* INC Mata Unit in Health and Family Welfare Minister Phungzathang Tonsing kipahpihna nei.
* State Level Youth Integration Camper te'n Rally nei.
* LRRC/Lam-etna mun a Inmates te'n Hotdamna Chialpi nei.
* HT Sangliana IPS (Retired) Vice Chairperson National Commission for Minorities in Lamka hongpha.
* Inspector Elvy Tunglut,CID (SB) Churachandpur in Lamka Police station ah OC hihna lending.
* District Level Athletics Meet neihna ding tawh kisai in Joint Meeting om ding.
* Multi-Lingual Monthly News Magazine Zogam Today Kum khat chinna kizang ding.
TUN TANCHIN KIMZAW IN :
Indian National Congress,INC Mata Unit saina in tuni sunnung dak 1:00 in Mata a T. Dengzapau tenna inn ah 58/CCpur A/C a INC candidate Phungzathang Tonsing lohchinna leh Cabinet Minister a ngah kipahpihna leh lopsakna program om hi. Hiai hun ah Pastor K. Vumzathang in Minister Phungzathang Tonsing a ding in vualzawlna ngetsak in Pathian kiang ah thumsak a, PTC Mata Unit, VPC Mata Unit leh Minister Phungzathang Tonsing in thugenna hun zang ua, T. Dengzapau in Minister Pa kipahpihna in bong 1 gou in mipi’n annekhawm uhi.
Department of Youth Affaris and Sports, Government of Manipur, District Youth Affairs and Sports leh Muolvaiphei Youth Club te saina in zanhal in, Muolvaiphei Youth Centre ah, State level Youth Integration camp kipan hi. Camp sung in, sinsak tu tuamtuam in sinsakna nei in May 6 in zou ding uhi. Hiai Integration camp toh kisai mah in, tuni’n rally nei uhi. Rally ahihleh zinglam dak 7:30 in camp omna mun, Muolvaiphei ah kipan a, Rengkai road tawn in, Police station kong apan Teddim Road ah pai tou in, Tedim Road apan Nehru Marg ah paisuk in, huai apan, Rengkai Road man in, Rengkai Road apan Muolvaiphei mah zuan nawn uhi. Hiai Rally ahihleh M. Chandrakumar, Senior Youth Officer, YAS in chief guest hihna toh uap in rally a pai dingte flag-off hi.
Integrated Rehabilitation Centre for Addicts (IRCA), LRRC/Lametna mun a inmate mi 19 omte a ding in May 5 tan daih ding Hotdamna Chialpi tuni’n kipan hi.Hiai Hotdamna Chialpi ahihleh tuni zinglam dak 10:30 in Upa HL Khai in hong a, T. Langsanglian, Secretary, LRRC in inmates te a ding in thugenna hun zang hi. Hiai hun ah LRRC nuai a project teng a staff te telkim vek uhi. Hotdamna Chialpi hunsung in Evan Khupzatun speaker a pang in inmates te a ding in hotdamna thugen ding hi.
HT Sangliana, IPS (Retd), Vice Chairperson, National Commission for Minorities in Delhi apat Manipur hongpha a, tuni zinglam in Lamka hong pha suak hi. Aman Lamka a a om sung in May 7, 2012 in Khuga Dam pha ding a, nitaklam in Imphal ah kiksuk nawn ding hi. Nitaklam dak 1 akipan dak 3 kikal in Raj Bhavan leh Old Secretriate ah meeting nei ding a, huai zoh in Manipur DGP toh a tuam in meeting nei ding uhi. May 5, 2012 zinglam dak 10:00 in Hotel Imphal ah State Minorities makaite toh meeting nei ding a, sunnung dak 2:00 in Chief Minister tawh meeting a neih zohnung uh nitaklam dak 4:00 in Manipur Governor toh meeting nei ding hi. HT Sangliana in May 9, 2012 in Manipur pawtsan in Delhi ah kiknawn ding hidan in thutut kingah hi.
Inspector Thangzamuan tulel a Loktak Protection Force a omlel Thanlon Police station a OC ding in hongpai ding a, Inspector Elvy Tunglut, CID (SB) /CCpur in Lamka Police station ah OC len ding a, Khamkhosiam Guite, OC Thanlon Police station lenlel in CID (SB) CCpur len ding in zan in order suak hi.
Hongtung ding May 9-11, 2012 sung lamka public ground a District Level Athletic Meet neihna ding toh kisai in zingchiang zinglam dak 11:00 in DC/CCpur makaih in BRGF Resource Centre ah joint meeting om ding hi. Hiai hun ah ZEO, CEO, SDO teng, DYASO, ZEO leh District Council nuai a DI teng, CDSU, ZSF, KSO leh HSA makaite banah Lalpuithluii Foundation School Principal telding uhi.
Kha teng a pau tuam tuam a suak, Multi Lingual monthly news magazine, Zogam Today in ahongtung ding may 12, 2012 in a din khiak nung kum 1 chinna, 1st anniversary lop na, Zogal memorial Hall Complex, Zoveng ah nei ding uhi. Huai hun ah, Ginsuanhau Zou, MLA, SIngngat AC in chief guest hihna toh uap ding a, M.Sesei Zou, Chairman, ADC, Chandel, Th. Thangzalian, President, MHJU leh Jacintha Lazarus, IAS, Deputy Commissioner, Churachandpur ten, Guest of Honour, Functional President leh Special guest hihna toh uap ding uhi. Huai ban ah, programme sung mah in, Michael Ginzasuan, DSO/Churachandpur, S.Kaikhankap, ARCS leh Mannuamching, CEO/ADC, Churachandpur ten Host hihna toh uap ding ua, kipolhlim na nei in, lucky draw ticket te leng draw ngal ding uhi.
Dr. Paulginthang, District Malaria Officer tuni'a kipan office kai in nasep pan a, staff-te toh kimeltheih tuahna in singpi dawnkhawm ua, maban a nasep ding tungtang genkhawm in staff-te hoihtak a office kai a nna sem ding in thuhilh hi.
Subscriber te kiang a theihsakna Reciept book tellou a,Hornbill Cable network fee hong khon om ahihlam theihkhiak ahihziak in poi kisa mahmah hi,maban ah Reciept book neilou a cable fee hong khon omleh kuamah in pelou ding in i kitheisak a,reciept book tellou a pia omleh Hornbill Cable Network Office in kitheihpihlou ahihman in cable fee pia bang in hon kipom theilou ding hi.