Siamsinpawlpi Hiangtam Lamka Branch in Manipur Board leh CBSE nuai a lohchinna ngah te Torch Lamp pia.

P Sianzadong Chairman Finance Committee ADCC in, amah Bial sung a PDS Agent te Meeting neihpih.

Kawnpui khua leh New-Lamka YPA Hall ah Phungzathang Tonsing Health and Family Welfare, GAD and CADA Minister kipahpihna neih in om.

DC Churachandpur makaih in Disaster and Relief tawh kisai in Meeting om a, Singngat leh Churachandpur Sub-Division sung a vangsiatna tuakkha te panpihna ding in Sum tamtak Sanction bawl.

Dr.N Paulginthang in Medical Superintendent ding in Charge la theinailou.

Vungzagin Valte MLA in The First K NGUL-CHIN-LIAN District Football Tournament hong ding.

Siamsinpawlpi Hiangtam Lamka Branch saina in tuni zinglam dak 10 in YPA Headquaters Hall Hiangtam Lamka ah Hiangtam Lamka huapsung a, Manipur Board leh CBSE nuai a tutung class 10 leh class 12 examination a lohchinna ngahte kipahpihna nei uhi. Hiai hun ah S Kamsuanlun Executive Member ADCC in keynote Address gen in lohchinna ngah student te kipahman piakkhiakna makaih hi. Pastor V Jamkhanthang Local Pastor EBCC Hiangtam lamka in lohchinna ngahte thumsak a, Jacintha lazarus IAS DC Churachandpur in Career guidance leh hasotna thugen hi. Aman a thugenna ah Student hihlai in tupna neih poimoh a, tupna lampi tawn a kuhkal tak a pang te a lohchinglou omlou ahihdan gen hi. Hiai hun ah Jacintha Lazarus IAS DC Churachandpur, Maniram Sharma IAS, Ngamhao Touthang MDC, Nehthang Mate MDC, Pastor V Jamkhanthang, Rev.Stephen Chinzathang, G Thangkhosuanmung Chief of Hiangtam Lamka, Chinngaihpau President YPA General Headquater leh PTC Central Working Committee Chairman in student te kiang ah kipahman in torch lamp pia uhi. Hiangtam lamka huapsung ah tutung CBSE leh Manipur Board nuai ah class 10 leh class 12 passed 65 om a, tuni'a telthei mi 55 in kipahman sang uhi. Amau te Manipur Board nuai a Class 10 ah first division 18, second division ah 19, Class 12 first division ah 12 leh second division ah 1 leh CBSE nuai a Class 10 ah first division 5 hidan in kigen hi.

P Sianzadong Chairman Finance Committee ADCC in tuni sun dak 12 in Amah Office Chamber ah, amah bial sung a PDS Agent te samkhawm in Meeting neihpih a, Singngat MLA Nominee Sonmuan tel in Singngat ADC Constituency sung a, PDS Item tuamtuam piakkhiakna tawh kisai leh thu poimoh tuamtuam genkhawm ua, PDS Agent tamzaw tel uhi.

Tuni sun dak 12 in Kawnpui khua ah Phungzathang Tonsing Health and Family Welfare, GAD and CADA Minister in Vocational Training Centre, (Late) Pi Chhungi Waiting Shed leh BSNK House honna nei hi. Huaizawh in Kawnpui Community Hall ah Phungzathang Tonsing Health and Family Welfare, GAD and CADA Minister kipahpihna nei uhi. Hiai hun ah Mahila Congress Kawnpui Unit leh INC Kawnpui Unit in Minister Pu kipahpihna thilpiak pia uhi. LT Zuan Tonsing Chief Election Agent INC 58 Churachandpur, Sumlianthang MDC Lanva, Zodingliana MDC, Health Minister Phungzathang tapa Khanthang leh a tanu Lulun ban ah Phungzathang Tonsing Health and Family Welfare Minister in thugenna hunzang ua, nitaklam in annekhawm uhi. Huailou in tuni zinglam dak 8 in New-lamka YPA hall ah New-Lamka huapsung a khaw 8 kigawmna New-Lamka Village Authority Council in Phungzathang Tonsing Health and Family Welfare Minister kipahpihna nei ua, huai ah New-Lamka Village Authority Council in Health and Family Welfare Minister Phungzathang kiang ah memorandum pia uhi. Memorandum ah Lamka South TD Block a kinlam a bawlkhiak a, huai pen New-Lamka TD Block a khek ding, New-lamka Primary Health Centre leng Community Health Centre a Upgrade ding leh Polling Station, Village wise a koih ding ban ah khaw chih a Health Institution koih ding leh New-Lamka Primary Health Centre a Doctor koih ding in ngetna bawl uhi.

Jacintha Lazarus IAS DC Churachandpur makaih in tuni sunma dak 11 in DC Churachandpur Office a BRGF resource centre ah Disaster and Relief Meeting nei uhi. Hiai hun ah Singngat leh Churachandpur Sub-Division sung a vangsiatna tuakkha te panpihna ding tawh kisai genkhawm ua, member paikhawm te'n Singngat Sub-Division sung vangsiatna tuakkha 36 panpihna ding in 1.6 Lakh Sanction ua, Churachandpur Sub-Division sung a vangsiatna tuakkha 64 panpihna ding in 1.98 Lakh Sanction uhi. Hiai Meeting neihzawh in Electoral Roll Summary Revision 2013 a neihna ding tawh in Meeting om nawn a, huai ah Electoral Roll Summary Revision 2013 a manpower poimoh ding zah leh thu poimoh tuamtuam genkhawm in SDO leh BDO te tel uhi.

Manipur Health Deparment thusuak dungzui in tulel a District malaria Officer Dr.N Paulginthang in Medical Superintendent District Hospital Churachandpur hihna lending a, Medical Superintendent lenlel Dr. P Nengzadou in District Malaria Officer hihna lending hi. Hiai ding tawh kisai in tuni'a Charge kipekhe ding chih himahleh Dr. HL Liensang Chief Medical Officer in Dr.N Paulginthang District Malaria Officer a release louh ziak in Charge kipekhe theilou uhi.

K Ngulkhanthang, K Chingzasiam leh a innkuan te'n innsungmi aphamsa K Telngul, K Aichin leh K Goulian theihgigena dia The First K NGUL-CHIN-LIAN District Football Tournament apatkhiak uh, June 4,2012 sunnung dak 2 in Lamka Public ground ah Churachandpur District Sports Association CDSA saina in a honna om ding hi. Hiai hun ah Vungzagin Valte MLA Thanlon Assembly Constituency, Chief Guest apang in Tournament hong ding a, Functional president in S Kamsuanlun Executive Member ADC Churachandpur pang ding hi.

District Horticulture and Soil Conservation Office ah Nahtang nou tamlou hongtung a, a deih te'n akintheilam in K Ngulkhanthang District Officer Horticulture and Soil Conservation kiang ah Office hour sung in ngaihven theih ding hi.

* Ginsuanhau MLA Singngat Assembly Constituency in Singngat khua ah Public Toilet, Primary Health Centre leh Marketing Shed mun ding enkhia.

* District Level Inter-School Subroto Mukherjee Football Tournament zohsiang hita.

* District Malaria Officer Dr. Paulginthang in Medical Superintendent District Hospital Churachandpur hihna lending.

* June 5,2012 in District Level Co-ordination Committee, Meeting om ding.

* Siamsinpawlpi Hiangtam Lamka Branch saina in lohchinna ngahte kipahpihna om ding.

Ginsuanhau MLA 60 Singngat Assembly Constituency makaih in Tongkai Baite MDC leh Sianzadong Chairman Finance Committee ADCC leh Rachel N Guite SDO Singngat in tuni sun dak 12 in Singngat khua pha in Singngat khua a Public Toilet ding kibawl thak enkhia ua,hiai hun ah bialtu MLA Ginsuanhau in Toilet sung ah zuntha ngal in zunthak man teng 5 pia hi. Hiai Public Toilet ahihleh khualzin mite khualna a, fund om naikei mahleh Bialtu MLA in ngai poimoh a, abawlsak hidan in kigen hi. Huai zawh in Singngat Primary Health Centre Building thak apaisa May 26,2012 a, Health Minister Phungzathang Tonsing in a hon leng va enkhia in, Primary Health Centre a, Medical Officer Incharge makaih in Staff te'n MLA pu a na vaidawn in singpi dawmpih uhi. Ginsuanhau MLA in a thugenna ah, Singngat khua a Primary Health centre pen ngai poimoh petmah ahihdan gen a, a poimoh leh kul bang enkai ding leng akisaipih Health Minister leh Chief Minister thuzak ding ahihdan gen in, staff te'n a poimoh teng uh list a bawl in MLA pu khut ah pia uhi. MLA pu in staff te hoihtak a kai chiat a, mipi te kipaksak ding in ngen a, mipi te akipah leh, a staff te kia hilou in bialtu MDC leh MLA adia kipahhuai petmah ding ahihdan gen hi. Huaiban ah Ambulance leh Medical Officer Incharge gari ding leng ngaituah sak ahihdan gen hi. Huaizawh in Singngat a Bazar buk bawlna munding leng enkhia hi.

District Youth Affairs and Sports Office Churachandpur saina in may 26,2012 in District Level Inter-School Subroto Mukherjee Football Tournament kipan a,tuni sunnung dak 2:30 in Lamka Public ground ah Closing function zang uhi. Hiai hun ahh Langkhanpau Guite Chairman ADCC Chief guest in pang a, aman a thugenna ah kimawlmite ading in mahni kithunun poimoh petmah a, zu-le-sa leh khamtheih chi tuamtuam a kibuallouh ding ahihdan gen hi. Functional President in Henkholun Doungel District Co-ordinator Nehru Yuva Kendra churachandpur pang a, aman Subroto Mukherjee tanchin tomkim gen a, Subroto Mukherjee kichi lehkha a siamban ah football a siam mahmah ziak in a sih nung kum 50 chingta mahleh, tunitan amah theihgigena dia football kimawlna omlai ahihdan gen hi. Guest of Honour in Lalvullien Joute President Churachandpur District Sports Association pang a, CDSA official leh mi poimoh hunkhop in hiai hun uap uhi. Subroto Mukherjee Football tournament under 14 years final ah Khawlmun JB school leh Hill Rose School kimawl ua, Hill rose school in penalty in Khawlmun JB School te zou in Under 14 years ah champion hihna la uhi. Under 17 years final ah Thangkhai Govt.High School leh Immanuel High School kimawl ua, Thangkhai Govt.High School in Immanuel High School te 2-0 a zou in champion hihna la uhi. Kipahman te chief guest, functional president leh guest of honour in pekhia ua, Under 14 years leh Under 17 years a champion team Hill Rose school leh Thangkhai Govt.High school te District ai-oh in State level Inter School Subroto Mukherjee Football Tournament ah kuan ding uhi. Hiai District level Inter-School Football Tournament Under 14 years ah team 36 leh Under 17 years ah team 21 kimawl uhi.

Director Of Health Govt.of Manipur in zan a Order a suahna ah tulel a District malaria Officer Dr.Paulginthang in Medical Superintendent District Hospital Churachandpur hihna lending a, Medical Superintendent lenlel Dr. P Nengzadou in District malaria Officer hihna lending hi. Zingchiang in senior medical officer nih te charge kipekhe ding uhi.

District level Co-ordination committee DLCC meeting June 5,2012 in DC lamka office a BRGF resource centre ah om ding a, SDO/BDO leh district level officer te telding uhi.

Siamsinpawlpi Hiangtam lamka branch saina in zingchiang zinglam dak 9:30 in YPA headquaters hall Hiangtam lamka ah Hiangtam lamka huapsung a, Manipur board leh CBSE nuai a tutung class 10 leh class 12
examination a lohchinna ngahte kipahpihna om ding hi. Hiai hun ah S Kamsuanlun Executive Member ADCC in keynote Address gending a, Pastor V Jamkhanthang Local Pastor EBCC Hiangtam lamka in lohchinna ngahte thumsak ding a, jacintha lazarus IAS DC Churachandpur in Career guidance leh hasotna thugen ding hi.

Paite Tribe council general headquaters makaih a zan a PTC head office hiangtam lamka a Paite nam sung a dan siam tuamtuam paikhawm te'n sun khua a Paite Customary law tawh kisai a genkhawm nung un, mipi leh a lunglut te ading, in theihtuak thupuan bawl uhi. Thupuan dungzui in Paite customary law (2004 Amendment) bu, deih te'n PTC Office Hiangtam Lamka ah teng 30 piak in laktheih ding a, Originality kembit kawm a revision proposal nei te'n a gelhthoh in June 15,2012 tan in Office Assistant khut ah piaklut theih ding a, huaiban ah PTC Unit leh Block te'n leng PTC Constitution Amendment proposal, a gelhthoh mah in PTC Head Office ah piaklut theih ding hidan in K Ginkhozam Secretary Custom and Culture PTC general headquater in thusuahna ah taklang hi.

Central Institute of Plastic Engineering and Technology (CIPET) ah Diploma in Plastics Technology, post graduate diploma in plastics processing and testing leh post diploma in plastics model design, zilna ding in admission kihong lel hi. Lunglutna nei te'n Manipur Express Office ah Application form a thon in muhtheih ding hi. Hiai Course te AICTE in approved vek hi.