* Siamsinpawlpi 66th Foundation Day-Cum-Siamsin Meritorious Award hawmna neih in om.
* Manipur Police Constable 2000 lakna ding in application form kihawm panta.
* DC makaih in District Level Co-ordination Committee meeting om ding.
* Phungzathang Tonsing Health and Family Welfare Minister in Hornbill's Digital hong ding.
* Vungzagin Valte MLA and Parliamentary Secretary in Thanlon bial ah Education System puahphat sawm in akisaipih teng Meeting neihpih.
*Health and Family Welfare Minister Phungzathang Tonsing in Trinity Centre hong ding.
*CMO makaih in IPPI 1st round leh 2nd round neihna ding tawh kisai in review meeting neih in om.
Siamsinpawlpi General Headquaters in zan sunnung dak 1 in YPA hall New-Lamka ah Siamsinpawlpi 66th Foundation Cum Siamsin Meritorious Award hawmna nei uhi. Hiai hun Vungzagin Valte Parliamentary Secretary, Rev. S Vungminthang General Secretary EBC leh M Jamchinthang Chairman Standing Committee Siamsinpawlpi General Headquaters, Jacintha Lazarus IAS DC Churachandpur leh L Mangkhogin Haokip IPS, SP Churachandpur in uap in thugenna hunzang in, Siamsin Meritorious, Donors leh Honour Award tuamtuam 32 hawmkhe ding uhi. Huaiban ah Siamsinpawlpi Life Member thak mi 9 te kiang ah Certificate pekhe uhi.
Manipur Police Training Centre a febuary 4-27, 2013 sung a Police Constable 2000 lakna ding tawh kisai in application form kihawm panta hi. SP Churachandpur Office ah leng tuni lel in form 800 val hawmkhiak in om hi. Churachandpur district akipan candidate te ading in febuary 4 leh 5, 2013 in physical efficiency test om ding hi.
District level Co-ordination Committee (DLCC) meeting january 16, 2013 in DC Office a BRGF resource centre ah om ding a, huai ah SDO/BDO leh district level officer te telding uhi.
Hornbill Cable Network in Digital in picture quality khahkhiak sawm in zingchiang sunnung dak 3 in Hornbill complex mission road hingtam lamka ah, Hornbill Goes Digital Launching and Inauguration Programme om ding hi. Huai hun ah Phungzathang Tonsing Health and Family Welfare, GAD and CADA Minister, chief guest apang in Hornbill Digital picture hong ding a, Rev. L Khamkholun Director of Missions EBC in Pathian kiang ah lan ding hi. Hiai hun Jacintha Lazarus IAS DC Churachandpur, Langkhanpau Guite Chairman ADCC, L Mangkhogin Haokip IPS, SP Churachandpur, Kamsuanlun Executive Member ADCC leh C Hangshing Project Director DRDA ban ah District level officer hunkhop in uap ding uhi.
Thanlon bialtu MLA Vungzagin Valte Parliamentary Secretary in Thanlon bial sung a education system puahphat sawm in zan zinglam dak 7:30 in amah tenna inn New-Lamka Chimtung Veng ah Meeting nei hi. Hiai hun ah, Joseph Lalrothang Zonal Education Officer, Thanlon Deputy Inspector of School leh Assistant Inspector of School ban ah Staff te leh Thanlon bial sung a Govt. School Headmaster, School Development Committee member leh Khaw Hausa te tel in, 2013 Academic Session kipatma a education system puahphat dingdan genkhawm uhi.
Damdawi khamtheih leh Zu ngolvei te kibawl hoihna dia Hope Foundation Trust in a bawl Trinity Centre kichi zingchiang sunma dak 11 in Pearsonmun khua ah, a honna leh latna ban ah Pathian kiang a kipah thugenna om ding hi. Huai hun ah, Phungzathang Tonsing Health and Family Welfare, GAD and CADA Minister in Trinity Centre hong ding a, Rev. S Vungminthang General Secretary Evangelical Baptist Convention in Pathian kiang ah thumna in lan ding hi.
Dr. HL Liensang Chief Medical Officer makaih in tuni sunma dak 10:30 in IPPI first round leh second round neihna ding tawh kisai in review meeting nei uhi. Hiai hun ah district sung primary health centre leh primary health sub-centre a medical officer incharge leh programme officer teng tel in polio damdawi naupang teng dawn suaksak dingdan genkhawm uhi.
GAMDANG THU.
Japan Prime Minister thak Shinzo Abe in thuneihna alaknung China gam tawh South East China sea a om tuikulh gam kituhna thu ah nungkiin sawm lou himhim hi. Shinzo Abe in China gam le chou mahmah ahih dan a lahkhiak nopna a Japan in a neih sunsun Lenna zanga galdouna Air Borne Battalion tel in sepaih tamtak galdoudan hoihtak in sinsakna neisak thak hi.
America gam in kaalnawn seppatni a 57th Presidential Inauguration aneih ding kisakkholna Washington D.C. khawpi ah naktak in pailel hi. Hiai hun ah President dia telchingthak nawn a om America khangthu a masapen dia MIVOM President Barack Obama in ABRAHAM LINCOLN leh MARTIN LUTHER KING te’ zatlui BIBLE nih a khut langnih ah tawi in America President dia kichiamna nei ding hi’n kigen hi.
Hindu sahkhua zuite’n kum 12 hal zel a zat uh, ni 55 sung daih MAHA KUMBH kichi tuni akipan Uttar Pradesh state sung ALLAHABAD khawpi a GANGA luipang ah zatpat in om hi. GANGA luitui ah kihon silsiangna neih ding lunggulh in mipi a Lakh a simte’n hiai festival uap ding in gamtuamtuam a pan India hong zin ua, a patni apan a tawpni tan in mihing crore 10 bang khualzinmi phazou di’n tuat uhi.
Tunitak lam in Brigade Commander makaih in India leh Pakistan sepaih ten gamgi ah flag meeting nei ding uhi. Hiai hun ah gam nih tuak apan ceasefire thukhun bawhsiat in a om zah vei tangtaka kigen tuahna nei ding ua, huai ban ah thaukap khawlsan ding dan tel in thukhun puahphat ding omte saifel vek din Director General of Military Operations te kisakkhol uhi.
Fighter lenna zang in France in Mali gamsung a Islamist helpawlte a dou uh gintak sang in helpawlte hat sa mahmah uhi. Tulel in Britain leh US tel in gamtuamtuam 7 ten galdouna ah kithuahpihna pia ua, France sepaihte’n bel tawlnga lou in helpawlte beizom zel ding hi’n thusuak in gen hi.
Atuam a Muslim gam deih ziak a India apan Pakistan om khe mah leh tuni tan in Sunni-Muslim leh Shia-Muslim kal a kimelmakna bei thei tuan lou hi. Kaal paita in Pakistan gam a minority hilel Shia-Muslim mi 100 val bang bomb hattak zanga thah in a om uh mawhpaihna in Karachi khawpi ah kiphinna STRIKE neih in om hi. MUSLIM gam kichi Pakistan ah a tawm zaw Shia Muslim te’n Sunni Muslim te thuaklah thei mahmah uh hi’n kigen hi.