* 59 Saikot Assembly Constituency sung ah TN Haokip Foundation Meritorious Award piakkhiak in om.

* Manipur Education Minister M Okendro Singh in District teng a ZEO leh DI of School teng Meeting neihpih.

* District Level Consultation on Child Trafficking and Labour om ding.

* Ngul-Chin-Lian District Level Football Tournament om ding.

* Paite Cultural Society in General Body Meeting masapen neiding.

* Paite Customary Law tawh kisai in Workshop om ding.

TN Haokip MLA in amah Constituency 59th Saikot Asembly Constituency sung a Board of Secondation Education Manipur saina nuai a High School Leaving Certificate HSLC Examination a sangtak a lohchinna ngahte kiang a TN Haokip Foundation Meritorious Award a piak sunzom in tuni sung dak 12 in Bijang Community Hall ah, a 8 veina ding in Award piakkhiakna neinawn hi. Hiai hun ah Chief Guest in T Manga Vaiphei MLA pang a, functional President in Ginsuanhau MLA pang a, Special Guest in Langkhanpau Guite Chairman ADC Churachandpur, Demmang Haokip Vice-Chairman ADC Churachandpur, L Mangkhogin Haokip IPS, SP Churachandpur leh Sister Lily Maria Principal St.Mary's High School pang uhi. TN Haokip MLA in a thugenna ah Student hanthawnna ding leh Mathematic leh Science Subject a kitaitehna sangtak omding deihna a, hiai bang Award pankhia ahihdan gen a, Student te ading in leitung a muhtheih Pathian Nu-le-Pa te ban ah Teacher te zahtak poimoh petmah a, huchibang Student te Pathian in Vualzawl ahi, chi'n leng gen a,huaiban ah TN Haokip Foundation Meritorious Award in 59th Saikot Assembly Constituency sung kia huam nawnlou a, District pumpi huamsak sawm a panla ahihdan leng genbeh hi. Chief Guest apang T Manga Vaiphei MLA in Award sang te kipahpih thupuang in, a Nu-le-Pa te hampha ahihdan gen a, Award sang Student te'n Pathian manghilhlou a, tuasang a hahpan zaw laiding in ngen hi.Functional President apang Ginsuanhau MLA inleng Award sang te kipahpih thupuang in, Award sang student te'n mahni hihna manghilhlou a, niamkiak lam sawmlou a, kalbi sangzaw manawh ding in hasuan hi.Huaiban ah TN Haokip Fundation Meritorious Award, adia a poimoh bang a pang ding a mansa ahihdan gen hi. Tutung a TN Haokip Foundation Meritorious Award sang Student te Rev.LB Angam Mission Director ECCI in thumsak hi. H.Hmingropui Sungte S/o L Lawilien Sung of Sielmat of Sielmat Christian Higher Secondary School in All Round Topper Award hihna la in Cash Award sing 2 ngah a, Thangminlun Kipgen S/o Paokhotong Kipgen of Koite Village of St.Mary's High School in Maths Topper award, Sing 1 leh Sang 5, sang a, Lhingpahhoi D/o Seikhojang haokip of B Vengnuam of St.Mary's High School in Science Topper Award, sing 1 leh sang 5 mah sang a, School of the Year Award ahihleh St.Mary's High School in la a, Cash Award sing 1 pia uhi. Hiai hun Kamsuanlun Executive Member ADCC, Tongkai Baite MDC, Ngamhao Touthang MDC, Hrila Hmar MDC, Nehthang Mate MDC, Khaipau MDC leh Baby Lhinghoihkim Touthang IFS ban ah mi poimoh tamtak in uap uhi.

Manipur Education Minister M. Okendro Singh in tuni'n District teng a Zonal Education Officer leh Deputy Inspector of school teng samkhawm in amah office chamber ah departmental meeting neihpih hi. Hiai hun ah Education Depatment nuai a semtute CPIS tutan zohlouh a om, June 10 tan a zousiang ding a panla dia a theihsak ban ah service toh kisai leh SSA nuai a primary teacher semtute khaloh piak ding dan toh kisai genkhawm uhi.

Zomi Mothers Association ZMA Headquaters leh New-Life Foundation Bishenpur saina in zingchiang sunma dak 11:30 in New-Lamka Vengnuam a Only Grace Home ah One Day District Level Consultation on Child Trafficking and Labour om ding hi.Hiai hun ah Ashim Ghosh Senior Manager Child Rights and You Kolkata, Arun Pande Director ARZ Foundation Goa leh Nicky Member Child Welfare Committee Churachandpur in Child Trafficking leh Child Labour tawh kisai in sinsak ding uhi.

K Ngulkhanthang, K Chingzasiam leh a innkuan te'n innsungmi aphamsa K Telngul, K Aichin leh K Goulian theihgigena dia The First K NGUL-CHIN-LIAN District Football Tournament apatkhiak uh, June 4,2012 sunnung dak 2 in Lamka Public ground ah Churachandpur District Sports Association CDSA saina in a honna om ding hi. Hiai hun ah Vungzagin Valte MLA Thanlon Assembly Constituency, Chief Guest apang in Tournament hong ding a, Functional president in S Kamsuanlun Executive member ADC Churachandpur pang ding hi.

Paite Cultural Society Headquaters in General Body Meeting khat veina June 1,2012 sunma dak 10:30 in YPA Hall Hiangtam Lamka ah neih sawm uhi. Hiai hun ah Paite te festival tuamtuam, Mou vanken, Paite puandum kizatna, Pupa ngeina a poimoh diakte, Sigalna, Cultural dance, kitenna numei leh pasal uniform ding tawh kisai, Pupa ngeina pahtawina, Pupa lam chi 15, Inndongta kilep dan, inndongta sahawm leh Logo ban ah Flag design tawh kisai leh sepkhiak masak ding tuamtuam om te genkhawm ding uhi. Hiai Meeting masapen a telding Member te'n member annual fund 2012 ading sum za 1 tawi ngai ding a, member hih-ut a lunglutna neite'n PTC Headquater Officer ah Sum za 1 pia in Registration bawl theih gige ding hi.

Paite Tribe Council PTC Headquaters saina in zingchiang sunma dak 11 in PTC Head Officer Conference Hall Hiangtam Lamka ah Paite Customary Law Amendment tawh kisai in Workshop om ding hi. Customary Law tawh kisai a lunglutna neite teltheih ding hi.