* Lamka Public Ground ah Independence Day thupitak in kizang.(watch vdo clip include)

* EBC Lamka North Division in Mission Joint Prayer Fellowship-Cum-Annual Planning Conference nei.(watch vdo clip include)

* District Transport Office kong Tedim Road ah Truck in Electric Post phutan.(watch vdo clip include)

* 46 Assam Rifle pawl in Kidnaped a om hunkhia in KNO Cadre 2 mankhia.

* Sum Demand tamluat ziak in ALTOS pawl in Sit-in-Protest nei in Tata Winger Service louding.

* Manipur University nuai ah Rayburn College in Permanent Affiliation ngah in Honour Course 5 leng neiding.

* SA Road leh Tedim Road Junction ah Automatic Solar Street Light System a kizang Solar Plate ki-gumang, Lamka Sports Club in mohpaih thupuang.

* Siamsinpawlpi General Headquaters in Workshop on Acting and Film Making a neih hunding kisuan.

* Ginsuanhau MLA in Lamzang ZYA Unit hong.

* (Late) Khaikhanlian First Division Football League 2012 Closing Ceremony om ding.

* Hornbill Show Room Mission Road ah Khakhat sung in Electrolux leh Sony Company Product 5 to 10 Percent Discount in kizuak ding.(watch vdo clip include)

TANCHIN KIMZAW IN :

District Administration Churachandpur makaih in zan zinglam dak 9 in Lamka Public Ground ah Independence Day lopna thupitak in om hi. Hiai ah Jacintha Lazarus IAS DC Churachandpur khuallian apang in National flag kaipalh in Parade Contingent te apan salute la hi. Parade Commander David Piaklian, MPS SDPO Churachandpur in parade contingent 55 te makaih hi. DC Churachandpur in thugenna aneih zawh in flagship programme tuamtuam te department bangzah hiam in display bawl uhi. Hiai hun ah Musical performance leh STC/BSF te apan exercise lakdan tuamtuam lahna om a, cultural performance hun ah India gamsung a state teng a traditional dress a kizem in mi tamtak in show nei ua, Churachandpur district sung a nam tuamtuam te traditional dress a kizem in naupang te'n parade nei uhi. Govt. Department tuamtuam in stall abawl uh leng DC Churahandpur in enkhia hi. Huai teng zawh in kipahman leh Award tuamtuam hawmna in zui hi. Huai teng zawh in DC eleven team leh Public Leader te football kimawl ua, DC eleven team in zou uhi. Parade kidemna ah NCC team ah Bethany Christian High School Junior Wing in 1st la a, Rayburn High School Junior Wing in nihna la in Rayburn Senior Division in thumna la uhi. Boys group ah AG High School in 1st la a, Ebenezar Academy in nihna leh Donbosco Higher Secondary School in thumna la uhi. Girls group ah St Mary High School in 1st la a, Donboco Higher Secondary School in nihna leh Savior Public school in thumna la uhi. Stall bawl kidemna ah Sericulture Department in khatna la in, SGSY in nihna leh District Council in thumna la uhi. Tableau competition ah PMGSY in khatna la in DRDA in nihna leh Horticulture and Soil Conservation in thumna la uhi.

Evangelical Baptist Convention (EBC) Lamka North Division in tuni sunma dak 10:00 akipan Bethel Baptist Church, Lailam Veng ah "Nungzuite Bawl un" chih thupi a zang in Mission Joint Prayer Fellowship cum Annual Planning Conference nei uhi. Hiai hun ah S.Vungminthang, Director of Missions, EBC in Pathian thugen a, EBC Lamka North Division sung a khawchih apan Tualsung Missions Committee member-te tel uhi.

District Transport Office lutna, Tedim road a Circuit house naih lampang Gate mai ah tuni sunnung dak 2:00 vel in Truck MN-01-4804 siklawng pua a Lamka apan Imphal lamzuan a tailai in Activa gari apelh nalam ah electrict post phutan hi. Kuamah a liam omkei mahleh gari mailam naksiat sim mahmah hi. Truck driver pa gendan in Activa gari pellou a phukha hileh activa gari segawp in Activa a tuang te leng si thei hidan in gen a, huai pumpelh na dia electrict post bawh hi'n leng gen hi.Hiai thiltung zawh nung minutes 20 vel paipan in Distrct Transports Office main gate mai ah Yamaha RX-100 MN 01B-6784 leh Yamaha RX-100 mah MN-02-8294 kihetkha in, MN 01B-6784 a tuang pen lampi lai ah kipuak a, Maruti Alto Car MN 02A-5786 toutai in bike accident pe'n hetkha nawn a, bangtanhiam khua phawklou in om a, akiang nai a om mipi te'n tuibuak in honghalh khethei hi. Aliamna ma muhding omkei mahleh District Hospital ah check-up ding in pua ua, a Bike leng kise zek hi.

Police thusuah kingah dan in KNO Cadre 2 in PULF Cadre khat Govt. khut a ki-surrendered sa Cadre number 381 Md. Atajuddin @ Manoj S/o Md. Abdul Helin of Kwakta Ward number 2 kipnap in, a innkuanpih te kiang ah sum a tankhe ding leh thah ding tanpha in vauna bawl ua, hiai thu 46 Assam Rifle pawl in theikhia in August 14,2012 zinglam dak 8:30 vel in Bijang area a gamlak ah KNO Cadre 2 in Md. Atajuddin a tonpih lai uh tuakkha in hunkhia ua, a innkuanpih te kiang ah pekhia in KNO Cadre leng manngal uhi. KNO Cadre 2 te ahihleh Lunkhosei Touthang (39) s/o (late) Hemthong Touthang of Bijang leh Th Haokip @ Alen (33) s/o Tongjam Haokip of D.Phailian hi ua, amau taksa tung apan 9mm Pistol 1 atang 8 leh Magazine 1 mukhia in Imphal Police te khut ah pekhia uhi. Imphal Police te' khut apan Churachandpur Police te'n case lasawn in Chief Judicial Magistrate (CJM) mai ah dingsak ua, CJM in August 18, 2012 tan Police custody a omding in thupia a Police te'n hiai thil tung tawh kisai in FIR chiamteh uhi.

Kum bangzah hiam paisa apan Churachandpur leh Imphal kikal a passenger pua a taituah Tata Winger Service pawl, All Lamka Taxi Owners’ Society (ALTOS) te lak ah tulai in galvantawi pawl tuamtuam apan sum demand amuh uh lungkimlouh etsakna in Tuibuong Peace Ground ah zingchiang sunma dak 11:00 apan sunnung dak 3:00 sung in sit-in protest neiding uhi. Hiai ding ziak in ALTOS pawl in zingchiang in Tata Winger service lou ding uhi.

Manipur University College Development Council nuai a Inspection team in Rayburn College bangzahvei hiam a etkhiak nung a report dungzui in Manipur University Vice-Chancellor in Rayburn College Permanent Affiliation ding in pomsak hi. Huaiban ah Rayburn College in Political Science leh History Honours Course a neih ban ah Academic Session 2012-2013 akipan English, Geography leh Sociology, Honours Course neiding in phalsak a, Honours Course thum honbehna ding in Dr. RK Ranjan Singh Director Incharge in Sum sang 9 deposit ding in Rayburn College Principal theisak ngal hi.

Jacintha Lazarus IAS DC Churachandpur leh S Kamsuanlun Executive Member ADCC panlakna nuai a, Lamka Sports Club in Lamka khopi sung mun bangzahhiam a, Automatic Solar Street Light System a thuah nung un SA Road leh Tedim road junction a kikoih pen a Solar Plate kigumang a, hiai thiltung Lamka Sports Club in mohpaih thupuang in, a gutu in ni 2 sung a koihkik ding in L Paukhanthang President Lamka Sports Club in theisak hi.

Siamsinpawlpi General Headquaters a Social-Culture, Publication and Media Department in August 17 leh 18,2012 in SSPP Complex Bungmual ah Lemchin leh Film bawldan kisinsakna "Workshop on Acting and Film Making" kichi neihsawm mahle uh, Resource Person ding Marathi Film Actor and Director Alok Rajwade in lemtanglouhna khenkhat a neih ziak in August 20 leh 21,2012 a neih ding in a hunsuan thak uhi.

Zomi Youth Association (ZYA) General Headquater makaih in tuni sunma dak 10 in Lamzang khaw hausa Pa tenna inn ah Lamzang ZYA Unit honna om hi. Hiai hun ah Ginsuanhau MLA 60 Singngat Assembly Constituency, Chief Guest apang in ZYA Lamzang Unit honna nei hi. Functional President in Langkhanpau Guite Chairman ADCC pang a, S Kamsuanlun Executive Member ADCC, Chief Host in pang a, Tongkai Baite MDC, Guest of Honour in pang hi. Huaiban ah District Council Executive Member leh MDC teng Special invitees hi uhi.

Churachandpur District Sports Association (CDSA) saina in August 18,2012 sunnung dak 2 in Lamka Public Ground ah (Late) Khaikhanlian First Division Football League 2012 Closing Ceremony om ding hi. Hiai hun ah Helien Kipgen Social Worker, Chief Guest in pang ding a, Guest of Honour in Kelvin Hatlang, Social Worker pang ding a, Functional President in L Sanga Hmar, Social Worker pang ding hi. Closing Match ah New-Lamka Youth Club leh Zomi Football Club kimawl ding uhi.

Mission Road leh Vengnuam Junction ah August 17,2012 zingkal in Hornbill Show Room honna zingchiang dak 7 in mission road ah om ding hi. Hornbill Show Room ah Company muanhuai mahmah Electrolux leh Sony innsung van leh Electronic Device tuamtuam kizuak ding a, August 17,2012 kipan khakhat sung in product te 5 to 10 percent Discount in van kizuak ding hi.