* World Indigenous Day kizatna ah Churachandpur District sung a MLA 6 kuamah kilang omlou.

* MC Mary Kom kimawlna ennuam hidia gintak pawl khat in Electricity Deparment Office hihsia. Office Staff te'n Dharna neih sawm.

* Langkhanpau Guite Chairman ADCC in Media te kimuhpih in MC Mary Kom vaidawn dingdan genpih.

* Janma Asthami himahleh Churachandpur ah Govt. Office te Suty louding.

* CDSU in District Topper Award pekhe ding.

* Saptuam makai te ading in Climate Change and Global Warming tawh kisai in Consultation om ding.

TANCHIN KIMZAW IN :

Zomi Human Rights Foundation General Headquaters saina in tuni sunma dak 11 in Synod Hall IB road ah " Rumination for our land and natural resources" chih pansan in World Indigenous Day 2012 kizang hi. Hiai hun Churachandpur district sung a MLA Phungzathang Tonsing Health and Family Welfare Minister, Dr. Chaltonlien Amo Chairman Hill Area Committee, TN Haokip MLA, T Manga Vaiphei MLA, Ginsuanhau MLA leh Vungzagin MLA in uap a thugenna hunzang ding chih himahleh kuamah kilanglou uhi. Langkhanpau Guite Chairman ADCC in a thugenna ah Zomi Human Rights Foundation panlakna tugn ah kipah thugen in Manipur State Govt. leh Jubilant Oil and Natural Gas Privet Limited in tualsuak mite theihpihlouh a Thanlon, Henglep leh Tipaimukh Bial sung a thautui zonna neih ding in Memorandum of Understanding MOU suai a kaih uh, Autonomous District Council Executive Meeting in doudal ding a thupukna la ahihdan gen a, tualsuak mite gamsung ah thautui laksuah hileh tualsuak mite hamphatna ding gentham omlou in gam-le-leitang tamtak kiman suah ding a, sing-le-lou gentaklouh in tuisiang dawn ding nasan vang mahmah ding chi hi. Aban agenzelna ah Govt. thupiak dungzui a MGNREGS tawh kisai a MDC te'n 25 percent ah thuneihna neiding kichi tungtang Hausa tamzaw in theisiamlou chi a, hiai tungtang ah thangpaihpan mailou a tutkhawm a genkhawm poimoh ahihdan gen hi. Huaiban ah Singtangmi Numei Olympic a telban a Bronze Medal tanpha honla Churachandpur District mi MC Mary Kom pahtawina hun lemtang masapen ah District Council makaih in neih hiding chi hi. K Guite Advisor Zomi Re-Unification Organisation in a thugenna ah Singtangmite gam kinei mahleh gam tung ah thuneihna kineilou a, Rights a kigen chiang in a theory kia in kinei a, a tak in kitangkha ngeilou chi hi. Thanlon, Tipaimukh leh Henglep Bial sung a, thautui laksuah ding tungtang ah Company tawh kilemna bawl a MOu a suaikai ding in ei a tualsuak te hong kidonglou in Manipur Govt. in tualsuakmite theihpihna tellou in tualsuakmite gam ana pekhia chi hi. Singtangmi te'n I gam tung a thuneihna I neih theihna ding ngaituah hun mahmah ta chi'n leng genbeh a, thautui laksuah sawm a Jubilant Oil Company te hongkuan uleh gamsung himhim lutsaklouh ding leh suang a deng thei te'n deng a, singkhuah thawh pang thei te pang a, khetzak ding ahi chi hi. Hiai hun ah tualsuakmi nam tuamtuam te'n Traditional Parade nei in, Chinlunthang Member Secretary Zomi Human Rights Foundation in tutung a thupi Rumunation for our land and natural resource chih pansan in thugen a, Zomi sung a tribe leader, student leader, social worker leh MDC ban ah mi poimoh hunkhop tel uhi.

Zan nitak dak 6 vel a MC Mary Kom Boxing kisukna TV a suahlai a Electric vaklouh ziak a thangpai pawl hidia gintak te'n Bijang a Electricity Department Office kongkhak khensia in Office sung a Table leh Chair ban ah Almirah hunkhop hihsia uhi. Kongkhak teng kisia in tukvelh glass teng leng kisia a, Executive Engineer Office Chamber  sung a table leng kisia in file poimoh om teng leng kipaihthang vek hi. Hiai thil tung tawh kisai in Tunzalian Executive Engineer Electricity Department Churachandpur in Police ah Complain thehlut hi. Hiai thutawh kisai mah in tuni sun dak 12 in Electricity Department Churachandpur in Meeting nei ua, huai ah thil tung mohpaihna in zingchiang a Lamka Police Station kong a Dharna tut ding in thupuk uhi. Tunzalian Executive Engineer in a gendan in MC Mary Kom kimawlna Tv a suah sung Electric meivak vaksak sawm a theihtawp suah a apnla ahihdan gen a, Meivak theihna dia Khengzang Power Station leh Superintending Engineer tanpha leng houpih mahleh lohsam ahihdan gen a, Electricity Department Office Power pekhetu hilou in Administrator ahi ua, Power pekhe te Power Station a Controller te ahi uh chi hi.

Langkhanpau Guite Chairman ADCC in tuni sunnung dak 3 in amah Office Chamber ah Media te kimuhpih in tulai a thubuaihuai mahmah Thanlon, Henglep leh Tipiamukh Bial sung a thautui laksuah ding tungtang leh MGNREGS tawh kisai a MDc te'n 25 percent tung ah thuneihna neiding chih tungtang a hausa te theihsiamlouh dan leh hunlemtang masapen a London Olympic a Bronze Medalist MC Mary Kom vaidawnna neihding tungtang genpih hi. Thanglon, Henglep leh Tipaimukh Bial mun 17 ah thautui laksuah hileh singtangmite'n churachandpur district sung seh 6 suah seh khat mansuah ding a, thautui laksuah hileh sing-le-lou tamtak leh tuisiangthou taksapna liantak tung ding chi a, hiai tungtang ah Manipur Govt. in Hill Area Committee leh District Council Member te nasan leng theisaklou in thautui zonna ding in phalna pia a, MLA te'n phalmah le uh, Singtangmite manna ding MDC te'n kideihlou chi hi. Huaiban ah hiai tungtang Govt. bangchi leh theihsiamsak theih ding hiam chih kingaituah lel chi'n leng genbeh hi. Huaiban ah MGNREGS tawh kisai a 25 percent thubuai tungtang leng hausa te'n a theihsiam uh poimoh chi a, hiai tungtang zingchiang sunma dak 11:30 in District Council Office ah hausa te tawh kigenkhawm ding chi hi. Aban a genzelna ah khentuam omlou a, aneu-alian in MC Mary Kom a pahtawi theihna ding lampi kingaihtuah lel in, hun lemtang masapen ah MC Mary Kom Home Coming Reception Programme sai hiding chi a, MC Mary Kom vualzawhna tung ah Pathian kiang a kipah thugenna tawh Programme kithuah ding a, MC Mary Kom pahtawina penuam leh thugenna zang nuam Tribe Leader, Student Leader, Philantrophic Organisation leh mimal khat peuh in District Council Office ahihkei leh MDC khat peuh kiang ah min piaklut theih ding chi a, mikhat tung ah thugenna hun a sawtpen in minute 5 kipe ding chi'n leng genbeh hi.

Zingchiang Janma Asthami ahihziak in Govt. Office teng suty ding chih himahleh Churachandpur District ah bel Govt. Office leh Institution te suty louding uhi.

Churachandpur District Students Union (CDSU) in August 11,2012 zinglam dak 8 in New-Bazar Bus Parking a CDSU Administrative Building ah District Topper Award 2012 piakkhiakna neihsawm uhi. HSLC ah Student 2 in Award sang ding ua, HSSLC ah Student 3 leh Class-XII (CBSE) ah Student 2 in District Topper Award sang ding uhi.

Network of Manipur Volunteer Organisation sponsor na nuai a Joint Action for Relief and Development Association saina in August 13,2012 sunma dak 10 in Synod Hall IB road ah Church Leaders Consultation on Climate Change and Global Warming om ding hi. Hiai hun ah Rev. L Simon Raomai Pastor MBCCC, Rev.Timothy Phoumei Pastor RNBA leh OJ Meetei Freelance Consultant te panelist in pang ding uhi