* National Small Industries Corporation Limited Imphal West in Lamka ah Campaign tawh kithuah in Workshop nei.
* DRDA Official te'n MGNREGS tawh kisai in Meeting nei.
* Churachandpur District Council Teachers Association in Emergency Assembly neiding.
* Widows Welfare Association Asia makaih in Meithai leh Nupi te'n Lampi zui ding.
* Zomi Human Rights Foundation saina in World Indigenous Day kizang ding.
* Siamsinpawlpi General Headquaters in Workshop on Acting and Film Making neihsawm.
* Vanglian Jehova leh Nampi Mosi kichi Music Video Album honna om ding.
* Ginsuanhau MLA in Singngat Special Music Video Album hong ding.
* (Late) Khaikhanlian District First Division League zawh chiang in Second Division League kipan nawn ding.
TUN TANCIN KIMZAW IN :
National Small Industries Corporation Limited Imphal West saina in tuni sunma dak 11 in Headquater Veng a Lamka Press Club ah National Small Industries Corporation tawh kisai in Schedule Caste leh Schedule Tribe te ading in Campaign tawh kithuah in Workshop nei uhi. Hiai hun ah Chief Guest in G Hanghal General Manager District Industries Centre Churachandpur pang a, Functional President in Th. Thangzalian Editor Lamka Post and President Manipur Hill Journalist Union pang a Guest of Honour in T Loken Singh Vice-President Indian Council of Small Indistries, Kolkata pang a, Resource Person Y Raghumani Singh Project Manager District Industries Centre Imphal West leh Ng. Mani Rotan Singh Assistant Director Micro Small and Medium Industries Imphal in National Small Industries Corporation Limited nuai a scheme leh financial assistant tuamtuam omte sinsak uhi.
Tuni sunnung dak 1 in DC Churachandpur Office a BRGF Hall ah DRDA Official te'n Mahatma Gandhi NREGS tawh kisai in Meeting nei uhi. Hiai hun ah Block teng apan Project Officer, Assistant Project Officer, Assistant Engineer, Section Officer leh Village Level Worker te tel uhi.
Churachandpur District Council Teachers Association in August 11,2012 sun dak 12 in Synod Hall IB road ah Emergency Assembly neihsawm uhi. Hiai hun ah Hmangneikhum in thumna in Assembly hong ding a, Kamlalmuan in vaidawnna thugen in D Letkholal President Churachandpur District Council Teachers Association in thugenna hunzang ding hi. Hiai hun ah Churachandpur District Council Teachers Association member teng telding in chialna leh theihsakna bawl ua, Assembly neihzawh in annekhawm ngal ding uhi.
Widows Welfare Association Asia saina in Manipur a numei te muhsitna leh numei te tung a thangtatna doudalna in August 10,2012 sunma dak 10 in Protest Demonstration Against Discrimination, Subjugation and Exploitation of Women of Manipur kichi om ding hi. August 10,2012 sunma dak 10 in Lamka Public ground ah mipi kipunkhawm ding a, huia akipan mipi'n Mission road zui in Nehru Marg junction apan Tedim road zuisuk ding ua, 27 Sector Assam Rifle Headquater apan DC Office ah Memorandum peding uhi. Hiai lampi zuihna ah meithai leh nupi tunitan a BPL Card leh Job Card neinailou, Old Age Pension Scheme tuamtuam leh Disable Pension Scheme ban ah numei te tandia kilawm scheme tuamtuam munailou te'n ngai poimoh a telchiat ding in ngetna leh theihsakna bawl uhi.
Zomi Human Rights Foundation General Headquaters saina in zingchiang sunma dak 11 in Synod Hall IB road ah " Rumination for our land and natural resources" chih pansan in World Indigenous Day 2012 kizang ding hi. Hiai hun Phungzathang Tonsing Health and Family Welfare Minister, Dr. Chaltonlien Amo Chairman Hill Area Committee, TN Haokip MLA, T Manga Vaiphei MLA, Ginsuanhau MLA, Vungzagin MLA, Langkhanpau Guite Chairman ADCC leh LB Sona Chairman Zomi Council in uap in thugenna hunzang ding uhi. Hiai hun ah Traditional Parade leng om ding a, Chinlunthang Member Secretary Zomi Human Rights Foundation in tutung a thupi Rumunation for our land and natural resource chih pansan in thugen ding a, Suanmawi Guite Secretary General Zomi Human Rights Foundation in Activities report peding hi.
Siamsinpawlpi General Headquaters a Social-Culture, Publication and Media Department in August 17 leh 18,2012 in SSPP Complex Bungmual ah Lemchin leh Film bawldan kisinsakna "Workshop on Acting and Film Making" kichi saisawm uhi. Hiai hun ah Marathi Film tuamtuam a Actor leh Director minthang mahmah Alok Rajwade in limlak maituah dingdan, ngaihtuahna zang kawm a lemchin dingdan leh lemchinna a Director te theihtuak te ban ah kampau leh scrip gelh dingdan leh a sepsuah ding dan sinsak ding a, District sung a Film bawl lunglutmi leh Music Video Album tuamtuam bawl te leh lemching mite tel theih ding hi.
Vanglian Jehova leh Nampi Mosi kichi Music Video Album honna leh Pathian kiang a latna August 11,2012 sunma dak 11 in New-Lamka YPA Hall ah om ding hi. Hiai hun ah K Guite Advisor Zomi Re-unification Organisation in Nampi Mosi kichi Music Video Album hong ding a, Rev. L Khamkholun General Secretary EBC in Vanglian Jehova kichi Music Video Album hong in Pathian kiang ah landing hi. Hiai hun ah Vungzamuan IRS, Chief Host in pang ding a, Ginsuanhau MLA, Vungzagin MLA, Langkhanpau Guite Chairman ADCC, M Gouzamang Executive Member ADCC leh LB Sona Chairman Zomi Council in Special Guest hihna tawh uap ding uhi.
Singngat Vision 2020 in August 13,2012 sunma dak 11 in Singngat Community Hall ah Public Awareness tawh kithuah in Singngat Special Music Video Album honna neihsawm uhi. Hiai hun ah Ginsuanhau MLA 60 Singngat Assembly Constituency in Chief Guest hihna tawh uap in Music Video Album hong ding hi. Functional President in Suanchinpau Guite MDC Lungthul pang ding a, Chief Host in P Sianzadong Chairman Finance Committee ADCC pang ding a, Guest of Honour in Rachel N Guite SDO Singngat pang ding hi. Hiai hun ah Singngat Vision 2020 a Co-ordinator leh Consultant Vungzamuan IRS leh Vungzamawi Lecturer Churachandpur Govt. College in Singngat Vision 2020 tawh kituak in mipi theih dia poimoh te gending uhi.
Churachandpur District Sports Association saina in Lamka Public Ground ah (Late) Khaikhanlian District First Division League pailel a, hiai tournament zawh ahihchiang in Second Division League 2012 September 1,2012 in kipan nawn ding hi. Hiai ding tawh kisai in District sung a Second Division Club te'n CDSA Office Hiangtam Lamka ah zinglam dak 7 akipan zinglam dak 9 sung in thuchian kantheih ding hi.
.