* ZRO/ZRA Anti Drug Cell in Thangngaihnem tawh Damdawi khawmtheih mankhawm.
* Pearsonmun ah Animal Health Camp leh Awareness Training Programme neih in om.
* Lalpuithluaii Foundation in Teachers Day zang.
* TN Haokip MLA in 13-Khawlmun ADC Constituency hong.
* CoPTAM General Strike zingkal dak 6 in kipan ding.
* 46 Assam Rifle pawl in KNLF member te panpihtu leh kibukna ding pia pasal khat mankhia.
* DC in Sinzawl khua a Ambulance a piakkhiak hunding kisuan.
* Election duty ding in Churachandpur Police hunkhop in Bishenpur District zuan.
TUN TANCHIN KIMZAW IN :
ZRO/ZRA Anti-Drug Cell in khopi sung a damdawi khamtheih doudalna sunzom in tuni zinglam dak 7 vel in Thangngaihnem (35) D/o Sangnem of Tedim road near SBI Churachandpur Branch apan damdawi khamtheih SP tang 192 mukhia in amah tawh mankhawm in Media te mai ah Mei in haltumsak uhi. Thangngaihnem kipuang dan in Kwakta apan Tomba kichi in Tuibuang Peace ground ah SP tang hong pesawn in aman Auto in inn tan pawtung hi. SP tang kihaltum teng sum a tuat in Rs. 2880 manzou ding in kigen hi. ZRA Anti-Drug Cell apan thu kiza dan in ZRO/ZRA in khangsawn te khualna in damdawi khamtheih doudalna naktak in sunzom ding a, damdawi khamtheih zuak leh a hih zongsang tam deuhdeuh a, ZRO/ZRA in poi kisa mahmah a chih ban uah, khamtheih hih leh a zuak te warning kipia a, warning ngeingaihlou te'n maban a, atuah ding uh muhkholsa a om chiat ding in theihsak uhi. ZRO/ZRA in damdawi khamtheih doudalna ah civil society leh saptuam heutute'n kithuahpih ding inleng ngen uhi.
Bangalore pansan a om PD-ADMAS sponsorna nuai a, ICAR Research Complex for NEH Region Manipur Centre, Lamphel, KVK Churachandpur leh State Vety Department Churachandpur saina in zan leh tuni'n Pearsonmun Community Hall ah 2 days Animal Health Camp -Cum- Awareness Training Programme nei uhi. Tuni'n Chief Guest in Thanchhung Chief of Pearsonmun pang a, Guest of Honour in Dr. Bless-a Sailo Animal Health Scientist pang a, Functional President in WR Singh Prof. Co-ordinator KVK Churachandpur pang a, hiai hun ah ganvulh tuamtuam Bawng, Ui leh Vok damdawi a thon in hawm ua, damdawi kapngai ganvulh te leng damdawi kap ngal uhi.
Lalpuithluaii Foundation School in tuni sunma dak 11 in School huangsung ah Teachers Day zang uhi. Hiai hun JB Rai (Retired) Teacher, Sidney Anthony Beham leh Siamkhankhual in Guest of Honour hihna tawh uap ua, Student te'n entertainment item tuamtuam lak in Teacher te mit-le-bil taisak mahmah uhi.
Tuni sunma dak 11:30 in Khawlmun Community Hall ah 13-Kholmun ADC Constituency honna leh TN Haokip MLA 59-Saikot Assembly Constituency kipahpihna program om hi. TN Haokip MLA in 13-Kholmun ADC honna nei a, Rev Jangkholam Doungel Executive Director ECA in Kholmun ADC Constituency latna leh TN Haokip MLA ading in vualzawlna ngetsak in thumsak hi.Hiai hun Langkhanpau Guite Chairman ADCC leh Jacintha Lazarus IAS DC Churachandpur inleng uap in thugenna hunzang ua, MDC tamtak leng tel uhi. TN Haokip in agenna ah nu-le-pa te'n tate lehkha hoihtak a simsak chiat a laisiam sak ding in ngen a, kuapeuh in haichi chiinna ding huan hoihtak bawl a, huangvulh ganta hoihtak a khoi chiat ding inleng ngen hi. Langkhanpau Guite in agenna ah 13-Kholmun ADC kihong thak leh TN Haokip MLA kipahpih thugen hi. Aman genbehna ah MGNREGS tawh kisai a 25 percent kichi pen MDC te'n amau bialsung chiat ah work proposal bawltheih ding uh ahihdan gen a, 25 percent pen a sum MDC ten tanglou in Village Authority tungtawn mah in kisemkhe lelding hi'n gen hi. Hausa, MDC te ban ah District Administration tawh kihoukhawm a theihsiamlouh te kikupkhawm adeih thugen hi. I gam sung ua development fund hongpai te aphatuam theipen a zattheih nang in kuapeuh pankhawm poimawh hi'n gen a, helpawl te apan sum demand omte omlouh theihnang a, church leader te tel in kuapeuh pangkhawn ding in ngen hi. Jacintha Lazarus in agenna ah TN Haokip in thu tom chikchik a gen ziak in mipi'n ngaina mahmah a District Administration adia leng advice hoih taktak honpe gige leh Politician te lak a ka ngaihsang pawl ahi chi'n gen a, TN Haokip ziak in Saikot Assembly Constituency sung ah thil thak tamtak kipan khia chi'n leng genbeh hi.
Committee on Protection of Tribal Area Manipur (CoPTAM) in Singtanggam a Zilla Parishad/Panchayati Raj Election neih theihlouh ding a thupuan a bawlsa Govt. in ngeingaihlou in Singtanggam ah Panchayati Raj Election neih sawm teitei a, Panchayati Raj Institution deihlouhna zingchiang zinglam dak 6 akipan nitaklam dak 4 sung in Singtanggam pumpi uap in General Strike puang uhi. Hiai general Strike in emergency case leh Press/ Media te kia huam khalou ding hi.
Songpeh khua ah Sept 10, 2012 zingkal baihtak dak 2:00 vel in 46-Assam Rifles te'n Seikhomang Touthang (30) s/o Haopu Touthang mankhia in Imphal Police te khut ah pekhia ua, huai apan Churachandpur Police te'n case lasawn uhi. Police thusuak kingah dan in Seikhomang Touthang ahihleh KNLF overground ahihban ah Sielmat Hospital kong a Vaite godowm leh apaisa August 25, 2012 nitak a Hiangtam Lamka a C.Hangshing Executive Director DRDA tenna inn compound a handgrenade paihpuak KNLF member te panpihtu leh kibukna ding pia hi'n gen uhi. Churachandpur Police te'n zan in Chief Judicial Magistrate court ah Seikhomang Touthang dingsak in Chief Judicial Magistrate in September 14, 2012 tan Police custody a om ding in thutankhum a, Police te'n chiamteh uhi.
Jacintha Lazarus IAS DC Churachandpur in zingchiang a Thanlon Sub-Division sung a Sinzawl khua phakkawm a Sinzawl Primary Health Centre a zatding Ambulance Gari pekhe ding chih himahleh September 17, 2012 ading in ahun suan thak uhi.
Manipur Phaizang area ah zingchiang in Zilla Parishad/Panchayati Raj election omding hi. Hiai ding tawh kisai tuni'n Churachandpur District apan Police Sub-Inspector 3, Assistant Sub-Inspector 4 leh Police Constable 33 Bishnupur District aduty ding in kuankhia uhi.