associate Professor DM College of Science, Dr. Y.Rohen Singh Head of Department of Maths, NIT Manipur leh Dr. M.Kuber Singh Assistant Professor in Maths, DM College of Science in endik uhi. Hiai seminar ah a siampen Student 2 Jennifer of Don Bosco High School leh Roshline Acharya of St. Marys' School telkhiak in om ua, amau te September 27, 2012 in Iboton Higher Secondary School, Imphal ah District ai-oh in State Level Students Science Seminar ah telding uhi. Amau kipahman tuni'n Cash Award za 7 leh lehkhabu ban ah Certificate sang tuak ua, midang 4 in consolation price ngah in sum za 3 leh lehkhabu ban ah certificate sang nawn in, a tel teng kiang ah Participation Certificate leh lehkhabu ban ah sum za 1 chiat pia uhi.
Tuni sunma dak 11:00 Dr. HL Liensang Chief Medical Officer makaih in Female Health Worker Training School ah District sung a ANM teng in meeting nei uhi. Hiai hun ah ANM 150 vel tel in, Dr. VC Pau, District Family Welfare Officer, D.Khuala Vaiphei District Programme Manager, Bariyauddin, District Finance Manager leh Doctor bangzahhiam in, amau Department tawh kisai a nasep dingdan sinsak uhi. Chief Medical Officer in agendan in, Government apan fund hongpaite, a zatna ding omsa a hongpai ahihman in, a hiding bangtak a zat ahihlouh chiang in fund hongpai nawn nang haksa ahihdan gen a, huaiban ah fund hongpaite ahiding bangtak a zatgaih poimoh ahihdan gen hi.
Churchandpur District sung a phalna neilou a electric connection bawl a, fee tamtak bat neite zonkhiak sawm in tuni'a kipan Electricity Department leh Police kithuah in khopi sung mun tuamtuam ah Drive bawl sawm in panla ua, tuni'n Rengkai lak ah Drive bawl pan uhi. Electricity Department lam apan thu kiza dan in, phalna neilou a Electric la te, a gui lakkhiaksak in, electric a guukna mun ah lemla khawm uhi. Lemlak tawh thauh in Police te khut ah Case pekhia ua, aban teng Police te khut a kinga hidan in gen ua, fee tamtak batneite leng sik-kawm in, fee pethei te a connection lakkhiaksak lou in, a petheilou te connection bel lakkhiaksak uhi.
India gamsung ah Bangladesh mi tamtak phalna neilou a honglut om ziak in Ministry of Home Affairs in, State tuamtuam te kiang ah phalna neilou a India gamsung honglutte mankhe ding in thupia hi. Thupiak dungzui in Imphal ah leng Bangladesh mi phalna neilou a India gamsung honglut mi tamtak matkhiak in omta hi. Churachandpur District ah leng DGP apan thupiak om dungzui in phalna neilou a honglut Bangladesh mi omleh matkhiak sawm in Police te'n tualai in SP makaih in naktak in panla uhi. Zan in Zenhang Lamka area a Muslim te om khawmna deuh te check bawl ua, document te enchian uhi. Tuni'n a muanmohna deuhte uh samkhawm in documents, I-card, Voter ID te hoihtak in enchian nawn ua, himahleh Bangladesh mi muh leh mat bel neilou uhi. Hiai thu tawh kisai in Police te'n maban ah leng phalna neilou a gamsung honglutte matkhiak sawm in panla touzl ding a, mipi'n leng kithuahpih ding in ngen uhi.
Tuni sun 12:00 in Finance Commissioner makaih in Secretariat Imphal ah, Manipur sung a District teng apan Deputy Commissioner ten meeting nei uhi. Meeting hun ah, Rural Self Employment Training Institute, RSETI tawh kisai genkhawm ua, huaizawh sunnung dak 12:30 in Secretariat mah ah Civil Supply tawh kisai in Meeting neinawn uhi. Meeting hun ah Finance Department, NABARD leh akisaipih Civil Supply Official te tel uhi. Hiai meeting ah Jacintha Lazarus IAS DC Churachandpur leng a tel ziak in Office kailou hi.
Zou Sangnaupang Pawlpi (ZSP) General Headquaters in zingchiang sunma dak 11 in Zogal Memorial Hall Complex, Zoveng ah Annual Magazine 2012 honna neiding uhi. Hiai hun ah Ginsuanhau MLA 60 Singngat Assembly Constituency Chief Guest apang in ZSP Annual Magazine hong ding a, Rev. Thangginmuanlian Executive Director ZCBC in Pathian kiang ah landing hi. Guest of Honour in M Sesei Zou Chairman ADC Chandel pang ding a, Functional President in P Sianzadong Chairman Finance Committee ADCC leh Grace Zamnu MDC Muallum pang ding ua, Chief Host in LK Haokip IPS, IG pang ding hi. Huaiban ah Manglianthang President UZO Headquater, Michael Ginzasuan District Supply Officer, T Gouzadou Ex-Minister, Letkhogin Haokip IAS, L Mangkhogin Haokip IPS, SP Churachandpur, Mannuamching Chief Executive Officer ADCC, Francis Zamkhanthang AO, Kaikhankap ARCS leh T Ginzamang SG Lecturer in Special Guest hihna tawh uap ding uhi.
EBC Lamka North Division nuai a Division Baptist Children Department saina in zingchiang sunma dak 10 in Bethel Baptist Church Lailam Veng ah Lamka North Division sung a Inter leh Senior pawl te ading in Awareness Programme om ding hi. Hiai hun ah B Jamkhanlian Counsellor Lamka Rehabilitation and Research Centre (LRRC) in sinsak ding hi.
.