* 2nd Paite Nam Khawmpi Committee member te'n Meeting nei.
* Churachandpur Govt.High School ah Free Text Book kihawm.
* DRDA saina in Technical Issues and Account Matters tawh kisai in Workshop om ding.
* IWMP sepsuahna tawh kisai in Watershed Committee in Meeting neiding.
* BADP nasepna enkhe ding in Dr.Buddhadeb Ghosh Principal Investigator ISI Kolkata in Lamka hongpha ding.
* Cycle a Accident Chiinneilam damzoulou in Si.

Tuni sunnung dak 1:00 in Hiangtam Lamka a PTC Office ah kum 2011 a Sinzawl khua a 2nd Paite Nam Khawmpi Committee member te’n meeting nei uhi. Hiai hun ah 2nd Paite Nam khawmpi Committee phiatna leh thu poimoh tuamtuam genkhawm uhi.

Government school-te a dia free text book hong pai te CCpur Block ading atamzaw te’n a lak zoh nung un tuni’n CCpur High School ah CCpur Block nuai a school 64-te a ding hawmkhia uhi. April 26 in Henglep Block nuai a school 25-te a ding hawmkhe nawn ding uhi.

District Rural Development Agency (DRDA) saina in zingchiang zinglam dak 11:00 in District Training Centre ah Workshop on Technical Issue and Account Matters for WDT members under IWMP” om ding hi. Hiai hun ah C Hangshing Executive Director DRDA in IWMP toh kisai pulakna nei ding a, Imphal apan SLNA member bangzah hiam leh DRDA staff te’n thupi tuamtuam zang in sinsak ding uhi.

Hongtung ding April 27 leh 28, 2012 sunma dak 10:30 in District Training Centre ah DRDA saina in Integrated Watershed Management Program (IWMP) sepsuahna toh kisai in Watershed Committee in workshop nei ding uhi. Thusuak in a taklat dan in, April 27, 2012 in Project I (Henglep, Samulamlan leh Tuibuong Block) leh Project III (Vangai leh Tipaimukh Block) te’n workshop nei masa ding ua, April 28, 2012 in Project II (Singngat Block) leh Project IV (Thanlon Block) te’n nein awn ding uhi. Hiai hun ah Block tuamtuam a IWMP toh kisai a Chairman leh Secretary teng tel ding uhi.

Ministry of Home Affairs nuai a Border Area Development Programme (BADP) tawh kisai enkhe ding in Dr Buddhadeb Ghosh, Principal Investigator, ISI Kolkatta in April 24, 2012 in Manipur hongpha ding a, Imphal ah Director(Planning) tawh houlim masa ding hi. April 27, 2012 zinglam dak 10:00 in Lamka hongpha ding a, Jacintha Lazarus DC/CCpur, C Hangshing Executive Director/DRDA leh DRDA official te tawh meeting neiding hi. Zinglam dak 11:30 in Dr Buddhadeb in Behiang (V) leh Hiangtam (K) banah Pakmual khua a BADP nasepna te enkhe ding hi. April 28, 2012 in BADP nasepna enkhe nawn ding a, nitaklam in Imphal ah kiknawn ding hi’n Police thusuak kingah hi.

Apaisa March 30, 2012 in Chiinneilam, 25 W/o Manglianthang of Manniang Veng, Lamka Hanmual kiang ah cycle a tailai accident in liam a, damdawi inn ah a ki et kol nung in zan nitaklam dak 1:30 vel in damzou lou in si hi. Chiinneilam sihna toh kisai in thu tuam tuam tampi om a, himahleh thuthang tuam tuam te, Chiinneilam pasal sanggampa, Zamkhanpau in diklou ahihdn gen hi. Zamkhanpau in a gendan in, Chiinneilam ahihleh a accident zoh phet in, District Hospital ah kipaw lut a, himahleh doctor ten, RIMS a ding a refer bawl uh ahihdan gen in, a case diktak theipah kei mahle uh, RIMS doctor ten, April 1 zinglam dak 12:00 vel a a case thei khia uh ahihdan gen hi. Chiinneilam sihna toh kisai in, a accident hun lai in, puanngou silh, meltheihlouh, khat in enkol chi in thu kithang a, hiai bang a thuthang pen, ei Christian te lak a ding a om theilou ahihdan leh thuzuau ahi chi in gen hi. Chiinneilam ahihleh a accident ziak in, a ngoi(intestine) mun 2 ah kitan in, a gilpi leng mun 1 a kisiat ban ah, a sin leng kise ban ahihdan gen a, RIMS ICU ah ni 7 a om nung ua Ward ah ni 9 sung ki enkol a, lamet om nawn lou chih ziak a inn a ki enkol ding a kipaw khia uh ahihdan gen in, kholai thuthang tuamtuamte zuau ahi chi in gen hi. Chiinneilam luang ahihleh tuni in Lamka haanmual ah vui in om hi.