* District Social Welfare Office in Annapurna Anntang hawm.
* Electricity Department Churachandpur Division in Electric New-Connection hawm mahleh a deih a tam mahmah ziak in beipah hi.
* Bijang khaw sung a Lamlian nawl ah nin tamtak kipaih khawm.
* DC makaih in Primary Health Sub-Centre Management Society in Meeting neiding.
* Dimapur apan FCI Official 3 in Tualnuam a FCI Godown kibawl lel hong enkhia.
* Sinzawl Primary Health Centre a zatding Ambulance piakkhiak hunding kisuan.
TANCHIN KIMZAW:
District Social Welfare nuai a Annapurna Card neite ading in tuni'a kipan District Social Welfare Office ah Annapurna anntang hawm uhi. Tuni'n Churachandpur Assembly Constituency sung a Annapurna Card neite ading hawm ua, zingchiang tan sunzom ding uhi. Singngat Assembly Constituency ading in September 19 leh 20 in kihawm ding hi. Henglep Assembly Constituency leh Samulamlan Block ading in September 21,2012 in kihawm ding a, September 22,2012 in Thanlon leh Tipaimukh Assembly Constituency ading in hawm nawn ding uhi. Tutung a Annapurna anntang kihawm te ahihleh April 2012 apan August 2012 sung ading hi a, beneficiary te'n kha 1 in anntang sel 10 chiat lading uhi.
Electricity Department Churachandpur Division in tuni'a kipan amau Office Bijang ah Electric lakthakna ding New-Connection hawm pan mahle uh, a form 100 kia ahihziak in sunma in bei ngal hi. New-Connection form deih a tam mahmah ziak in zingchiang in Imphal ah form tamzaw lakthak sawm uhi.
Autonomous District Council Churachandpur Sanitary Truck in Khopi sung tawn in nin pawkhe mahleh town sung a veng leh khaw chih tawn suak zawlou in Bijang a Forest Department kiang a lampi nawl ah nin tamtak kipaih khawm in, nin paihkhawmna suak maimah ding in kilang a, nin om te a pawkhe ding kuamah om tuanlou hi.
Jacintha Lazarus, IAS DC Churachandpur makaih in September 28,2012 sunma dak 11 in BRGF Resource Centre, DC Office ah Primary Health Sub-Centre Management Society a Chairperson apang khaw Hausa te'n meeting neiding uhi. Hiai meeting ah Churachandpur District sung a Primary Health Sub-Centre 69 a Chairperson khaw hausa teng telding ua, Primary Health Sub-Centre te puahphat dingdan genkhawm ding uhi.
Tuni sunma dak 10:00 vel in Dimapur apan FCI Official 3 leh State apan mi 1 in Lamka hongpha in Tualnuam khua a FCI Godown kibawl lel hong enkhia uhi. Dimapur apan Official hong zinte ahihleh SK Sajit Kumar, Assistant General Manager, Civil Engineer, RO Dimapur in hon makaih a, Kunal Maru Assistant General Manager, F/A, RO Dimapur leh G. Kamei Assistant General Manager, STG, RO Dimapur in hon zui ua, Thoiba Area Manager FCI Manipur in hon kithuahpih hi. Tuni a Dimapur apan FCI Official hong zinte'n Tualnuam khua a FCI Godown kibawlna hoihtak in hong enkhia ua, nasep dan lungtun huaisa mahmah uh hi'n kigen hi. Tualnuam khua a FCI Godown bawlna tawh kisai a concern department Manipur Development Society official te'n nih vei thum vei bang hong enkheta mahle uh, FCI Dimapur ah report bangmah a bawllouh ziak ua, tuni'a Dimapur apan FCI Official te'n sum release zawhnung a spot enquiry hong bawl uh hidan in kigen hi. Thutut kingah dan in, Tualnuam khua a FCI Godown bawlna ding in 5.39 crores sanction in om a, tuni tan a lakh 67 release hita hi'n kigen hi.
Jacintha Lazarus IAS DC Churachandpur makaih a zingchiang a Sinzawl khua a Primary Health Centre azat ding Ambulance piakkhiakna om ding chih himahleh lemtanglouhna khenkhat om ziak in September 24, 2012 a piakkhiakna neih ding in a hun suan thak uhi. Hiai Ambulance thak ahihleh BADP 2009-2010 fund tungtawn a kileikhia hidan in kigen hi.
Lalremsiem leh EFCI Central Numei Pawl saina in Mualvaiphei a Nehemiah Prayer Mountain ah September 25 akipan November 3,2012 sung in, Ni 40 leh zan 40 anngawl a thumna om ding hi. Hiai Anngawl thumna ah Sptuam khentuam omlou in a lunglut peuhmah teltheih ding a, Churachandpur, Manipur leh Khovel pumpi huap in thumna neiding uhi.