HORNBILL News 22nd December, 2012

* Phungzathang Tonsing Health and Family Welfare, GAD and CADA Minister in Meithai 468 te kiang ah Langva pekhia.
* Pearsonmun khaw sattu aphamsa T Thangkhai Suangphuh honna neih in om.
* Pearsonmun Vengsak ah Luanzakham tenna inn mei in kangtum.
* Christmas ding kuan in Kum dang sang in Khawpi sung ah mi tawmzaw.
* Churachandpur Police te'n Advent Christmas zang.
* Nehru Marg a Kim Joe Gas Agency huangsung a Lianhmingthang tenna inn mei in kang.
* M Songgel ECA Mission and Evangelist Board in Orphanage Home 6 veh in Christmas present pia.
* Lam-etna mun a om Inmates leh a pawtsa te lak a, a hoihlai teng in Christmas Carol neiding.
* Langkhanpau Guite Chairman ADCC leh a innkuan te'n Churachandpur mipi leh Zo-Suan teng Christmas leh Kumthak Chibai buk in Wish bawl.

TUN TANCHIN KIMZAW IN.

Phungzathang Tonsing Health and Family Welfare, GAD and CADA Minister in A zi aphamta Pi Chhungi lungtup sepsuahna ding in tuni sun dak 12 in amah tenna inn New-lamka Hebron Veng ah, Pi Chhungi Widow Welfare Scheme chih minvuah in meithai 468 te kiang ah langva bundle 5 zel in pekhia hi. Langva te piakkhiak ahihma in Rev. L Khamkholun Director of Missions EBC in Pathian ah lan hi. Minister Pu in a thugenn ah, Pi Chhungi in a damlai in meithai te panpih theihna ding lampi ngaituah gige a, himahleh a lemtang om theilou chi a, tutung in amah om nawn kei mahleh, meithai te kipaktak a sangsak ding in ngen hi. Tutung in meithai te lak a leng a haksa deuh teng kipe masa chi a, tutung a tangkhalou te khase mailou a, ngak hamham ding in ngen hi. Aban a genna ah, Govt. apan fund bangmah omlou in development work bangmah kisem theilou a, tutung a langva kihawmkhe te leng Govt. apan hongpai hilou a, meithai te khualna ziak a, bank loan lazen a, a leikhiak hidan in
 gen hi. Huaiban ah district sung kivaipuakna zangkhai zawkna ding in Lamka South TD Block leh Lanva TD block kihon beh ding a, tun a Block Office munding ki-enlel chi hi. Hiai hun ah, Minister Pu leh a tanu Lulun ban ah Kamsuanlun Executive member ADCC, H Mangchinkhup Executive member ADCC, M Gouzamang Guite Executive member ADCC leh Zodingliana MDC in meithai 468 te kiang ah lanva pekhia uhi. Langva kihawmkhiak dan ahihleh Bolzang ah inn 81, Buallian ah 3, Bungmual ah 27, Chiengkonpang ah 6, D Leikot ah 2, Gelzang ah 4, Headquater Veng ah 11, Hengkot ah 5, Hiangtam Lamka ah 37, Hill Town ah 25, Kawnpui ah 9, Lamzang ah 5, Lanva leh Pangzawl ah 8, Lingsiphai ah 6, Mata ah 9, Mata Mualtam ah 6, Mission Compound ah 2, New-lamka ah 172, Ngathal ah 4, Pearsonmun ah 10, Rengkai ah 14, T Bolzang ah 10, Tangmual ah 7 leh Thingkangphai ah 5 hidan in kigen hi.

Pearsonmun khaw sattu aphamsa T Thangkhai Suangphuh honna tuni sunnung dak 1:30 in Pearsonmun khaw hausa pa tenna inn ah nei uhi. Hiai hun ah Upa Phungzathang Tonsing Health and Family Welfare, GAD and CADA Minister in (Late) T Thangkhai theihgigena dia kibawl suangphuh umna gate hong in, Rev. Dr. Hs. Chinsuanthang Local Pastor EBCC Pearsonmun in suangphuh hong in Pathian kiang ah lan hi. Hiai hun khaw hausa leh mi poimoh tamtak in uap in nitaklam in annekhawm uhi.

Tuni sunma dak 11 vel in Pearsonmun vengsak ah Luanzakham (46) te'n inn mei in kangtum hi. Luanzakham zi Ningngaihlian in agendan in tuzingkal in mei leng kitohlou in, mun dang ah zing anne in kikuan chi a, veng sung a misi gal a kuan kal a, a tenna inn kangtum hidan in gen a, innkang ahihleh Nepali bawng ching te'n mu in khaw sung mite hilhsawn ua, khaw sung mite'n inn nei nu Ningngaihlian hilhsawn uh hidan in kigen hi. Innsung van tuamtuam singlem, lupna um-le-bel, zan puan bangmah lakkhiak man omlou in kangtum sipsip hi. Luanzakham leh a zi Ningngaihlian in ta 2 nei in khawsak haksatak in niteng a kiloh tawm in nekzong uhi.
A tenna inn uh, a tuang gawpek, a baang maupek leh a tung bii hidan in kigen a, khaw sung mipi'n a theih in kangtum man a, fire service te'n leng delh manlou uhi.

Tutung Christmas ding kuan in khawpi sung ah van leiding mitam bang mahleh kumdang sang a tawmzaw ding in kilang hi. Christmas hunding ni 2 lel in samta a, tunitan inleng kumdang tawh teh in Khawpi sung in mitam nailou hi. New-Bazar leh Zenhang Bazar lak ah van leiding mi tamsim bangmah leh Tedim road zul ah bel mitam lawmlawm lou hi.

Churachandpur Police te'n tuni sun dak 12 in Lamka Police Station ah Advent Christmas zang uhi. Hiai hun ah Chief Guest in L Mangkhogin IPS, SP Churachandpur, pang a, Guest of Honour in David Piaklian SDPO Churachandpur pang a, Functional President in W Nongyai SDPO Thanlon pang a, hiai hun ah Inspector Elvy Tunglut OC lamka Police Station in vaidawnna thugen in Pastor Nengzatun in Christmas message gen a, Police personnel leh a innkuan te uh tel in nitaklam in annekhawm uhi.

Tunitak dak 4:30 vel in Nehru Marg a Kim Joe Gas Agency huangsung a Lianhmingthang tenna inn mei in kang a, meikang annhuan buk a hong kipan hidan in kigen a, gas cylinder 3 puakzak in, a liam pawl leng om hidan in kigen hi. veng sung mipi leh a kim-a-kiang a theikha te'n kidelh huan in panla mahle uh, meikuang a hat mahmah ziak in phelhmit zawh hilou a, fire service te hongtung nung in meikuang phelhmit theih in om pan hi. Innsung vanzat tamtak kangtum ding in kigen a, innkang delh te lak ah Phungzathang Tonsing Health and Family Welfare Minister, Zodingliana MDC leh G Thangkhosuanmung Chief of Hiangtam Lamka te leng tel uhi.

M Songgel ECA nuai a Mission and Evangelist Board in tuni'n District sung a naupang tagah kepna Orphanage Home tuamtuam Sanggamuon inn, Tabitha Home, Grace Home, Motherless Home, ABC Home leh Mongjang Home veh in Christmas present in anntang pia uhi.

LRRC Lam-etna mun a om inmates leh a pawtsa te lak a tunitan a hoihlai te'n zingchiang nitak in without drugs and alcohol chih pansan in Christmas Carol neiding uhi. Kuapeuh mah in ngaihnatna sulang a, kithuahpih ding in ngetna bawl uhi.

Langkhanpau Guite Chairman ADCC leh a innkuan te'n Churachandpur District mipite leh khuavannuai a Zo-suan te Christmas leh kumthak chibai buk in message khak uhi. Message in agendan in Christmas in khalam, salam leh lungsim lam ah, navakna leh damna hontun henla, Kumthak in lemna, kipahna, khantouhna leh khamuanna, nang leh na innkuan te ading in Zingni nou hon suahpih hen chi in lungsim tawng deng in deihsak thukhak uhi.

Young Paite Association Diamond Jubilee lopna ding tawh kisai in pasal te a ding in football tournament om ding a, numei leh pasal ading in volley ball tournament om ding hi. A telnuam YPA Unit, Block leh Joint Headquaters te'n December 31, 2012 tan in Bungtui Plazza Bungmual Auto Parking, Kimboi Pan Shop, New-lamka leh Vungi Enterprise Tedim Road ah entry form muhtheih ding hi. Football ading in entry fee 500 hiding a, Vollye ball ading in 300 hiding hi. YPA Unit, Block leh Joint Headquater apan team a tam theilam teltheih ding a, a tel teng YPA member ahih ngai ding in kigen hi.

GAMDANG THU.

Central America gam tuamtuam MEXICO, GUATEMALA, BELIZE, EL SALVADOR leh HONDURAS gamte apat official tel in mitamtak in  zanitak in COPAN khawpi ah BAKTUN kichi MAYAN calendar kum 5125 sung vingveng zat ahih nung in a beina lopna leh Kumthak dawnna in kikhopna nei uhi. Hiai hun North America leh South America continent kikal a gam tuamtuam omte’ adia nipoimawh leh khangthu chiamtehna ni leng hihi.

Kumthak 2013 apat in FISCAL CLIFF chih a om TAX sukpunna leh solkal sumsen sukkiakna in America gam leh mipite a sukbuai louhna di’n President Obama in Congress party te’n panla di’n nawhna bawl hi.Fiscal cliff ah awkkhak hileh bel, sangtak in TAX sukpung in om dia, hiai kia hilou in gamsung sum manphatna naktak in a kiak ding banah mihing million 2 val bang in sepna taanlawh ding ua, GDP leng HALF PERCENT in kesuk lai ding hi thusuak in gen hi.

EUROPE gam phalbi khawvot dan ani ni in uang deuhdeuh a, ROMANIA, BULGARIA, RUSSIA tel in UKRAINE gamte ah khawvot thuaklah ziaka sihna tuak punbeh hi’n kigen hi. Ziltawpni in le UKRAINE ah mi 83 phalbi khawvot dou lou in si uhi.

Egypt ah Constitution thak deih leh deih louh vote khiak anih veina leh atawpna tuni’n neih in om hi. Tuni tan in solkal gumpawl leh kiphin pawlte kal ah kihuatna nasa mahmah a, zanitak in ALEXENRIA MOSQUE kiim ah leng mipi kihon sual nawn uhi.

School naupang tamtak kaplup ahi nung nipikal khat a chin ni’n America gamsung ah phamsa te suunna hunzat in om hi. Huchi bang kal ah NATIONAL RIFLE ASSOCIATION pawl in mimal a thau kep phal nawn louh ding thu naktak in kalh ua, hiamgamna sukbeina ding Galvan mah zat poimawh ahih dan gen ua, galvan tawi migilou khat hepkhiak nadin’n galvan mah atawi mihoih a om ngai zaw ahi chi’n NRA kimuh khawmna hun ah gen uhi.

United States Secretary of State thak di’n President Obama in JOHN KERRY guanna nei hi. JOHN KERRY in ahih leh kum thak apan HILLARY CLINTON khengkhe ding hi.

Zanin SOUTH SUDAN ah UN PEACE KEEPING FORCE te zat helicopter khat SUDANESE ARMY te’n kapkhia ua, helicopter sung a tuang RUSSIAN PILOT 4 te sivek uhi. Hiai thu ziak in UN member nunung pen ahilel SOUTH SUDAN gamtatna tungah UN SECRETARY GENERAL BAN KI MOON in santak mawhpaihna gen khum hi. Kapkhiak a om HELICOPTER tungah muhtheih dia ‘UN’ chih kigelh pen muh gegu nunga kapkhiak teitei in a om ziak a Secretary General suthangpai diak hi’n kigen hi.

Argentina capital BUENOS AIRES ah gamsung OPPOSITION party tawsawn a vanzuakna dawr liantaktak luhtu guta 200 Argentina police in tuni’n man uhi. Argentina gamsung a nasem kilawhtawm a nekzongte’ nitha khansak ahih louh ziak leh vanman naktaka khansak in a om ziak a solkal douna dia hichi banga gamta uh hi’n kigen hi.Tuabang kal ah United Kingdom in Antarctica vuuk gamsung a munliantak khat mindia QUEEN ELIZABETH apiak naziak uh hilhchian di’n Argentina solkal in UK ambassador sam uhi.

Zanhal in British Prime Minister DAVID CAMEROON in Christmas Chibai buk kawm in AFGHANISTAN a om British sepaihte kiang vapha hi. David in kum 11 sung galphual a om sepaih galhangte’ nasep gamkhat in gamdang khat tung ah a sepkhiak zah hun sa mahmah ahih dan agen kawn in kumnawn 2013 sung ngeingei a Afghnistan apan British sepaih 4,000 lakkik ding hi’n gen hi.

Tuni’n Delhi khawpi sung RAJPAT, RAISINA HILL, RASHTRAPATI BHAWAN tel in mun tuamtuam ah mipi in GAMSUNG AH NUMEITE BITNA ding ngetna in tuni zing lam dak 9 apan lamzuihna nei uhi. Hiai hun ah school naupang leh tuailai tel in police tawh kibeih tuahna tamtak om a, Police in akhengval a gamtang mi bangzah hiam leng mat nei hi’n thusuak in gen hi. A kigen dan in internet website leh networking group ‘i-PROTEST’ leh ‘LET’S UNITE AND FIGHT BACK’ chihte apan Delhi khawpi sung ah mitamtak kithutuakna banga hiai kiphinna hong kipan hi’n leng kigen hi.

Post : David R.Tonsing