* Langkhanpau Guite Chairman ADCC in Music Video Album " Pa neiloute Pa " kichi hong.(vdo clip)

* Singngat SDO Office ah Old Age Pension Scheme tuamtuam kihawm.(vdo clip)

* Singngat khua ah Public Awareness tawh kithuah in Singngat Special Music Video Album honna neih in om.(vdo clip)

* DC Churachandpur in "Wino System" kichi Solar Energy zang a vanzat tuamtuam kizuakna hong.(vdo clip)

* Henjakai Khuga Dam ah kelum.

* Lamka Piblic Ground ah Independence Day Eve Celebration om ding.

* Ginsuanhau MLA in Singngat khua a Independence Day zatna Khuallian hihna tawh uap ding.

* DS Poonia IAS Chief Secretary in Lamka hongpha.

TANCHIN KIMZAW IN :

Thanlon Sub-Division sung Palkhuang khua a om S Gindal tanu Thianhoih in a sak Music Album " Pa neiloute Pa " kichi zan sunnung dak 2 in New-Lamka Gouchinkhup veng a CYA Hall ah, ahonna nei uhi. Hiai hun Langkhanpau Guite Chairman ADCC in Chief Guest hihna tawh uap in Music Album hong a, Rev. V Khamvum in Pathian kiang ah lan hi. Langkhanpau Guite Chairman ADCC in a thugenna ah hiai Music Video Album, Pa neilou te, Zi neilou te leh Nu neilou te adia kinepna tham ahihngei lam-et thugen in Music Video Album kichi te Nam adia gou ahihdan gen in hoihtak a kepbit poimoh chi hi. Paite te'n Laibu leh Music Album a neihtam ziak in Link Langguage ding a recommend a omkha ahihdan gen hi. Hiai hun H Jamkhanpau MDC Thanlon leh Lalmangpui MDC Parbung in Functional President leh Guest of Honour hihna tawh uap uhi. Hiai Music Album "Pa neiloute Pa' kichi ahihleh M Ginzapau MDC in a pianna nu aphamsa Donzangai theihgigena dia a bawlkhiak hidan in kigen hi.

Tuni sunma dak 11 in Singngat SDO Office ah Rachel N Guite SDO Singngat makaih in Pension Scheme tuamtuam September 2011 akipan February 2012 sung a ding hawm uhi. Manipur Old Age Pension Scheme ah mi 309 kiang ah, a sum in sang 1 chiat pia ua, Indira gandhi National Old Age Pension Scheme ah mi 927 kiang ah, a sum sang leh za 6 chiat pia uhi. Indira Gandhi National Widows Pension Scheme ah mi 63 kiang ah, a sum in za 8 chiat pia ua, Indira Gandhi National Disable Pension Scheme ah mi 4 ading a sum in za 6 chiat pia uhi.

Singngat Vision 2020 in tuni sunnung dak 1 in Singngat Community Hall ah Public Awareness tawh kithuah in Singngat Special Music Video Album honna nei uhi. Hiai hun ah Ginsuanhau MLA 60 Singngat Assembly Constituency in Chief Guest hihna tawh uap in Music Video Album honna nei hi. Aman a thugenna ah, amah tup-le-ngim te Singngat Vision 2020 te ngaihdan tawh a kibat ziak in kipahhuai a sak thugen a, Singngat min diktak Govt. record a Singhat kichi pen bawldik ding a Chief Minister kihoupih khin ahihdan gen a, Singngat Water Supply Scheme a lohchin theihna dia theihtawp suah ding ahihdan leh Hand Pump omsak na dia a kisaipih Minister houpih khin ahihdan gen a, Minister in thautui omlou chi mahleh aman thautui teng pawsuah ding ahihdan gen hi. September kha sung a hand pump koih zawh lam-et huai ahih thu leng gen a, Singngat khua Churachandpur District ban a Second town suahsak sawm ahihdan leh Model Town suahsak sawm ahihdan gen hi. Khawpi suahsakna ding in lampi a kisuktuah tam poimoh a, mipi'n theihsiam poimoh ding chi a, Govt. ah fund kiningching omlouh ziak in deih bang in naa kisem theilou chi'n leng genbeh a, Singngat SDO Office leh Staff Quarter leng bawl thak hiding chi a, Singngat Vision 2020 te tup-le-ngim te tu term sung ah 70 percent beh sepsuah sawm a panla ding ahihdan gen in mipi'n kithuahpih a, hon muanngam nak ua leh itna taktak tawh nasem ding ahihdan gen hi. Huaiban ah Singngat High School leng Higher Secondary School a upgrade ding a panla lel ahihdan gen a, Singngat Police Station leng puahphat hiding chi'n leng gen beh a, Singngat Vision 2020 te kithuahpihna in Sing 5 piak chiam hi. Hiai hun ah Functional President in Suanchinpau Guite MDC Lungthul pang a, Chief Host in P Sianzadong Chairman Finance Committee ADCC pang a, Guest of Honour in Rachel N Guite SDO Singngat pang in, Singngat Vision 2020 a Co-ordinator leh Consultant Vungzamuan IRS leh Vungzamawi Lecturer Churachandpur Govt. College in Singngat Vision 2020 tawh kituak in mipi theih dia poimoh te gen uhi.

Churachandpur District sung a masapen ding in Solar Energy tungtawn a innsung vanzat tuamtuam zuakna "Wino System" kichi tuni sunnung dak 2 in Tipaimukh road Hiangtam Lamka ah a honna nei uhi. Hiai hun ah Jacintha Lazarus IAS DC Churachandpur, Chief Guest apang in dawr thak hong a, Rev. K Kamchinkhup Director of Ministry EBC in pathian kiang ah lan hi. Hiai hun Kamsuanlun Executive Member ADCC in Chief Host hihna tawh uap in Maniram Sharma IAS Assistant Commissioner to DC tel in mi poimoh hunkhop in uap uhi.

Henjakai (21) S/o (Late) Otjathang of Suongpi Village, zan sunnung dak 3:30 in Khuga Dam a tui kichingna mun leh a thukna mun mahmah ah, a lawm te mi 7 vel ding tawh kisil lai tui ah kia in, theihtawp suah a zon ahihnung in tui sunnung dak 12:30 in a luang mukhe pan uhi. Tuni'n Kuki Khanglai Lompi leh Zomi Youth Association in Henjakai luang naktak in zong ua, Ginsuanhau MLA inleng amun vapha in Henjakai luang zong dia kisa Kuki Khanglai Lompi leh Zomi Youth Association te singpi dawnna ding in sang 5 pia a, huaiban ah a luang tuamna ding in puandum leng pia hi. Henjakai ahihleh VDF Reserve Line a sem hidan in kigen hi.

District Administration Churachandpur saina in August 14,2012 nitak dak 5:30 in Lamka Public Ground ah Independence Day Eve Celebration om ding hi. Hiai hun ah Fire Work, Light Show, Live Musical Performances, Hip-Hop Dance lakna om ding a, BSF te'n Cultural Dance lak ding ua, Assam Rifle te'n Dog Show neiding uhi.

Sub-Divisional Headquater teng a Independence Day zatding chih ahihtawh kiton in August 15,2012 zinglam dak 9 in Singngat Public Ground ah leng Sub-Divisional Officer makaih in Independence Day kizang ding hi. Hiai hun ah Ginsuanhau MLA 60 Singngat Assembly Constituency Chief Guest in pang ding a, Rachel N Guite SDO Singngat in National Flag kaipalh ding hi.

DS Poonia IAS Chief Secretary Govt. of Manipur in tuni'n Lamka hongpha a, Thingkangphai khua leh Azi te inn pha in sunnung in Imphal ah kiknawn hi.

Churachandpur Chemist and Druggist Association in August 15,2012 sun dak 12 in YMA Hall Hmuia Veng ah General Body Meeting tawh kithuah in Assembly neihsawm uhi. Hiai hun ah Association member peuhmah telding in theihsakna bawl uhi.

* CDSU in District Topper Award pekhia.

* Vanglian Jehova leh Nampi Mosi kichi Music Video Album honkhiak hita.

* Manipur Evangelical Lutheran Church in Gospel Tangkou Kum 25 chinna lawm.

* Churachandpur District Council Teachers Association in Emergency Assembly nei.

* Ginsuanhau MLA in Khuga Dam Right Side Canal kibawl thakna enkhia.

* T Manga Vaiphei MLA Henglep Assembly Constituency in Election lai a amah adia Anngawl a thumna neite pahtawina pia.

* A Nite With S Chingnu ading Laa teng teelkhit hita.

* Siamboi Guite Music Album "Suulkik Simthu" kichi honkhiak hita.

* Zomi Chief Assostion in General Meeting nei in 25 Percent thu tawh kisai in, akul-le-poimoh bang a gamtang ding in thupukna bawl.

* Langkhanpau Guite Chairman ADCC in "Pa neiloute Pa" kichi Music Album hong ding.

TANCHIN KIMZAW IN :

Churachandpur District Students Union (CDSU) in tuni zinglam dak 8 in CDSU Administrative Building New-Bazar Bus parking ah District Topper Award piakkhiakna nei uhi. Hiai hun ah CDSU Consultant H Doungel, Siamnunlian Valte leh Lalkhohao Chongloi President CDSU in District Topper Award pekhia in hasotna thugenna ua, Award sang Student ading in Rev. Henjalen Doungel Pastor KBC, B Vengnuam in vualzawlna ngetsak hi. Tutung a District Topper Award sang te ahihleh Class-X (HSLC/AISSE) ah Thengujam Chingkheinganba Singh S/o Thengujam Ibomcha Singh of Young Learners School leh A Gautam Singh S/o A Ranjeet Singh of St.Paul Institute in Award sang ua, Class XII (HSSLC) ah Niangthianmawi D/o L Ginzapau of Don Bosco Higher Secondary School, Chingmuankim D/o L Thangzagin of Don Bosco Higher Secondary School leh C Lalrinchhani D/o RR Chungnunga in Award sang ua, Class-XII (CBSE) ah Ravinder Kumar Shah S/o Anil Shah of JNV Tuinom leh Ruthy Nignneilam D/o Thongzalian of JNV Tuinom te'n Award sang uhi. CDSU in District Topper Award in Trophy, Citation leh Cash Award pia uhi.

Tuni sunma dak 11 in New-Lamka YPA hall ah Vanglian Jehova leh Nampi Mosi kichi Music Video Album honna leh Pathian kiang a latna nei uhi. Hiai hun ah K Guite Advisor Zomi Re-unification Organisation in Nampi Mosi kichi Music Video Album hong a, Rev. L Khamkholun General Secretary EBC in Vanglian Jehova kichi Music Video Album hong in Pathian kiang ah lan hi. Hiai hun ah Vungzamuan IRS, Chief Host in pang a, Ginsuanhau MLA, Vungzagin MLA, Langkhanpau Guite Chairman ADCC, M Gouzamang Executive Member ADCC leh LB Sona Chairman Zomi Council in Special Guest hihna tawh uap uhi. Ginsuanhau MLA in Music Video Album thak sang 5 in leisak a, Langkhanpau Guite ADCC in sang 3 leh cheng 10 in leisak a, Vungzagin Valte MLA in za 5 in leisak hi.

Manipur Evangelical Lutheran Church in saptuam sung kithuzak tuahna dia Gospel Tangkou kichi a patkhiak nung kum 25 chinna tuni sunma dak 11 in Zomi Colony a Manipur Evangelical Lutheran Church ah lawm uhi. Hiai hun ah Upa. V Lawmsang Deputy Moderator in thumna in hun hong a, Rev. Nengkhanlal Director of Missions in sunna hun makaih hi. Right Rev. Dr. Ginkhanmung Zou, Bishop in Gospel Tangkou special Issue hong in Pathian kiang ah lan a, Rev. Hangminthang Moderator in Pathian thutak gen hi. Hiai hun ah Gospel Tangkou a Patron Member te pahtawina in Memento pia uhi.

Churachandpur District Council Teachers Association in tuni sunma dak 11 in Synod Hall IB road ah Emergency Assembly nei uhi. Hiai hun ah D Letkholal Haokip President Churachandpur District Council Teachers Association in Presidential Speech pia in Association member aphamsa mi 4 te kiang a Death cum Gratuity sum lakh 2 chiat piak ahihdan leh Pension cum Gratuity sum lakh 1 chiat mi 6 kiang a piak ahihdan gen hi. Hiai Assembly sung ah Pending 6th Month Revision of Pay tungtang leh Pension Benefit scheme tawh kisai leh thu poimoh tuamtuam genkhawm in Member tamtak piakhawm ua, nitaklam in annekhawm uhi.

Khuga Dam Right Side Canal in a totkhak M Semuol leh Lahvom khua kikal a tuma deuh a Canal kichiam sia puahphatna ding in nasep kipanta a, tuni sunnung dak 2 in IFCD Minister leh O Ibobi Singh Chief Minister thupiak dungzui in Ginsuanhau MLA 60 Singngat Assembly Constituency in Canal kibawl thakna mun va enkhia hi. Huai mun ah Canal baang kichim se nawn ding dalna in Protection wall feet 120 a sau, feet 12 asang kibawl ding a, a nuailam feet 5 a sah in a tunglam feet 2 in sah ding hi. Ginsuanhau MLA in nipi kalkhat sung a bawlzawh ding chi mahleh vuahzuk ziak in nasep deih bang in paitheilou hi. Assistant Engineer Hanla Singh in tuni akipan ni 15 sung in kibawl zouding chi a, Canal bawlna mun ah Assistant Engineer, Section Officer Chinzasawm leh Contractor in ompih den ua, mi 24 in nasem uhi. Khuga Dam Canal kibawl thak ziak in Dam akipan Canal ah tui kikhah nawnlou in Canal ah tui tawm mahmah a, Canal sung a nga man nuam mi tam thei mahmah hi.

T Manga Vaiphei MLA Henglep and Chairman MTDC in tuni sunnung dak 2 amah tenna inn Red-Cross road ah Election lai amah adia sun-le-zan a anngawl a thumna nei nupi za 1 vel tawh kithuahkhawmna nei hi. Hiai hun ah T Manga Vaiphei MLA in amah dia anngawl khawksa lou a sun-le-zan a thumna neite tung ah kipah thugen in blanket leh water filter khat chiat pia in annekpih hi. T Manga Vaiphei MLA in tutung a pahtawina a piak te ahihleh Election lai akipan Result puankhiak ahihtan a amah tenna inn mun a, anngawl a thumna neite hidan in kigen hi.

Centre for Community Initiative malakna a Churachandpur Reporters Guild, Laijon Digest leh CT Lian Convenience Store pangkhawm a, The Malsawm Initiative Initiative a vualphalou naupang te panpihna dia August 31,2012, nitak dak 5 a New-Lamka YPA hall A Nite with S Chingnu kichi neihna ding tawh kisai in S Chingnu lasak ding deih te'n sang 3 tunglam in la khat teltheih ding kichi mahleh, S Chingnu lasak ding teng teelkhit hita hi. Hiai A nite with S Chingnu hun ah lasiam minthang Haumang, S Lalpu leh Muan Hangzou in special appearance neiding ua, kisakkhawlna pailel in musician te tawh practice neilel uhi. August 24,2012 tan in ticket kizuak ding a, ticket leikhin a mangsak kha te'n ticket number thei in ticket leina mun ah duplicate ticket laktheih ding hi.

Siamboi Guite in Music Video Album "Suulkik Simthu" kichi honkhiak hita a, Album sung ah lalui nalh taktak leh latual leng ngaihnop huai taktak tuang a, Copy deih te'n khopi sung a CD Library leh Cassettee zuakna tuamtuam ah muhtheih ding hi.

Zomi Chief Association in tuni sunma dak 11 in Zomi Council Office Nehru Marg ah General Meeting nei uhi. Hiai hun ah Khaw Hausa 150 val paikhawm in MGNREGS sepsuahna tawh kisai a MDC te'n 25 percent tung a thuneihna nei ding chih leh line department in 25 percent a lakding deihlou in, a kul-le-poimoh tang a gamtang ding in thupukna bawl uhi. Huaiban ah Khaw Hausa khat in sang 2 chiat a puaksuah ding inleng thupukna bawl uhi.

Thanlon Sub-Division sung Palkhuang khua a om S Gindal tanu Thianhoih in a sak Music Album " Pa neiloute Pa " kichi zingchiang sunnung dak 2 in New-Lamka Gouchinkhup veng a CYA Hall ah, ahonna om ding hi. Hiai hun Langkhanpau Guite Chairman ADCC in Chief Guest hihna tawh uap in Music Album hong ding a, Rev. V Khamvum in Pathian kiang ah landing hi. Hiai hun H Jamkhanpau MDC Thanlon leh Lalmangpui MDC Parbung in Functional President leh Guest of Honour hihna tawh uap ding uhi. Hiai Music Album "Pa neiloute Pa' kichi ahihleh M Ginzapau MDC in a pianna nu aphamsa Donzangai theihgigena dia a bawlkhiak hidan in kigen hi.

Singngat Vision 2020 in August 13,2012 sunma dak 11 in Singngat Community Hall ah Public Awareness tawh kithuah in Singngat Special Music Video Album honna neihsawm uhi. Hiai hun ah Ginsuanhau MLA 60 Singngat Assembly Constituency in Chief Guest hihna tawh uap in Music Video Album hong ding hi. Functional President in Suanchinpau Guite MDC Lungthul pang ding a, Chief Host in P Sianzadong Chairman Finance Committee ADCC pang ding a, Guest of Honour in Rachel N Guite SDO Singngat pang ding hi. Hiai hun ah Singngat Vision 2020 a Co-ordinator leh Consultant Vungzamuan IRS leh Vungzamawi Lecturer Churachandpur Govt. College in Singngat Vision 2020 tawh kituak in mipi theih dia poimoh te gending uhi.