* Lamka Traders and Self Employed Association makaih in Sum dawng mite'n Meeting nei. 
*STC/BSF Mualkawi in Olympic Bronze Medalist MC Mary Kom vaidawn.
* C Hangshing Additional Deputy Commissioner in Awareness Cum De-Addiction Camp khak.
* Lamka Police te'n khopi sung mun tuamtuam ah Zu tamtak mankhia.
* P Songlianlal inn a thiltung tawh kisai in ZRO in Press Statement suah.
* T Goukhomang President ZYA General Headquaters in ZYA, S Zezaw Block hong in vaipaw ding te kichiamsak.
* Student te haksatna tawh kisai in CDSU in SBI, Vijaya Bank leh HDFC Bank thuneitu te kimuhpih.
TUN TANCHIN KIMZAW IN :
Lamka Traders and Self Employed Association makaih in zan sunnung dak 1:30 in synod hall IB road ah Lamka khopi sung a sum dawng a niteng nektawm zong te'n Meeting nei uhi. Hiai hun ah JL Sawmi President Churachandpur District Joint Women Organisation leh Langkhanpau Guite Chairman ADCC in hasotna thugen in bandh om gige pen a ninhuai dan leh Govt. kiang a thilphut taklatna himahleh lunggel vengveng a, dal ding leh dallouh ding theihkhen poimoh ahihdan gen uhi. Hiai Meeting ah Lamka Traders and Self Employed Association in thupukna tuamtuam bawl in sum dawn mite theihpihlouh a bandh, strike leh kiphinna tuamtuam te niteng nektawm zong leh dawr kaite subuai thei ding a om leh gupna piaklouh ding in lemsa ua, District mipi adia phatuam ding leh omzia neitak Bandh ahihleh bel full support piak ding in thupukna la uhi. Huaiban ah Guta lata apan kivenna hoihtak hiding chihna ziak in zuaksawn theih van himhim kimantak a zuak om leh leisaklouh ding leh maban a Lamka Traders and Self Employed Association Executive member leh Area a mawhpaw ding guan behlap ding inleng lemsa ua, kuapeuh in a piakzawh ding welfare fund tam loulou khon ding in lemsa uhi. Huaiban ah Lamka Traders and Self Employed Association kingakna tak pawlpi hiding in namkipna leng nei uhi. Hiai Meeting ah Lamka khopi sung a sum dawng mi 700 val tel uhi.
India gamsung a kimawl mite pahtawina sangpen Padmashree, Khelratna leh Arjuna Award la a, tutung Olympic a bronze Medalist MC Mary Kom vaidawnna thupitak in tuni sunma dak 11:30 in STC/BSF Mualkawi ah neih in om hi. Hiai hun ah Baljit Singh Kasana PMG Deputy Inspector General STC/BSF in MC Mary Kom vaidawnna thugen in, MC Mary Kom tanchin tomkim in taklang hi. Huaiban ah manipur a lemgelh siam mahmah a minthang RKCS Gallery te'n MC Mary Kom boxing a kisuklai lem a gelh uh pia in puan silhsak hi. MC Mary Kom in School naupang leh BSF Jawan te'n tutna teng tawnsuak in chibai buk hi. Aman a thugenna ah STC/BSF in pahtawina a piakna tung ah kipah thugen in, khawvel a India gam minthangsak a tawisangna ding in kuapeuh mah in chihtakna suah a panla ding in ngen hi. MC Mary Kom ahihleh a pasal ban ah a nu-le-pa'n leng honzui uhi. Hiai hun STC/BSF kim-le-kiang a School tuamtuam apan student te leh khaw hausa C Hangshing Addidtional Deputy Commissioner
Churachandpur in uap uhi.
Ministry of Social Justice and Empowerment Govt. of India Sponsor na nuai a Nehru Yuva Kendra (NYK) Churachandpur leh Lamka Rehabilitation and Research Centre (LRRC) saina in Bungmual a Lam-etna mun ah September 24, 2012 in Awareness Cum De-Addiction Camp kipan a tuni sunnung dak 3 in hunkhakna nei uhi. Hiai hun ah C Hangshing Additional Deputy Commissioner Churachandpur Chief Guest apang in hunkhakna nei hi.
Churachandpur Police te'n tuni'n Lamka khopi sung mun tuamtuam a Zu zuakna dawr leh Zu huanna mun te luh in Zu san leh Zu ngou tamtak mankhia in Lamka Police Station ah Media te mai ah Zu zuak te tawh dingsak uhi. Lamka Police te'n Tuibuang area, Light House area, Zion veng area, Rengkai Super Market, New-Bazar area, Phailian area, Khumujamba Meitei Leikai leh Damkam Bazar area apan zu tamtak mankhia ua, zingchiang in Court ah pawlut ding uhi.
Zomi Re-Unification Organisation (ZRO) a Kenneth Secretary Ministry of Information and Public Relation in October 7, 2012 a P Songlianlal tenna mun a Langol Game Village a thiltung tawh kisai a tuni'a Press Release a bawlna ah, ZRA Cadre te'n P Songlianlal leh a innkuan te thah ding in soisak ding tupna lungsim bangmah neilou ahihdan taklang a, innsung common room a, P Songlianlal tapa leh, amah mimal sepaih mi 8 vel ding in ngamkhat a bohguih ziak ua, ZRA Cadre in mimal kivenna dia thautang a khahna lam a, a zi leh a tapa liamkha zek hidan in thusuahna ah taklang hi. Huaiban ah lemna ding deih a kuan ZRA Cadre te attack a om pen theihsiam huailou leh mohpaih thamching mahmah ahihdan leng taklang hi. Aban a genzelna ah P Songlianlal in tuma deuh in Organisation Coup sawm in panla a, bangzahvei hiam tak a dinmun genchian ding in theihsakna kibawl mahleh limsaklou a, diklouna nei ahihleh Zomi customary dan dungzui a kihouna neih ding in Zomi Civil Society tuamtuam leh Family Council in panla mahleh limsak nuamlou chi hi. A lehlam ah Organistion sung suksiat sawm in nasep sunzom a, mimal a sepaih kibawl in pawlpi dang te bel in pawlpi sung hihsiat sawm a panla te kibukna ding pia in nasem a galvantawi pawl dang te tawh kimuhkhawmna neizel hidan inleng taklang hi. Huaiban ah, a tapa P Nanglamkhenmung Delhi a om inleng pawlpi sung siatna ding in email ID bawltawm ( This email address is being protected from spambots. You need JavaScript enabled to view it. ) kichi zang in thusia thehzak chi'n ngoh a, a Pa'n leng tua bangmah in Pamphlet thehzak chi hi. Huaiban ah, P Songlianlal, hiai bang a gamtatna, Election a vuallelh ziak ahi chi a, hiai tungtang ah pawlpi in mohpuakna bangmah a neikei chi'n leng genbeh a, pawlpi in election tuhding leh tuhlouh ding tungtang ah bangmah gen leh sak a neikei chi'n leng genbeh a, hun paisa a record hoih nei te'n election hun ah mipi support a ngah gige chi hi. Huaiban ah, pawlpi in issue tuamtuam hihvenglouh a om teng leng a nem theitawp a hihfel ut ahihdan gen in, hiai dan a painuamlou a, gamtang teitei om leh bel theihsiam ahikei ding chi'n thusuahna ah taklang hi.
Singngat leh Lamka kikal a masapen ding in October 7, 2012 sunnung dak 2 in T Goukhomang President ZYA general Headquaters in ZYA, S Zezaw Block honna nei in ZYA Zezaw Block 2012-2015 sung vaipaw dia telching thak a om te kichiamsak ngal hi. T Goukhomang President ZYA General Headquaters in a thugenna ah Philantrophic vai ah haksatna tuamtuam mipi theihpihlouh tamtak a om ding a, makai thak te'n hanlung chiam a, headquater tawh kithuzak a kalsuan ding in ngen hi. TK Hang Chief of S Zezaw in a thugenna ah vaipaw thak te'n theihtawp suah a panla, nopni dahni om hun a nambing a nasemlou ding in ngen a, fel ziak a hihkhelh khak pen a bawl dan a nuam a, fellouh ziak a sukkhelh khak pen a bawl dik a haksa chi'n gen hi. ZYA, S Zezaw Block 2012-2015 sung vaipaw dia kichiamna neite ahihleh President L Chinsuankap, Vice-President Lunkhohau, General Secretary Khailamthang, Assistant Secretary Siakminlian, Secretary Finance Ngaisonniang leh Treasurer Kimthianvak te
hi ua, huaiban ah member ding in mi 7 leh advisor ding in khaw hausa 4 guang uhi.
Higher Secondary School Student te'n Scholarship lakna ding in Bank Account hon poimoh a Bank Account honna ding in Student tamtak in haksatna tuak uhi. Hiai thu tawh kisai in Churachandpur District Students Union (CDSU) in SBI, Vijaya Bank leh HDFC thuneitute kimuhpih in student te haksatna genpih uhi. SBI in niteng a Account honna ding form 30 a hawmkhiak gige pen Student te khualna a nikhat ah za 3 hawmkhiak ding in lemsa ua, Vijaya bank leh HDFC bank in sum a tawm theipen bei a student te a ccount honsak ding in lemsa uhi.