* VK Tawnna College in One Day Motivation Programme zang.
* Rachel N Guite MCS, SDO Singngat in (Late) Khaitinsiak Singphun District 3rd Division League 2012 hong.
* Women Self Help Group Scheme tawh kisai in Monitoring Cum Review Meeting neih in om.
* Government in October 22 akipan November 9, 2012 sung a Village Authority Election neih ding in thusuah bawl.
* Thangzasong Vice-President CDSA tung a khutkha te CDSA in mohpaih.
* Khawlmun Playground ah The 5th Seikam Memorial Open Football Tournament kipan ding.
TUN TANCHIN KIMZAW IN:
VK Tawna College in tuni sunnung dak 1 in college mun ah One Day Motivation Programme nei uhi. Sunnung dak 1 in Motivation Programme nei masa ua, sunnung dak 2 in Teacher te'n Programme zang nawn uhi. Hiai hun ah Dr. Ginlianlal Buhril Professor, Human resources and organisation Behavior Director Corporate Government Universal Business School in sinsak hi.
Churachandpur District Sports Association (CDSA) saina in tun sunnung dak 2:30 in Lamka Public ground ah (Late) Khaitinsiak Singphun District 3rd Division League 2012 kipan hi. A honna hun ah Rachel N Guite MCS SDO Singngat Chief Guest in pang a, aman a thugenna ah khangthak te lampi dik a pisawm a panla CDSA te tung ah kipah thupuang in kimawl mite'n nekzonna thamching thei ding khop a panla ding in ngen a, tua 3rd division sang a kaisang zaw ding inleng deihsak thugen hi. District League sponsor tu Lallunkam Chief of Mata tung ah leng kipah thugen in CDSA kithuahpihna in sum sang 5 pia hi. Opening match ah Headquater veng Youth Organisation leh Chilogate Football Club kimawl uhi. Hiai (Late) Khaitinsiak District 3rd Division League ah Club 68 pool 13 in kikhen ding a, Pool champion Club 13 te 2nd Division ah luttou ding uhi.
Churachandpur District sung a Womens Self Help Group Scheme sepsuahna tawh kisai in tuni sunnung dak 3 in Rengkai Road, Zenhang Lamka a EAC nuai a Relief and Development Department Office ah NABARD makaih in Monitoring Cum Review Meeting nei uhi. Hiai Womens Self Help Group Scheme ahihleh NGO 4, Rural Aid Service, Rural Women Upliftment Society leh EAC nuai Relief and Development Department in enkai ua, tunitan in District sung a Selp help Group 150 val domsang ta uhi.
Government in October 22 akipan November 9, 2012 sung a Village Authority Election neih ding in Notification suah hi. Hiai ding tawh kisai in Sub-divisional Officer te'n amau bial sung a khua om te Election neih hunding bikhiah ding ua, kum 5 sung Village Authority vaipaw ding kitel ding uhi. Khaw sung a inn 20 apan 59 kikal om leh Village Authority Member 5 telthei ding ua, inn 60 akipan 99 om leh member 7, inn 100 akipan 149 om leh member 10, inn 150 apan a tunglam om leh member 12 telthei ding uhi.
Churachandpur District Sports Association in thusuah a bawlna uah, zan nitak in D Phailian a Waiting Shed ah meltheihlouh migilou khenkhat in Thangzasong Vice-President CDSA naktak in vua ua, khangthak te talent pholhsuah sawm a panla sport leader khat haihuaitak a vuak a omna tung ah CDSA nuai a affiliated Club 90 val te sik-le-tang in CDSA in mohpaih thupuang uhi. Huaiban ah hiai thiltung tawh kisai a, District mipi pangkhawm a, migilou te mankhe ding in ngetna bawl ua, hiai bang thiltung khantouh vailou lua ahihdan leng taklang uhi.
Khawlmun Youth Club saina in zingchiang sun dak 12 in Khawlmun Playground ah The 5th Seikam Memorial Open Football Tournament honna om ding hi. Hiai hun ah Hatlhing MDC Phaijol Jiribam, chief guest a pang in Tournament hong ding hi. Functional President in Paolal Special Contractor pang ding a, Special Guest in Tadinang Gangmei Executive member ADC Tamenglong pang ding a, Guest of Honour in Letjamang Haokip Assistant Project Officer DRDA Churachandpur pang ding hi. Tournament honna neihzawh in Exhibition Match ah Ahsijolneng Football Club leh New-lamka Youth Club kimawl ding uhi.
Jacintha Lazarus, IAS DC Churachandpur makaih in tuni sun dak 12:00 in DC office a BRGF Resource Centre ah District Health Society Governing Body meeting om a, huai ah 2011-12 sung a physical achievement tuamtuam te leh finance progress tungtang leh 2012-13 sung a tunitan a nasep dan genkhawmna leh 2012-13 work plan tel in thu poimawh tuamtuam genkhawm uhi.