* Ginsuanhau MLA leh K Konthoujam Commerce and Industries Minister in Behiang khua a Border Trade Centre munding enkhia.
* VK Tawnna College in One Day Motivation Programme zang ding.
* D Phailian khaw hausa Sholet tung ah YVA Compound Veng in kipah thugen.
* ZYA Singngat in Diesel gu pasal 2 mankhia.
* Special Summary Revision 2013 ding tawh kisai in BLO te'n Training nei.
* DC makaih in District Health Society Governing Body Meeting om ding.
TUN TANCHIN KIMZAW IN :
60 Singngat Assembly Constitueny MLA Ginsuanhau leh K Govindas Konthoujam Commerce and Industries Minister in tuni sun dak 12 in Singngat Sub-Division sung a Behiang khua vapha in Behiang khua a, Border Trade Centre lamna munding va enkhia uhi. Behiang khua ah St. Mary School Student te'n Ginsuanhau leh K Konthoujam Commerce and Industries Minister ana vaidawn in pakkhi oksak ua, Minister leh MLA pu in St.Mary School te Excursion paina ding sing 1 sang 2 pia uhi. Behiang khua Tourist Centre ah Jubilee Mawi Chief of Behiang in ana vaidawn in Minister leh MLA pu puandum silhsak hi. Behiang khua hausa Jubilee Mawi makaih in India leh Myanmar gamgi kihenna Gamgi luitan khe a pai in va enkhia ua, Minister Pu in gamgi kikhenna mun a thugenna ah Govt. apan Behiang Border trade centre ding a proposal om ziak in, behiang khua poimoh mahmah ding suak chi a, Ukhrul leh Chandel ah leng bawl hiding chi a, sum dawng mite ading in phatuam mahmah ding chi hi.Border trade centre lohchinna dia mipi'n kithuahpih ding in ngen hi. Behiang mun ah gam Acre 10 vel a lian poimoh ding a, hiai ding tawh kisai in hausa nu tawh kihouna neih hiding chi hi.
VK Tawna College in zingchiang sunnung dak 1 in college mun ah One Day Motivation Programme zang ding uhi. Hiai hun ah Dr. Ginlianlal Buhril Professor, Human resources and organisation Behavior Director Corporate Government Universal Business School in Student leh Teacher te sinsak ding hi. Hiai Programme ding ziak in zingchiang in 4th period tan lading uhi.
ZYA Singngat in tuni zingkal in khaw sung a leivuhna khawl a kizang Diesel litre 140 gu pasal 2 mankhia in thudotna nei uhi. Guta te ahihleh Lamchinthang (21) S/o Dongkhomang of Singngat Sim Veng leh Paukhanlun (22) S/o (Late) Kaigou of Singngat Sim Veng te hi uhi.
D Phailian hausa Sholet panlakna ziak in Compound veng to Tedim road, K Salbung Compound Veng to Tipaimukh road kikal ah tuni a kipan diesel auto service om ta hi. D Phailian hausa pu panlakna tung ah Luaithang President YVA Compound Veng Unit in mipi sik-le-tan in kipah thugen hi.
Churachandpur District sung a Assembly Constituency 6 a Booth Level Officer (BLO) teng in Special Summary Revision 2013 ding tawh kisai in tuni'n mun tuamtuam ah Training nei uhi. 55-Tipaimukh A/C sung a BLO te'n BRGF hall DC Office ah sunma dak 10 in training nei ua, 56-Thanlon A/C sung a BLO te'n DC Office Conference Hall ah sunma dak 10 mah in neinawn uhi. 57-Henglep A/C sung a BLO te'n
District Training Centre Ground floor ah Training nei ua, 58-Churachandpur A/C sung a BLO te'n NREGS Hall SDO Office ah sunma dak 10 in training nei ua, 59-Saikot A/c sung a BLO te'n a mun kibang mah ah sunnung dak 1 in training neinawn uhi. 60-Singngat A/C sung a BLO te'n District Training Centre Top Floor ah sunma dak 10 in Training neinawn uhi.
Jacintha Lazarus, IAS DC Churachandpur makaih in zingchiang sun dak 12:00 in DC office a BRGF Resource Centre ah District Health Society Governing Body meeting om ding a, huai ah 2011-12 sung a physical achievement tuamtuam te leh finance progress report om ding a, 2012-13 sung tunitan anasep dan genkhawmna leh 2012-13 work plan tel in thu poimawh tuamtuam genkhawm ding uhi.
District Youth Affairs and Sports, Churachandpur saina in October 8 apan October 10, 2012 tandaih ding in Tuibuong Peace Ground, Lamka Indoor Hall leh Lamka Public Ground ah District Level Women Sports Competition om ding hi. Hiai hun ah Churachandpur district sung a numeite a ding in discipline tuamtuam Basketball, Handball, Athletics, Badminton, Table Tennis, Kho-kho, Kabadi leh Volleyball ah kidemna om ding a, hiai kidemnate a vualzohna ngahte October 12 akipan 15, 2012 sung a Khuman Lampak, Imphal a State Level Womens Sports Competition neihna ah, Churachandpur District ai-oh in kuan ding uhi. Hiai ding tawh kisai a lunglutna nei te'n District Youth Affairs and Sports Office, Tuibuong ah Eligibility Certificate leh Official Entry Form laktheih ding hidan in Lunkhosei Haokip District Youth Affairs and Sports Officer Churachandpur apan thutut kingah hi.