* Paite Customary Law Amendment tawh kisai in Workshop neih in om.
* Child Trafficking and Labour tawh kisai in District Level Consultation neih in om.
* Dr.J Suresh Babu IAS Principal Secretary Education in Rengkai Govt.Higher Secondary School, Felicitation Programme Chief Guest hihna tawh uap.
* Police te'n Bike gu mankhia in Court ah dingsak.
* District Malaria Department in DDT First Round kap lel.
* District Horticulture and Soil Conservation Office ah Nahtang nou deih te'n ngaihven theih.
* District Level Inter-School Subroto Mukherjee Football Tournament Closing Function om ding.

TUN TANCHIN KIMZAW IN :

Paite Tribe Council PTC Headquaters saina in tuni sunma dak 11:00 in PTC Head Office Conference Hall, Hiangtam Lamka ah Paite Customary Law Amendment tawh kisai in Workshop om hi. Hiai hun ah, Zomi Council Chairman LB Sona leng tel a, Customary Law tawh kisai a draft copy te enkhawm uhi.

Zomi Mothers Association ZMA Headquaters leh New-Life Foundation Bishenpur saina in tuni sunma dak 11:30 in New-Lamka Vengnuam a Only Grace Home ah One Day District Level Consultation on Child Trafficking and Labour at Churachandpur District om  hi.Hiai hun ah Ashim Ghosh Senior Manager Child Rights and You Kolkata, Arun Pande Director ARZ Foundation Goa leh Pradeep Kumar Singh, convenor, Child Welfare Committee Churachandpur in Child Trafficking leh Child Labour tawh kisai in sinsak  uhi.Huai hun ah ZSF, KSO, MPC Women Wing, Hmar women Association, PCI, EOC, Social Human Action for Rural Empowerment leh CBA saptuam makai te tel uhi.

Rengkai Higher Secondary School akipan Class X leh XII passed-te kipahpihna leh amaute adia thumsakna tuni sunma 11 in School campus ah nei uhi.Hiai ah Chief Guest in Dr J.Suresh Babu, IAS, Principal Secretary(Education)pang  a, Functional President in Jacintha Lazarus, IAS, DC/CCpur pang hi. Hiai hun ah Rev J. Lalremsiama, Manipur Area MPSC in hasotna thugen in lawhchinna ngah student te thumsak hi. Rengkai Govt. Higher secondary School ah tutung in student 87 in Class X exam ua, first division ah 12 pass in, second division ah 60 a pass ban uah third division ah mi 2 pass in pass percentage 35 tungzou hi. Huaiban ah, Class XII Arts leh Science ah student 85 exam in, first division ah mi 13; second division ah 47 leh third division ah 6 in lohchinna ngah ua, Arts ah pass percentage 91 tung in letter mark mu 12 om a, science ah pass percentage 46 tung in letter mark mu mi 9 om hi. Hiai hun a functional president  Jacintha Lazarus, IAS in a thugenna ah, Rengkai Govt. Higher Secondary School a semtu teacher leh staff te kithutuahna ziak a khangtou hi'n gen a, Churachandpur district sung a government school  omteng lak a hoihpen leh tulel in private school tamtak in hiai school paidan enton uh hidan in gen hi. Chief Guest Dr. Suresh Babu in a thugenna ah, Churachandpur ah education system chituam mahmah a, district dang a student te'n private school a delh souhsouh lai un, Churachandpur ah govt. school a kai muh ding hiaizah a om theih kipahhuai a sakthu gen hi. Huaiban ah, teacher-te qualify thei mahmah uh hi'n gen a Rengkai Govt. Higher Secondary School in hiai bang a lohchinna a ngah kipahpih thupuang a, etton thamching mahmah chi hi. Manipur ah bandh ziak in school kikhak gige mahleh khangthakte'n talent hoihtak nei in, civil society te'n student te khualna a siamsinna sukbuai louh a kithuahpih hoihzaw ding a chih ban ah, kum nawn a Rengkai Govt. Higher Secondary school in class X ahihkei leh class XII a top 10 a neih leh school principal S. Vanlalruala apension nung in service kum 2 behlapsak hiding in gen hi.

Apaisa May 29, 2012 nitaklam dak 4:30 vel in Light house lane ah guta kuate hiam in Robert Fima (30) s/o Sawma Fima of Light house lane zatlai Hero Honda MN-01R-7776 gukmang sak uhi. May 30, 2012 in gari neitu te'n Tuithapi khua ah gari mukhia in Police te'n gari gu Md Hussain (26) s/o Md Abdul Haque of Saiton mankhia in tuni'n Chief Judicial Magistrate court ah Md Hussain dinsak uhi.

District Malaria department in May 23, 2012 apan in mum tuamtuam ah DDT 1st Round kap uhi. Thanlon PHC huapsung ah Dailon PHSC nuai ah khua 9, sumtuk PHSC nuai ah khua 3 ah DDT kap uhi. Parbung CHC huapsung a Pherjawl PHSC nuai ah khua 4, ban ah Singngat PHC huapsung a Hiangmual PHSC nuai ah khua 6, Lungthul (E) PHSC nuai ah khua 4 ah DDT kapzou uhi. June khabul in Behiang PHC huapsung  a Hiangtam (K) PHSC nuai ah khua 30 leh Vangai area a Sibapurikhal PHC nuai a khua 4 ah DDT kapnawn ding uhi. Huai teng zawh in Patpuihmun PHC huapsung a Ngampabung PHSC nuai ah khua 6, Kangreng PHSC nuai ah khua 4 leh Kharkhuplien PHSC nuai a khua 4 ah DDT kap ding ua, huai teng zawh chiang in Churachandpur District ah DDT 1st round kapna zou ding uhi.

District Horticulture and Soil Conservation Office ah Nahtang nou tamlou hongtung a, a deih te'n akintheilam in K Ngulkhanthang District Officer Horticulture and Soil Conservation kiang ah Office hour sung in ngaihven theih ding hi.

District Youth Affairs and Sports Office Churachandpur saina in zingchiang sunnung dak 2 in Lamka Public ground ah District Level Inter-School Subroto Mukherjee Football Tournament Closing Function om ding hi. Hiai hun ah Langkhanpau Guite Chairman ADC Churachandpur pang ding a, Functional President in Henkholun Doungel District Youth Co-ordinator Nehru Yuva Kendra Churachandpur pang ding a, Guest of Honour in Lalvullien Joute President Churachandpur District Sports Association pang ding hi. Hiai hun ah Under 17 years Football Final match leh kipahman hawmkhiakna leng om ngal ding hi.

Zingchiang zinglam dak 7:30 in Pearsonmun ah aphamsa D Thangkhanmang, Zamngaihnem te Nupa leh D Vungliansang mualsuang honna om ding a, Pastor Dr.Hs Chinsuanthang in Mualsuang hong ding hi. Mualsuang honna neihzawh akipan sunma dak 11 sung in Pearsonmun a Kamsuan tenna inn ah Mualsuang honna annkuang kilui ding a, ngaina tu kuapeuh mah in hiai hunsung a annkuang umsak ding in D Ginkhotual leh Chonglut in chialna bawl uhi.