**Rev. L Khamkholun General Secretary EBC in Zoan EBC Biakinn thak hong.
**District Blindness Control Society in mi tengteng mit a thon in test ding.
**District Level Women Sports Competition neih in om.
**Ngamhao Touthang MDC in abial sung a Hausa teng MGNREGS tawh kisai in Meeting neihpih.
**NRHM Regional Resource Centre Gauhati apan Monitoring Cum Supervision Support team in Lamka Damdawi inn leh PHC tuamtuam enkhia.
**DC Churachandpur in thusuah a bawlna ah Village Authority Election neih hunding kibehlap.
**District Blindness Control Society saina in 13th World Sight Day kizang ding.
**District Water and Sanitation Mission in MDC teng Training peding.
**Zenhang Lamka Core Committee in Guta 2 leh hanmual a No. 4 kikap sawm pasal 2 mankhia.

TUN TANCHIN KIMZAW IN :

Tuni sunma dak 11:30 in D.Phailian leh Dorcas Veng, New Lamka kikal ah EBCC Zoan Biak Inn thak bawl zawh ahihtawh kiton in honna neih in om hi.Hiai hun ah Rev L. Khamkholun, General Secretary EBC in Biakinn thak hong in Pathian kiang ah latna nei ngal in Pathian thugenna tawh thuah hi. Hiai hun ah Upa B.Chinkhansuan, Chairman Building committee in biakinn lamna tawh kisai in report pia hi. Hai Zoan EBCC saptuam ah inn 36 om in milip195 om ua, Upa 3 nei uhi.

Dr. VC Pau Tonsing District Family Welfare Officer leh Dr.  Eye Specialist District Hospital in tuni'a Media te mai a gendan un, District Blindness Control Society saina in October 12 akipan 19, 2012 sung in mun tuamtuam ah "Eye Testing for All" chih thupi anei in kuapeuh ading in mit test na om ding hi. Huai hun ah refractive error muhkhiak teng govt in mitbulh a thon a peding hi'n kigen hi.Oct 12, 2012 in L. Foundation School, Hermon English School leh YPA Hall, Bungmual ah om ding a, Oct 13, 2012 in Thangkhai Govt. High School leh Pearsonmun Community Hall ah om nawn ding hi. Oct 15, 2012 in LM Academy, Lingsiphai leh Vungzagen High School Mata ah om ding a, Oct 16, 2012 in St Mary High School leh Tuibuong Community Hall ah om ding hi. Oct 17 in St Pauls Higher Secondary School leh YPA Hall, New Lamka ah om ding a, Oct 18, 2012 in Rengkai govt Higher Secondary School leh Rengkai Community Hall ah om ding hi. Oct 19, 2012 in Chinkham Modern High School leh Phungkhothang Govt High School ah om ding hi.

District Youth Affairs and Sports, Churachandpur saina in October 8 akipan tuni tan in Tuibuong Peace Ground, Lamka Indoor Hall leh Lamka Public Ground ah District Level Women Sports Competition nei uhi. Hiai hun ah Churachandpur district sung a numeite discipline tuamtuam Basketball, Handball, Athletics, Badminton, Table Tennis, Kho-kho, Kabadi leh Volleyball in kidemna nei ua, kidemnate a vualzou te October 12 akipan 15, 2012 sung a Khuman Lampak, Imphal a State Level Womens Sports Competition ah, Churachandpur District ai-oh in kuan ding uhi.

Ngamhao Touthang MDC Tuibuang in a bial sung a khaw hausa teng samkhawm in tuni sunma dak 11 in Bijang Community Hall ah MGNREGS tawh kisai in Meeting neihpih hi. Hiai hun ah MGNREGS 2013-2014 Annual plan tawh kisai leh sum hongpai te zat dingdan khaw hausa te genkhawm in khaw hausa tamtak paikhawm uhi.

National Rural Health Mission (NRHM) Regional Resource Centre, Gauhati apan Monitoring cum supervision support team in Churachandpur leh Thoubal district ah National Rural Health Mission, NRHM tungtawn a nna kisem te hong enkhia uhi. Monitoring cum supervision support team te Dr. Joydeep, Advisor Public Health, Regional Resource Centre, North East makaih in mi 7 pha ua, amau zan in Saikot PHC enkhia uhi. Tuni zinglam dak 10:30 vel in District Hospital enkhia ua, huai zawh in Thingkangphai PHSC, Singngat PHC leh Sagang PHC enkhe in Imphal ah kiknawn uhi.

Jacintha Lazarus, IAS DC Churachandpur in Manipur Chief Secretary order dungzui in Churachandpur District sung a SDO teng in recognised khua leh veng te ah Oct. 22 apan Nov. 9, 2012 sung a Village Authority election neiding in notice suah a, himahleh ahun behlap in Oct. 22 apan Nov. 21, 2012 sung a neihding in  notice bawl thak hi. Village Authority election neizawh nung Nov. 23, 2012 tan in election result teng DC Churachandpur office ah submit ding in SDO teng theisak hi.

District Blindness Control society Churachandpur saina in zingchiang sunma dak 11:00 in Churachandpur College ah "Eye testing for all" chih thupi anei in 13th World Sight Day 2012 zatna omding hi. Hiai hun ah S.Kamsuanlun, Executive member ADCC Chief Guest in pang ding a, Functional President in Dr H.L Liensang, Chief Medical Officer pang ding a, Guest of Honour in Ricky L.Guite, Principal Churachandpur College pang hiding hi.

District Water and Sanitation Mission, Churachandpur District saina in zingchiang zinglam dak 10;30 in Tuibuong a District Training Centre ah MDC te'n  "One Day Sensitization on Nirmal Bharat Abhiyan (NBA) and Operation and Mainatenance (O and M) of NRDWP Sheme" kichi neiding uhi.Hiai hun ah L.Swamikanta singh, Director. CCDU/Manipur; L.Ibomcha Singh, SE/R-I PHED/Manipur; Ph Yaima Singh, SE, Planning and Monitoring PHED in thupi tuamtuam pansan in thugen ding uhi.

Zenhang Lamka Core Committee in tuni zinglam in guta mi 2 Mr Mangminlian Taitom (27) s/o (Late) Lunkhokam of Meitei Leikai, Phailian leh Genlunthang (31) s/o Thienkhogen of Kanvai te mankhia ua, amau apan in Langva pek 2 akisat sia pek 1 mukhia uhi. Huaiban ah Zenhang Lamka Cemetry ah No.4 kikap deklai Lalhmingliana (20) s/o Dimphara of Field Veng, Saikot, Lalrosang (18) s/o Lalhmuklien of Field Veng Saikot mankhia uhi. No.4 kikap sawmlai mi 2 te ahihleh alawmpa uh Lalzira, tulel a Assam Regiment apang lel suty a kiknawn ding va khazou a No. 4 kikap sawm uh hi'n kigen hi.

**Zenhang Lamka Core Committee in Guta tamtak mankhia.
**The Malsawm Initiative phungvuhna dia A Nite With Benny Khongsai kichi neihna ding tawh kisai in Benny Khongsai in The Malsawm Initiative a naupang te veh.
**Horticulture and Soil Conservation Department saina in Winter Vegetable Cultivation tawh kisai in loubawlmi te'n Training nei.
**CoPTAM in Hill District sung a Panchayat Election a kigolhkha peuhmah Sum liausak ding a, telching a om singtangmi peuhmah tukha sung a kitawp ding in thupia.
**Integrated Child Protection Scheme tungtawn in Mualvaiphei a Destitute Children Home ading Sum Lakh 16 val hongpai mahleh UBI Churachandpur ah, a omna theihlou in om.
**National Rural Health Mission nuai a Regional Resource Centre Gauhati apan Monitoring Cum Supervision Support team in Lamka hongpha ding.

TUN TANCHIN KIMZAW IN:
Zenhang Lamka Youth Club, Village Authority leh YPA Zenhang lamka unit te kikhaikhawmna Zenhang lamka Core Committee in tuni zinglam dak 10:00 vel in Ngamsei (34) S/o Otkhokhai of Hlangnuom, man in amah apan a van guuk, beel gong geek khat leh khamtheih No.4 tuun khat mukhia uhi. Core committee te apan thu kiza dan in, mat a om Ngamsei in B.Vengnuom ah van gu a, zuak a sawm laitak mat a om hidan in gen uhi. Huailou in, apaisa October 7 nitak inleng mi bangzah hiam tak man in amau apan numei puan tamtak mukhia uhi. Hiai van te neitu in tukal sung in core committee te khut apan laak theih ding hidan inleng gen uhi. Zenhang Lamka huap sung a mi van guuk te kimantak a kizuak ana leisak, theihkhiak om leh guta bang a ngaih hiding in Core Committee palai te'n gen uhi.

Pianken a vualphalou te siamsinna The Malsawm Initiative, phungvuhna ding in khalui in Centre for Community Initiative, CCI, CT Lian Convenience Store, Laizon Digest leh Churachandpur Reporters' Guild te saina in A nite with S.Chingnu neih in om a, huai mah bang in October 13, 2012 nitak dak 5 apan dak 7 kikal in B.Vengnuom Community Hall ah A nite with Benny Khongsai kichi neih hinawn ding hi. Hiai ding toh kisai in tuni sunma dak 11:00 in Benny Khongsai in The Malsawm Initiative  mun va pha in, huai school a kai naupang te dinmun va enkhia hi. Benny Khongsai in pianken a vualphalou te kaina ding school bawlkhe tute pahtakhuai a sak thugen a, funding om lou ahihna ah, aman leng a hihtheih sunsun chi a childrens with special needs te kithuahpihna dia hiai bang musical event saisawm ahihdan gen hi. Mipin leng naupang te kithuahpihna dia ticket za 1 man  leisak siau siau ding in ngen a, tutung in upat dan bikhiah omlou ding hi.

Horticulture and Soil conservation Department saina in tuni zinglam dak 10:30 in Synod Hall, IB Road ah 1-day state level farmers training programme on Winter Vegetable Cultivation under HMNE/ 2012-13 neih in om hi. Hiai hun ah, NK Paite District Officer, Horticulture and Soil Conservation Churachandpur in keynote address gen in, Dr. RK Dilip Singh, Associate Professor, CAU, Imphal leh Dr. M.Thoithoi Singh, Programme Coordinator, KVK, Wangbal in sinsak ua, khopi sung a loubawl mi 100 tel uhi.

Committee on Protection of Tribal Areas Manipur (CoPTAM) in tuni sunnung dak 3:30 in CDSU Information Centre ah Media te kimuhpih in hill district sung a Panchayat Election 2012 neih tungtang genpih uhi. H Pauzalal Vice-Chairman External CoPTAM in a gendan in hill district huapsung ah Panchayat election neih ding CoPTAM in theihtawp suah in dal mahleh solkar in a tawpsan tuanlouh ziak in singtangmi kuamah kigolhlouh ding in tamveitak theihsakna kibawl mahleh hill district sung mun khenkhat ah singtangmite deihdan kal in election neihna ah panla pawl bangzah hiam om a huai te tung ah action lak kisawm chi a, hill district sung a panchayat election neihna a singtangmi candidate telching a om te tukha sung ngei a, a kitawp ding uh chi a, election a lohching leh a lohchinglou te hita leh singtangmi te deihdan kalh ahihziak un, sum liausak hiding uh chi'n leng genbeh hi. Aban a genzelna ah hiai ding tawh kisai in pawlpi tuamtuam in mohpuakna lading chi hi.
Hill district sung a Panchayat election neihna mun te ahihleh Saikul Block sung a Phouwaibi area ah Kuki Innpi Saikul in enkai ding a, Saikul Block sung mah Nongmaiching Naga Area ah United Nongmaiching Area Tribal People Organisation in enkai ding a, Samulamlan Block sung Khodang khua ah CDSU in enkai ding chi hi. Hiai ding tawh kisai a mohpuakna piak a om pawlpi tuamtuam te'n sum liausak ding leh elected te tawpsak ding tungtang tukha sung in hihfel ding uhi. Hiai thutawh kisai mah in singtangmi organisation tuamtuam te tawh tukha tawp in special joint meeting om ding hi.

Apaisa October 8, 2012, in K.Lalbiaksanga, Superintendent, Management Board, Destitute Children Home, Muolvaiphei in Destitute Children Home a ding Centre apan Integrated Child Protection Scheme tungtawn a sum, lakh 16 sang 1 leh za 5 leh 50 te kigumang chi in Police ah complain thehlut hi. Hiai toh kisai a police lam apan thu kimu dan in, hiai destitute children home a ding sum te United Bank of India, UBI, Churachandpur Branch a deposit kibawl hidan in taklang ua, himahleh, hiai sum te K.Lalbiaksanga in a laak khiak sawm leh omlou hi. Police hiai thu kansui in, a kigolh kha dia muanmoh, UBI Churachandpur branch manager, Abhinan Jha, ban ah, Assistant Manager, Jotin Singh leh Lieutenant Colnel Khaizadinga, Secretary for Programme Administration, Salvation Army, Territorial Headquarter, Aizawl Mizoram leh Major Laithanmawia, Division Commander, Salvation Army, Eastern Division manipur te thudotna nei ding chi uhi. Destitute Children Home a management
 board lam te'n UBI te kiang ah a buaina uh hihveng sak ding in ngetna leng bawl khin ua, UBI lam in hiai buaina ni 2 sung a hih fel ding chih himahleh, UBI manager, Abhinan Jha in a ngaihsak louh ziak in, hiai sum te aman leng nekha ding ahi chi'a muanmoh na om ziak in thudotna nei hiding in Police thusuak in taklang hi.

National Rural Health Mission (NRHM) Regional Resource Centre, Gauhati apan Monitoring cum supervision support team in Churachandpur leh Thoubal district ah National Rural Health Mission, NRHM tungtawn a nna kisem te hong enkhe ding uhi. Monitoring cum supervision support team te Dr. Joydeep, Advisor Public Health, RRC, North East makaih in mi 7 hiding  ua, amau tuni'a Imphal tung in zingchiang in Lamka hongpha in, District hospital, Community Health Centre khat le nih, Primary Health Centre 4, leh Sub-Centre 2 te pha in nnasep dan te enkhe ding uhi. Monitoring team te'n October 11, 2012 in Thoubal ah NRHM nuai a nasepna enkhe nawn ding ua, October 12, 2012 in State Mission Director te toh meeting neinawn ding uhi.