HORNBILL News 10th January, 2013
* District Level Review Committee and District Consultative Committee in Meeting nei.
* ZEO in teacher te posting na mun a om chiat a Student Enrolment Drive bawl ding in theisak.
* Siamsinpawlpi General Headquaters in 66th Foundation Day Cum Siamsin Meritorious Award hawmna neiding.
* Langkhanpau Guite Chairman ADCC in 30th Shodhyatra (Journey of Exploration) hong ding.
* Chief Secretary makaih in Medical Officer te'n meeting nei.

Jacintha Lazarus IAS DC Churachandpur makaih in tuni sunma dak 11:30 in DC Office a BRGF resource centre ah, District Level Review Committee and District Consultative Committee Meeting for Quater Ended September 2012 neih in om hi. Hiai hun ah District sung a Bank manager teng ban ah District Social Welfare Officer tel in, CD ratio enthak ua, DCP 2012-2013 nuai a sepsuah te genkhawm in 2013 a SGSY leh Education loan target ding tungtang leh Social Benefit Scheme tuamtuam te Bank account tungtawn a piakkhiak theihna dia bank account hon ding thu leh Siamgan te adia Credit Card Scheme sepsuahna tawh kisai ban ah RSETI dinmun genkhawm ua, RSETI a semding lakna ding in January 15, 2013 a Interview neih ding in lemsa uhi.
Manipur Education Minister M Okendro Singh makaih in January 8, 2013 sunnung dak 2 in Imphal a Education Minister Office Chamber ah Meeting poimohtak om a, huai ah, Chaltonlien Amo Chairman Hill Area Committee, Vungzagin Valte Parliamentary Secretary, Joseph Lalrothang Zonal Education Officer leh Deputy Inspector of School khenkhat tel uhi. Huai a thupukna dungzui in Right to Education (RTE) sepsuahna dia January 15, 2013 mangei a Govt. leh Govt. Aided School a teacher teng mahni posting na mun a om chiat a, student tamsem Govt. School a kaitheihna dia Student Enrolment Drive bawl ding in Joseph lalrothang Zonal Education Officer in gen a, mahni posting na mun a omlou te teacher te khauhtak a etzui hiding in thusuah hi.
Siamsinpawlpi General Headquaters in January 13, 2013 sunnung dak 1 in YPA hall New-Lamka ah Siamsinpawlpi 66th Foundation Cum Siamsin Meritorious Award hawmna neih sawm uhi. Huai hun ah Phungzathang Tonsing Health and Family Welfare, GAD and CADA Minister, Vungzagin Valte Parliamentary Secretary, Rev. S Vungminthang General Secretary EBC leh M Jamchinthang Chairman Standing Committee Siamsinpawlpi General Headquaters in thugenna hunzang ding ua, Siamsin Meritorious, Donors leh Honour Award tuamtuam 32 hawmkhe ding uhi. Huaiban ah Siamsinpawlpi Life Member thak mi 9 te kiang ah Certificate pekhe ding uhi.
National Innovation Foundation (NIF), Society for Promotion of Tribal Welfare and Development leh Kuki Innpi Manipur kithuahpihna nuai a Society for Research and Initiatives for Sustainable Technologies and Institution (SRISTI) saina in January 12, 2013 nitak dak 5 in Sangga Muon Inn Bijang ah 30th Shodhyatra (Journey of Exploration) kichi honna om ding hi. Huai hun ah Langkhanpau Guite Chairman ADCC, Chief guest apang in Journey of Exploration hong ding hi. Guest of Honour in L Mangkhogin Haokip IPS, SP Churachandpur pang ding a, Functional President in Atong Haokip President Kuki Innpi Churachandpur pang ding hi. Huai hun ah Prof. Anil K Gupta President SRISTI and Vice Chairperson NIF in Journey of Exploration paiding dan taklang ding hi. Hiai 30th Shodhyatra (Journey of Exploration) honna neih zawh in January 13, 2013 zinglam dak 8 in Sangga Muon Inn akipan foreigner 6 tel in mi 70 vel in khe a pai in singtang khua tuamtuam zuan ding uhi. January 13 in Hengkot khua ah giak ding ua, huai akipan kipahkhe nawn in Janury 14 in Tuilaphai khua ah giaklut nawn ding uhi. Huai akipan January 15 in P Sejol ah giak nawn ding ua, Janury 16 in Tuilumzang ah giak in Janury 17 in kikhen ding uhi. Hiai 30th Shodhyatra (Journey of Exploration) kichi Manipur a, kizat patna ding hidan in kigen hi. North-East ah Assam, Meghalaya leh Manipur ah kizang ding hi.
Manipur Chief Secretary DS Poonia IAS makaih in tui'n Resource and Development Wing Lamphelpat Imphal ah District teng apan Chief Medical Officer, NRHM District Programme Manager, Medical Superintendent leh District Aids Control Officer te'n Meeting nei uhi. Hiai hun ah RIMS, JNIMS leh District Hospital Churachandpur a Centenial Surveillance Centre te function sak dingdan genkhawm ua, Churachandpur District akipan Dr. F Thienkhogin District Aids Control Officer, Dr. Liensang Chief Medical Officer leh Dr. Paulginthang Medical Superintendent leng va tel uhi.
GAMDANG THU.
Venezuala President dia tuni a kichiamni ding himahleh taksa damlou a Cuba gam ah etkol ahih ziak in gam makai Chavez gumtute lungliap tak in om uhi. Huai tawh kiton in Venezuala solkal khutzat Radio te apan Chavez support tute’n anatna apan hong dam pah a, kum 14 sung vengveng  President dinmun alet pen hong zop nawn zawh na di’n deihsakna in tuni’n lampi zuihna thupitak in sai sawm uhi’n leng kigen hi.
Tulel a summer nipi hun zang Australia gam in a buaipih mahmah uh gamkatna thuak lellel New South Wales sung kia leng kilometer 3,000 kimkot a lian huamsung a om ganvulh, singlehlou tel in bangmah hawituam omlou in thil tamtak kangtum ta hi. Helicopter zang in meiphelh pawl leng lawhsam mun mahmah hi’n kigen hi.
America Computer siam mahmah mi nih te’n gamdang tawh thukizakna deihlou North Korea gam va pha in thuneitute’ kiang ah Nuclear leh Missile bawl nawlkhin phot a tulai khawvel changkangna tawh kituak zaw dia gamdang tawh thukizak tuahna North Korea gam ah INTERNET baihlam taka  zattheih dingdan limsak zaw di’n Google C.E.O. leh US politician te’n naktak in va ngen mah le uh, North Korea thuneitu lam apan kintaka dawna om dan in gamdang mi himhim hong pawng zinlut phal hinawn lou ding hi’n thusuak in taklang hi.
Saudi Arabia gam a innsung nasem a kilawh Sri Lanka apan numei RIZANA NAFEEK kichi in kum 2005 in a ta-ngek athah ziak in, Saudi Arabia solkal thupiak khauhtak dungzui in hiai sila numeinu ngawng tansak in om hi.
Muslim kulmut gam ah hichi bang mulkim huaina bei a kithahna inn-nasep a nekzongte’ tung ah om mun mahmah ahih ziak in International Human Rights pawl tuamtuam in mawhpaih ua, International Labor Organisation in inn-nasemte humbitna ding ngaihtuahsak di’n khawvel thuneite naktak in ngen hi.
Mexico capital Mexico City sung adiak in South East district sunga neitu omlou a kikhahzan Uihai(stray dogs) te keih ziak in mihing in 5 in asihlawh taak ziak un mexico police ten khawlak a neitu omlou ui tamtak mankhawm ua, aleh lam ah ANIMAL ACTIVIST pawl in bel police te’n a khawlak ui matte uh poison zanga that mai lou di’n ngen uhi. Mexico police thusuak dan in Mexico khawpi ah siingkhat leh sang nih val(12,000) bang Ui hai om di’n tuat uhi.
1863 kum a lamlian kidaih zawh nawh louh ziaka khawvel khangthu a masapen dia kibawlkhia subway kichi lei nuai a mipi tuan theihna ding train, London khawpi ah bawl in a om zawh tuni in kum 150 chingta hi. Hiai champha lopna in Lodon subway station te ah nidang lai a subway omdan lemlaak luitaktak te poster lahkhiakna nei uhi.
Zan zingkal a New York khawpi zuan a pai mihing 300 pua Long khat ahat tai luat ziak in a khawlna mun ding naktak in bawh kha in asung a tuang mi 57 liam lian lakah mi 11 te gim diak hi’n kigen hi.
United Nations Refugee Agencies thusuak apan tuni tanin Syria gam nusia a Iraq ah galtai mi Lakh 6 phata ua, niteng in kibehlap zel lai hi’n leng thusuak in gen hi. UN in galtai te nek leh dawn siksak in puansilh leng hawm mah leh niteng a galtai a tamsem ziak in etkai haksa sa mahmah ahih dan gen beh lap hi.
Pakistan sepaih ten gamgi kantan a India sepaih 2 hong kaplupna thu ah tuni’n Pakistan foreign minister HINNA RABANI KHAR in hiai suizuina tungtang ah UN makai thuneite kigolh ding deih ahih dan gen mahleh a leh lam ah India in bel gamnih kal a Khasmir thubuai pen Pakistan in International issue suak ding a deih tinten ziak a ceasefire bawhse zen a hiai banga gamtang uh chi’n ngawh hi.
Apaita December 16 a Delhi khawpi a gangrape thubuai ziaka matkhiak mi 5 te maban ding tunin Sakit court ah ngaihtuah in om nawn dia, huai zawh in thutanna sangpen tuak di’n fast-track court ah dinsak in om nawn ding uhi. Huchibang kal ah tunitan in Delhi khawpi sunga TINTED GLASS thuah a gari tai tamtak a om lailai ziak in Delhi High Court in Delhi Police te mawhsa mahmah hi’n gen hi.
Tuzingkal Bihar state sung AURANGABAD zul National Highway 139 ah nasem mi 35 pua truck khat ahat tai luatna lam ah accident tuak in asung a tuang mi 17 in sihlawh ua, mi 10 in liamna tuak uhi.
Post: David R.Tonsing