* Tongminthang MDC Sagang ADC Constituency in BJP Party zom.
* Lions Club of Churachandpur Greater in khopi sung a Lampi kikawkmuhna ding takkhia.
* S Nabil khaw Hausa Henkhothang Haokip Thau a kaplup in om.
* Ginsuanhau MLA in ZSP Annual Magazine hong.
* EBC Lamka North Division sung a Inter leh Senior pawl in Awareness Programme zang.
* Police Drug Cell in Damdawi khawmtheih tamtak mankhia.
* 1st MR Ground ah State Level Kut zat hiding.

TUN TANCHIN KIMAW IN :

Bharatya Janata Party (BJP) Churachandpur District in tuni sunma dak 11 in M Chungkhosei Haokip BJP Sate Executive Member tenna inn Tuibuang ah BJP a lutthak 20-Sagang ADC Constituency a MDC Tongminthang vaidawnna leh 13th IFMA Indian National Muaythai Championship a Gold Medalist Hengousang Khongsai leh Silver Medalist Helkhothang Touthang kipahpihna nei uhi. Hiai hun ah Sh. Shantikumar Sharma President BJP Manipur Pradesh, Chief Guest in pang a, Guest of Honour in Yanglet Haokip General Secretary BJP Manipur Pradesh pang a, Functional President in Lhunkhojang Haokip President BJP Churachandpur District pang a, amau te'n Member thak Tongminthang MDC vaidawnna in puan silhsak ua, Gold Medalist leh Silver Medalist te Memento pia uhi. Tongminthang MDC in BJP Party a zopna ziak tomkimtak in gen a, aman a gendan in Party tamtak om te naktak in study ka bawl a, Congress Party in a genthoh lam a uang bawl mahmah ua, kholak a nuapang kaplai khem lungdamna dia,
chikhum i piak bang in India gamsung ah chikhum a hawm uh chi a, BJP in pitek-putek leh naupang bangmah semthei nawnlou te lampi ding kawkmuh in, a khut a len in a makaih zel chi hi. Huiban ah Manipur a Singtangmite buaina leh haksatna genngam ding Party ka muhlouh ziak a, Singtangmite haksatna tangkoupih ngam ding BJP ahihziak a Party a lut ka hi chi'n leng genbeh hi. Aban agenzelna ah BJP a ka lutma in ka worker te, lawm-leh vual ban ah khaw hausa te ngaihdan ka lakhawm masa a, BJP party Christian sahkhua doudal Party ahihlouh dan ka theisiamsak a, amau leng hon deihsak mahmah uh chi a, huchih dungzui in kei BJP a ka lut leh ka worker te leng honglut ding ahi chi a, election nawn chiang in Manipur ah BJP in solkar bawl ngei ding in kinemna sangtak ka puang chi hi.

Churachandpur District pawlam leh gamdang apan hongzinte ading khualna in Lions Club of Churachandpur Greater in District sung a lampi paidan leh mun poimoh ban ah Govt. Office Building te omna mun theih-theihna ding sikpek a kigelh lamka bom mun tuamtuam ah takkhia uhi. Tuni'n Tuibuang Forest Gate ah khat takkhia ua, maban ah Peace Ground, SP Quater, Police Station, Tedim road leh Nehru Marg junction, Churachandpur College kong, Lanva, Dorcas Hall, ZEO Office leh Rengkai road leh Nehru Marg junction ah taklai ding uhi.

Henglep-Sub-Division sung a S Nabil khua ah zan nitak dak 9 vel in S Nabil khaw hausa Henkhothang Haokip thau a kaplup in om hi. Hiai thiltung tawh kisai in Joint Action Committee (JAC) dinkhiak in om ngal a, JAC pawl in Tuibuang Bazar ah dawr teng khaksak in Gari tanpha khamkhawl in Bandh chi mahle uh sunnung in bel ngeina bang nawn hi. Hiai thutawh kisai in S Nabil khaw hausa tapa Nehlenlal Haokip in Press Release bawl kawm in sunnung dak 1 in Tuibuang ah Media te kimuhpih hi. Nehlenlal Haokip in a gendan in kum 2010 in Sehpu Haokip S/o (L) Mangkhothong Haokip of Old Lambulane Imphal in ka pa Henkhothong Haokip, thau a ngim in blank paper ah suaikai sak a, huai suai kaihna paper pen a khonung in S Nabil khua zuakna Sale Deed suaksak a, huai apan Govt. paidan bohsia in Henglep Sub-Division a Sub-Registrar thuzawh nawn in mipi leh khaw sung mipi theihpihlouh leh kithuahpihna tellou in S Nabil khua amah ahita dan in hong pang mawk chi hi. Aban agenzelna ah, hiai thu te ziak in Sehpu Haokip in S Nabil khua a hausa hihna hon pekhia un chi in, kei leh ka pa thah ding hon vau gige a, hiai thu te ziak a khaw sung a kivaihawmna abuai mahmah ziak in Deputy Commissioner khut ah gelh thoh in complain kibawl a, Sehpu Haokip in khaw sung mipi kithuahpihna a ngah zawhlouh in Gauhati High Court ah Case file a, Case number WPC Number 415 of 2012 chiamteh in om a tunitan in pending in om chi'n leng genbeh hi. Aban agenzelna ah, hiai thubuai ziak in zan nitak dak 9 vel in Sehpu Haokip leh a thuzawh Lamkhomang Haokip S/o Tingthang of Old Lambulane leh Thangkholal S/o Jamkholam, ka khua uah valut in, innkong a ka pa zuntha dia pawtkhe phet thau in kap uh chi a, innsung a om ka sanggampa Thenlenmang in thau ging a zakphet in delh pawt ngal a, Sehpu Haokip leh a lawm te kintak in kihem mang uh chi hi. Ka pa naktak in liam a, 9 Gorkha Rifle leh Moirang Police te'n District Hospital honpuak tung sak uh chi a, Ka pan a sihma in thau a kaptute min genvek man chi hi. Aban agenzelna ah hiai thu Moirang Police Station ah FIR kibawl a, tualthat Sehpu Haokip leh a lawm te mi 2 Police in a matkhiak masiah siluang lak hilou ding chi hi. Henkhothang Haokip luang ahihleh RIMS Imphal ah post mortem bawl in om hi.

EBC Lamka North Division nuai a Division Baptist Children Department saina in tuni sunma dak 10 in Bethel Baptist Church Lailam Veng ah Lamka North Division sung a Inter leh Senior pawl te ading in Awareness Programme nei uhi. Hiai hun ah B Jamkhanlian Counsellor Lamka Rehabilitation and Research Centre (LRRC) in Damdawi khamtheih a kibualkhak a lauhhuai dan gen in khamtheih guihtheih apan kiveng dingdan sinsak hi.

Zou Sangnaupang Pawlpi (ZSP) General Headquaters in tuni sunnung dak 2 in Zogal Memorial Hall Complex, Zoveng ah Annual Magazine 2012 honna nei uhi. Hiai hun ah Ginsuanhau MLA 60 Singngat Assembly Constituency Chief Guest apang in ZSP Annual Magazine hong a, Rev. Thangginmuanlian Executive Director ZCBC in Pathian kiang ah lan hi. Guest of Honour in M Sesei Zou Chairman ADC Chandel pang a, Functional President in Grace Zamnu MDC Muallum pang a, Chief Host in LK Haokip IPS, IG pang a, huaiban ah Manglianthang President UZO Headquater, Michael Ginzasuan District Supply Officer, T Gouzadou Ex-Minister, Mannuamching Chief Executive Officer ADCC, Francis Zamkhanthang AO, Kaikhankap ARCS leh T Ginzamang SG Lecturer in Special Guest hihna tawh uap uhi. Hiai hun ah ZSP General Headquater in member pahmsa te suunna hunzang in Zou Tribe sung a lasiam masa, laigelh masa, drama bawl masa te ban ah drama a lemching te pahtawina pia uhi.

L Mangkhogin Haokip IPS SP Churachandpur in district sung a khamtheih doudalna ding tawh kisai a Drug Cell a dinkhiak nung in Drug Cell te'n khopi sung ah khamtheih doudalna sunzom in tuni sunnung dak 2 in Mualveng Hiangtam Lamka ah mi 3 Md. Sanjoy (28) S/o (Late) Md. Latip of Kwakta, Terakhongsang Bishnupur District, Md. Nazerrudin (35) S/o Md. Kherruddin of Kwakta Ward no. 2 leh Md. Riya uddin (34) S/o (Late) Md. Aket Ali of Kwakta Ward no. 1 apan damdawi khamtheih SP tang sang leh za 8 leh 13 mukhia uhi. Police te gendan in hiai mi 3 te'n Churachandpur District ah damdawi khamtheih hong supply gige ua, sawtpek akipan kichang gige tuni' a kilohching pan chi'n gen uhi. Hiai mi 3 te'n Md. Amir Khan S/o Md. Idin of Kwakta, Thingel Leikai min a ki-register Hyundai i-10 Car number AS11D-5344 zang in gari seat nuai ah SP tang te selgu uhi.

P Doungel IPS Secretary State Level Kut Committee Manipur in thusuah abawl kimu in agendan in Apaisa August 29,2012 in 1st MR Banquet Hall Imphal ah Dr. Chaltonlien Amo Chairman State Level Kut Committee Manipur makaih in Minister, MLA, IAS leh IPS Officer te ban ah Kut family a Officer tuamtuam te tawh Meeting neih in om hi. Huai ah State Level Kut zatna 1st MR Ground Imphal a neih ding in lemsa ua, Programme sung in Tribe 23 apan namlam lahna om ding a, Miss. Kut 2012 kiteelna leng om ding a, "Kut Outstanding Personality" chih minvuah in MC Mary Kom pahtawina piak hiding a, hiai ding department tuamtuam leng dinkhiak ding in thupuk uhi