Ngakik leh Telsing Bazar kikal ah Shaktiman Truck Accident in mi 8 liam.

Siamsinpawlpi Joint Headquaters Golden Jubilee Football Tournament zawhsiang hita.

STC/BSF in thau-le-bobm kapna sunzom ding.

Siamsinpawlpi 66th Foundation Day-Cum-Siamsin Meritorious Award hawmna om ding.

Sangga Muon Inn ah 30th Shodhyatra (Journey of Exploration) honna neih in om.

Thanlon bialtu MLA Vungzagin Valte Parliamentary Secretary in Education System puahphat sawm.

Henglep akipan National Highway 150 tawn a hongtai, sing leh passenger bangzahhiam pua Shaktiman Truck zan nitak dak 9:30 in Ngakik leh Telsing bazar kikal ah accident in lamkhang ah lengkhia hi. Truck driver in lamkawina a hekkawi zoulou a lamkhang a taikhia hidan in kigen hi. Tuahsiatna Truck sung a tuang mi 8 liam uhi. Amau te Nemkhochong (27) D/o Sutneh of Vongmual, Lalminlien (17) S/o janglam of Thenjang, Vahkholhing (60) W/o Hemthang of Henglep, Dongzahat (48) W/o Thenmang of Henglep, Pauminlien (30) S/o Letkhohao of Mongbung Jiribam, Hoihching (15) of Pengjang leh Nehjang (34) of Jiribam te hi ua, amau te lak ah Vahkholhing (60) W/o Hemthang of Henglep, a serious deuh ziak in tuni'n Imphal ah refer in om hi.

Tuni sunnung dak 1 in Lamka public ground ah Siamsinpawlpi Joint Headquaters Golden Jubilee Football Tournament closing ceremony neih in om hi. Hiai hun Langkhanpau Guite Chairman ADCc in chief guest hihna tawh uap hi. final match ah Siamsinpawlpi New-lamka (B) leh Siamsinpawlpi Hiangtam lamka kimawl uhi.

Subsidiary Training Centre STC/BSF in Mission compound suahlam leh pearsonmun, mualkawi leh gangpimual simtum kikal ah January 15 akipan 31, 2013 sung in zinglam dak 5 akipan zannung tanpha in thau leh bomb kapna sunzom nawn ding uhi. Kim-le-kiang a omte pilvang a ganvulh te khahzanlou ding in theihsakna bawl uhi.

Siamsinpawlpi General Headquaters in zingchiang sunnung dak 1 in YPA hall New-Lamka ah Siamsinpawlpi 66th Foundation Cum Siamsin Meritorious Award hawmna neih sawm uhi. Huai hun ah Phungzathang Tonsing Health and Family Welfare, GAD and CADA Minister, Vungzagin Valte Parliamentary Secretary, Rev. S Vungminthang General Secretary EBC leh M Jamchinthang Chairman Standing Committee Siamsinpawlpi General Headquaters in thugenna hunzang ding ua, Siamsin Meritorious, Donors leh Honour Award tuamtuam 32 hawmkhe ding uhi. Huaiban ah Siamsinpawlpi Life Member thak mi 9 te kiang ah Certificate pekhe ding uhi.

National Innovation Foundation (NIF), Society for Promotion of Tribal Welfare and Development leh Kuki Innpi Manipur kithuahpihna nuai a Society for Research and Initiatives for Sustainable Technologies and Institution (SRISTI) saina in tunitak dak 5 in Sangga Muon Inn Bijang ah 30th Shodhyatra (Journey of Exploration) kichi honna om hi. Hiai hun ah Langkhanpau Guite Chairman ADCC, Chief guest apang in Journey of Exploration honna nei a, guest of Honour in L Mangkhogin Haokip IPS, SP Churachandpur pang ding a, Functional President in Atong Haokip President Kuki Innpi Churachandpur pang in, Prof. Anil K Gupta President SRISTI and Vice Chairperson NIF in Journey of Exploration paiding dan taklang hi. Hiai 30th Shodhyatra (Journey of Exploration) honna neih zawh in zingchiang zinglam dak 8 in Sangga Muon Inn akipan foreigner 6 tel in mi 70 vel in khe a pai in singtang khua tuamtuam zuan ding uhi. January 13 in Hengkot khua ah giak ding ua, huai akipan kipahkhe nawn in Janury 14 in Tuilaphai khua ah giaklut nawn ding uhi. Huai akipan January 15 in P Sejol ah giak nawn ding ua, Janury 16 in Tuilumzang ah giak in Janury 17 in kikhen ding uhi. Hiai 30th Shodhyatra (Journey of Exploration) kichi Manipur a, kizat patna ding hidan in kigen hi. North-East ah Assam, Meghalaya leh Manipur ah kizang ding hi.

Thanlon bialtu MLA Vungzagin Valte Parliamentary Secretary in Thanlon bial sung a education system puahphat sawm in zingchiang zinglam dak 7:30 in amah tenna inn New-Lamka Chimtung Veng ah Meeting neiding hi. Huai hun ah, Joseph Lalrothang Zonal Education Officer, Thanlon Deputy Inspector of School leh Assistant Inspector of School ban ah Staff te leh Thanlon bial sung a Govt. School Headmaster, School Development Committee member leh Khaw Hausa te telding ua, 2013 Academic Session kipatma a education system puahphat dingdan genkhawm ding uhi.

Telecomunication and Regulatory Authority Govt. of India in India gamsung pumpi a Cable Operator teng kum 2014 tan a digitization vek ding a order a suah dungzui in Hornbill Cable Network inleng Cable signal teng digital quality in piakkhiak sawm in panla a, tun etkhiakna pailel hi. Picture quality kikhe mahmah in, stereo sound hizawmah hi. Digital picture quality ennuam te'n set top box thuah ngai ding a, set top box deih te'n booking masak ngai ding hi. Set top box booking masa te piak masak hiding a, booking masa lou in leitheihlouh ding a bazar ah leng kizuaklou ding hi. Tulel inleng digital signal etkhiakna in signal kipeta a, ettheihna ding in set top box neih masak poimoh hi. Hornbill Cable Network Mission road Hiangtam Lamka ah set top box booking theih ding a, thuchian kimzaw leh a dinmun chiangzaw theinuam te'n kanchet theih ding a, picture quality ennuam te'n leng ettheih ding hi. Set top box ah channel 100 apan a tunglam kipekhe ding hi.

GAMDANG THU.

India gamsung a numei tunga tatsiatna in venlam nawt tuan lou hi. Haryana state sung SONEPAT khua ah pawl 10 sinlai nungaknou khat sual in a om nung a kingaihsiat luat ziak in kerosene zangin kihal lum hi. A nu’ gendan in school apan pasal khat in zuauthu a khemkhia in kuamah theihphak louhna mun ah numeinu’ utna tellou in sual chi hi.
Uttar Pradesh sung a MEERUT khua ah Engineer khat in tapa aneihlouhna thu ah thangpaih luat ziak in atanu kum 23 a upa gawlmek lum hi’n kigen hi. Police in hiai thu ah case chiamteh in engineer pa leng man ngal uhi.Tua bangkal ah, Pune khawpi sunga om shopping mall khat apan nungak kum 18 a upa khat migilou te’n thagum zang in pimang ua, dakkal 48 sung kizuakna inn ah akhum nung un, apumpi tung ah vuak leh zepna ma bangzah hiam tawh hutkhiak in om thei hi. Hiai bang vangtahna tuak numeinu’n police kiangah hekna bawlmah leh AHMEDA-NAGAR police te’n limsak utlou in ana zep thuah zawsop ua, tu in TOFKHANA police in hiai thubuai chiamteh in thil omdan suizui lel hi’n kigen hi.

India khawpite bit nawnlou chih ziakin West Bengal University of Technology a semte’ ngaihtuahna tawh Kolkata khawpi sungah Satellite panpihna zangin camera mun kilchih ah koih in omta hi. Hiai camera te khawpi sung enchetna dia phattuam mahmah ding ahih dan Kolkata police apan kiza hi.

Delhi khawpi ah Numeite adia bitzawkna ding khual na in Police in zan apan PINK AUTORICKSHAW service omsak nawn ta uhi. Hiai auto ah numei kia tuanphal dia kibawl ahih ban ah, PANIC BUTTON leh GPS te leng thuah in omta hi.

Africa continent sung MALI gam ah Islamist helpawl hattak dou na di’n France solkal in MALI gam ah sepaih tamtak sawllut ua, Mali sepaih tawh kituah in helte naktak in doukhawm uhi. Nigeria tel in Africa gamtuamtuam apan in Mali solkal galdouna panpih ding in sepaih tamtak kisakhol lellel ua, Mali solkal sepaih tengkia in a dou zawh louh uh Islamist helpawlte France sepaih thahatna zang in helpawlte’ beihna in masawn mahmah hi’n thusuak in gen hi.

Afghanistan apan America sepaih tuahkhiak ding genkhawmna ah US in ahih leh Afghanistan ah galdouna tawpsan mah leh, Taliban leh Al Queda te ziaka Afghan solkal apuk siat nawn louhna di’n a kisam hunhun a panpihna pe din America sepaih siing nih leh sang nga (25,000) Afghanistan ah taam lai ding hi’n President Obama in gen hi.

Tuzing lam in South West China ah menchim ziak in mihing 40 bang om na theih louh in lei nuai ah vukkhak in om ua, China army leh hutkhiak nasem pawl in khaw vot mahmah nuai ah menchim in a vuhkhak inn leh van tel in siluang tamtak zonna nei lel uhi.

Tuahsiatna tun thei dia ginlelhna neuhneuh omte’ ziak in US thuneite’ apan Lenna Boeing 787 kibawl dan etphat thak ding thupiak om mah leh American aviation authority (F.A.A.) in bel hiai DREAM-LINER lenna Beoing 787 a kibawldan leh design ah bangmah hih khelh omlou hi’n gen uhi.