Block 3 ah 10 Days SSA-RTE/ Teachers Training kipan.

MDC te'n Imphal ah Sit-in-Protest nei.

Common Service Centre tawh kisai in DC makaih in Meeting om ding.

Lamka Auto Owners Association in 35th Annual Meet-Cum-Election neiding.

Ukhrul DC Sudan IAS in Lamka hongpha.

ATSUM General Strike ding CDSU in support puang.

Student Body 5, TKSU, HSA, MZP, KSU leh Zillai General Headquater in NO CDSU, NO ATSUM chi in Joint Press Statement suah.

CDSU Executive lepthak in om a, L Pumkhenchin in President in hihna len.

District Level Quiz Competition om ding.

Lamka block, singngat block leh Henglep block ading in tuni'n 10 days SSA-RTE/ Teachers Training kipan hi. Lamka block in Vimala Raina high school ah training nei in Pauzachin District Intervention Co-ordinator in ahonna nei hi. Singngat block in Singngat community hall ah nei ua, Ginsuanhau MLA in a honna nei hi. Henglep block in Kangvai khua ah nei ua, DT Haokip Deputy Inspector of School Henglep in a honna nei in, Govt. high school, Aided school a teacher teng ban ah, EGS a sem primary leh upper primary teacher teng tel uhi.

Manipur State Govt. in Member of District Council (MDC) te khut a thuneihna atak a pekhelou a, a thu kia a thuneihna a piak ziak a lungkimlou in tuni'n MDC te'n in Kwakeithel Imphal ah sit-in-protest nei uhi. Hiai sit-in-protest ah churachandpur district apan MDC 26 te leng Langkhanpau Guite Chairman ADCC makaih in va tel ua, tuzing dak 10 in bus khat zang in kuan uhi.

Common Service Centre tawh kisai in January 19, 2012 sun 12 in DC Office a BRGf resource centre ah meeting om ding hi. Jacintha Lazarus IAS DC Churachandpur in meeting makaih ding a, SDO teng ban ah MANIREDA, Zoom Developer, Hughes leh MSITS Imphal apan Official te tel in Common Service Centre te chiamtehna ding tawh kisai leh VSATS leh Solar Power Pack Instal dingdan leh common Service Centre te nasep dingdan genkhawm ding uhi.

Lamka Auto Owners Association in zingchiang sunma dak 11:30 in Synod hall IB road ah 35th Annual Meet-Cum-Election neiding uhi.

Sudan IAS DC Ukhrul leh a Zi in tuni'n Lamka hongpha ua, Jacintha Lazarus IAS DC Churachandpur kimuhpih uhi.

All Tribal Students Union Manipur (ATSUM) in Manipur Govt. kiang a demand tuamtuam 8 a neih te sepsuah omlouh ziak in January 18 zankim akipan January 19, 2013 zankim tandaih ding in dakkal 24 sung Manipur pumpi huam in General Strike puang uhi. Churachandpur District Students Union (CDSU) inleng ATSUM General Strike support puang uhi. ATSUM in charter of demand 8 a neihte ahihleh, tunaizek a Junior MCS Officer te promotion paidan etthak ding, Scheduled Trice te adia Manipur State Commission dinkhiak ding, Hill District teng a B.Ed Centre koih ding, Indira Gandhi National Tribal University Regional Campus thu hihveng ding, recruitment leh promotion hun a Scheduled Tribe leh Scheduled Caste te adia reservation kichiantak a om ding, Singtangmite tanvou leh gam-le-leitang kepbit sak ding leh hill district teng a kivaipuakna bawl hoih ding chihte hi'n kigen hi.

Thadou-Kuki Students Union (TKSU) General Headquaters, Hmar Students Association (HSA) General Headquaters, Mizo Zillai Pawl (MZP) General Headquaters Manipur, Zillai General Headquaters leh Komrem Students Union (KSU) General Headquaters in tuni'a Joint Press Statement a suah uh kimu dan in, Churachandpur District students Union (CDSU) sung a parent bodies 9 lak apan a tamzaw parent body 5 in student community leh minautang khualna a, CDSU apan palai a zukkik nung in CDSU om nawnlou tawh kibang chi in, CDSU apan pawtkhia palai te'n President, Vice-President (External leh Internal), General Secretary ban ah Joint Secretary post lenkha chi uhi. CDSU suk hing nawnna ding in CDSU makai masa te tawh Advisory Committee kibawlkhia a, Advisory Committee Chairman ding in Gouzamang leh Secretary ding in Songtinpao kiguang a, CDSU suk hing nawnna ding in tunitan in khawllou in panla lel uh chi in thusuahna ah taklang ua, hiai committee a ki-form leh tua CDSU kichi pen phiat ahihdan chiang huntawk mahmah chi uhi. Aban agenzelna uah, CDSU mah bang in ATSUM leng, a lunglut mi bangzahhiam in ATSUM paidan diktak zuilou a, a bawlkhiak maimai uh ahihdan taklang ua, huchih dungzui in singtangmi student body tuamtuam te adia ATSUM pen apex body kichi theilou ding ahihdan leng thusuahna ah taklang uhi. Huaiban ah, mipi leh akisaipih te theih ding in CDSU leh ATSUM kichi omlou ahihdan leh CDSU kichi in kingakna neinawnlou ahihdan leh CDSU leh ATSUM kichi kitheikhalou a chih ban uah, CDSU leh ATSUM kichi te nasep thil bawl te kitheihpihlou in tl leng ki-telkhalou chi'n student body 5 TKSU, HSA, MZP Zillai leh KSU General Headquaters a President leh Secretary in thusuahna uah suaikai uhi.

Churachandpur District Students Union (CDSU) a Secretary Information and Publicity Department Pumkhanlian Tombing in tuni'a thusuah abawlna ah, CDSU apan parent body khenkhat kizukkhiak nung in, Union sung bawl hoihna ding in theihtawpsuah in pan kila mahleh lohching zoulou in, CDSU Adviser kiang ah buaina hihveng sak ding in ki-ngen a, huchih dungzui in Adviser in zan in CDSU Administrative Office New-Bazar ah meeting sam a, huai ah, Union apan pawtkhia parent body khenkhat te a mohpuakna utawh a kizukkikna uh pomsak in om chi hi. Huaiban ah, post awng teng leng hukdim in om ngal a, amau July 2012 akipan July 2014 tan mohpaw ding ua, hiai ding in zan akipan mohpuakna la in office leng luah ngal uh chi in thusuahna ah taklang a, huaiban ah meeting in CDSU letter head leng khek ding in lem kisa chi hi. CDSU Executive member thak te ahihleh President L Pumkhenchin, Vice-President Th. Thonglunthang, General Secretary Thangkhanlun Samte, Secretary Organisation Kamsuanmung Guite, Finance Secretary P Nengkhosoi leh Secretary Information and Publicity Pumkhanlian Tombing te hi uhi.

District Election Officer Churachandpur saina in zingchiang sunma dak 11 in District Training centre Tuibuang ah "Democracy and Election in India" chih pansan in District Level Quiz Competition om ding hi. Hiai District Level Quiz Competition ah 1st prize 2000, hiding a, 2nd prize 1500 leh 3rd prize 1000 hiding hi.

Chief Engineer Power Department Govt. of Manipur in thusuah abawlna ah Govt. in electric fee bat neite khualna in febuary khatawp tandiah ding in scheme khat bawl a, hiai hunchiam sung a electric fee bat pia peuhmah te electric bill a surecharge 75 percent lak hilou ding a, surecharge 25 percent kia piak theih ding hi.

Churachandpur district sung a kum 2009-2010, 2010-2011 leh 2011-2012 sung a PMEGP beneficiaries teng ban ah 2012-2013 a telkhiak a om thak te ading in zingchiang sunma dak 11 in District Training Centre Tuibuang ah Consultative meeting om ding hi. Huai hun ah, akisaipih PMEGP beneficiaries teng telkim ding in G Hanghal General Manager District Industries Centre in theisak hi.

Hornbill Digitalised ding a Phungzathang Tonsing Health and Family Welfare Minister in, a honna a zawh tawh kiton in digital picture quality deih te'n Hornbill Cable Network ah set top box booking theih in omta hi. Tv remote control sumang te'n leng set top box remote zattheih ding a, a sound leng chiang zaw ding hi. TV lui ziak a channel tampi suak theinawnlou chihte om nawnlou ding hi. Tulel in analog in channel 50 hon kipia a, digital in channel 98 hong kipekhia a, set top box neite'n digital picture quality enthei ngal ding uhi.

GAMDANG THU.

Kum zabi 19 nunga khawvel in a theih khiak pat Antartica continent gam sunga Chi-le, Argentina leh Britain gamte’ kituhna mun ah tuni’n Chile President SEBASTIAN PINERA in Chile flag va phut in research tuamtuam neihna mun ding honna nei hi. Chile in hiai mun pen amau huanbawlna mun chi in gen mah leh kha lui a British solkal in Queen Elizabeth Land chi in chiamtehna bawl ta ua, huai ziak in Argentina leh Britain gamte kikal ah thu hoih lou leng om khin ta hi.

ALGERIA gam LIBYA tawh kilometer 100 vel a kinaihna mun a om Natural Gas factory khat sunga nasem gamdang mi 20 vel helpawlte’n huai mun ah a hentang ban uah midang 2 kaplum uh hi’n kigen hi. Mali gam a Islamist helpawl te tawh kizom MOKH-TAR BEL MOKH-TAR makaih helpawl te gamtatna hi’n thusuak om a, a kigen dan in France gam in Mali gamsung a om Islamist helpawlte a douziak a thuk kikna dan in hichi bang hong piang ahih dan Algerian Interior Minister in gen hi. Algeria sepaih tamtak te’n tulel in hiai factory umkual  uhi.

France sepaih lenna apan bomb khiak maimai tawh Mali gamsung a Islamist helpawlte dou zawh ding ahih louh ziak in huih lam leh Lei lam sepaih kithuah a nasepna tuni in kipan ta uhi. Mali President apan galdoupih dia chial a om France sepaih te’n CHAD gam a om French Military Air Base pansan in Mali gam ah galdouna missile pua Jet fighter leh Helicopter GUNSHIP te tatsat lou in lutsak mah leh uh, dou a om helpawlte a kibuk siam ziak un lenna kia-kia zat a bang mah phatuam lou ding hi’n thusuak in gen hi. Tulel in French sepaih 2,500 sawllut in a om nung CHAD gam in le sepaih 2000 sawllut beh sawm lai hi. Ahuntak in galdou kipan lou hi leh Helpawlte’ khut sungah Mali gam om ta ding hi’n gen a, hiai buaina pen Mali buaina kia hilou in khawvel pumpi huap a democracy deihloute’ dou na ahi chi’n Mali President DIAN-COUN-DA TRAO-RE in sepaihte kiangah gen hi.

Dreamliner 787 lenna suakthak sung a kizang LITHIUM BATTERY in meipeh thei chih ziak in America apan United Airline leh Air India tel Japan Airlines leh Nippon Airways ten bawlhoih ma passenger puak na ding in Boeing 787 zat khawl san phot mah leh Australia apan Qantas Airways leh New Zealand gamte’n Dreamliner lenna tamtak lei thak nuam in order uhi.
Kashmir gamgi thu a India leh Pakistan kikal ah kihuatna sousang mah leh tulel in India in zahngaihna lungsim pu thei deuh ta hi.  Pakistan Foreign Minister Hina Rabbani Khar in thagum a kithat utna sukbei nadia gamnih kal ah Foreign Minter level a kihou ding a utna alem theih ding leh lemsak louh ding India solkal Cabinet in genkhawn neih masak sawm uhi.

United Nations in Palestine gam Statehood apiak nathu ah Israel a lungkimlouh ziak a Novemeber kha a kipan Palestinian te’ tax kaih ding million dollar 1 tak a mattaang sak ziak in Palestine solkal nasemte khalawh tanpha subuai pha mahleh tuni’n SAUDI ARABIA solkal in huai ding taang million dollar 1 mah in Palestine solkal phungvuh uhi.

Afghanistan a Taliban helpawl te dou dia kuan America sepaih khat in helpawl siluang khat zun a thak khum ziak a court in athutan khumna ngai dam di’n ngen mah leh lawhsam suak hi. Hiai thiltung ahih leh kum 2011 a US sepaih khat in kaplup a om Taliban helpawl 3 siluang mai ah zun a thak khum na video mipi muh theih dia upload ahih nunga hichi bang court tan pha ah thu buaihuai tak nei hong suak hi.

Kal paita in Paris a KURDISH Information center ah KURDISTAN WOKER’S PARTY founding member tel in numei 3 meltheih louh ten a thah nung un aluang te uh vui ding in Turkey gam ISTANBUL khawpi ah puak ahih lai un mipi asang asim ten thah in a om na uh mawhpaihna in lamzuihna tawh siluangte vaidawnna nei uhi. Hichi bang lemna palai 3 te thahna ziak leh kua te khut nung hiam chih theih suah hinailou hi’n kigen hi.

Gun Activists pawl in naktak in kalh mah leh President Obama in minautang te’ galvan neih theihna tungtang ah zuih ding order 23 sukkipna in suai kai hi. Huai executive order te lakah sepaihte zat galdouna thau (military style assault weapons) himhim a neisa te simlouh kua mah neih phal hi nawn lou dia, thau magazine sung ah atam pen in tang 10 tan tan thun theih te kia minautang in kem theih ding chih ahi.

Spain gam in kum teng in a lop uh sakol leh meikuang zang a nopbawlna Animal activist pawl in ganhing a dia lauhuai chih ziak in deihkeih mah le uh, tuni’n mitamtak in ganvulh sakol damtheih nading leh vangphat nading in meikuang sangtaktak tawmkaan sak uhi. Hichi bang in a hih ziak un a ganhing damthei chih gintakna liantak  Spain mite tawndan hi hi.

Kum 5 sunga Indonesia gamsung adia vuahzu nasa pen hidia kigen in JAKARTA khawpi sung gari tai dan naktak in subuai a, government office tel in school tamtak khak in om hi.
Tunitan in hiai tuilian ah mi 2 in sihna tuak tua ua sungkuan tamtak mun lemtang zaw ah tuah khiak in om ta uhi.

Jarkhand state government sung a BJP leh JMM party kikal a cabinet seat kituh buaina ziak in re-election tanpha nei ding in a omtaak ziak in Union Cabinet in Jarkhand state sung President’s Rule bulh khum in om ta hi.

* Health and Family Welfare Minister Phungzathang Tonsing in Trinity Centre hong.
* ZEO in Deputy Inspector of School teng Meeting neihpih.
* YPA Diamond Jubilee Celebration Committee leh Sub-Committee teng in Meeting nei.
* Fat James in Imphal Zoo a koih ding in Himalayan Vulture pekhia.
* Health and Family Welfare Minister Phungzathang Tonsing in Hornbills' Digital hong.
* IPPI booth 435 ah naupang 0-5 years Polio damdawi dawnsak hiding.
* RSETI a semding lakna ding in Interview neih in om.
* Vungzagin Valte Parliamentary Secretary in YPA Diamond Jubilee Football Tournament hong ding.

Pearsonmun khua a Hope Foundation Trust India in abawl, damdawi khamtheih leh zu ngolvei te kepna ding Trinity Centre kichi tuni sunma dak 11 in a honna nei uhi. Hiai hun Phungzathang Tonsing Health and Family Welfare, GAD and CADA Minister in chief guest hihna tawh uap in Trinity Centre hong a, Rev. S Vungminthang General Secretary EBC in Pathian kiang ah lan hi. Phungzathang Tonsing Health and Family Welfare Minister in a thugenna ah, talent peuhmah ahiding bangtak a, akizat leh Pathian a vualzawl dia mansa ahihdan gen a, rehabilitation centre te khenkhat in sum dawngna ding in a zang ua, huai ding ahilou ahihdan gen in Rehabilitation centre bawl a hausa omlou ahihdan leng gen in Trinity centre a lohchin theihna dia thumna a phawk chiat ding in mipi paikhawm te ngen hi. Langkhanpau Guite Chairman ADCC in a thugenna ah, Trinity Centre bawl khetu K Paukhansuan pianna pa Songkhotuan leh a zi, ki-itdan gen in, innkuan lohching leh innkuan enghuai mahmah te lak a khat ahihdan gen hi. Hiai hun District Council member saptuam heutu leh mi poimoh tamtak in uap uhi.

Joseph Lalrothang Zonal Education Officer in tuni sunnung dak 1 in amah officer chamber ah block tuamtuam a deputy inspector of school te meeting neihpih in, education system paidan leh thu poimoh tuamtuam genkhawm uhi.

Young Paite Association Diamond Jubilee Celebration Committee chairman H Mangchinkhup makaih in tuni sunnung dak 1 in YPA General Headquaters Office Hiangtam Lamka ah Celebration Committee leh Sub-Committee teng in meeting nei in, March 3, 2013 a YPA Diamond Jubilee lopna ding tawh kisai a tunitan a sepsuah te kikumkhawm in maban a panlak dingdan genkhawm uhi.

Tedim road a Fat James in Himalayan Vulture (Mulukolh) liantak a khoilai Forest department te khut ah tuni sunnung dak 2 in pekhia hi. Fat James in Himalayan Vulture liantak H Dalzamang Divisional Forest Officer khut ah pekhia a, Divisional Forest Officer in Imphal Zoo a koih ding in pekhe ngal in Zoo thuneitu te'n Imphal ah pawsuak uhi. Fat James in agendan in Senvon gam a, midang in a mat, aman december kha a sum tamtak a, a leisawn hidan in gen a, sel 8 leh a kim vel in gik a, nikhat in bawng sa leh aksa sel 4 vel negai gige chi hi.

Telecommunication Regularity Authority of India (TRAI) order dungzui a India gamsung pumpi a Cable Operator tengteng kum 2014 tan a digitalized vek ding a thusuah a bawl dungzui un, Manipur a masa pen ding in Hornbill Cable Network in, digital picture quality piakna ding in tuni sunnung dak 3 in Hornbill Complex Mission road Hiangtam lamka ah, Hornbill Goes Digital launching and Inauguration Ceremony zang uhi. Hiai hun Phungzathang Tonsing Health and Family Welfare, GAD and CADA Minister in chief guest hihna tawh uap in Hornbill's Digital hong a, Rev. L Khamkholun Director of Missions EBC in Pathian kiang ah lan hi. Phungzathang Tonsing Health and Family Welfare Minister in a thugenna ah, Honrbill Cable network neitu Mangpu Tonsing leh a Zi kituah dan leh nekzonna khat peuh a kituahna a poimoh dan gen in, Honrbill Cable Network ziak a, missionary bangzahhiam leh naupang tagah te'n hamphatpih ahihdan gen hi. Huaiban ah, Hornbill in Digital picture quality a piakkhiak theihna tung ah kipah thugen in maban ah leng tua sang a thupizaw a sepsuah deihsak thugen hi. Hiai hun Kamsuanlun Executive member ADCC, L Mangkhogin Haokip IPS, SP Churachandpur, Grace Zamnu MDC Muallum, C Hangshing Additional Deputy Commissioner Churachandpur, Thangkhosuanmung Chief of Hiangtam lamka leh mi poimoh hunkhop in uap uhi.

Dr. Vumchinpau Tonsing District Famility Welfare Officer in thusuah a bawlna ah, January 20-22, 2013 sung a Intensive Pulse Immunization (IPPI) zinglam dak 6 akipan IPPI booth 435 a neih na ding ah, nu-le-pa peuhmah in naupang piangtung akipan kum 5 tan polio damdawi dawnsak ding in theisak hi. Hiai ding tawh kisai a, medical leh para medical staff teng mahni posting na mun a om chiat ding in

Tuni sun dak 12 in DC Office ah RSETI a semding lakna ding in personal interview neih in om a, huai ah candidate 7 tel uhi.

YPA Lamka Block saina in January 19, 2013 sunnung dak 12:30 in lamka public ground ah YPA Diamond Jubilee Football Tournament honna om ding hi. Huai hun ah Vungzagin Valte MLA and Parliamentary Secretary, chief guest apang in tournament hong ding hi. Opening match ah YPA Vengnuam B Unit leh YPA Hiangtam Lamka B Unit kimawl ding uhi. Tournament sung in football ah team 21 kimawl ding ua, volley ah numei team 8 leh pasal team 8 kimawl ding uhi.

GAMDANG THU.

Kashmir a India sepaih khat Pakistan sepaihte’n a ngawng tan ziak a BJP in ruling Congress party ahawm thawhna thu ah zanitak in Prime Minister Dr. Manmohan Singh in opposition makai ARUN JAITLEY leh SUSHMA SWARAJ te houpih in, hiai thusia ziak a ei leh ei kikal ah kimelmakna piangsak lou ding in ngen a, huai nung in National Security Advisor leh BJP kikal ah kihouna le om hi.

Tuni’n New Delhi khawpi ah 65th Army Day thupitak in zat in om hi. Hiai hun ah Indian Army Chief BIKRAM SINGH in galdouna a sihna tuak sepaih galhangte leh sepaih sung a pahtak tham tak a gam a dia nasemte’ tung ah medal tuamtuam piakkhiakna nei hi.

Tulai in China gamsung adiak in Beijing khawpi ah mihing diik ding huihsiang a tawm ziak in awm natna leh huih diik haksatna tel in cancer natna vei kintak in pung uh hi’n kigen a, hiai bang natna adiak in naupang te’n thuak lel uh hi’n leng kigen behlap hi. Khawvel a niteng a suangmeihol kizang khe zah laka a kimkhat mahmah China gam ah zat in a om ziak mah in huih siang kiam mahmah ahih dan China mipi ten gen uhi.

America gamsung ah solkal in Russia naupang himhim kuaman adopt louh ding chi a dan akhun thak uh mawhpaihna in Moscow khawpi ah Pathianni in mitamtak in lamzuihna nei uhi.

Bolivia solkal in gamsung ah COCOA plantation phalsakna abawl ziak Bolivia mipite’n sepatni in gamsung mun tuamtuam ah lopna bawl uhi. Hiai Cocoa chiing thei dia Bolivia in phalna pe mah leh aleh lam ah America tel in Europe gam khenkhat in bel lemsak pih lou uhi.

Mali gam a Islamist helpawl te douna dia France in pan a lakna UN security council in gup thu puang khia hi. Hiai buaina ah panpihtu di’n British sepaihte tun beh ua, huai lou in Africa gamte apan in sepaih tamsem lut beh lai ding hi’n kigen hi.