* Phungzathang Tonsing Health and Family Welfare Minister in New-Bazar Super Market Building thak hong.

* Huihpi in tenna inn tamtak leh School mutsia.

* 27 Sector Assam Rifle saina in Red Shield Peace Seminar neih in om.

* Vungzagin Valte MLA in The 1st Ngul Chin Lian Football Tournament hong.

* Dr.N Paulginthang in Medical Superintendent in Charge la.

* Tipaimukh Dam enkhe ding in Bangladesh apan Journalist team in Lamka hongpha ding.

* DC Lamka Office ah Lead Bank Scheme tawh kisai in Meeting om ding.

* Songtal khua ah 2 Days Teachers Orientation om ding.

* DC Lamka makaih in DLCC Meeting om ding.

* Singngat PHC ading vanzat hunkhop hongtung.

TUN TANCHIN KIMZAW IN :

BRGF 2010-2011 tungtawn a kibawl, New Bazar Super Market, tuni zinglam dak 8:00 in a honna neih in om hi. Hiai hun ah, Phungzathang Tonsing, Health and Family Welfare, GAD, CADA Minister in chief guest hihna toh uap in ahonna nei a, Jacintha Lazarus, IAS, Deputy Commissioner, Churachandpur leh, Langkhanpau Guite, Chairman ADCC in, Guest of Honour leh Functional President hihna toh uap uhi. Functional President, Langkhanpau Guite, Chairman, ADCC in a thugenna ah, New-Bazar Super Market  bawlkhe te tung ah kipah thupuang in Lamka khopi adia gou manpha tak hiding ahihdan gen hi.Huaiban ah, hiai super market a neitu tuam omlou ahihman in kuapeuh mah in mahni a bang a ngai a kep siangthou poimoh ding chi a, bazar sung a tutna munding a kihawm chiang a leng kuamah kisubuai lou ding in ngen hi. Guest of Honour,  Jacintha Lazarus, IAS, DC, Churachandpur in ahihleh, Lamka a hongtun akipan New-Bazar area a kongzing te kawchik leh namse lua ahihdan gen a, Market
 building bawl ding lungulhna lianpi nei a, Minister pa tawh pangkhawm a abawl uh hidan in gen hi. Huaiban ahbazaar buuk ding bawlzawh himahleh,lampi te kawchik petmah lai a,PWD ten a kinthei lam a panla a, a thoveng thei ding pen ngaihtuah ding in ngen hi.Huaiban ah lampi zul a dawr bawl peumah in bawl nawnlou ding inleng ngetna bawl ngal hi. Jacintha Lazarus, IAS, Deputy Commissioner, in agenzel dan in, BRGF tungtawn in, scheme neu chik chik kibawl sek a, himahleh churachandpur district ah hiai bang a scheme liantak a kibawl khiak churachanpdur mipi leh officer te kia hilou in Manipur chief secrtary inleng hoih sa mahmah in district dang ah leng bawlsawm ahihdan gen hi.Chief Guest, Phungzathang Tonsing,Health and Family Welfare GAD, CADA Minister in agenna ah Super Market bawlna ding in DC Churachandpur in theihtawp suah in panla a, ka ngaituah phaklouh District a dia thil thupitak a sepsuah ziak in pahtak thu ka puang chi hi. Lampi lam tawh kisai
 ahihleh District Council lam in a etkai uh deihhuai a sakthu gen hi.Huaiban ah, Churachandpur district sung ah tulel in TD Block 10 om a, huai teng ban ah, Lamka North, Lamka South leh Lanva TD block  hon thak ding in cabinet in namkipna bawlta chi a, TD Block Headquarter mun ding te, District adminstration in buaipih lel ahihdan gen in, New Bazar super market enkol ding in District council khut ah pekhia hi.

Zan nitak dak 11:30 vel in Lamka khopi sung leh a sehvel ah huihpi leh vuahpi kithuah in mun bangzahhiam tak nuai a, teenna inn hunkhop leh school kisia om zel hi. Ngathal a Siamsinpawlpi Residential School a nursery section te class room huihpi'n mut sia in, a inn baang leh langva te kikhen in mun gamla pipi ah kithehzak vek hi. Hiai school siatna tawh kisai in bialtu MDC, Sumlianthang in amun vapha a,hihthei bangmah nei kei mahleh, a kinthei bang pen a government lam a panpihna ngen ding ahihdan gen hi. Huaiban ah, Kawnpi Tangnuam khua ah tenna inn 10 mut sia in, huaite lak ah inn 6 te teeng theih nawnlouh ding khop in mutsia a, Kawnpi Tangnuam khawlai ah electric post 2 leng mut puk hi. Kawnpi Tangnuam khua a tenna inn kisia te, Lalringliana, Lalthutlunga, F.Rosanga, Vanlawma, Rothuama leh Tuithaphai Presbyterian biakinn chowkidar quarter te hi a, huai lou, tenna inndang 4 leng mut sia a, himahleh hiai inn 4 te bel teen theih laiding dinmun in om hi.
 Inn tampi a kisiat ban ah, Kawnpi Tangnuam khawtaw a  ZMB Brick-field leng mut sia a, brick field veng a om, Sapo Singh, 30 S/o (Late) Lala Singh of Kawnpi, a lu singzawl in deng liam a, damdaw inn ahdressing bawlsak in, a teenna inn ah ki enkol hi. Kawnpi Tangnuam a teenna inn huihpi mutsiat thutawh kisai in B.Zodingliana, MDC in a mun delh in, panpih theih dandan a panpih ding a mansa ahihdan gen in, Govt. apan panpihna a om bangbang delh ding ahihdan gen hi.Zan nitak a huihpi hattak in Lamka khopi sung leh a sehvel ah tenna in tamtak mutse ding in kigen a, Khamsuanlun Secretary ZYA general Headquater apan thu kiza dan in Sim veng thingkangphai area ah huihpi'n tenna inn 33 vel mutsia hidan in gen hi.

27 Sector Assam Rifle saina in tuni sunma dak 11 in Synod Hall, IB Road ah, Red Shield Peace Seminar neih in om hi. Hiai hun Major General Binoy Poonem, VSM, GOC, 57 Mountain Division Leimakhong in chief guest hihna toh uap hi. Hiai hun VS, Ranade, Commander, 27 Sector Assam Rifle, Jacintha Lazarus, IAS, Deputy Commissioner Churachandpur, Rev. M.Siema Raomei, MBC, Central Church Imphal, N.Iboton Sing, Dean Agriculture University, Imphal, Rajesh Hizam, Editor, Sangai Express  inleng uap uhi. Hiai hun ah, khopi sung a college tuam tuam apan student hunkhop in tel in Assam Rifle te'n galvan chi tuamtuam display bawl uhi.

K Ngulkhanthang leh a innkuan te sponsor na nuai a Churachandpur District Sports Association saina tuni sunnung dak 2:00 in Lamka Public Ground ah, the 1st Ngul Chin Lian District Football Tournament kipan hi. Hiai hun ah Vungzagin Valte, MLA, Thanlon in chief guest hihna toh uap in Tournament hong a, S Kamsuanlun, Executive member ADCC in functional president hihna toh uap hi. Tournament ah team 12 kimawl ding ua, Tournament ah champion team in, cash prize sing 5, Trophy leh citation sang ding a, Runners in sing 2 leh sang 5 leh Trophy sang in, Golden Boot ngah pen pen in sang 2 ngah ding hi. Tuni'a opening match ah Headquarter veng Youth Club leh Lamka Sports Club  kimawl uhi.

Dr N.Paulginthang, Dist Malaria officer in tuni sunnung dak 3:30 in Dr P.Nengzadou, Medical Superintendent Hospital akipan charge la a , Dr P.Nengzadou in Distirct Malaria officer hihna lending hi.

Tipaimukh Dam project toh kisai a thuthang tuamtuam a om ban ah Dam bang dinmun a om hiam chih enkhe ding in Bangladesh apan journalist team khat in Churachandpur district hongpha in, Tipaimukh Dam project a mun ah enkhe ding uhi. Official thusuak kimu dan in, Bangladesh apan Journalist mi 11 ban ah, Central government apan official bangzah hiam in,  hiai dam mun ding June 6, 2012 in hong enkhe ding  ua, Huai ding toh kisai in tuni'n Parbung SDO leh Parbung Police Station OC in Lamka nusia in Tipaimukh zuan uhi.

Zingchiang sunma dak 11:00 in DC office a BRGF Resource centre ah, Lead Bank scheme toh kisai in meeting om ding hi. Meeting  hun ah, bank branch tuam tuam a Manager, Executive Director DRDA, SDO/BDO teng, concern line department leh General Manager, RBI, Guwahati, Lead bank Manager, UBI Keishampat, Imphal te ban ah MLA leh MDC te leng telding uhi.

Zingchiang leh zinghal June 6, 2012 in Songtal Government High School ah, 10-Tuivai ADC constituency sung a teacher te ading in 2-day orientation training programme om ding hi. Huai hun ah, thupi tuam tuam pansan in, Tualkhanlal, Assistant Inspector of School, Thanlon, Vashti Kim leh Langkhanpau Guite Chairman ADCC in sinsak ding uhi.

Jacintha lazarus IAS DC churachandpur makaih in zingchiang sunnung dak 12:30  in DC office a BRGF resource centre ah District Level Co-ordination Committee Meeting omding hi. Huai hun ah SDO/BDO leh District Level Officer te telding ua, thu poimawh tuamtuam genkhawm ding uhi.

Phungzathang Tonsing Health and Family welfare Minister in apaisa May 26, 2012 a Singngat Primary health Centre a honkhiak nung in vanzat ding bangzah hiam hongtung khit nung in, tunai zek inleng vanzat honkhop hongtung beh hi.Medical department lam apan thu kiza dan in, hiai Primary Health Centre ading vanzat tuam tuam, damdawi leh matress bangzahhiam ban ah vanzat chi tuam tuam te, Imphal ah indent bawl in Singngat khua puaktung hita hi.