* District Council Office a vanzat ding hongtung.
* Consumer Court Building ding kibawl panta.
* Manipur a Helpawl 4 te Rising Day tukha sung ahihkhak ziak in Security te kigingsa in om.
* Taxi Owners leh Bus Owners te kal a buaina leh CT Scan vanzat mang tungtang Govt.in May 7,2012 tan a ahihveng keileh Joint Meeting in May 9,2012 Zankim akipan Total Indefinite Bandh puang sawm.
* District Hospital ah Generator 2 vanzat kigumang.
* M Gouzamang Executive Member ADCC in Health and Family Welfare Minister Phungzathang Tonsing leh District sung a MLA dang te tawh Special Get Together neiding.
* District Aids Prevention and Control Unit in Monthly Meeting nei.
* G Mualkawi Baptist Youth Fellowship in BYF Revival Fellowship neiding.

Autonomous District council Churachandpur Office a zat ding in tusun in godrej steel drawer 4 hongtung thak a,account section ah koihlut in om ngal hi.

Churachandpur Consumer Club in Consumer Court building lamna ding apanlakna lohching in headquater veng a FCS te gam ah building lamna kipanta hi.MTDC in building lamna naasem in churachandpur Consumer club in nasep enkai ding uhi.

Manipur a helpawl om teng lak ah helpawl 4 te rising day tukha sung ahihkhak ziak in security te kigingsa in om uhi.Helpawl 4 te rising day ahihleh ZRA may 7,PULF(MI) may 11,KNF may 18 leh PULF may 20 hidan in kigen hi.

Churachandpur district Students Union CDSU,Zomi Youth Association ZYA, Young Mizo Association,Hmar Youth Association,Kuki Khanglai Lawmpi KKL, Kuki students Organisation KSO Churachandpur leh Zomi Human Rights Foundation ZHRF in zan a CDSU Administrative Office building a joint meeting a neihna utawh kisai in tuni'n Joint Press Communique bawl uhi. Thusuak in a taklat dan in All Lamka Taxi Owners Association leh Bus Owner Association Down service te kal a buaina Govt. in a limsaklouh ziak in mipi haksatna genvuallouh tuak ahihdan taklang ua, govt.in hiai association 2 te kal a buaina a hihveng ding ahi chi in thuneitu te kiang ah ngetna bawl uhi. Huaiban ah District Hospital a CT Scan vanzat mang tungtang ah vanzat gute mankhia a, thutanna mai ah dinsak ding leh CT scan vanzat thak koih ding in Govt.kiang ah ngetna bawl ua, hiai ding in May 7, 2012 tan hun pia uhi. Ngetna bang a Govt.in a sepsuah keileh May 9, 2012 zankim a kipan hunchiam omlou in Total Bandh puang hiding chi'n thusuahna ah taklang uhi.

District hospital a room 2 sung a kikoih MSF te generator leh district hospital te generator vanzat hunkhop tak kigumang hi. Hiai thu tawh kisai in Dr.P Nengzadou Medical Superintendent District hospital in zan nitaklam ah police ah report bawl a,vanzat te mang hun leh a gutu theih hilou hi.Report dungzui in District hospital te generator vanzat Armature Cap 1, Air filter 1,Starting handle 1 leh diesel litre 10 hi a,MSF te generator vanzat Silencer Pipe 1,exhaution fan 1, starting handle 1 leh diesel tank 1 hidan in kigen hi. Huailou in District Fishery Officer H Tomba Singh in zan a police a report a bawlna ah April 27, 2012 in Tuibuang a District Fishery Farm Office Complex nawl a kiphut Demarcation post (RCC post) kigumang ahihdan gen hi.

M Gouzamang Executive Member ADC Churachandpur in May 5, 2012 sunma dak 11 in PT Sport Complex Vengnuam New-Lamka ah Phungzathang Tonsing Health and Family Welfare, GAD and CADA Minister leh Churachandpur District sung a MLA dang te tawh Special Get Together neih sawm a, hiai hun ah 17 New-Lamka East ADCC Constituency a om kha peuhmah telding in chial a, sial 1 leh vok 4 gou in mipi'n annekhawm ding uhi. Hiai special get together hun ah Langkhanpau Guite Chairman ADCC, GS Haupu MLA Singngat, Vungzagin Valte MLA Thanlon, T Manga Vaiphei MLA Henglep, Dr.Chaltonlien Amo MLA Tipaimukh, TN Haokip MLA Saikot leh Phungzathang Tonsing Health and family Welfare, GAD and CADA Minister in thugen ding uhi.

Dr.Nengkhanmang District Aids Control Officer makaih in tuni sun dak 12 in District Aids Prevention and control Unit DAPCU staff te'n monthly meeting nei in kha khat a sepsuah te leh maban paiding dan genkhawm uhi.

Evangelical Baptist Convention Church Local Baptist Youth Fellowship G Mualkawi in "Khrista khovel khek lumlet zou, tuailai" chih thupi zang in May 5, 2012 sunma dak 10:30 in Hope Foundation Trust Pearsonmun ah BYF Revival Fellowship 2012 neiding uhi. Hiai hun ah guest of honour in Upa L Vungzamuan Youth Coordinator EBC leh T Khamchin Music Promoter EBC pang ding ua, guest of Revivalist Relative in BYF Pearsonmun te hiding uhi. Huaiban ah Guest of Host in K Paukhansuan Director Hope Foundation Trust India pang ding a, Guest of departments ah G Mualkawi EBC saptuam a Department teng apan chairman leh secretary te hiding uhi.

* KNF(MC) in Koite Hanmual ah George Lalrongbawl vuaktang a om mankhia.
* Tipaimukh MLA Nominee Samson in Tipaimukh Bial ading PDS anntang pawlut.
* ZSF General Headquater in Diesel Auto Service te Traffic Rules tawh kisai in Awareness Programme neihpih sawm.
* SSPP Residential School ah C Hangshing Executive Director DRDA in Free Uniform pekhia.
* Parbung khua a DLCC Meeting a telding District Level Officer te zingchiang in kuankhe ding.
* IWMP nuai a Technical Expert-A Contract Basis a sem ding lak hun ding kisuan.
* STC/BSF in Thau-le-Bomb kapna sunzom ding.
* Zingchiang May day ahihziak in Govt.Office leh Institution te Suty ding.

Kuki national Organisation KNO nuai a om KNF(MC) in zan nitak zan sawt nung in Koite hanmual ah pasal khat vuaktang a om mukhia in tuni zinglam dak 9 in Kuki Students Organisation KSO Churachandpur khut ah pekhia uhi. Mat a om ahihleh George Lalrongbawl (23) S/o Pastor L Neivung of Mualvaiphei hi a, KSO churachandpur in Hmar Youth Association HYA khut ah tuni mah in pekhe ngal uhi. KNF(MC) lam apan thu kiza dan in numei leh naupang muh dia kilawmlou tak a om matkhiak ahihnawn leh a tung ah action khauhtak lak hiding a, kuamah in nam vai in a lathei kei ding chi uhi.

Dr.Chaltonlien Amo Chairman Hill Area Committee HAC nominee Samson in Tipaimukh Assembly Constituency ading April 2012 quota PDS anntang hawm ding in tuni'n Tipaimukh bial zuan in pawkhe nawn hi. PDS anntang pua Truck 4 te tuni zinglam dak 10 in Micheal Ginzasuan District supply officer in khakhia hi. Tipaimukh bial ading PDS anntang quintal 389 pha a, tuni'n truck 4 zang in puaklut in om a, zan in truck 3 zang in anntang pawlut khinta uhi.

Zomi Students Federation ZSF General Headquater in hongtung ding May 6, 2012 sunnung dak 1 in synod hall IB road ah Lamka khopi sung a service diesel auto owners te traffic tawh kisai in awareness programme neihpih sawm uhi.Hiai Awareness programme ahihleh Jacintha Lazarus IAS DC Churachandpur in hong ding a,Resource person in Siamzading Advocate leh Police department apan traffic lam tawh kisai officer te'n sinsak ding ua, Lamkhosiem District transport officer Special guest in pang ding hi.

Ngathal khua a Siamsinpawlpi Residential School ah tuni'n free uniform hawmna programme om a,hiai hun C Hangshing Executive director DRDA Churachandpur in khuallian hihna tawh uap in free uniform te student te khua ah pekhia hi. Hiai hun Rachel N Guite SDO Singngat leh mi poimoh hunkhop in uap uhi.

Tipaimukh Sub-division sung Parbung ah May 2,2012 in District Level Co-ordination Committee DLCC Meeting omding hi. Hiai ding tawh kisai in SDO/BDO leh district level officer te zingchiang in kipan khe ding ua, May 3, 2012 in Lamka lam zuan in hong kik ding uhi.

Integrated watershed management programme IWMP nuai a Technical Expert-A contract basis a sem ding lakna ding hun kisuan hi.Hiai tawh kisai a C Hangshing Executive Director DRDA Churachandpur in tuni'a thusuah a bawlna ah a lemtang zaw ding gelna a Interview hun ding May 9, 2012 a neih dia suan ahihdan taklang hi.

Subsidiary training centre STC/BSF in Mission Compound suahlam leh Pearsonmun, Gangpimual leh Mualkawi simtum kikal ah May 1 akipan ni 15 sung zinglam dak 5 akipan zannung tanpha in thau leh bomb kapna sunzom nawn ding ua, kim-leh-kiang a om te pilvang a ganvulh te khahzan lou ding in theihsakna bawl uhi.

Zingchiang May Day ahihziak in Govt.office leh Institution teng suty ding uhi.