* EBC Lamka South Division Kumsim Khawmpi 6veina in 2013 Budget ding in Crore 5 leh Lakh 75 guang.
* GBC Student te'n Tabitha Orphanage Home veh.
* Paite Tribe Council, Central Working Committee in Constitution leh Customary Law tungtang genkhawm.
* Council of Higher Secondary Education Manipur in Lamka a Higher Secondary School a Teacher te Orientation Programme neihpih.
* Hatlhing MDC Phaijol, Jiribam in The 5th Seikam Memorial Open Football Tournament hong.
* Suspension of Operation nuai a om UPF leh KNO in Joint Meeting nei.
* STC/BSF Mualkawi in Olympic Bronze Medalist MC Mary Kom thupitak in vaidawn ding.
* Chief Executive Officer ADCC in 2006 a Appointment mu Primary Teacher 93 te'n mimal tak a kimuhpih ding in theisak.
* DC Churachandpur in Traffic Rule thak bawl.
* NYK Churachandpur leh NYK Kangpokpi saina in District tuamtuam apan mi 50 in 7 Days Adventure Camp nei.
* Centre for Community Initiative in A Nite With Benny Khongsai kichi Musical Event saisawm.
TUN TANCHIN KIMZAW IN :
Zan nitak in EBCC Zion ah Lamka South Divison kumsim khawmpi a 6vei na kipan hi. Zan nitak in Rev. Thawndoulian, Divisional Superintendent, EBC, Lamka South Division in khawmpi hong in "Nungzuihna" chih thupi pansan in Pathian thugen hi. Tuni in vaihawmna neih in om a, huai ah 2013 budget ding in Crore 5 leh lakh 75 guang in pomkip ua, kumnawn khawmpi Ulian ding kiteelna leng neingal uhi. Lamka South Division EBC, Kumsim Khawmpi a 7vei na a khawmpi a Chairman ding in Upa D.Daikhansuan, Vice Chairman ding in Upa N.Tualzalang, Recording Secretary ding in Upa T.Paukhansiam leh Assistant Recording Secretary ding in Upa SK Denga te teelching uhi.
Grace Bible College Student bangbah hiam in tuni'n Tabitha Orphanage Home a om naupang tagah te veh in pathian thu-le-la a kithuah khawm in Pathian kiang ah thumna hun leng zang ua, thil piak leng pia uhi.
Paite Tribe Council, PTC, General Headquater a Central Working Committee, CWC in tuni in PTC Conference hall ah, meeting poimoh tak nei uhi. Meeting hun ah, member paikhawm ten, Constitutional Amendment tawh kisai leh Paite Customary Law tungtang etthak na nei uhi.
Council of Higher Secondary Education, Manipur (CoHSEM) saina in tuni'n Lamka College Multipurpose Hall ah, Churachandpur district sung a Higher Secondary school tuamtuam a teacher te a ding in One day Orientation Programme on Comprehensive Continuation and Evaluation neih in om hi. Hiai hun ah S.Geeta Devi, Chairperson, CoHSEM, Dr. H.Nabachandra Singh, Secretary, CoHSEM, Babudhon Sapancha, Joint Secretary, (Academic) CoHSEM Dr. L.Ramachandra Singh, Retired Reader in Chamistry, DM Coillege of Science leh A. Sukumar Singh Senior Lecturer in sinsak uhi. Hiai hun ah, district sung a higher secondary tuamtuam Bethany Christian College, Bonbosco Higher Secondary School, Ebanezer Academy, Lamka College, Rayburn College, Rengkai Government Higher Secondary School, Sielmat Christian Higher Secondary School, VK Tawna College, Vision Academy leh Young Pillar College apan teacher 120 tel uhi.
Khawlmun Youth Club saina in tuni sunnung dak 2 in Khawlmun playground ah The 5th Seikam Memorial Open football Tournament kipan hi. Hiai hun ah, Hatlhing MDC Phaijol Jiribam in chief guest hihna toh uap in tournament hong a, Paolal Special Contractor in Functional President hihna toh uap in, Letjamang Haokip Assistant Project Officer DRDA Churachandpur in guest of honour hihna toh uap hi. Chief Guest in a thugenna ah, politics leh kimawlna kichi a kibatna mahmah khat om a, Politics leh kimawlna ah hehsa in a hih theihkei chi hi. Tuni a opening ceremony a guest teng in sing 1 chiat pia uhi. Special guest dia chial a om, Tadinang Gangmei Executive member ADC Tamenglong hoh theikei mahleh, sum sang 5 khaak ve ve hi. Tournament honna neih zawh in New-lamka Youth Club leh Ahsijolneng Football Club Exhibition Match kimawl ua, tournament ahihleh October 8, 2012 in kipan ding hi.
Centre Govt. leh Manipur Govt. tawh kitheihsiamna nei a Suspension of Operation nuai a om KNO leh UPF makai te'n tuni'n Lamka khopi sung munkhat ah Joint Meeting nei in maban a panlka dingdan genkhawm uhi.
STC/BSF Churachandpur in October 8, 2012 sunma dak 11 in STC/BSF Mualkawi ah Olympic Bronze Medalist MC Mary Kom vaidawnna thupitak in neihsawm uhi.
Mannuamching, MCS, Chief Executive Officer ADCC in ADC nuai a 2006 kum a appointment mu Primary Teacher 93 te'n October 9, 2012 a amah office a mimal tak a kimuhpih ding in theihsak hi. Huai hun a hohlou te tung ah a kituahpih bang action laak hiding chi hi.
Apaisa October 4, 2012 in Jacintha Lazarus, IAS, Deputy Commissioner, Churachandpur makaih in DC office BRGF Resource centre ah Traffic Rules toh kisai meeting neih in om a thupukna hun khop leng la uhi. Meeting thupuk toh kisai a DC in thusuah abawl kimu dan in, October 17, 2012 apan Police Station apan Nehru Marg kikal ah one way traffic zat hiding a, Imphal a hong kipan gari te Tedim Road ah taisuak ding ua, Imphal lam manoh ding gari peuhmah IB Road ah taitou ding uhi. Huaiban ah Singngat lam a kipan Diesel Auto teng in IB Road tawn in Mission Road ah lutding ua, Town Hall a ki park ding ua, Thangjam Road ah kiik zel ding uhi. Churachandpur College kong a IB Road ah gari suk lut phallouh hidan in taklang hi. Huailou in Zion Street a Bus leh Jeep ki park te leng, Lailam lei kiang ah ki park ding ua, Thangzam road tawn a tai passenger gari peuh mah, Thangzam Road ah khawl phal hilouh ding hi. Teddim Road zul ah heavy, medium leh light vehicle peuhmah in zinglam dak 8 tan leh sunma dak 11 apan sunnung dak 1:00 kikal leh Sunnung dak 4:00 nung in load leh unload hihthei ding uhi. Light House land apan Lailam Lei kikal Teddim Road ah dakkal 1 a Kilometre 20 kaan a haat in tai theihlou ding a, 2 wheeler heektu peuh mah in November 1, 2012 apan helmet khuk ngai ding hi. 2 wheeler ah mi 3 kipuak phal hilou ding a, Lamka leh Imphal kikal a Tata Winger service te, Lanva Lei a Forest Office kiang ah ki park ding ua, Diesel Auto, Chiengkon Bazar a ki park te, Vimala Raina High School kiang ah ki suan ding ua, Teddim Road dung ah 4 wheeler gari te, tum lampang ah ki park ding a, 2 wheeler te suahlam pang ah ki park ding hi. Lampi zuul a gari park peuh mah in parking theihna ding a line-mark kibawl pelh theih louh ding a, Lampi zuul a gari workshop bawl peuh mah in, lampi a black topping heetkha in gari koih theihlouh ding hi. hiai traffic rule thak zuilou te tung ah, section 117 of the Motor Vehicle Act, 1988 dungzui in action laak hiding chiin DC Churachandpur in thusuahna taklang hi.
Apaisa October 1, 2012 in Nehru Yuva Kendra, NYK, Churachandpur leh NYK Kangpokpi saina in MMTA training, Institute, Lamdan, Churachandpur ah 7-days Adventure Camp neih in om hi. Hiai camp ah, district tuamtuam apan mi 50 tel ua, zingchiang in zouding uhi. Huai lou in October 8, 2012 in Lametnamun, Bungmual ah Valedictory Function of 15 Days De-addiction camp om ding hi. Huai hun ah, C.Hangshing, Additional Deputy Commissioner, Churachandpur chief guest in pang ding hi.
Pianken a vualphalou te siamsinna The Malsawm Initiative phungvuhna ding in Centre for Community Initiative in Laizon Digest leh churachandpur Reporters Guild tawh kithuah in October 13, 2012 nitak dak 5 in Bijang Community ah A nite with Benny Khongsai kichi Musical Event nuamtak siasawm uhi. Ticket deih te'n za 1 pia in ngah theih ding hi.