* Oinam Kumar Singh in a Tanu kum 14 miding pawngsual in Police in man.

* Widows Welfare Association makaih in Meithai leh hamphatna ngahlou nupi tamtak in lampi zui.

* Electricity Department in Sit-in-Protest nei.

* Langkhanpau Guite Chairman ADCC in Khaw Hausa khenkhat kimuhpih.

* Singzawl a om 29 Assam Rifle pawl in Burma mi 3 tawh No.4 mankhawm in Police khut ah pekhia.

* Tutung Independence Day ah Parade Contingent 54 phading.

* August 13 leh 15,2012 in PTC General Headquater Office kikhak ding.

* Hornbill Cable Network in Electrolux Show Room hong ding.

TANCHIN KIMZAW IN :

Tuni sunma dak 10:30 vel in Lamka Police te'n Oinam Kumar Singh (38) S/o Chaoba of Khumujamba, tulel a Tuibuang Meitei leikai a om mankhia uhi. Oinam kumar Singh in a tanu, a pawngsual ziak hidan in kigen hi. Oinam kumar in zi 2 nei a, a zi masa toh tanu 2 leh tapa 2 nei in, a zi thak tawh bel ta neinai lou uh hidan in kigen hi. Oinam kumar in a zi masa tawh hoihtak a kikhen bawllou a zi dang a neih ziak in Khumujamba apan khaw sung mipi'n a hawl khia uh hidan inleng gen uhi. Tulel a, a omna mun Tuibuang Meitei leikai ah kha 4 vel om pan ua, Oinam Kumar in ahihleh kha khat sung in a tanu 3 vei pawng sual a, a 3vei na zan nitak in a tanu in thuakzou nawn lou in Tuibuang Area Youth Club te kiang a apa gamtat dan gen a man dia ngetna a bawl dungzui in Tuibuang Area Youth Club te'n man in police te kiang ah pekhia uhi. Mat a om Oinam kumar ahihleh mipi'n vuaklum sawm mahle uh police te vatung man uh hidan in gen uhi. Sual a om, Oinam Kumar tanu ahihleh tulel in goverenment high school ah class VI simlel a kum 14 vel ding mi hidan in gen a, Oinam Kumar leh a tanu ahihleh tuni mah in Imphal ah medical examination bawl ding in Police te'n pawsuk uhi.

Widows Welfare Association Asia saina in Manipur a numei te muhsitna leh numei te tung a thangtatna doudalna in tuni sunma dak 11 in Protest Demonstration Against Discrimination, Subjugation and Exploitation of Women of Manipur kichi nei uhi. Lamka Public ground ah mipi kipunkhawm in, huai akipan mipi'n lampi zui a DC Churachandpur kiang a memorandum piak ding chih himahleh DC Churachandpur in pitek taksa a leng paizou dia kilawmlou tamtak om te amuh ziak in Lamka Public Ground ah Memorandum vasang a, Govt. scheme tuamtuam ngahlou pitek putek tamtak in DC nu tung ah kipah thugen uhi. Memorandum in Chief Minister kiang ah ngetna bawl a, BPL Card a neidia kilawm te piak ding, Widow Pension Scheme leng a mudia kilawm meithai teng piak ding leh Job Card leh Old Age Pension Card neilou teng piak ding, Churachandpur District sung a numei te haksatna leh buaina te enkai dia Committee khat dinkhiak ding, niteng nektawm zong numei te zalentak a, khawsak theihna dia dan leh thupiak enkai tute sukhat ding, Meithai leh khawsak haksa nupi te adia Churachandpur District sung a Fair Price Shop honkhiak ding, Widow pension scheme leng za 2 akipan sang 1 a khansak ding leh numei te pawngsualna leh thahna tawh kisai a beitheihna dia panla ding in ngetna bawl uhi. DC Churachandpur in memorandum sang kawm a, thugenna ah kei leng numei ka hih dungzui in ka numei pihte haksatna ka theisiam mahmah a, ka hih theihna tan in pan kala ding chi hi. BPL Card tawh kisai ahihleh tulai in Socio-Economic Census ki-kaikhawm lel a, huai apan in bawl dik theih ding chi a, pension scheme te ahihleh september kha in ki-en thak ding chi hi. Hiai hun ah BPL Card leh Job Card neinailou, Old Age Pension Scheme tuamtuam leh Disable Pension Scheme ban ah numei te tandia kilawm scheme tuamtuam munailou tamtak paikhawm in Lamka Public ground akipan Zenhang Bazar tan lampi zui uhi. Joint Memorandum ah Widows Welfare Association Asia, Churachandpur Joint Women Organisation, Zomi Mothers Association, Mizo People Convention, Ima Leimarel Apunba Lup leh Kuki Womens Union makai te'n suaikai uhi.

Apaisa August 8 nitak a London Olympic 2012 a Mary Kom kimawl hun a electric vaklouh ziak a thangpai pawl khat hidia gintak te'n Bijang a Electricity Department Office a hihsiat uh mohpaihna in tuni'n Churachandpur Electricity Employees Union makaih in Electricity Office ah Sit-in-protest nei uhi.Tunzalian Executive Engineer Electricity Department Churachandpur in agendan in, Mary kom kimawl ni load shedding himahleh, light vak sak sawm in ngetna tamvei tak kibawl mahleh kilohsam chi hi. Hiai thu tawh kisai in DC Churachandpur kiang ah Memorandum pia ua, Police ah leng Complain bawlkhin uhi.

Tuni sunma dak 11:00 in Langkhanpau Guite Chairman ADCC in District sung a khaw hausa tuamtuam te meeting neihpih in, government order dungzui a MGNREGS sepsuahna ding tawh kisai a MDC te'n 25 percent tung a thuneihna nei a proposal bawl thei ding chih tungtang genkhawm uhi. Meeting na tawh kisai a Chairman pu apan thu kiza dan in, apaisa September 14, 2009 in Dr. Sushel Akhtar Commissioner RD and PR Govt. of Manipur in Order suah a, MGNREGS sepsuahna tawh kisai a MDC te'n 25 percent tung a thuneihna nei a work proposal bawl thei ding chih chiangtak in taklang a, hiai pen hausa lam te'n thei siamlou chi hi. Aban agenzelna ah MDC te'n work proposal bawl thei ding ua, himahleh a sepsuahna lam ,hausa te khut ah kinga veve ding chi a, Govt. Order ahih dungzui in United Chief Committee in doudal a sawm leh District Council Member te mohsa mailou a, State Govt. kiang a, Order zukkik theih dingdan kikupkhawm poimoh zaw chi hi. Khantouhna ding toh kisai a theihsiamlouh om te hausa te kia hilou a District Council member te toh hoihtak a genkhawm uthuai asak thu leng gen hi. Langkhanpau Guite Chairman ADCC in a genzel dan in, United Chief Committee in hiai thu Court ah beih sawm a, ngetna tanpha a piaklut un omzia neilou ding a, Court in, a Case pending a, a koih leh MGNREGS nasepna paizom theilou ding a, a thuak ding mipi te mah hikha ding ahi chi hi. Genkhawm a veng thei ding tamtak om a, thuchiang theiloupi a kholak houlimna leh Hotel houlimna te gingta mailou ding in ngetna bawl ngal hi. Huaiban ah United Chief Committee in August 16 leh 17, 2012 vel a Bandh bawl ding a thupukna a bawl uh, paisuak pihding a chih ua leh mipi subuailou theitawp dia hihding in ngetna leng bawl ngal hi. United Chief Committee in Court a beih a sawm uh mipi adia phatuam ding ahihleh MDC te'n dallou ding ahihdan gen a, khantouhna dia tutkhawm a genkhawm zel poimoh ahihdan gen hi. Tuni Meeting ah thupukna bangmah lak omlou in suai ki-kaihsak chih te leng omlou in houlimna dan in pai a, hausa te'n leng theihsiamlouh te dong in Mannuamching Chief Executive Officer leh Executive Member ADCC te'n hilhchetna bawl zel uhi.

Apaisa August 7 2012, nitak dak 5:30 vel in Sinzawl khua a om 39 Assam Rifle pawl in Khuanggin khua ah Burma mi Nengliankham (46) S/o (Late) Pumkap of Tedim, Z.Gouzang (36) S/o (Late) Lianthang of Tedim leh N.Ginlian (30) S/o Vajong of Tedim Burma te man in amau apan khamtheih No. 4 gram 700 mukhia uhi. Mat a om mi 3 te, Assam Rifle pawl in tun'in Police te khut ah pekhia ua, police in a tung uah FIR N. 6(8)2012 Tln PS U/S 14 Foreigner Act & 21 ND & PS Act tungtawn in thubuai chiam teh uhi. Mat a om mi 3 te gendan in, amau Tedim apan Tongchiin khua a sing-aat ding a kuan, mikhat in, sang 1 chiat loh ding a, No. 4 te Khuanggin tan pawdia a sawl hidan in gen uhi.

District Administration makaih a August 15, 2012 a Lamka Public ground a Indian Independence Day lopna ding tawh kisai in tuni zinglam dak 7:00 in rehearsal nei uhi. Tutung in parade contengent 54 om ding a, Parade Commander in David Piaklian, MPS SDPO Churachandpur hiding hi.

Paite Tribe Council General Headquater Office niteng in kihong gige mahleh August 13, 2012 Patriots Day leh August 15,2012 Independence Day ahihziak in hiai ni 2 in Office suty ding hi.

Hornbill Cable Network in Mission road ah tutung sawtlou in Electrolux Show room thak hong ding, Electrolux company hoih leh muanhuai mahmah in innsung vanzat tuamtuam refrigerator, washing machine leh innsung vanzat tamtak hong koihta uhi. Company muanhuai leh vanzat hoih deih te'n tutung sawtlou in naih theihpah ding hi.